Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Bhaibheri Riciri Kucinja Upenyu Hwenyu Here?

Bhaibheri Riciri Kucinja Upenyu Hwenyu Here?

“Phindukanyi, mecitenderuja mirangariro yenyu.”—ROM. 12:2.

NDUMBO: 61, 52

1-3. (a) I cinjo japi jinganesa kuita pasure po kubhabhatijwa? (b) Apo kuita cinjo kukava kwecitinesera, mubvunjo japi jatingaita? (Vonanyi pikica yo kutanga.)

PAAKAZIVA cokwadi, Khevhini [1] aacaidazve cimweni kusiapo kuva no ushwari hwo phedo na Jehovha. Asi, ko makore akawanda, iyena wainga mundhu waitamba cabutha, waibhema, waidhakwa, zve waishandisa mutombo jinodhakwisa. Kuti atendehwe ndi Mwari, Khevhini, waidikana kusiya zviito zvese izvi zvicikazwirani no Matahwa. Wakazviita ngo kuthemba Jehovha no simba rinocinja ro soko Rake rakatahwa.—Heb. 4:12.

2 Kureva kuti naapera kubhabhatijwa, Khevhini wakasiya kuita cinjo here? Haiwa, ngo kuti wakaramba ecivangisira pa kusakurira zve kuitisa nane mugariro jake jo ciKristu. (Ef. 4:31, 32) Inga muezaniso, zvakamushamaisa kuvona kuti kukwanisa kujibata pa mugariro wake wokukasika kunyangajwa, kwainga kwecinesa. Iyena wakananga kudari: “Kujijira kujibata pandaikasika kunyangajwa kwainesa maningi kupinda kusiya zvirovejeso zvakashata  zvandainga nazvo!” Khevhini wakaita cinjo jinodiwa ngo kuvangisira pa mukumbiro no kuita jijo yo Bhaibheri.

3 Mukufanana na Khevhini, vazinji vedu takadikana kuita cinjo jinosisira ticito tabhabhatijwa kuti tizwiranise upenyu hwedu no mupango mukuru jo Bhaibheri. Pasure po kubhabhatijwa, takaziva kuti taidikana kuramba teciita cinjo—pazvimweni zvicikanasi kuvoneka—kuitira kuti titevejera Mwari na Kristu ngo phedo kamare. (Ef. 5:1, 2; 1 Ped. 2:21) Inga muezaniso, tingajivona pacedu kuti, tino mujimu wokukasika kushora, wo kuthya mundhu, takapeamira pa kuda kuita magumbu kana magumba, kana kuva no marembo amweni. Kureva kuti kuita cinjo mu mativi aya zviri kumunesera maningi kupinda zvamwaivetera here? Kana zvakadaro, mungatorangarira kudari: ‘Ndakaita cinjo huru maningi, waro ngenyi zviri kundinesera maningi kwenda mberi ndeciita cinjo pa zviro zvidoko izvi? Ndingaendesa kudini mberi ndecitendera kuti Bhaibheri ricinje upenyu hwangu?’

MUCAVETERA KUITA ZVAMUCIKAKWANISI

4. Ngenyi atikwanisi kudakajisa Jehovha pa zvese zvatinoita?

4 Itusu takagumari pakuziva no kuda Jehovha, tinoda ngo mwoyo wese kuita zvinomudakajisa. Asi, pikija cido condhoco cikure zvakadini, kutama kwedu kukwana kunoita kuti titame kukwanisa kumudakajisa nguva jese. Tinojivona tiri pa mugariro wakadari inga wa mupostori Pauro, uwo wakatara kudari: “Inini ndinokwanisa kuda bzauxoni, kaveta andikwanisi kubziita.”—Rom. 7:18; Jak. 3:2.

5. I cinjo japi jatakaita ticito tabhabhatijwa, asi kurembejeka kwapi kwatingaramba tecihwisana nako?

5 Takasiya zviito zvakashata zvaizotama kutikwanirisa kuti tive umwe wo ungano yo ciKristu. (1 Kor. 6:9, 10) Pikija zvakadaro, atindozivi kukwana. (Kol. 3:9, 10) Ngo kudaro, zvaizova zvicikabesi kurangarira kuti, pasure po kubhabhatijwa—kana pasure po kuva no makore akawanda mucokwadi—aticazoposizve, aticazowirazve mu mugariro jokare, kana aticazonesanizve no zvidisiso zvakashata. Zviito zvemweni zvingatoramba zviripo ko makore.

6, 7. (a) Icinyi cinotiitisa kuti tive shamwari ja Jehovha pikija no kutama kuwana kwedu? (b) Ngenyi atidikani kuramwa pa kukumbira kuregerehwa ndi Jehovha?

6 Kutama kukwana kotakagara utaka akutirambiji kuva no ushamwari na Jehovha kana kuenderera mbera tecimushandira. Rangariranyi basi: Jehovha paakatikwevejera kuti tive no ushamwari nae, waizviziva kuti taizoshaisha pa mukuvo no mukuvo. (Jo. 6:44) Zvecivoneka kuti Mwari anoziva mugariro wedu no zviri mu mwoyo mwedu, zvokadi iyena waijiziva mugariro jinoviiswa ngo kutama kukwana jaizotinesa kamare. Zve itusu tinoziva kuti tinoshaisha pa mukuvo no mukuvo. Asi, izvi azviitisi kuti Jehovha atame kutida inga shamwari jake.

7 Rudo hwakandundira Mwari kuti atipe cipo cinosisira maningi—muripo wo kujipira wo mwana wake anodiwa. (Jo. 3:16) Takacijikira pa nasiriro iyi yo mutengo mukuru, patinoposa, tikakauya kamare tokumbira kuregerehwa ndi Jehovha, tingathembadi kamare kuti ushamwari hwedu naye unoramba uripo. (Rom. 7:24, 25; 1 Jo. 2:1, 2) Ngo ndava yo kujizwa takasvipa kana tiri mushaishi, tinodikana kuthya kuashira besero rinoviiswa ngo muripo here? Atidikani kamare! Izvo zvaizoezana no kuramba kushandisa kumwa kuitira kusamba nyara jedu no jakasvipa. Pamusoro po zvese, muripo wakanasiririhwa vashaishi vanokhauya. Ngo kubonga ngo muripo, tingakwanisa kubusa ushamwari na Jehovha pikija tiri pa mugariro wo kutama kukwana.—Verenganyi 1 Timoti 1:15.

8. Ngenyi atidikani kurerusa kurembejeka kwedu?

8 Zvokadi kamare, itusu atirerusi kurembejeka kwedu. Kusakurira ushamwari hwedu na Jehovha  kunobatanija kuvangisira pa kutevejera Mwari na Kristu ngo phedo kamare zve tova mushovo wo vandhu wovanoda kuti tive. (Ndu. 15:1-5) Izvo zvinobatanijazve kuvangisira kuti tijibate paya patinoda kukhombijira mugaririo jinoviiswa ngo kutama kukwana, pikija kutojipeja pazvinokwanisikaya. Kudari tabhabhatijwa sasambi kana taano makore mazinji notiri mu cokwadi, tinodikana ‘kuramba ticirungamiswa.’—2 Kor. 13:11, Shanduro yeNyika Itsva.

9. Tinozvizivisa kudini kuti zvinokwanisika kuramba tecisimira undhu hupsa?

9 Zvinoda kuvangisira kuti ‘tirungamiswe’ no kukhombija “undhu hupsa.” Pauro wakaceukija vatendi doni vake eciti: “Ndibzo munodikana kuphinduja maitiro o kare o mwoyo yenyu, kusia undhu hwo kare, hunovora, hweciteveja kupombora kunocengeja, kuti muite vandhu vapsa mu murangariro no mu mwoyo yenyu, no kusimira undhu hupsa hwakaruhwa mwa Mwari ngo ururami no unasi hwo bzokadi.” (Ef. 4:22-24) Magama okutanga akasandujwa kuti “muite vandhu vapsa” anokhombija kuti kusimira undhu hupsa i basa ro kuenderere mberi. Izvi zvinovangisa, ngo kuti zvinopa cigondiso co kuti azvinenyi kuti tino nguva yakadini tecishandira Jehovha, tingaramba tecienderera mberi mu kusimira undhu hupsa. Hina, Bhaibheri rinokwanisa kuramba recicinja upenyu hwedu.

NGENYI ZVINONESA MANINGI

10. Tinodikana kuitenyi kuti tirambe teciita cinjo tecibesehwa ngo Bhaibheri, zve mubvunjo japi jatingazviita?

10 Kudari tiri kuda kutendera kuti Soko ra Mwari rirambe reciticinja, tinodikana kuvangisira. Asi ngenyi zvinodikana kamare kuti tishande ngo simba? Kudari Jehovha ari kubesera kuvangisira kwedu, kuenderera mberi akucaizoreruka here? Jehovha aacaizoregerera hake zviito zvedu zvinoviiswa ngo kutama kukwana kuti tikwanise kwenderera mberi ticikavangisiri maningi here?

11-13. Ngenyi Jehovha aatirerusiri kuti patame dikano yo kuvangisira kuti tinyise zvido zvedu zvakashata?

11 Tikasota pasi no mugore, tinokwanisa kuvona kuti Jehovha ano simba guru. Inga muezaniso, ngo segundu imwe basi, zuva rinokwanisa kucinja mamirioni o zviro zvaro kuti zvive simba. Mutengo mushoma basi wo simba rondhoro ngaunoviya pasi pano, asi pikija zvakadaro unopa kupisa no ruvheneko unokwana kuitira kuti pasi pano zviro zvirambe zvecirarama. (Ndu. 74:16; Is. 40:26) Jehovha anodakara maningi ngo kupa mutengo wakati kuti wo simba kuno vashandiri vake zvecidiwaya. (Is. 40:29) Hina, Mwari angatokwanisa kutipa simba rinodiwa kuti tinyise kurembejeka kuri kwese, mukutama kunesehwa kana kutambujika ngo muviyo jo kuposa kwedu. Waro ngenyi acikazviiti?

12 Jehovha wakatipa cipo cicikaezaniswi co rusujunuko wo kujikhetera. Ngo kukheta kuita kuda ka Mwari, zve tovangisira pa kuzviita, itusu tinokhombija makurire o rudo hwedu naye pomwe no cido catinaco co kumudakajisa. Tinokhombijavo kuti tiri kubesera ukuru-kuru hwake. Sathana wakaphikiza kurungama ko ukuru-kuru hwa Jehovha, ngo iyo ndava kujipira kwedu no kuvangisira kwatinoita pa kuhubesera, kunosisira maningi kuna Baba wedu vo mugore vano unyasha zve vanobongesera. (Job. 2:3-5; Mazwi 27:11) Asi, kudari Jehovha waitibvisira dikano iri yese yokuvangisira pa kuhwisana no kutama kukwana kwedu kuti timudakajise, manangiro ari ese otaizoita okuti takagondeka kwaari zve tiri kubesera ukuru-kuru hwake aacaizova no revo.

13 Ngo iyo ndava, Jehovha anotibvunja kuti ‘tivangirire’ pa kusakurira mugariro jo umwari. (Verenganyi 2 Pedru 1:5-7; Kol. 3:12) Iyena anovetera kuti tishande ngo simba  pa kungwarira murangariro no mazwiro edu. (Rom. 8:5; 12:9) Patinovangisira pa divi iri, tinojizwa takadakara kamare ngo kuziva kuti Bhaibheri riciri kucinja upenyu hwedu.

TENDERANYI KUTI SOKO RA MWARI RICINJE UPENYU HWENYU

14, 15. Tingaitenyi kuti tisakurure mugariro jinodiwa ndi Jehovha? (Vonanyi bhokiso rinoti: “Bhaibheri no Mukumbiro Zvakacinja Upenyu Hwavo.”)

14 Tingaitenyi kuti tisakurire mugariro jo umwari zve todakajisa Jehovha? Tinodikana kuita zvinopinda kuva no urongwa hwo kujiitisa nani. Tinodikana kuenderera mberi tecivangisira no simba rese zve toteverera ndhungamiriro ja Mwari, ngo kuti pana VaRoma 12:2, panoti: “Mucateveja bzo nyika yo pasi ino. Kaveta phindukanyi, mecitenderuja mirangariro yenyu, kuti muzivisise ngo kwapi kuda kwa Mwari, ngo capi cauxoni, cinodakaja no cakaperera.” Ecishandisa Soko rake no mujimu mucena wake, Jehovha anotibesera kuzwisisa kuda kwake, tokuita zve tocinja upenyu hwedu mbhera pa mudida wokuti tizwirane no mupango jake. Kuvangisira kwatinoita kunodikana kubatanija kuita mabasa akadari inga kuverenga Bhaibheri njiku ngo njiku, kurangarijisisa Matahwa, zve kuita mukumbiro kuitira kupuwa mujimu mucena. (Lc. 11:13; Gal. 5:22, 23) Patinobatisisa ndhungamiriro jo mujimu mucena wa Mwari tozwiranisa murangariro jedu no mavonero Jehovha, anowanikaya mu Soko rake, tinozova no murangariro, magama pomwe no zviito zvinozozwirana no kuda kwake. Pasure pazvo, tinozodikana kuramba tecingwarira kuti titame kuwirazve mukurembejeka kuri kwese hako kotainga nako.—Mazwi 4:23.

Zvingabesera kukheta perepo mojija mavhesi no musoro jo mabhuku jingabesera pa kuhwisana no kurembejeka kuri kwese kwenyu (Vonanyi ndima 15)

15 Kusiyapo basi kuverenga Bhaibheri, tinodikana kujija Soko ra Mwari pamwepo no mabhuku o ciKristu no cido co kutevejera mugariro jinoshamaisa ja Jehovha. Vamweni vanobesereka ngo kukheta vhesi jimweni no musoro jimweni jo Murindiri kana Despertai! jinobesera pakusakurira mugariro jo umwari kana jingabesera kuitira kunyisa kurembejeka kuri kwese kovanako, vecijijija nguva jimweni.

16. Ngenyi atidikani kuvora mwoyo kudari atikwanisi kuita cinjo ngo kukasika?

16 Kudari kuenderera mberi kwenyu ku mujimu kuri kunonoka, ceukijanyi kuti kukura uku kunotora nguva. Kusakurira mugariro jo kumujimu i basa ro kwenderera mberi. Tinodikana kusengerera patinonga tecivangisira pa kutendera kuti Bhaibheri rirambe reciita cinjo mu upenyu hwedu. Pa kutanga, zvingadikana kuti tijiroveje pacedu kuita zvinonangwa ngo Matahwa kuti zvakarungama. Ngo kudaro, mukufamba ko nguva, kurangarira no kuita mukuzwirana no kuda ka Mwari kunozotirerukira apo murangriro no zviito zvedu pazvinonga zvecizwirana no murangariro ja Jehovha Mwari.—Ndu. 37:31; Mazwi 23:12; Gal. 5:16, 17.

 NGATICEUJE VETERO HURU YATINAYO

17. Kudari tikava takagondeka kuna Jehovha, tingava no vetero yapi inodakajisa?

17 Vashandiri vakagondeka va Jehovha vanozova no cidakajiso co kumushandira kwenda no kwenda, no vari vandhu vakakwana. Pa mukuvo wondhowo, kukhombijira mugariro jo umwari akuzodi kuvangira, asi kunozodakajisa maningi. Ucito waguma mukuvo wondhowo, ngo ndava yo mupiro, itusu tinotendehwa kunamata Mwari wedu wo rudo. Tingatozviita pikija ticikazivi kukwana kudari tikaramba tecivangisira pa kutenda kuti simba ro Soko rake riticinje.

18, 19. Tingava kudini no gwinyiso ro kuti Bhaibheri rino simba ro kuenderera mberi recicinja upenyu hwedu?

18 Khevhini, wanangwaya pakutanga, wakavangisira maningi kuti akwanise kujibata pa mugariro wake wo kukasika kunyangajwa. Iyena wairangarijisisa no kushandisa zviambi zvo mu Bhaibheri, zve wakatendera besero no mbhangiro yaakapuwa ngo maKristu doni. Nopapera makore manganani, Khevhini wakaita cinjo jinosisira. Wakazokwanirisa, wogajwa kuva mubatiri anoshandira, zve wari ari kushanda inga mukuru wo ungano ko 20 o makore. Pikija zvakadaro, iyena ari kuvona dikano yo kuenderera mberi ecijingwarira kuti atame kuhwirirazve sure ku mujimu.

19 Zvakasongana na Khevhini zvinokhombija kuti Bhaibheri riri kubesera vandhu va Mwari kuti varambe veciita cinjo mu upenyu hwavo. Ngo kudaro, ticadoramwa pa kutendera kuti Soko ra Mwari rirambe reciticinja no kutigumisa po kuva no ushamwari hwo phedo na Jehovha. (Ndu. 25:14) Jehovha paanonga ecikomborera kuvangisira kwedu, tinozovona zvakajeka kuti Bhaibheri rinokwanisadi kuramba recicinja upenyu hwedu.—Ndu. 34:9.

^ [1] (ndima 1) Zina rakacinjwa.