Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

Mushovonyi wo Rudo Unoviisa Mudakaro wo Kadi-kadi?

Mushovonyi wo Rudo Unoviisa Mudakaro wo Kadi-kadi?

Vanodakara vandhu vaya vokuti Mwari wavo ndi Jehovha!’​NDUYO 144:15, Baiberi Mazwi Akacena aMwari.

NDUMBO: 111, 109

1. Ngenyi nguva yatiri kurarama yakasiana no nguva imwenivo hayo?

TIRI KURARAMA mu nguva yakasiana kamare no nguva iri yese hayo. Jehovha ari kuunganija uzinji ukuru hwo vandhu kubvira mu ‘nyika jese, majinja no vandhu vo ndumi jese,’ inga zvakanangwa ngo Bhaibheri. Ivona ndi “jinja rakavanga” rinodarika makumasere o zviuru zvo vandhu vakadakara ‘vaciita basa rakacena usiku no masikati.’ (Apokalipsi 7:9, 15, Shanduro yeNyika Itsva; Isaia 60:22) Akuzivi kumbova no vandhu vakawanda kudari vakaguma pa kuva no rudo na Mwari pamwepo no vadoni vavo.

2. Mushovonyi wo rudo ucikashandiswi mu njira kwayo watinovona mu vandhu vacikaripi shamwari ja Mwari? (Vonanyi pikica yo kutanga.)

2 Pikija zvakadaro, Bhaibheri rakanangazve kuti mu njiku jedu jino, vandhu vacikaripi shamwari ja Mwari vaizova no rudo ucikashandiswi mu njira kwayo, uwo ngo wo umbau. Mupostori Pauro wakatara kuti mu njiku jo kupejisira, vandhu vaizova ‘vanozvida pacavo, vanoda mare,’ zve ‘kudisisa zvinodakaja muviri vosiya kuda Mwari.’ (2 Timoti 3:1-4, Shanduro yeNyika Itsva) Mushovo uwu wo rudo wo kujida wega basi wakasiana  kamare no kuda Mwari. Kupsaka zvaunoda basi akuiiti kuti mundhu adakare, pikija angarangarira kuti anozova wakadakara. Kunja kwa izvo, izvi zvinoita kuti nyika ive no umbau zve zvinoita kuti upenyu unese ku vese.

3. Zvicinyi zvatinozopopora mu musoro uno? Ngenyi?

3 Mupostori Pauro waiziva kuti rudo hwo umbau waizoguma pa kuva zviro zvo njiku no njiku zve zvaizova ngozi ku maKristu. Ngokudaro iyena wakavangwaja kuti ‘reai kovari’ kana kutiza, vaya vanotatija rudo wo umbau. (2 Timoti 3:5, Shanduro yeNyika Itsva) Asi ngo maitiro ari ese tinosongana no vandhu vakadaro. Ngokudaro, zvicinyi zvatingaita kuti tizvijivirire pa murangariro wo vandhu vakatitendeneja zve tidakajise Jehovha, Mwari wo rudo? Ngatende tivone musiano uripo pakati po rudo unoda Mwari kuti tive nawo no rudo wakasananguhwa pana 2 Timoti 3:2-4, Shanduro yeNyika Itsva. Perapo tonasa kuzviringisa pacedu zve tovona kuti tingatatijisa kudini rudo unozotiita kuti tive no mudakaro wokadi-kadi zve tinase kugajana.

TINODA MWARI KANA KUTI TINOJIDA PACEDU?

4. Ngenyi azvizivi kushata kuva tinojida pacedu?

4 Pauro wakatara kudari: ‘Vandhu vanozojida pacavo.’ Izvi zvinoreva kuti zvakashata kujida pacedu here? Haiwa, kujida pacedu akuzivi kushata zve kunodikana. Jehovha wakatisika kudaro. Jesu wakananga kudari: “Disai mudoni wako, inga mudiro wounojiita iwewe.(Marco 12:​31) Zvokadi kamare, atingakwanisi kuda vandhu vamweni kudari ticikazvidi pacedu. Bhaibheri rinotibvujazve kudari: “Vanarume vanodikana kudisa vakaji vavo, inga muviri yavo. Ndiani anodisa mukaji wake, anojidisa ega, ngokuti apana mundhu anoda kuxata ko muviri wake; kaveta anouhisa no kuukorondha.” (VaEfeso 5:​28, 29) Zvakajeka kuti tinodikana kujida pacedu.

5. Mwaizosanangurisa kudini mundhu anojidisisa maningi pacake?

5 Rudo wokujida pacedu watinoverenga pana 2 Timoti 3:2, Shanduro yeNyika Itsva asipi rudo wiyana watinozivaya kana wiyana wakanakaya. Ngo wo umbau. Kudari ari wese anojidisisa maningi pacake, anorangarira zvakawanda kupinda zvinodiwa. (Verenganyi VaRoma 12:3.) Anojitaja maningi pacake kupinda ari wese. Zviro zvikashata, iyena anopumbha vamweni. Masoko amweni anobhuya ngo zvo Bhaibheri akaezanisa mundhu wakadaro no cinungu cinotifukududu coviga ukuse waco, asi cokhombija vamweni basi mizwa jaco jakapinja. Vandhu vakadaro avana mudakaro wokadi-kadi.

Mushovo wo rudo waanoda Mwari kuti tive nawo unobara mugariro jakanaka

6. Zvicinyi zvatinowana ngo kuva no rudo na Mwari?

6 Vamweni vanojija ngo zvo Bhaibheri vanodavira kuti Pauro wakatanga kunanga ngo rudo hwo umbau, ngo kuti iwona unobara mugariro jakashata jaakazonangaya tevere. Mukusiana, mushovo wo rudo unoda Mwari kuti tikhombije unobara mugariro jakanaka. Rudo wondhowo wakabatana no mudakaro, runyararo, kusengerera, kunaka mwoyo, unaki, gonda, kupfava, no kujibata. (VaGalàsia 5:22, 23) Mutari wo nduyo wakatara kudari: ‘Vanodakara vandhu vaya vokuti  Mwari wavo ndi Jehovha!’ (Nduyo 144:​15, Shanduro yeNyika Itsva) Jehovha ndi Mwari wakadakara, zve vandhu vake vakadarovo. Cimwenizve, mukusiana no vaya vanojididisisa maningi kupindirija mudida zve vanoda basi kuashira, vashandiri va Jehovha vakadakara ngo kuti vanopa vamweni.​—Maitiro o Vapostori 20:35.

Tingatizisa kudini kuva vanojidisisa pacedu? (Vonanyi ndima 7)

7. Mubvunjo japi jinotibesera kuti tipopore rudo hwedu na Mwari?

7 Tingazivisa kudini kuti tiri kujidisisa maningi pacedu kupinda kuda Mwari? Rangariranyi ngo pamusoro po ngwajo ii: “Mucaita ciricese ngo kuphikizana kana kuti kuzvikuja, thivanyi mwoyo mecivona vamweni inga vakuru kumuri, mucapsaka bzinomudakarisa basi, kaveta psakanyi bzinodakarisa vamweni.” (VaFilipi 2:3, 4) Itusu tingazvibvunjisa pacedu kuti: Inini ndinopurukira ngwajo ii? Ndinoeja kuita zvinoda Mwari kuti ndizviite? Ndinoeja kuvona njira jo kubesera vamweni mu ungano zve no mu basa rokucumaera? Azvizivi kureruka nguva jese kupa nguva no simba redu. Ngokudaro zvingatodikana kuti itusu tive takabatikana zve tozvipira pa zviro zvimweni kuti tiwane mudakaro. Asi akuna cingatidakajisa kupinda kuziva kuti Mukuru-kuru wo mudenga no pasi wakadakara ndisu!

8. MaKristu amweni akaitenyi ngo ndava yo kuda Mwari?

8 Ngokuti vano rudo kuna Mwari zve vanoda kumushandira kamare, maKristu amweni anosia zviro zvaizoaita vakhupuki. Ericka, ndi medhika, asi wakatema civaringo co kuva piyona kusiapo kuramba akabatikana ngo basa rake ro kurapa. Iyena no mwanuna wake vakashandira ku nyika jakasiyana-siyana. Iyena wakananga kudari: “Zviro zvizinji zvatakawana ngo kubesera kucumaira mu ndima jinovereketwa ndumi imweni, kubatanija no shamwari jatakava najo, zvokadi zvakakhupusa upenyu hwedu.” Ericka, aciri kushanda inga medhika, asi  anoshandisa nguva no simba rake kazinji kuitira kujijisa vandhu ngo pamusoro pa Jehovha no kubesera hama no hambzaji jake jo ciKristu. Iyena wakananga kuti izvi zviri kumupa “mudakaro wo kadi-kadi no kugajana ko mukati.”

UPFUMI HWO MUGORE KANA PASI?

9. Ngenyi mundhu anodisisa mare aazovi no mudakaro?

9 Pauro wakatara kuti vandhu vaizova ‘vanodisisa mare.’ Pa makore akaperari, piyona umweni ku Irirandiya wakabhuya no mwanarume umweni ngo pamusoro pa Mwari. Perepo mwanarume uwu wakafunungura sharitera yake, wobvisa mare yo phepha, wobvunja piyona wiya kudari: “Uwu ngo mwari wangu!” Vandhu vazinji vano mazwiro akadarovo, pikija vacikazvitendi. Ivona vanodisisa mare pomwe no zviro zvainotenga. Asi Bhaibheri rinongwaja kudari: ‘Uwo anoda sirivha, aazokwanihwi ngo sirivha; nee anoda pfuma aazokwanihwi ndiyona.’ (Mucumaeri 5:10, BMAA) Mundhu anodisisa mare aambokwanihwi ndiyona! Nguva jese anoda mare yakawanda zve anopeja mukuvo muzinji pa upenyu hwake ecindoipsaka. Izvi zvinomuviisira ‘kutambujika kamare.’​—1 Timoti 6:9, 10.

10. Bhaibheri rinonangenyi ngo pamusoro po ukhupuki no urombo?

10 Izvokadi kuti tese tinoda mare. Iyona inotibvikira mbhera pakati kuti. (Mucumaeri 7:​12, Shanduro yeNyika Itsva) Waro kunanga kuti tinozodakara kudari tikava basi no zvinodiwaaya maningi here? Hina! (Verenganyi Mucumaeri 5:​12, Shanduro yeNyika Itsva.) Aguri mwana wa Jakehi wakatara kuti: “Mucandipa upfumi nokuti urombo; ndipenyi dimbu rangu ro cingwa.” Zvakareruka kuzwisisa kuti ngenyi mwanarume uwu aacaida kuva murombo wo kupejisira. Iyena wakananga kudaro ngo kuti aacaida kuva pa muejo wo kuba, ngo kuti kuba kwake kwaizoshoresa Mwari. Waro ngenyi aacidazve kuva mukhupuki wo kutanga? Iyena wakatara kudari: “Kuti, nditame kuguta no kumuramba ndeciti: “Ndiani Tenji Mwari?”” (Mazwi Akangwara 30:​8, 9) Kangaije munotovaziva vandhu vanothemba upfumi kuciripi Mwari.

11. Jesu wakati kudini ngo pamusoro po mare?

11 Mundhu anodisa mare aazodakajisi Mwari. Jesu wakananga kudari: “Apana anokwanisa kubatira vandhu vaviri. Ngokuti anozonyenya umwe woda umweni, dangani anozobatira umwe, ecizonyenya umweni. Amukwanisi kubatira Marure pamwepo no upfumi.” Wakanangazve kudari: “Mucadounganija mu nyika upfumi hwenyu, muno honye no bzipfundho bzinopfundha, muno mbava jinophwanya nyumba, jeciba. Unganijanyi upfumi hwenyu mugore, mucina honye no bzipfundho bzinopfundha, mbava ajiphwanyi nyumba jeciba.”​—Mateu 6:19, 20, 24.

12. Ngenyi kuva no upenyu wakareruka zvinotibesera kushandira Mwari? Ipanyi muezaniso umwe.

12 Vashandiri va Jehovha vazinji vari kueja kutora upenyu hwakareruka. Ivona vari kufumbhura kuti ngo kuita kudaro vanowana nguva yakawanda kuti vashandire Jehovha zve zvinovapa mudakaro. Jack, anogara ku Estadhos Unidhos, wakatengesa nyumba yake huru no nyagoso yake kuitira kuti iyena no mujimai wake vave mapiyona. Iyena wakananga kudari: “Zvainesa kwatiri kusia nyumba yedu yakaseja no zvatainga nazvo mu nyika yedu.” Asi ko makore iyena waiviya ku basa akanyangajwa. Wakati: “Mukaji wangu, wainga waapiyona wo nguva jese, waigara akadakara nguva jese. Iyena wakananga kuti:  ‘Ndino patarawe vanopinda ari wese hake!’ Wari ndaapiyonavo, zve tese toshandira Mundhu umweo, Jehovha.”

‘Kunanga kuti maponero angu anotatija kamare kuti ndinothemba zvinonanga Bhaibheri ngo pamusoro po mare here?’

Tingatizisa kudini kuva vanodisisa mare? (Vonanyi ndima 13)

13. Zvicinyi zvingatibesera kupopora mavonero edu ngo pamusoro po mare?

13 Patinopopora mavonero edu ngo pamusoro po mare atidikani kupsaka kujiinikira zve tinodikana kujibvunjisa kudari: ‘Maponero angu anotatija kamare kuti ndinothemba zvinonanga Bhaibheri ngo pamusoro po mare here? Kupsaka mare ndikona kunosisira maningi kondiri here? Ndinoreremeja maningi zviro zvo kunyama kupinda ushamwari hwangu na Jehovha no vandhu vake here? Ndinogondadi kamare kuti Jehovha anozondipa zvandinoda here?’ Tingava no gwinyiso ro kuti iyena aazombosiizve vaya vanomuthemba!​—Mateu 6:33.

TINODA JEHOVHA HERE KANA KUTI ZVINODAKAJISA MUVIRI?

14. Ngo api mavonero akanaka ngo pamusoro po kudakajihwa mu upenyu?

14 Bhaibheri rakanangavo kuti mu njiku jo kupejisira, vandhu vaizova ‘vanodisisa zvinodakajisa muviri.’ Inga zvatinoziva, kuva no mavonero akaezanana ngo pamusoro pedu no po mare azvizivi kushata. Ngo kudaro, azvizivivo kushata kuda kudakajihwa mu upenyu mbhera pakati kuti. Vamweni vanorangarira kuti avadikani kudakajihwa ngo maitiro ari ese, asi izvi andizvopi zvinoda Jehovha kwatiri. Bhaibheri rinovangisa vashandiri vakagondeka va Mwari reciti: “Endai hako, woha mukate wako ngo kudakara, imwai wecibusa doro rako.”​—Mucumaeri 9:7.

15. Zvinonangenyi ‘kudisisa zvinodakajisa muviri’?

15 Pa 2 Timoti 3:4, Shanduro yeNyika Itsva, panobhuya ngo pamusoro po vaya vanodisisa zvinodakajisa muviri no vacina ndava na Mwari. Vonanyi kuti vhesi iyi ainangi kuti vandhu vaizodisa zvinodakajisa muviri kupinda Mwari. Novaiita kudaro, vaizosiyavo rudoho padoko kuitira Mwari. Asi vhesi inonanga kuti ivona ‘vaizosiya’ kuda Mwari. Umwe anojija ngo zvo Bhaibheri wakatara kuti vhesi iyi ‘mukupejera kamare iri kunanga kuti vandhu avo vanoda Mwari mbhera pakati kuti. Iyona iri kunanga kuti ivona avatodi Mwari nee padoko.’ Iyi i ngwajo huru kuno vaya vanodisisa zvinodakajisa muviri. Bhaibheri rinosanangura vanodisisa zvinodakaja muviri inga vaya ‘vanocengejwa’ ngo zvinodakajisa upenyu.​—Luka 8:14.

16, 17. Muezaniso wapi wakagajwa ndi Jesu ngo mavonero aainga nao ngo pamusoro po kudakajisa muviri?

16 Jesu wakatatija kuti zvinorevenyi kuva no mavonero akaezanana ngo pamusoro po zvinodakajisa muviri. Iyena wakaenda ku mabuso o ‘mucadho’ no ‘cirariro cikuru.’ (Johani 2:1-10; Luka 5:29) Pa mucadho, pakacota vhinyo, ngo kudaro Jesu wakaita mushamaiso wocinja kumwa kuva vhinyo. Pa bvaza imweni, vandhu pavakamuvereketera ngo ndava yo kuha no kumwa, iyena wakavajekesera kuti ivona ngovacainga no mavonero akaezanana.​—Luka 7:33-36.

 17 Pikija zvakadaro, Jesu aacaita kuti kudakajisa muviri kuve ciro cinosisira maningi mu upenyu hwake. Iyena waidira Jehovha pa kutanga no kuita zvese zvaikwanisa kuti abesere vamweni. Iyena wakatojipira kuti afe pa danda ro kutambujikira ngo maitiro anosuruvarisa kuitira kuti aponese vandhu. Jesu wakabvunja vaya vaida kuva vateveri vake kudari: “Munozova no mucena vakazomutuka, vecimuteverera, vecinanga bzakaxata bzese ndimwi, vecinyepa, ngo njio yangu. Dakaranyi, sekereranyi , ngokuti mupocero wenyu unozoita mukuru mugore. Ngokutibze vakagogomeresa kudaro vaporofeti vakamutungamirira.”​​—⁠Mateu 5:​11, 12.

Tingatizisa kudini kuva vanodisisa zvinodakajisa muviri? (Vonanyi ndima 18)

18. Mubvunjo japi jinozotibesera kuvona kuti tinodisisa zvinodakajisa muviri kana kuti haiwa?

18 Zvicinyi zvinozotibesera kuvona kuti tinodisa zvinodakajisa muviri kana kuti haiwa? Tingajibvunjisa kudari: ‘Kwandiri mabungaijo ngaanosisira maningi kupinda musongano no basa ro kucumaera here? Ndinotendera kusiya zviro zvimweni zvinondidakajisa ngo kuti ndiri kuda kushandira Mwari here? Pandinokheta mabungaijo, ndinotanga ndarangarira mavonero a Jehovha ngo pamusoro pawo here?’ Ngo ndava yo kuti tinoda Mwari zve tinoda kumudakajisa, no kungwarira kwese, atitizi basi zvatinoziva kuti zvakashata asi tinototizavo zvatinorangarira kuti izvi kangaije zvinomunyangaja.​—Verenganyi Mateu 22:37, 38.

TINGAWANISA KUDINI MUDAKARO?

19. I vandhu vapi vacikazombowanizve mudakaro wokadi-kadi?

19 Sathana ari kutambuja vandhu ko makore anokhwedera kuita 6.000. Mu njiku jo kupejisira jino jo mugariro uno wo zviro, pasi pano pakazara ngo vandhu vanojidisisa pacavo, vanodisisa mare zve vanodisisa zvinodakajisa muviri. Vanorangarira zvavanodikana kuva nazvo zve vanoita kuti zvido zvavo zvive zvinosisira maningi mu upenyu hwavo. Asi vandhu vakadaro avazowani mudakaro wokadi-kadi! Mukusiyana, Bhaibheri rinonanga kudari: ‘Ano mudakaro mundhu anobesehwa ndi Mwari wa Jokobe, anovetera Jehovha Mwari wake.’​—Nduyo 146:5, Shanduro yeNyika Itsva.

20. Rudo hwenyu kuna Jehovha huri kumupa mudakaro wakadini?

20 Vashandiri va Jehovha vanomuda kamare zve gore ngo gore vazinji vamweni vari kuguma pa kumuziva no kumudavo. Izvi zvinovonesa kuti Umambo hwa Mwari hwaakutonga zve sambiri pano ucaviisa makomborero acikatoverengeki! Patinoita zvaanoda Jehovha kwatiri, tinomudakajisa, zve tinowana mudakaro wokadi-kadi. Vano rudo na Jehovha vanozodakara no kudakara mbhera narini! Pa musoro unotevera ticada kupopora mugariro jimweni jinoviiswa ngo rudo hwo umbau. Perepo tovona kuti jinosiyana papi no mugariro jakanaka jo vashandiri va Jehovha.