Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUBVUNJO 6

Ndinganyisisa Kudini Kuvangirijwa ngo Vadoni?

Ndinganyisisa Kudini Kuvangirijwa ngo Vadoni?

NGENYI ZVINOSISIRA

Paunocijikira wega kamare, unonga wecikwanisa kuvonerera upenyu hwako, kunja kokuregerera kuti vamweni vakuvonerere.

ZVICINYI ZVAUNGAITA?

Rangarirai ciitiko ici: Apo vadoni vake vaviri vanokhwedera phedo, Bhatista anozwa mundani kuruma. Vakamueja kaviri sumana ino kuti abheme. Uku kumuejazve hwocitatu.

Cimujaha cokutanga conanga kudari:

“Uri wegazve nyamasi? Imira ndikutatije shamwari.”

Otonasa kucindira kamare gama ro kuti “shamwari” paanonga ecibvisa ciro mu borosa rake zve otambanuja nyara eciashija Bhatista.

Bhatista ovona sigaro pakati po zvikunwe zvo murimbhwane. Kuhwaja mundani kwia kotoengejeka kamare.

Bhatista oti “Sori, ndakapera kumubvunja kare kuti andi . . ”

Cimujaha cocipiri cogura ngo kunanga kuti: “Ucaita inga wakamatha!”

“Andizi kumatha!” Bhatista waita kukoka cicunge kuti anange izvi.

Cimujaha cocipiri codira mukono waco pa pfuji ra Bhatista. “Torai basi,” onanga ngo cipasi-pasi.

Cimujaha cokutanga cokhwedeja sigaro phedo kamare no mumeso ma Bhatista oengejera ngo cipasi-pasi kuti: “Atizobvunji ari wese.”

Kudari iwewe ndiwe Bhatista, waizoitisa kudini?

 IMAI URANGARIRE!

Vadoni va Bhatista vari kuzvirangarira kamare zvovari kuitaro here? Vari kuzviita ngo zvivaringo zvavo kamare? Zvinodenga kuti haiwa. Kunasa kunanga, vakatendera kukwevejehwa ngo vamweni. Vaida kutendehwa, ngo kudaro vakatendera kuti vamweni vavaumbe.

Kudari ukasongana no mugariro wakafanana, waizokhetesa kudini gwanja rakasiana, wonyisa kuvangirijwa?

  1.  

    Bhaibheri rinoti: ‘Muzivi anovona bzakaxata, wofindara; benji rinoenda mberi, rinotambujwa ndibzona.’—Mazwi Akangwara 22:3.

    Kazinji, ungavona ngozi nguva iciripo. Inga muezaniso, ngatiti wavona cikwata co vadoni vako vo kucikora kumbeji kwako vecibhema. Ngo kutanga wavona cineso, ungakwanisa kutohwisa cinesoco.

  2.  

    Bhaibheri rinoti: ‘Rambai uno hana yakanaka.’—1 Pedru 3:16, Shanduro yeNyika Itsva.

    Zvibvunjisei kudari: ‘Ndinozozwa kudini pa kufamba ko makore kudari ndikateverera vamweni?’ Zvokadi, kocimukuvo waizojivirira kutama kunyangajisa vadoni vako. Asi no kufamba konguva unozozwa kudini? Wakazvipira kurasa kamare zvauri ngo kuda basi kudakajisa vaunojija navo here?—Exodo 23:2.

  3.  

    “Mungwari anothya bzakaxata.”—Mazwi Akangwara 14:16.

    Sambiri pano kana no kufamba ko nguva, tinozodikana kusana no kurarama mukuzwirana no kusaneko. Bhaibheri rinotibvunja ngo vanarume vakadari inga ndi Jasefa, Jobe na Jesu, vakatema zvivaringo zvaushoni. Rinotibvunjazve ngo pamusoro pa Khaini, Ezauu na Judha, vakatema zvivaringo zvakashata. Unozoitenyi?

Bhaibheri rinoti: ‘Teverera ugondeki.’ (Nduyo 37:3, Baiberi Mazwi Akacena aMwari) Kudari ukatanga warangarira ngo pamusoro po muviyo wopera kugajana mu hwiru, kuvonesa ciimo cako kungareruka maningi—no kukomborehwa.

Ucadothya—azvirevi kuti unodikana kupa vadoni vako hurukuro huru. Kunanga basi kuti ANDIDI zvingakwana. Kana kuti andidi wako ave wakavanga kamare, ungananga kuti:

  • “Ucadondibvunjazve izvo!”

  • “Andizomboiti ciro cakadaro!”

  • “Iwe, unondiziva ushoni kupinda izvi!”

Khiya yakona i kudavira ciripo-ripoco ngo kucunga kwese kamare. Ukadaro, ungazoshamisika ngo mafundhire angaita vadoni vako!

 KUHWISANA NO KUSEKWA

Kudari ukatendera kuvangirijwa ngo vadoni vako, unozoita inga robhoti rinogiyahwi ndivona

Unozoitenyi vadoni vako vakakuseka? Zvakadini vakananga kuti: “Zvakashatira papi—iwewe unothya maningi?” Zivai manera aya okusekwa inga zvaari kamare—ndikona kusekwa kunondoithwa ngo vadoni vari vese. Waizodavirisa kudini? Uno mukana muviri.

  • Ungaita inga uri kutotendera kutukwa uku. (“Uno razawe, ndinothya kamare!” Perapo ngo masoko mashoma wonanga thangwe rakona.)

  • Ungahwirijira kuvangirijwa. Nangai thangwe rinokurambisaro perapo wovonesa vadoni vako kuti asipi zvoungwaru zvavanoita. (“Ndairangarira kuti mundhu wakangwara inga ndiwe aabhemi!”)

Kudari vadoni vako vakaenderera mberi vacikutuka, pindai! Ceujai, paunopeja maningi nguva wakaima, ngopanovangavo maningi kuvangirijwa. Ngo kubuda pa mugarirowo, unovonesa kuti uri kuramba kuti vamweni vacinje zvauri.

Kunasa kunanga, aukwanisi kumbzenga kuvangirijwa ngo vadoni. Asi ungasunga zvaunoda kuita, woramba uno ciimo cako zve wocingwarira. Pakupejisira, kukheta ngokwako!—Joxwa 24:15.