Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MUBVUNJO 3

Ndingabhuisa Kudini no Vabari Vangu?

Ndingabhuisa Kudini no Vabari Vangu?

NGENYI ZVINOSISIRA

Paunoita cika ndi cikevo no vabari vako, upenyu hwako hunoita cecetere inga meno o mbuji.

ZVICINYI ZVAUNGAITA?

Amborangarirai ciitiko ici: Mucitatu cousiku. Teofiro, ano makore 17, wapeja mutoro wake, wasujunuka kuti ave no mukuvo waaivetera wokumbozorora! Ofunungura TV, perapo oita kujikhandira pa sofaa paanodakarira maningi.

Pa mukuvo uu, Baba voima pa cirimbo kana cizingiti vakanyangajwa.

“Teofiro! Ngenyi uri kupeja nguva ngo kuvona TV kuveni waidikana kubesera munukuna wako kuita TPC? Nguva jese aumboiti zvaunobvunjwa!”

Teofiro overeketa ngo kun’gun’guta, asi ngo njira yokuti azike kamare: “tinoenda wee, hei”.

Baba voita inga kukotamira nyezuru voti. “Wanangenyi, ndumurewe?”

“Apana condananga, Papaa,” Teofiro onanga ecihasaira, ecitendereresa majiso.

Baba vonyangajwisisa kamare. Vovereketa ngo hasha kudari: “Ucashandisa izwi iro wecivereketa neni wazvizwa!”

Kudari ndiwe waenga Teofiro, waizojiviririsa kudini kunesana uku?

IMAI URANGARIRE!

Kubhuisana no vabari vako zvakadenga kufambisa karu. Kudari ukawana mucitaka muno ciphingo, ungatandurira ngo cimweni.

 INGA MUEZANISO:

Musikane umweni anozwi Reia wakananga kudari: “Ndakazvivona zvecinesa kubhuisana na baba vangu. Nguva jimweni ndingabhuya navo ko cimukuvo, asi gare gare baba voti, ‘ndinourombo, wainga wecibhuyenyi wea?’”

REIA ANO MUKANA MUTATU.

  1. Kuvereketera baba ngo hasha.

    Reia angavereketera baba vake aciti: “Ngenyi amundipurutani, zvinosisira maningi pa! Teyanyi njeve!”

  2. Kuregera kuvereketa na baba.

    Reia angatoramwa oregera kueja kunanga cineso cake kuna baba vake.

  3. Kuimira nguva kwayo kuti azobhuye shwiro yakona.

    Reia anozobhuya na baba vake hope ngo hope pa mukuvo umweni kana anozoita kutara karata ngo pamusoro po shwiroyo.

Pa mazano matatu aya, ngorapi raunorangarira kuti Reia anodikana kukheta?

VONAI BASI: Baba wa Reia vakabatikana ngo zvimweni—ngo kudaro avaripi kuvona kuneseka kwake. Waro kudari Reia akasana Mukana 1, Baba vangatama kuzvibata kuti ngenyi ari kuita kuvakhuwira. Mukana uu kangaije auzoiti kuti baba wa Reia vamupurutane, zve auzotatiji nderemejo no goja kuna baba. (VaEfeso 6:2) Zvokadi, mukana uu auzobeseri vese.

Inga zvaucikadi kuti ciphingo ciri mucitaka cive mugumo wo hwendo hwako, ungawana njira kuita ushamwari no vabari vako

Mukana 2 ungava wakapfava asi asipi wo ungwaru. Ngenyi? Ngo kuti kuitira kuti ahwisane no cineso cake ngo njira inobudirira, Reia anodikana kubhuya na baba vake—kudari vacizomubesera, vanodikana kuziva zvaari kusongana nazvo muupenyu. Kunyarara akuna cakunobesera.

Asi Reia akashandisa Mukana 3, aazoregeri ciphingo pakati po citaka kuti atame kubhuya na baba vake. Mukusiana, anoeja kubhuisana shwiroyo pa mukuvo umweni. Kudari akasana kuita kutarira baba vake, Reia angazwa zviri nane pamukuvo wondhowo kamare.

Kutara karata zvingamubeserazve kuti anase kubudisa kamare zvaanoda kunanga. Baba pavanozoverenga karata, vanozozwa zvaaida kuvabvunja, zvingavabesera kuzwisisa zviri kunesa Reia. Zano ro 3 rinobesera vese vovaviri Reia na baba wake. Kana vanobhuya hope ngo hope kana ngo karata, mukana uu unotevera zano ro Bhaibheri ro ‘kupsaka zviro zvinovaka rugarisiko.’—VaRoma 14:19.

Mukana japi jimweni jingava na Reia?

Vonai dengani ungarangarira umwe, zve utarei pa ndau iri pasi apa. Perapo tarai kuti mukana uu unoviisa muvio wenyi.

 NGWARIRA KUTI VATAME KURANGARIRA ZVICIRIPI IZVONA

Ceujai, zvawananga zvingasiana no zvinorangarira vabari vako kuti ndizvona zvauri kuda kunanga.

INGA MUEZANISO:

Vabari vako vangakubvunjisa kuti ngenyi uri kuvonesa kucamwa. Iwewe woti: “Andidi kuzvibhuya.”

Asi vabari vako vangazwa kuti wananga kudari: “Andimugondi kuti ndimuverengere sengeredho. Ndinozobhuya no shamwari jangu ngo pamusoro po cinesoco kuciripi imwimwi.”

Ngatiti uri kuhwisana no cineso cikuru asi mubari wako ozvipira kuti akubesere. Asi ukananga kuti “Mucaneseka henyu. Ndinokwanisa kucihwisa ndega.”

  • Vabari vako vangazwa kuti:

  • Mupinguro wakanaka wowaizoita waizova wo kuti: