Kwenda ku nda-nda-nda yo zviri mukati

Zvapupu zva Jehovha

Kheta ndumi Cindau

Munoda Kuziva Zvokadi Here?

Munoda Kuziva Zvokadi Here?

ZVOKADI zvenyi? Zvokadi ngo pamusoro po muvhunjo jinodikana maningi jinociizwa ngo vandhu. Kangaije imwimwi munocishamaiswa ngo pamusoro po muvhunjo inga iji:

  • Mwari anotitaja zvokadi-kadi here?

  • Hondo no madambujiko zvinozopera here?

  • Ngozvapi zvinoitika kwatiri tikafa?

  • Kuno vetero iri yese ko vakafa here?

  • Ndingakumbirisa kudini kuti ndizike ndi Mwari?

  • Ndingawanisa kudini mudakaro mu upenyu?

Mungajiwanirepi mipinguro jo muvhunjo iji? Kudea makamboenda mu mabhibhirioteka kana mu maroja o mabhuku, kangaije makavona zviuru no zviuru zvo mabhuku anodenga inga anopa mipinguro. Ngokudaro, kazinji-kazinji, bhuku rimwe rinophikiza rimweni. Amweni anovoneka inga anoshanda pa nguva yondhoyo asi pa nguva shomani aacashandi zve anoithwa nga papsa kana kucinjwa.

Zvakanyadaro, kuno bhuku rimwe rino mipinguro jinogondeka. Iri ibhuku ro zvokadi. Jesu wakananga mu mukumbiro kuna Mwari kuti: “Izwi renyu ndha kadi.” (Johani 17:17) Nyamasi uno tinoziva Izwi rondhoro inga Bhaibheri Rakacena. Mu matsamba anotevera, mucava no cikhombiso co mipinguro jakajeka zve jakagondeka jo Bhaibheri ku muvhunjo jiri panyezuru apa.

 Mwari Anotitaja Zvokadi-kadi Here?

NGENYI UNOIZWA MUVHUNJO UWU? Tiri kurarama mu nyika yakazara ngo ushati zve no kutama kurungama. Zviara zvizinji zvinojijisa kuti matambujiko atinawo kuda ka Mwari.

NGOZVAPI ZVINOJIJISA BHAIBHERI? Mwari aamboitisi zvakashata. “Mwari aaiti zvakaxata kamare! Nyakukwanisa bzese aaxaixi.” anonanga Jobe 34:10. Mwari ano cidisiso co rudo kuno vandhu. Ndiyo ndava Jesu wakatijijisa kukumbira kudari: “Baba wedu muri nyezuru . . . umambo hwenyu ngahuze kwedu, kuda kwenyu ngakuitwe pasi pano inga nyezuru.” (Mateu 6:9, 10) Mwari anotitaja maningi, wakajinesa kuti akwanirise cidisiso cake kamare.—Johani 3:16.

Vonanyizve Genesi 1:26-28; Jakobe 1:13; zve na 1 Pedru 5:6, 7.

Hondo no Madambujiko Zvinozopera Here?

NGENYI UNOIZWA MUVHUNJO UWU? Hondo jiri kuenderera mberi jeciuraya civerengo cisinganangiki co vandhu. Itusu tese tinocizwa kuhwajihwa patinovona kutambujika ko vandhu.

NGOZVAPI ZVINOJIJISA BHAIBHERI? Mwari wakananga nguva yaanozogaja mutendere pasi pese. Pasi po Umambo hwake-utongi hwo mugore, vandhu “avazojijibze kuita hondo.” Pandau pazvo, “vanozogura [vanozopfura] mapanga avo, kumaita mapaja.” (Isaia 2:4) Mwari anozopeja kutama kurungama kwese no madambujiko. Bhaibheri rinogondesa: “[Mwari] anozopukusa misoji yo mu meso mavo. Akucazovi no kufa nokuti mariji, kurira nokuti kuhwaja. Ngokuti bzokare [kubatanija kutama kurungama no madambujiko a nyamasi uno] bzakapinda.”—Apokalipsi [Cakapangidzirwa] 21:3, 4.

Vonanyizve Nduyo 37:10, 11; 46:10 [46:9, BAIBERI MAZWI AKACENA AMWARI]; zve na Mikeya 4:1-4.

Ngozvapi Zvinoitika Kwatiri Tikafa?

NGENYI UNOIZWA MUVHUNJO UWU? Zviara zvizinji zvo munyika zvinojijisa kuti kuno ciro mukati mo mundhu cinoramba cecirarama pakupera kufa. Vandhu vamweni vanotenda kuti vakafa vanokwanisa kukhuvaza varipenye kana kutizve Mwari anopanica vashati ngo kuvatongera nyathwa yo kuvatambuja mu gehena.

NGOZVAPI ZVINOJIJISA BHAIBHERI? Vandhu vanosia kurarama pa kufa. “Vakafa . . . avabzizivi,” anonanga Mucumaeri 9:5. Zvecivoneka kuti vakafa avazivi, avazwi, kana kuita ciri cese, ivona avakwanisi kukhuvaza—kana kubesa—vandhu vanorarama.—Nduyo 146:3, 4.

Vonanyizve Genesis 3:19 zve no Mucumaeri 9:6, 10.

 Kuno Vetero Iri Yese ko Vakafa Here?

NGENYI UNOIZWA MUVHUNJO UWU? Itusu tinoda kurarama zve tinoda kubusa upenyu pamwepo no vayani votinoda. Ngo cibarihwe tinodandha ro kuvonazve vadoni vedu vakafa.

NGOZVAPI ZVINOJIJISA BHAIBHERI? Vandhu vazinji vakafa vanozomuswa ko vakafa. Jesu wakagondesa kuti “vaya vari mu makuva . . . vanozomuka” (HS.4 Johani 5:28, 29) Mu kuzwirana no cidisiso ca Mwari cokutanga, vayani vanozomuswa ko vakafa inga vandhu vanozova no mukhanjo wo kurarama mu paradhesi pasi pano. (Luka 23:43) Cigondiso ici co nguva yo kumbeji, cinobatanija uhomi hwakaperera pomwe no upenyu hucingaperi ku vandhu vanopurukira. Bhaibheri rinoti: “Varurami vanazoita [vanozoita] veno vo nyika, vanozogaremo mbhera narini.” —Nduyo 37:29.

Vonanyizve Jobe 14:14, 15; Luka 7:11-17; zve no Maitiro o Vapostori 24:15.

Ndingakumbirisa Kudini Kuti Ndizike ndi Mwari?

NGENYI UNOIZWA MUVHUNJO UWU? Zvokadi kamare, vandhu mu zviara zvese vanoita mukumbiro. Zvakanyadaro, vazinji vanozwa kuti mukumbiro javo ajidavihwi.

NGOZVAPI ZVINOJIJISA BHAIBHERI? Jesu wakatijijisa kuti ticaphinda-phinda magama mu mukumbiro jedu. Iyena wakati, “Mukaita mukumbiro mucawanja mazwi.” (Mateu 6:7) Tikada kuti Mwari apurukire mukumbiro jedu, tinodikana kukumbira mu njira yaanotendera. Kuti tiite izvi, tinodikana kujija kuti kuda ka Mwari ngakupi perapo tokumbira mukuzwirana nako. Tsamba yokutanga ya Johani 5:14 inosanangura kuti: “Tikamukumbira ciro, ngo kuteveja kuda kwake, iyena anotipurukira.”

Vonanyizve Nduyo 65:3 [65:2, BSM]; Johani 14:6, 14; zve na 1 Johani 3:22.

Ndingawanisa Kudini Mudakaro mu Upenyu?

NGENYI UNOIZWA MUVHUNJO UWU? Vandhu vazinji vanotenda kuti mare, nduma, kana kuseja kunovaitisa kuti vadakare. Ngokudaro, ivona vanozvitevera zviro izvi—kaveta varikunzvengwa ngo mudakaro.

NGOZVAPI ZVINOJIJISA BHAIBHERI? Jesu wakakhombija khiya yo mudakaro paakananga kuti: “Vanomucena vano mujimu wo umasikini [vanoziva zvinodiwa zvavo zvo kumujimu NM], ngokuti Umambo hwo mugore ngo hwavo.” (Mateu 5:3) Mudakaro wokadi ungawanika basi tikatevera mudanyu jo kuzaja cinodiwa cedu cikuru-kuru—njara yedu yo zvokadi zvo kumujimu ngo pamusoro pa Mwari no cidisiso cake kwatiri. Zvokadi iyi inowanika mu Bhaibheri. Kuziva zvokadi iyi zvingatibesa kuti tizwisise kuti ngozvapi zvinodikana kamare— zve no zvapi zvicingadikani. Kuregerera Bhaibheri kuti ritungamirire zvisungo zvedu zve no zviito zvinoseseja ku upenyu huno cidisiso.—Luka 11:28.

Vonanyizve Mazwi Akangwara 3:5, 6, 13-18 zve no 1 Timoti 6:9, 10.

 Zvotaperari kuvona ngo kukasika cainga civoniso co mipinguro jo Bhaibheri ku mivhunjo mutandhatu basi. Munoda kuziva zvakawanda kupinda izvi here? Pacina kukana-kana imwimwi munoda, kudea muri pakati pavayana “vano mujimu wo umasikini [‘vanoziva zvinodiwa zvavo zvo kumujimu,’ NM].” Kangaije mungashamaiswa ngo mivhunjo jimweni, inga iji: ‘Kudea Mwari ecititaja, ngenyi anoregerera kushata kwakanyanya zve no madambujiko mu nguva yakareba iyi yo zviitiko? Ndingaitisa kudini kuti mugarire wo mbhuri yangu huite nane?’ Bhaibheri rinotipa mipinguro jakazara zve jinodakajisa ku mivhunjo iji zve no jimweni jakawanda.

Zvakanyadaro, vazinji nyamasi uno vanokana-kana kujija Bhaibheri. Ivona vanorivona inga bhuku guru-guru kazinji rinonesa kurizwisisa. Munoda kubeswa here kuti muwane mipinguro mu Bhaibheri? Zvapupu zva Jehovha zvinomutatija njira mbiri jo kumubesa ndijo.

Yokutanga, bhuku Bhaibheri Rinombojijisenyi kamare? rakanasirihwa kuti ribese vakabatika ngo basa kuti vavone mipinguro jakajeka jo Bhaibheri ku mivhunjo jinodikana. Njira yocipiri urongwa hwo jijo yo Bhaibheri yo pamuzi icingariphwi. Pacina mutengo, umwe wo Zvapupu zva Jehovha anogara phedo nemwi, anokwanisa kujijisa Bhaibheri, ungavia pamuzi penyu kana pa ndau imweni yomunodakarira kuti apeje nguva shoma vhiki ngo vhiki ecimujijisa Bhaibheri. Pasi pese zviuru no zviuru zvo vandhu zviri kubesehwa ngo urongwa uhu. Vazinji vavo vagumira pa mbhejiso iyi: “Inini ndawana zvokadi!”

Akuna cakapinda kunaka kuwana. Zvokadi yo Bhaibheri inotisujunura mu kuthya maninji, kukanganiswa, zve no kuthya kamahara. Iyi inotipa vetero, cidisiso zve no mudakaro. Jesu wakati: “munozoziva bzokadi, no bzokadi bzinozomusujunura.”—Johani 8:32.