Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 9

‘Tizanyi Mufambiro Wakashata wo Vatano’

‘Tizanyi Mufambiro Wakashata wo Vatano’

‘Ngo kudaro urayanyi mativi o muviri jenyu jiri pa nyika ngo pamusoro po uhure, zviro zvicikazivi kucena, cido co kuvatana, cido cinokhuvaza, no ruemuro, izvo zvinoreva kunamata zvithombi.’—VAKOLOSI 3:5, Shanduro yeNyika Itsva.

1, 2. Bharama wakarongenyi kuti akwanise kuviisira ngozi vandhu va Jehovha?

MUVEJI anoenda ku ndau yaanodakarira maningi kuvejera. Iyena anotanga arangarira mukhaindi umwe wo hove waanodakarira maningi. Anokheta nyambo perepo wokhandira civejo mu kumwa. Nopapera cimukuvo, civejo cotanga kuhira, mbhera kukweviwa, iyena wocimusa wovona kuti wabata hove yaaida. Wonyemwerera ngo kuvona kuti nyambo yaakheta yashanda.

2 Mu gore ro 1473 N.V.I.Y. (Nguva ya Vese Icito Yaguma), mwanarume umweni waidanijwa Bharama, wakanasa kurangarira nyambo yaaida kushandisa. Vaaida kubata, vainga vandhu va Mwari, avo vainga vari mu Mapani o Moabhi, phedo no Nyika yo Cipikihwa. Bharama waijiita muphorofita wa Jehovha, asi zvokadi kamare wainga ari mundhu wo umbau wakapagahwi kuitira kuti atuke Iziraeri. Ngokudaro, iyena wakakwanisa basi kukomborera Iziraeri ngo kuti Jehovha wakazvinghwinira. Ngo kudisisa kuwana mupocero wake, Bharama wakarangarira kuti kangaije waizokwanisa kuitisa kuti Mwari atuke vandhu vake, kudari ivona vakawira pa muejo wo kuita cishaishi cikuru. No murangariro wondhowo, Bharama wakashandisa nyambo iyi—vasikane vo kuMoabhi vaiita kuti vanarume vade kuvatana navo.—Bziverengo 22:1-7; 31:15, 16; Apokalipsi (Cakapangijihwa) 2:14.

3. Zano ra Bharama rakashanda zvakadini?

3 Zano rake rakashanda here? Hina, rakashanda padoko!  Gumi ro zviuru zvo vaIziraeri vakabatwa ngo nyambo iyi ngo “kuhura no vanakaji vo vaMoabi.” Ivona vakatotanga kunamata zvimwari zvo vaMoabhi, kubatanija, Bhaari wo Peori, cimwari co ndimo, kana uhure. Inga muviyo, 24.000 zvo vaIziraeri vakafa povainga vaaphedo no kunghwina mu Nyika yo Cipikihwa. Rakava dambujiko rakakura ravakava naro!—Bziverengo 25:1-9.

4. Ngenyi zviuru zvo vaIziraeri zvakawira mu uhure?

4 Zvicinyi zvakavatora kuti vagume pa dambujiko iri? Vazinji vavo vainga vakakurisa mwoyo wakashata ngo kusiya Jehovha, Mwari wiyana kamare wakavapokonyora ku Ejipita, wakavahisa mu zvipare no kuvatungamirira vakangwaririka kwenda ku nyika yo cipikihwa. (Vaheberi 3:12) Ecirangarira izvi, mupostori Pauro wakatara kudari: “Ticajiregera tecipombora [kana kuhura], inga bzo vakaita vamweni vavo. Ngo ndaveyo vakafa makumaviri na bzitatu o bziuru bzo vandhu, mu njiku yondhoyo.” *1 VaKorinto 10:8.

5, 6. Ngenyi ciitiko cinoverengwa ngo pamusoro po cishaishi co vaIziraeri mu Mapani o Moabhi, cinosisira maningi kwatiri nyamasi uno?

5 Ciitiko ico ciri mu bhuku ro Bziverengo rina zvijijo zvinosisira maningi kuna vandhu va Mwari nyamasi uno, avo vari kuda kunghwina mu nyika yo cipikihwa inopinda yaidaya kunghwiniwa  ngo vaIziraeri. (1 VaKorinto 10:11) Inga muezaniso, nyika ino yakazarari ngo uhure, ina mugariro inga wo ku Moabhi yo kare, asi ngo maitiro akanyanyisa. Kunja kwa izvi, gore ngo gore mazana no mazana o maKristu ari kuwira mu uhure—nyambo yakashandiswaya kuitira kubata vaIziraeri. (2 VaKorinto 2:11) Mukutevejera Zimiri, uwo wakava no cicunge co kuviisa mwanakaji wo ku Midhiani mutende yake, mukati mo mucaca wo vaIziraeri, vamweni vanosonganirana no vandhu va Mwari nyamasi uno, vari kuguma pakukwevejera vamweni kuti vave no mufambiro wakashata mu ungano yo ciKristu.—Bziverengo 25:6, 14; Juda 4.

6 Muri kujivona nyamasi uno kuti muri pa mugariro wakatojana no wo mu Mapani o Moabhi here? Munokwanisa kuvona mupfupo wenyu—nyika imbza iri kuvetehwari kubvira kare—iyo yaaphedo here? Kana zvakadaro, itanyi zvese zvamunokwanisa kuti murambe muri mu rudo hwa Mwari ngo kubatisisa mupango wake unoti: ‘Tizanyi uhure.’—1 VaKorinto 6:18, Shanduro yeNyika Itsva.

Mapani o Moabhi

I CINYI UHURE?

7, 8. Icinyi ‘uhure,’ zve ngenyi vaya vanohura vanokotora zvovanosima?

7 Inga zvarinoshandiswa mu Bhaibheri gama rokuti ‘uhure’ (ngo ciGiriki por·neiʹa) rinoda kunanga kuvatana ko vandhu vacizivi kucadha zvinotendehwa ngo Matahwa. Uhure hunobatanija upombo, kuvatana ngo kuda mare, kubatanijavo kuvatana ngo mukanwa, kuvatana ngo kunobudisa svina zve kubata-bata zvirewa kana kuti ndhengo jo vatano jo mundhu woucizivi kurovorana nae. Zvinobatanijavo kuvatana ko mwanarume no mwanarume kana mwanakaji no mwanakaji zve kuvatana no zvinyama. *

8 Matahwa anojekesa kamare kuti: Vaya vanohura avadikani kuva mu ungano yo ciKristu zve avazoashiri upenyu  hucikaperi. (1 VaKorinto 6:9; Apokalipsi 22:15) Kusiapo izvi, pikija wari kamare vangatojiviisira matambujiko mazinji o kutama kujithemba no kujireremeja pacavo, kutama kuzwirana mu mucadho, kuva no hana inojipumbha, kumita mimba vacikadi, kuwana ndhenda kana kutofa kamare. (Verenganyi VaGalàsia 6:7, 8.) Taizoda here kuita mudanyu waizotitora kwenda ku zvineso zvakawanda kudari? Zvinosuruvaja ngo zvokuti, vazinji avazvirangariri pavanonga veciita mudanyu wo kutanga—uwo wokuti kazinji unobatanija zvoumitu-mitu.

MUDANYU WO KUTANGA—ZVOUMITU-MITU

9. Zvoumitu-mitu azvikhuvazi here, inga zvinonanga vamweni? Sananguranyi.

9 Mu nyika zinji zvoumitu-mitu zvinowanika mu ndau jinotengesehwa majhoronari, mu mumbo, mu terevhizau zve mu masaite mazinji o mu Internerti. * Zvoumitu-mitu azvikhuvazi here, inga zvinonanga vamweni? Haiwa, zvinokhuvaza kamare! Vaya vanovona zvoumitu-mitu vangaguma pakuva no cirovejeso co kuita cinyamundundu zve vosakurira ‘cido cinonyoweja co kuvatana no umweni,’ ico cingaitisa kuti vave no mukhuva wo kundoda zvokuvatana basi, kuva no zvido zvo vatano zviciripi zvo cibarihwe, kutama kuzwirana mu mucadho, zve pikija kutorambana. * (VaRoma 1:24-27; VaEfeso 4:19) Mupsakisiri umweni, wakaezanisa mukhuva wo kundoda kuvatana, no ndhendha yo kanseri. Iyena wakananga kudari. “Iwona unoramba wecikura zve weciparajika. Kazinji auperi wega, zve iwona unonesazve maningi kurapa no kuupeja.”

I ungwaru kushandisa interneti pa ndau inogara vazinji mumba

10. Tingashandisa kudini ciambi ciri pana Jakobo 1:14, 15? (Vonanyivo  bhokiso riri pa pheji 101.)

10 Vonanyi masoko akatahwa pa Jakobo 1:14, 15, panoti:  “Kaveta mundhu anoejwa ngo maemuriro ake anomucengeja no kumukweva. Maemuiriro ondhoo anomita no kubara uxaixi. Uxaixi ukaibva unobara rufu.” Ngo kudaro, kudari cidisiso cakashata cikanghwina mu murangairo mwenyu, ciriporipoco itanyi ciito kuti mucibvise kamare! Inga muezaniso, pamunovona pikica inomusijira cido co vatano mucikadi, ciriporipoco munodikana kusota pamutivi, kana kujima komputadhori, kana kucinja kanari yo terevhizau. Itanyi zviri zvese zvinodiwa kuti mutame kujipira ku cido co uhure cicito cakura no kumunyisa!—Verenganyi Mateu 5:29, 30.

11. Patinohwisana no zvido zvakashata, tingatatijisa kudini kugonda kwedu Jehovha?

11 Wiyana anotizivaya maningi kupinda itusu kamare, ano thangwe rakanaka paanotipangira kudari: ‘Ngo kudaro  urayanyi mativi o muviri jenyu jiri pa nyika ngo pamusoro po uhure, zviro zvicikazivi kucena, cido cokuvatana no umweni, cido cinokhuvaza, no ruemuro, izvo zvinobhuya kunamata zvithombi. (VaKolosi 3:5, Shanduro yeNyika Itsva) I zvokadi kuti kuita kudaro, zvingada kuvangisira. Asi rangariranyi, itusu tina Baba vo mugore vano rudo zve vanosengerera vatingadeketerera. (Nduyo 68:20) Ngo kudaro, psakanyi besero ravo ngo kukasika kudari mukagumihwa ngo murangariro jakashata. Itanyi mukumbiro, kuti muwane “simba rakakura” zve jivangisirenyi kurangarira zvimweni.—2 VaKorinto 4:7; 1 VaKorinto 9:27; vonanyi bhokiso rinoti: “ Ndinganyisisa Kudini Cirovejeso Cakashata?” pa pheji 104.

12. “Mwoyo” wedu icinyi, zve ngenyi tinodikana kuungwarira?

12 Muzivi Soromona wakatara kudari: “Rindirisisai [kana ngwarirai] uxoni mwoyo wako, ngokuti mawo hunobva uhomi.” (Mazwi Akangwara 4:23) “Mwoyo” wedu i undhu hwedu hwo mukati, zvotiri kamare inga mundhu pamberi pa Mwari. Kunja ka izvi, zvinozoitisa kuti tiashire upenyu ucikaperi kana kuti haiwa, asipi zvinovona vandhu kwatiri asi i mugariro wo “mwoyo” wedu pamberi pa Mwari. Zvakareruka. Asi i shwiro huru. Mugondeki Jobe wakaita citenderano no majiso ake, co kuti aacaizosota mwanakaji no cidisiso co vatano. (Jobe 31:1) Muezaniso wakanaka zvakadini kwatiri! Ecikhombija murangariro umwewo, mutari wo nduyo wakakumbira eciti: “Reesanyi majiso angu kuti atame kuvona bza biresi.”—Nduyo 119:37.

KUTAMA UNGWARU KA DHAINA

13. Dhaina wainga ani, zve ngenyi kukheta kwake shamwari kwainga kuciripi ko ungwaru?

13 Inga zvatakavona pa Cipauko 3, shamwari jedu jingatikwevejera ku zvakanaka kana ku zvakashata. (Mazwi Akangwara 13:20; verenganyi 1 VaKorinto 15:33.) Rangariranyi muezaniso wa Dhaina, mwana wa Jakobe. Pikija wakarehwa ushoni, Dhaina mukutama ungwaru wakakheta kushamwarijana no vasikane vo ku Kanani. Mukufanana no vaMoabhi , vaKanani vaizivika maningi ngo uhure. (VaLevi 18:6-25) Kuno vanarume  vo ku Kanani, kubatanija Shekemi—“waireremejwa” maningi pamuzi pa baba wake—Dhaina waivoniwa kuva mwanakaji acikanesi kuvatana nae.—Genesi 34:18, 19.

14. Kukheta shamwari ka Dhaina kwakaviisa kudini ngozi?

14 Dhaina kangaije wainga acina murangariro wo zvovatano paakavona Shekemi. Asi, Shekemi wakaita zvaizoitwa ngo muKanani ari wese paaiva no cido co vatano. Kueja kuramba ka Dhaina pa museswa wo kupejisira akuzivi kushanda ngo kuti Shekemi “wakamutora” zve “womujipa.” Zvinovoneka kuti Shekemi pasure pazvo ‘wakadisa’ Dhaina, asi zvondhozvo azvizivi kucinja zvaainga akaita. (Verenganyi Genesi 34:1-4.) Dhaina aacaizotambujika ega ngo muviyo wo zvakaitika. Kukheta kwake shamwari kwakaviisa dambujiko no kushohwa kuna ukama hwake hwese.—Genesi 34:7, 25-31; VaGalàsia 6:7, 8.

15, 16. Tingawanisa kudini zivo yokadi-kadi? (Vonanyivo  bhokiso riri pa pheji 109.)

15 Kudari Dhaina wakava no cijijo ngo zvaakaita, iyena wakajija no musoji pamatama. Vaya vano rudo na Jehovha zve vanomuzwira avadikani kuwana cijijo ngo maitiro anonesa.  Zvecivoneka kuti vanozwira Mwari, ivona vanokheta ‘kufamba no vazivi.’ (Mazwi Akangwara 13:20a) Ngo kudaro, ivona vanozwisisavo ‘njira jese jakanaka’ zve kutiza matambujiko no kusuruvara kucina shwiro.—Mazwi Akangwara 2:6-9, Baiberi Mazwi Akacena aMwari; Nduyo 1:1-3.

16 Uzivi hwo umwari hungawanika ngo vese vanohudisisa zve vanoita mukuzwirana no kudisisa kondhoko, ngo kuvangisira kuita mukumbiro no kujija Soko ra Mwari pomwe  no zvinobudiswa ngo muranda wakagondeka no wakangwara. (Mateu 24:45; Jakobo 1:5) Kujidodokesa kunosisirazve maningi, ikona kunovoneka ngo cidisiso co kubatisisa mbhangiro yo Matahwa. (2 Majimambo 22:18, 19) Inga muezaniso, muKristu angatendera hake ciambi cokuti mwoyo wake unocengeja zve auna vetero. (Jeremia 17:9) Asi, akawira mu mugariro wokuti aazivi kuvonesa ungwaru, muKristu uu anozojidodokesa kamare kuti atendere mbhangiro yo rudo pomwe no besero here?

17. Sananguranyi mugariro ungabuda pakati po mbhuri, zve khombijanyi kuti baba vangabesera kudini mwana wavo wokaji.

17 Rangariranyi ngo pamusoro po mugariro uu. Baba avatenderi kuti mwana wavo wokaji abude no mujaha wo ciKristu pacina anovaperekeja. Musikane uu wonanga kudari: “Baba amundithembi kani? Atiiti ciri cese cakashata!” Pikija iyena angada hake Jehovha zve wova no cido cakanaka, asi waizova ecifamba “ngo kungwara” here? Iyena ari ‘kutiza uhure’ here? Kana kuti ngo kutama ungwaru ari ‘kugonda mwoyo wake’? (Mazwi Akangwara 28:26, BMAA) Kangaije munoziva zviambi zvimwe zvaizoshandisa baba kuti vabesere mwana wavo wokaji ngo pamusoro po shwiro iyi.—Vonanyi Mazwi Akangwara 22:3; Mateu 6:13; 26:41.

JASEFA WAKATIZA UHURE

18, 19. Muejo wapi wakasongana na Jasefa mu upenyu hwake, zve wakahwisana kudini nawo?

18 Umwe mujaha wakanaka, waida Mwari zve wakatiza uhure wainga Jasefa, hama ya Dhaina. (Genesi 30:20-24) Paainga ari mwana mudoko, Jasefa wakavona kamare ngo meso ake muviyo jakavepo ngo ndava yo kutama ungwaru ko hambzaji yake. Atikakaniji kuti, kuceuja kwake izvi pomwe no cidisiso co kuda kuramba ari mu rudo hwa Mwari, zvakangwarira Jasefa pa makore akazotevera ku Ejipita, apo mukaji wa tenji wake paaieja kumukwevejera “mazuva ese” kuti avatane naye. I cokwadi kuti, inga muranda, Jasefa aacaizokwanisa kusiya uranda hwake wotopinda! Iyena waidikana kuhwisana no mugariro wondhowo ngo ungwaru pomwe no kucunga. Wakaita  kudaro ngo kuramba mukaji wa Potifari mukundohwirijira no kuhwirijira, mbhera paakazomutiza.—Verenganyi Genesi 39:7-12.

19 Vonanyi basi: Kudari Jasefa waindogara ecirangarira ngo pamusoro po vatano, waizokwanisa kuramba akagondeka here? Kangaije haiwa. Kusiapo kuramba ecindosakurira murangariro jakashata, Jasefa waireremeja ushamwari hwake na Jehovha, izvo zvinovoneka ngo magama aakabvunja mukaji wa Potifari. Iyena wakananga kudari: “Tenji wangu . . . apana ciri cese caakandirambisa, kuciripi imwimwi basi, ngokuti muri mukaji wake. Ndingabziitisa kudini kuita bzakaxata no kuxaixira Mwari?”—Genesi 39:8, 9.

20. Jehovha wakacinjisa kudini zviro ngo pamusoro pa Jasefa?

20 Rangariranyi mudakaro wakava na Jehovha paakavona mujaha Jasefa, ari ndhambo no ukama hwake, eciramba akagondeka njiku ngo njiku. (Mazwi Akangwara 27:11) Pakufamba ko nguva, Jehovha wakaita kuti zviro zvicinje, haiwa basi kuitira kuti Jasefa abudiswe mu gunia asi kuti aitwevo mutungamiriri wo kutanga zve muvonereri wo zvokuha! (Genesi 41:39-49) Magama ari pana Nduyo 97:10, BMAA ngo okadi kamare: ‘Imwimwi munoda Jehovha, nyenyai zvakashata. Uwo anongwarira mwiha yo vakacena vake. Anovanunura kubva mu nyara jo vakashata.’

21. Hama imweni iri mujaha yo imwe nyika yo mu Afrika yakakhombija kudini cicunge pa mufambiro wayo?

21 Mukufanana, nyamasi uno vashandiri vazinji va Mwari vanokhombija  kuti ‘vanonyenya bzakaxata, vanodisisa bzakanaka.’ (Amosi 5:15) Imwe hama iri mujaha, yo ku imwe nyika yo mu Afrika, inoceuja kuti musikane umweni wainga mujijidoni wayo, no cicunge wakakumbira kuvatana nayo kuti azobesehwe pa porovha yo matematika. Hama iyi yakati: “Ndakaramba ciriporipoco. Ngo kuramba ndakagondeka, ndiri kuramba ndecijireremeja pacangu, izvo zvina mutengo mukuru kupinda goridhe no sirivha.” Ngo zvokadi kuti cishaishi cingapa “kubusa” ko nguva shomani, asi kudakajihwa uku ko baratu, kazinji kunoviisa kuhwajihwa kukuru. (Vaheberi 11:25) Kunja ka izvi, kudakajihwa uku, kushoma maningi tikakuezanisira no mudakaro unoramba uripo unobva pa kuzwira Mwari.—Mazwi Akangwara 10:22.

TENDERANYI BESERO RINOBVA KUNA MWARI WO UNYASHA

22, 23. (a) Kudari muKristu akaita cishaishi cikuru, ngenyi azvirevi kuti mugariro wake aucina vetero? (b) I besero rapi riripo kuitira anoshaisha?

22 Inga vandhu vacikazivi kukwana, tinohwisana no zvidisiso zvo nyama zve tinovangisira kuti tiite kuda ka Mwari. (VaRoma 7:21-25) Jehovha anozviziva zvondhozvo, “anocereceja kuti tiri bukuta.” (Nduyo 103:14) Ngo zvokadi kuti, nguva jimweni, muKristu angaita cishaishi cikuru. Kureva kuti aazovi no vetero here? Haiwa kamare! Zvokadi ngo zvokuti, mushaishi angakotora mucero jinovava, inga zvakaita Mambo Dhavhidhi. Pikija zvakadaro, nguva jese Mwari aripo kuti ‘akungurire’ vaya vanocumba ngo zvavakaita zve ‘vodekeca’ zvishaishi zvavo.—Nduyo 86:5; Jakobo 5:16; verenganyi Mazwi Akangwara 28:13.

23 Mukuengejera, Mwari ngo kunaka mwoyo wakatipekeja ungano yo ciKristu ino ‘zvipo zviri vanarume’—vahavisi vo kumujimu vakaibva avo vanokwanirisa zve vanoda kupa besero no cido cese. (VaEfeso 4:8, 12, Shanduro yeNyika Itsva; Jakobo 5:14, 15) Cinangwa cavo ngo co kubesera mushaishi kuti amusijire ushamwari hwake na Mwari zve kumubesera kuti ‘awane hwiru’ kuitira kuti atame kuitazve cishaishi.—Mazwi Akangwara 15:32.

 ‘WANANYI MWOYO UNO UZIVI’

24, 25. (a) Mujaha wakasananguhwa pa Mazwi Akangwara 7:6-23 wakakhombijisa kudini kuti wainga no ‘mwoyo ucina uzivi’? (b) Tingawanisa kudini ‘mwoyo uno uzivi’?

24 Bhaibheri rinonanga ngo pamusoro po mundhu ‘acina hwiru’ zve wia ano ‘hwiru.’ (Mazwi Akangwara 7:7) Ngo ndava yo kutama kuibva kumujimu zve kuva acina uzivi mu basa ra Mwari, wiya acina ‘hwiru’ angatama zwisiso zve mavonero akanaka. Inga mufana wakasananguhwa pa Mazwi Akangwara 7:6-23; iyena angava wakapeamira pa kuda kuwira mu cishaishi cikuru. Asi, wiya anowana hwiru’ anopa ngwariro ku undhu hwake hwo mukati ngo kuita jijo yo Soko ra Mwari no mukumbiro nguva jese. Zve ngo kuita zvaanokwanisa inga mundhu acizivi kukwana, iyena anozwiranisa murangariro jake, zvido zvake, mazwire ake, no zvaanodadamira kuita mu upenyu hwake zvinotendehwa ndi Mwari. Ngo kudaro iyena ‘anoda mwiha wake’ kana kuti anojikomborera, zve ‘acawana zvakanaka.’—Mazwi Akangwara 19:8.

25 Jibvunjisenyi kudari: ‘Ndinonasa kuthemba kamare kuti ndhungamiro ja Mwari jakarungama here? Ndinotenda no kuvanga kwese kuti kujibatisisa kunoviisa mudakaro mukuru here’? (Nduyo 19:8-11; Isaia 48:17, 18) Kudari mukava no kukana-kana kuri kwese hako ejanyi kujinasirira. Rangarijisisanyi muviyo jingavepo ngo kuphurusa mutemo ja Mwari. Mukuengejera, “ejanyi, munozovona unaki hwa [Jehovha] Mwari” ngo kurarama mu cokwadi zve ngo kuzaja mu murangariro mwenyu ngo zviro zvakanaka—zvokadi zvese, zvakarungama, zvakacena, zvakakojwa, zvaushoni zvese. (Nduyo 34:9; VaFilipi 4:8, 9) Mungava no cokwadi co kuti pomunonga meciengejera kuita kudaro munozoengejera rudo hweyu na Mwari, kuda zvaanoda zve kunyenya zvaanonyenya. Jasefa aacainga mundhu wakakwana. Asi, pikija zvakadaro iyena wakakwanisa ‘kutiza uhure’ ngo kuti wakatendera kuti Jehovha amuumbe ko makore akawanda, perepo womupa cido co kudakajisa Mwari. Ngazvidarovo kwamuri.—Isaia 64:8.

26. Ngo wapi musoro unosisira waticazojija mu cipauko cinotevera?

 26 Musiki wedu wakasika zvirehwa kana kuti ndhengo jedu jo vatano, haiwa kuti zvive zvitengerebwe zvo kujidakajisavo hedu basi, asi kuitira kubarana no kudakajisana no watakarovorana naye. (Mazwi Akangwara 5:18) Mavonero a Mwari ngo pamusoro po mucadho acazobhuiwa mu zvipauko zviviri zvinotevera.

^ ndim. 4 Zvinovoneka inga kuti Mutengo wakanangwa mu bhuku ro Bziverengo waibatanijavo “vatungamiriri” vo vandhu avo vaikhwedera kuita 1.000, vakaurawa ngo vatongi, pamwepo no vaya vakauraiwa kamare ndi Jehovha ambhwine.—Bziverengo 25:4, 5.

^ ndim. 7 Kuitira masoko mazinji ngo pamusoro po zvinoda kureva mufambiro ucikazivi kucena zve ucikapingiki, vonanyi “Mibvunzo Inobva Kuvaverengi” mu Murindiri wo 15 ya Khunguru, 2006, mu ciShona wakabudiswa ngo Zvapupu zva Jehovha.

^ ndim. 9 “Zvoumitu-mitu,” inga zvinonangwa apa, zvinoda kunangira zvese zvino cinangwa co kumusijira cido co vatano zvakadari inga, mupikica, zvakatahwa, kana kuti mazwi anobhuya ngo zvo kuvatana. Zvoumitu-mitu zvinotangira pa pikica yo mundhu umwe wakagara ngo maitiro anomusijira zvido zvo vatano mbhera pa pikica yo vandhu vaviri kana vazinji vari kuita zviito zvo vatano yakashatisisa.

^ ndim. 9 Cinyamundundu cinosananguhwa pa Masoko o Kuengejera, pa mapheji 218-219.