Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 5

Tingaitisa Kudini kuti Tirambe Ticikaiti Divi ro Nyika?

Tingaitisa Kudini kuti Tirambe Ticikaiti Divi ro Nyika?

“Amuripi vo nyika yo pasi.”—JOHANI 15:19.

1. Pa usiku hwo kupejisira naari pasi pano inga mundhu, zvicinyi zvakagogomejera Jesu?

PA USIKU hwo kupejisira Jesu naari pasi pano inga mundhu, wakavonesa kubatikana kwake ngo pamusoro po kumbeji kwakanaka ko vateveri vake. Iyena wakatoguma pakuita mukumbiro ngo pamusoro po shwiro yondhoyo ecinanga kudari: “Andikumbiri kuti muvabvise pasi, kaveta kuti muvangwarire ku uxaixi. Ivona asipi vo pasi pano, kudari inga ndini andiripi wo pasi pano.” (Johani 17:15, 16) Pa cikumbiro ici caibva pasi po mwoyo, Jesu wakakhombija rudo hwake hwo mukati-kati kamare kuno vateveri vake no kusisira ko magama aakatanga kunanga pa usiku hwondhohwo kuno vamweni vavo kuti: “Amuripi vo nyika yo pasi.” (Johani 15:19) Zvakajeka kuti kuna Jesu zvaisisira maningi kuti vateveri vake varambe vacikaiti divi ro nyika!

2. “Nyika” yakanangaya Jesu yainga cinyi?

2 “Nyika” yakanangari Jesu yainangira vandhu vese vakaparajana na Mwari, vanotongwa ndi Sathana, vari varanda vo mujimu wo umbau no wokujikuja unobva kwaari. (Johani 14:30; VaEfeso 2:2; 1 Johani 5:19) Hina “anoita ushamwari no nyika anozondana na Mwari.” (Jakobo 4:4) Zvingaitisa kudini vese vanoda kuramba vari mu rudo hwa Mwari vave mu nyika ino asi vacikaiti divi rayo? Ticazopopora, mativi mashanu aya: Ngo kuramba takatendeseka ku Umambo hwa Mwari hunotongwa ndi Kristu ticina kotakapeamira ku zvo matongehwe o nyika, ngo kuhwisana no mujimu wo nyika, ngo kuva tinojibata  pa kusimira no kujinemesa, ngo kuramba tina upenyu hwakareruka, zve ngo kusimira zvijito zvo kumujimu.

KURAMBA TAKATENDESEKA ZVE TICINA KWATAKAPEAMIRA

3. (a) Jesu waivona kudini ngo pamusoro po zvomatongehwe o nyika? (b) Ngenyi zvinonangwa kuti vateveri vokuzojwa va Jesu vanoshanda inga vatumwi? (Batanijanyi no masoko o pasi.)

3 Kunja ko kutora rutivi mu zvomatongehwe o nyika, Jesu wakasotesesa pa kucumaera ngo pamusoro po Umambo hwa Mwari, utongi hwo mugore hwo kumbeji uhwo hwaanozotonga inga Mambo. (Danieli 7:13, 14; Luka 4:43; 17:20, 21) Ngo kudaro, paainga ari pamberi pa Govhernadhori Ponsio Pirato, wakati: “Umambo hwangu asipi hwo pasi pano.” (Johani 18:36) Vateveri vake vakagondeka vanotevejera muezaniso wake ngo kuva vakatendeseka kwaari no Umambo hwake zve ngo kuzivisa Umambo hwondhohwo pasi pese. (Mateu 24:14) Mupostori Pauro wakatara kudari: “Ngokudaro, tiri vatumwi vokubatira Kristu. . . . Tinomukumbira, ngo zina ra Kristu: Viirananyi na Mwari!” *2 VaKorinto 5:20.

4. MaKristu ese okadi-kadi anokhombijisa kudini kutendeseka kuno Umambo hwa Mwari? (Vonanyi  bhokiso riri pa pheji 52.)

4 Zvecivoneka kuti vatumwi vanoimirira utongi hwo nyikanja, ivona avanghwiniri mu shwiro jo mu nyika yovanoshandira, asi vanoramba vacina povakapeamira. Asi, vatumwi vanobesera utongi hwo nyika yavanoimirira. Izvi zvakaezanavo no vateveri vokuzojwa va Kristu ngokuti ivona i “vagari vo [‘mudenga,’ Shanduro yeNyika Itsva].” (VaFilipi 3:20) Hinadi, ngo ndava yo kuvangisira kwavo mu kucumaera Umambo, ivona vari kubesera zviuru zvo ‘mabvuta amweni’ kuti ‘vaviirane na Mwari.’ (Johani 10:16; Mateu 25:31-40) Vokupejisira  ava vanoshanda inga vaimiriri va Kristu, zve vanobesera hama jokuzojwa ja Jesu. Inga mushambi wakabatana unoimirira Umambo hwo ciKristu, zvikwata zviviri izvi zvinoramba zvicina kozvakapeamira ku shwiro jo zvo matongehwe o nyika.—Verenganyi Isaia 2:2-4.

5. Ungano yo ciKristu yakasiana kudini no Iziraeri yo kare, zve musiano wondhowo unovonekesa kudini?

 5 Asipi kutendeseka kuna Kristu basi kunoitisa kuti maKristu ave acina kwaakapeamira. Mukusiana no Iziraeri yo kare iyo yainga no nyika yo kugara yo yakapuwa ndi Mwari, itusu tinoita divi ro ukama hwo ciKristu hwo pasi pese. (Mateu 28:19; 1 Pedru 2:9) Kudari tikava tinotora rutivi pa zvikwata zvo matongehwe o nyika, kucunga kwedu pa kuvereketa ngo pamusoro po masoko o Umambo pomwe no kubatana kwedu ko ciKristu zvaizova pa ngozi. (1 VaKorinto 1:10) Kunja kwa izvi, pa nguva yo hondo, itusu taizohwisana no vatendi doni vedu, vatinopangihwa kuti tinodikana kuvada. (Johani 13:34, 35; 1 Johani 3:10-12) Ngo iyo ndava Jesu wakabvunja vajiji vake kuti vatame kuhwa hondo. Iyena wakatovabvunjazve kuti vade vavengi vavo.—Mateu 5:44; 26:52; vonanyi bhokiso rinoti: “ Ndinoramba Ndicina Kondakapeamira Here?” pa pheji 55.

6. Kujipira kwenyu kuna Mwari kunopsasa kudini kuzwira kwenyu Sezari?

6 Inga maKristu okadi-kadi, itusu takapira upenyu hwedu kuna Jehovha, haiwa kuno mundhu, ciungano co vandhu, kana kuti kuno nyika. Pana 1 VaKorinto 6:19, 20 panoti: “Amuripi veno venyu. Mbzakadi: Makatengwa ngo mutengo mukuru.” Ngo kudaro, pikija hazvo vecipa “Sézare” zvaanofanira kuti apuwe zvakadari inga rukujo, mushabo, kujidira pasi mbhera pakati kuti, ivona vanopa “Mwari bza Mwari.” (Marco 12:17; VaRoma 13:1-7) Izvi zvinobatanija kunamata kwavo, rudo hwavo hwo mwiha-wese, zve kuzwira kwavo ko kutendeseka. Kudari zvicidiwa, ivona vanotova vakanasirira kuti vapire upenyu hwavo kuna Mwari.—Luka 4:8; 10:27; verenganyi Maitiro o Vapostori 5:29; VaRoma 14:8.

KUHWISANA NO ‘MUJIMU WO NYIKA’

7, 8. Icinyi “mujimu wo nyika,” zve iwona unoshandisa kudini pa mundhu?

7 Njira imweni yo kuti muKristu arambe acikaiti divi ro nyika ngo yo kuhwisana no mujimu wakashata. Pauro wakatara  kudari: “Itisu atizivi kuaxira [‘mujimu,’ Shanduro yeNyika Itsva] wo nyika, kaveta takaaxira [‘mujimu’] unobva ka Mwari.” (1  VaKorinto 2:12) Pauro wakananga kudari kuno VaEfeso: “Kare, maigara na ibzona, ngo kuteveja . . . nyika yo pasi ino, meciteveja Sathana, mutungamiriri wo [‘utongi wo,’ Shanduro yeNyika Itsva] mbhepo; mujimu uu, wari, unofambisa vana vanotama kupurukira.”—VaEfeso 2:2, 3.

8 “Mbhepo” yo nyika kana mujimu i simba rinondundira ricikavoneki, iro rinokhwindijira ku kutama kuzwira Mwari zve rinokhwijirija “madisiro o muviri, ruyemuro hwo majiso.” (1 Johani 2:16; 1 Timoti 6:9, 10) “Utongi” hwo mujimu uhu hunovoneka pa simba rahunoita pa kukwevejera nyama inoshaisha, kukucengejera kwayo, kukutama kwayo kupingika, zve ihwona wakaparajika inga mbhepo. Kupinda zvese, ihwona ‘hungafambisa’ mundhu kana kushanda kwaari, padoko ngo padoko huciita kuti ave no mugariro jinovengwa ndi Mwari jakadiri inga umbau, kujikuja, ruemuro hwakakura, mujimu wo kujitungamirira ega pamufambiro no wo kupandukira utongi. * Ngo magama mashoma, mujimu wo nyika mukuenderera mberi ungabara mugariro ja Dhiabhu mu mwoyo mo mundhu.—Johani 8:44; Maitiro o Vapostori 13:10; 1 Johani 3:8, 10.

9. Ngo maitiro api mujimu wo nyika unganghwina mu murangariro no mu mwoyo mwedu?

9 Zvingaita kuti mujimu wo nyika umere miji mu murangariro no mu mwoyo here? Hina, izvo zvingaitika kudari mukatama kuva munongwarira. (Verenganyi Mazwi Akangwara 4:23.) Kukwevejera ko mujimu uu, kunotanga padoko ngo padoko, kangaije ngo kushamwarijana no vandhu vakaita inga vakanaka, asi zvokadi kamare vacikadi Jehovha. (Mazwi Akangwara 13:20; 1 VaKorinto 15:33) Imwimwi mungakwevera mujimu wondhowo wakashata ngo kushandisa mabhuku akashata o site jo mu interneti jinovonesa zvo umitu-umitu, mubungaijo jakashata, pomwe no mutambo jo kuphikizana —hina kubvira ku ari wese kana ciri cese cinopa murangariro wa Sathana no nyika yake.

10. Tingahwisana kudini no mujimu wo nyika?

10 Tingahwisana kudini no mujimu unokhuvaza wo nyika zve toramba tiri mu rudo hwa Mwari? Ngo kushandisa zvakaperera nasiriro jo kumujimu ja Jehovha no kuita mukumbiro kuna Jehovha kuti atipe mujimu wake mucena. Jehovha ano simba maningi kupinda Dhiabhu no nyika ino yakashata iri  mu nyara jake. (1 Johani 4:4) Ngo kudaro, zvinosisira maningi kuti tirambe tiri phedo na Jehovha ngo kuita mukumbiro!

KUJIBATA KWEDU PA KUSIMIRA NO KUJINEMESA

11. Mujimu wo nyika uri kupsasa kudini masimiriro?

11 Mavonekero o mundhu anokhombija kuti masimiriro ake, kujinemesa kwake no kujicenesa kwake kunokwevejehwa ngo mujimu wapi. Mu nyika zinji, masimiriro aderera maningi zvokuti umwe Mudaviri wo zvo mu terevhizau wakananga kuti mbaimbai pano zvinozonesa kusianisa hure no aciripi hure ngo masimiriro. Kunyazi ku vasikane vari kuaruka vaakutokwevejehwawo mu mugariro wondhowo. Inga zvakananga rimwe jhoronari, masimiriro owari nga aya: “Kuvonesa maningi muviri, kusimira ushoni kwaakushoma.” Vazinji vari kudakarira masimiriro amweni okujiregejera anokhombija mujimu wo kupandukira no wokutama kujireremeja kana kuti kutama kujida.

12, 13. Zviambi zvapi zvinodikana kutungamirira masimiriro no kujinemesa kwedu?

12 Inga vashandiri va Jehovha, tino mathangwe okuda kuva no mavonekero akarongeka, zvinoreva kuti kusimira mu maitiro akarongeka, akacena, anodakajisa zve anozwirana no zvatinonga teciita. Nguva jese, mavonekere o kunja anodikana kuvonesa “kujibata no” [‘murangariro wakanaka,’ Shanduro yeNyika Itsva] pamwepo no “maitiro auxoni” anodikana ku mundhu wese—mwanarume kana mwanakaji—[‘vanothya Mwari,’ Shanduro yeNyika Itsva]. I cokwadi kuti, cineso cedu asipi co kuda kuvoneka ngo vandhu, asi tinoda kuti tirambe tiri “mu rudo hwa Mwari.” (1 Timoti 2:9, 10; Juda 21) Hina, zvatinoda maningi ngo zvo kuva “vakaseja ngo mukati . . . Ndibzona bzino mutengo panyasi pa Mwari.”—1 Pedru 3:3, 4.

13 Mucadokanganwa kuti, kujinemesa kwedu no masimiriro edu angapsasa kuvona kunoita vamweni kunamata ko cokwadi. Gama ro ciGiriki rakashandiswa apa kuti “kujibata,” kudari rikashandisihwa pa mufambiro, rinopa murangariro  wo nderemejo, rukujo, pomwe no kureremeja mazwiro kana mavonero o vamweni. Ngo kudaro, cidisiso cedu cinodikana kuva co kudira pakutanga mazwiro o hana jo vamweni, kusiapo kudira pakutanga zvatinorangarira kuti tinotendehwa kuzviita. Pamusoro pa zvese, itusu tinoda kukuja Jehovha no vandhu vake tecikhombija pacedu inga vashandiri va Mwari, zvese ‘tecibziita tecikoja Mwari.’—1 VaKorinto 4:9; 10:31; 2 VaKorinto 6:3, 4; 7:1.

Mavonekero angu anopa rukujo kuna Jehovha here?

14. Ngo pamusoro po mavonekero edu no kujicenesa kwedu, mubvunjo japi jatinodikana kujiita pacedu?

14 Masimiriro, kujinemesa no kujicenesa kwedu zvinosisirazve maningi patinonga takabatikana mu basa ro mu munda kana patinonga tiri pa musongano jo ciKristu. Jibvunjisenyi kudari: ‘Mavonekere no kujicenesa kwangu kunoita kuti vandhu vandisotesese zvicikafaneri? Kunoita kuti vamweni vakhugunyike? Pa shwiro jondhojo, ndinovona kuti zvandinoda ndizvona zvinosisira maningi kupinda kukwaniriswa kwangu kuti ndishandiswe pa ungano?’—Nduyo 68:6; VaFilipi 4:5; 1 Pedru 5:6.

15. Ngenyi Soko ra Mwari aridiri nda-nda-nda yo mutemo ngo pamusoro po masimiriro, kujinemesa no kujicenesa?

15 Bhaibheri aridiri nda-nda-nda yo mutemo wo masimiriro, kujinemesa, no kujicenesa. Jehovha aadi kuti titame kuva no rusujunuko hwedu hwo kujikhetera kana kuti titame kushandisa simba redu ro kurangarira. Kusiapo, iyena anoda kuti tive vakaibva avo vanokwanisa kurangarijisisa ngo pamusoro  po zviambi zvo Bhaibheri zve ‘ngo kushandisa, vano simba ravo ro zwisiso rakarovejwa kuitira kuziva zvakanaka no zvakashata.’ (Vaheberi 5:14, Shanduro yeNyika Itsva) Pamusoro po zvese, itusu tinoda kutungamirihwa ngo rudo—rudo kuna Mwari no kuna vamweni vedu. (Verenganyi Marco 12:30, 31.) Pikija zvecidiwa kuti tireremeje madire ondhowo, itusu tinova no masimiriro no kujinemesa kwakasiana-siana kunotendehwa kuno maKristu. Izvi zvingavoneka ngo mukhaindi jakasiana-siana jo nguvo jinosimihwa ngo mbhungano yo vandhu va Jehovha paripese pavanonga vakaungana.

RAMBANYI MUNO UPENYU HWAKARERUKA

16. Mujimu wo nyika wakasiana kudini no zvakajijisa Jesu, zve mubvunjo japi jatinodikana kuzviita?

16 Mujimu wo nyika unocengeja zve uri kundundira mamirioni o vandhu kuti vapsake mare no zviro zvo kunyama kuitira mudakaro. Asi, Jesu wakananga kudari: “Basopanyi muemuro yese! Ngokuti, pikija muve no bzizinji, apana anopona  ngo ndava yo upfumi.” (Luka 12:15) Pikija Jesu acikazivi kutendera mugariro wo kujitambuja, kana kujiramba kunopindirija mudida, iyena wakajijisa kuti upenyu no mudakaro wokadi-kadi, unowanika ngo vaya ‘vanoziva zvinodiwa zvavo zvo kumujimu,’ zve vanoramba vano upenyu hwakareruka, uho hunobatikana basi pa zviro zvo kumujimu. (Mateu 5:3, Shanduro yeNyika Itsva; 6:22, 23) Jibvunjisenyi pacenyu kuti: ‘Ndinodaviradi kamare here zvakajijisa Jesu, kana kuti ndinokwevejehwa ndi “baba wo unyepi”? (Johani 8:44) Magama angu, zvandinodadamira, zvandinodira pa kutanga pomwe no mararamire angu, zvinovonesenyi?’—Luka 6:45; 21:34-36; 2 Johani 6.

17. Verengejanyi makomborero anowanika ngo vaya vanoramba vano upenyu hwakareruka.

17 Jesu wakananga kudari: “Uzivi hunozivika ngo maitiro ahwo.” (Mateu 11:19) Vonanyi mabesero anowanika ngo vaya vanoramba vano upenyu hwakareruka. Ivona vano mudakaro wokadi-kadi mu basa ro Umambo. (Mateu 11:29, 30) Avabatwi ngo kuthimwa-thimwa kucikafaneri nee dambujiko ro mu murangariro rinoviiswa ndikona. (Verenganyi 1 Timoti 6:9, 10.) Ngo kuva kwavo vanodakara ngo kuwana basi zvinodiwa mu upenyu, ivona vanokwanisa kupeja nguva no mbhuri javo no maKristu doni. Inga muviyo ivona vanovata hope jinoza. (Mucumaeri 5:12) Vanowana mudakaro unoviiswa ngo kupa, ngo kushandisa mukana uri wese kuti vape. (Maitiro o Vapostori 20:35) ‘Ruvetero hwavo hunomwaxaixika’ zve vano runyararo no mudakaro wo mukati. (VaRoma 15:13; Mateu 6:31, 32) Makomborero ao ano mutengo mukuru!

SIMIRANYI “ZVIJITO BZO IMBI”

18. Bhaibheri rinosanangurisa kudini magariro o muvengi wedu, zve maitiro ake no mahwisanire atiri kuita naye?

18 Vaya vanoramba vari mu rudo hwa Mwari vanowana bvikiro yo kumujimu pa kuhwa na Sathana, uwo anoda kufungira maKristu kuti atame kuwana mudakaro no upenyu ucikaperi. (1 Pedru 5:8) ‘Ngokuti itisu atihwisani no vandhu vano ngazi no nyama, tinojipana no [‘mujimu jakashata,Shanduro  yeNyika Itsva], jiri vatongi, vatungamiriri, vanyisi vo nyika yo cidima no [‘mujimu,’ Shanduro yeNyika Itsva], jakaxata jinogara [ku ndau jo kumujimu].’ (VaEfeso 6:12) Gama ro kuti “kujipana” rinopa murangariro wo kuti kuhwisana kwedu asipi ko ndhambo no ndhambo—notiri ku ndau imweni yakangwaririka—asi ngo ko kuimisana. Kusiapo izvo magama o kuti “vatongi,” “vatungamiriri,” pomwe no “vanyisi vo nyika,” anokhombija kuti kuhwisa ko mujimu jakashata kwakanasa kurongwa zve kuno cinangwa.

19. Sananguranyi zvijito zvo kumujimu kuitira muKristu.

19 Inga vandhu, itusu tino kurembejeka, zve kuno zvatinokonehwa kuita, asi pikija zvakadaro itusu tingakwanisa kuwina. Kuitisa kudini? Ngo kushandisa “zvijito bzo imbi zva Mwari.” (VaEfeso 6:13) Yecisanangura ngo pamusoro po zvijito zvondhozvo, VaEfeso 6:14-18 inoti: “Ndibzo, makaima, sunganyi mu cihunu menyu ngo bzokadi, makasimira muthavo wo ururami. Simiranyivo magwada mu soka menyu, kuti mukasike kutokotesa Vangeri ro rugarisiko, mecibata mu nyara muviko wo rutendo, nguva yese: Mozokwanisa kujima ndiwona mupaxa yese yakabwaka ya Sathana. Toranyivo cigoko co ruponeso, no banga ro mujimu, riri izwi ra Mwari. Namatanyi njiku jese, itanyi mukumbiro wo mufumbo wese no kupota, mu mujimu.”

20. Kuitisa kudini mugariro wedu wakasiana no wo masoca kamare?

20 Zvecivoneka kuti iyi i nasiriro ya Mwari, zvijito izvi zvo kumujimu zvinodokwanisa kutibvikira, kudari tikazvisimira nguva jese. Mukusiana no masoca kamare, ao anopeja nguva yakati kuti ari mu runyararo, maKristu ari mu hondo icikacijiki, yokuti kupona-kana-kufa, iyo inozopera Mwari paanozoparaja nyika ya Sathana no kukhandira mujimu jese jakashata mu ujiki. (Apokalipsi 12:17; 20:1-3) Ngo kudaro, amudikani kuremba kudari mucihwisana no kurembejeka kana zvidisiso zvakashata, ngokuti tese tinodikana ‘kujitambuja’ pacedu kuitira kuti tirambe takagondeka kuna Jehovha. (1 VaKorinto 9:27) Ngo zvokadi kuti, tinodikana kuneseka patinonga ticikahwisani!

21. Ngo yapi njira imwe basi ingatigumisa pa kuwina pa hondo yedu yo kumujimu?

 21 Kusiapo izvi, atingawini mu hondo iyi ngo simba redu basi. Ngo ndava iyo, Pauro anoticeukija kuti tinodikana kuita mukumbiro kuna Jehovha “njiku [kana nguva] jese, . . . mu mujimu.” Asi pa nguva imweyo, itisu tinodikana kupurukira Jehovha ngo kujija Soko rake zve kusonganirana no ‘vahwi’ doni vedu nguva jese, ngo kuti atiripi tega mu kuhwa uku! (Filemoni 2; Vaheberi 10:24, 25) Vese vanogondeka mu mativi ese aya, avagumi pa kuwina basi, asi vanokwanisavo kubvikira gonda ravo parinophikizwa.

IVANYI MAKANASIRIKA KUTI MUBVIKIRE GONDA RENYU

22, 23. (a) Ngenyi tinodikana kuramba takanasirira nguva jese kuitira kuti tibvikire gonda redu, zve mubvunjo japi jatinodikana kuzviita? (b) I shwiro yapi icazobhuyiwa mu cipauko cinotevera?

22 Jesu wakananga kudari: “Ngokuti amuripi vonyika yo pasi . . . nyika inomunyenya ngo njioyo.” (Johani 15:19) Ngo ndava iyo, maKristu nguva jese anodikana kugara akanasirira kuitira kubvikira gonda rawo, asi acizviita ngo nderemejo zve akapfava. (Verenganyi 1 Pedru 3:15.) Jibvunjisenyi kudari: ‘Ndinozviziva here kuti ngenyi nguva jimweni Zvapupu zva Jehovha zvinova no mavonero akasiana no o vazinji? Pandinophikizwa ngo kuva no mavonero akasiana, ndinokhohwa here kuti zvinonanga Bhaibheri no muranda wakagondeka no wakangwara zvakarungama? (Mateu 24:45; Johani 17:17) Zve kudari iri shwiro yokuita zvakarungama pa meso pa Jehovha, kusiapo kuva ndakanasiririka basi kuti ndive ndakasiana, ndinodakara ngo kuva ndakasiana here?Nduyo 34:3; Mateu 10:32, 33.

23 Kazinji cido cedu co kuramba ticikaiti divi ro nyika cinodihwa pa muejo ngo maitiro amweni acikanasi kuvoneka kamare. Inga muezaniso, kudari ngo zvanangwaya Dhiabhu anoeja kupausa vashandiri va Jehohva mu nyika, acishandisa mabungaijo o nyika. Tingakhetesa kudini mabungaijo akanaka anozotisia takadakara zve tino hana yakacena? Shwiro iyi icazobhuyiwa mu cipauko cinotevera.

^ ndim. 3 Kubvira mu Pentekoste yo 33 N.V.Y., Kristu waishanda inga Mambo pakati po ungano yo vateveri vake vokuzojwa pasi pano. (VaKolosi 1:13) Mu gore ra 1914 Kristu wakaashira utongi inga mambo pakati po “umambo hwo pasi pano.” Ngokudaro maKristu okuzojwa nyamasi uno ari kushandavo inga vatumwi vo Umambo hwo uMesia.—Apokalipsi (Cakapangijihwa) 11:15.

^ ndim. 8 Vonanyi bhuku Kukurukurirana Tichishandisa Magwaro (mu Cishona), mapheji 249-252, rakabudiswa ngo Zvapupu zva Jehovha.

^ ndim. 65 Vonanyi masoko o kuengejera ari pa mapheji 212-215.