Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MASOKO O KUENGEJERA

Kutonga Kutama Kuzwana mu Shwiro jo Nyagoso

Kutonga Kutama Kuzwana mu Shwiro jo Nyagoso

Inga zvakatahwa pa 1 VaKorinto 6:1-8, mupostori Pauro wakananga ngo zvokuendesana kubanje pakati po vatendi. Iyena wakatatija kucamwa ngokuti maKristu amweni o ku Korinto aienda “kotongwa ngo vacikazivi kurungama.” (Vhesi 1) Pauro wakapa mathangwe akavanga okuti ngenyi maKristu aadikani kookeshari muKristu doni kubanje, asi anodikana kutonga kutama kuzwana mukati mo ungano. Ngatende tivone mathangwe amweni o mbhangiro ii yakafemehwa perepo tozopsasa padoko mugariro jimweni jokuti ndhungamiro iji ajishandi.

Kudari tino kutama kuzwana mu zvo nyagoso no hama yo ciKristu, tinodikana kupsaka kutonga mu njira inozwirana no zvinoda Jehovha, kuciripi ngo madiro edu. (Mazwi Akangwara 14:12) Inga zvakakhombija Jesu, zvakanaka maningi kukasika kutonga kutama kuzwana kucito kwakura koita ndava huru maningi. (Mateu 5:23-26) Zvinosuruvarisa ngo zvokuti, maKristu amweni anokonehwa kutonga kutama kuzwana kwao, mbhera oendesana kuutongi hwo nyika. Pauro wakati: ‘Munomangarirana umwe noumweni kureva kukonehwa kwenyu, BMAA.’ Ngenyi? Thangwe guru ngo rokuti zvingasvipisa zina rakanaka ro ungano no ra Mwari wotinonamata. Tinorangarijisisa mubvunjo wa Pauro wokuti: “Amutenderi ngenyi kuxaixihwa?”—Vhesi 7.

Pauro wakanangazve kuti, Mwari wakapa ungano nasiriro yakanaka yo kutonga ndiyona ndava zinji. Vakuru vo ungano i vanarume vo ciKristu vakava vakangwara ngo kuziva kwavo zvokadi zvo Matahwa, zve Pauro wakati ‘vanokwanisa kutonga hama’ pakava “no ndhango jondhojo.” (Mavhesi 3-5) Jesu wakatatija kuti kutama kuzwana ngo kuitirana uposi hwakakura, hwakadari inga magumba kana kuti magumbu no kubirana razawe, zvinodikana kutongwa mu kuzwirana no njira ndhatu iji: Yokutanga, kuvangisira kutonga shwiroyo muri mega maposeranaro; yocipiri, kudari zvikanesa pa njira  yokutanga, danijanyi capupu cimwe kana zviviri; njira yocitatu, kudari kunesaneko kukaramba kutongeka, endesanyi shwiroyo ku ungano iciimirihwa ngo vakuru.—Mateu 18:15-17.

Zvokadi, vakuru vo ciKristu asipi vapangiri vo mutemo kana vo zvonyagoso zve avadikani kuva pa zvigaro izvi. Avadikani kutongera hama kuti ripirananyi mutengo wakati mu shwiro jo nyagoso. Asi, vanodikana kubesera vese kuti vashandise Matahwa no kutonga shwiroyo ngo ushamwari-shamwari. Mu shwiro jinonesa, kangaije vangasunga kubvunjisa ku muvonereri wo ndharaundha kana hofisi yo cine yo Zvapupu zva Jehovha. Asi, kuna mugariro jicikadikani kamare kushandisira mbhangiro ya Pauro. Ngojapi jimweni jakona?

Mu shwiro jimweni, kookeshari kubanje kungava matongero aushoni kana ngozvinodiwa pa mutemo no kupeja mapope. Inga muezaniso, kuendesa shwiroyo ku vatongi vo nyika ingava njira imwe basi kuitira kurambana, kuwana citendehwa co kurera mwana, njira yo kupagahwi kuitira kutenga zvinodiwa, kupagahwi ngo kushandira mundhu kana kushandisihwa zviro zvako, kutaririswa inga umwe wo muvigisi wo mare kuitira impereza ikambhwera izopuwe vashandi no kuashira ida. Kunazve shwiro jimweni jokuti hama ingavangijihwa kuenda kokeshari kuitira kubvikirihwa ngo utongi. *

Kudari kuenda kookeshari kukaithwa ngo mujimu wo kupsaka runyararo, muKristu anonga aciripi kuphwanya mbhangiro yakafemehwa ya Pauro. * MuKristu anodikana kutambujikira pakutanga zina ra Jehovha, runyararo no rubatano hwo ungano. Vateveri va Kristu vanozvitatija maninginingi ngo rudo hwavo, zve “rudo . . . ahupsangi kuda kwahwo.”—1 VaKorinto 13:4, 5; Johani 13:34, 35.

^ ndim. 2 Zvingathuka zvaitika, muKristu waitira muKristu doni ndava huruwane—yakadari inga kujipa, kubhinya, kuuraya kana kuba zvakawanda. Mu shwiro jakadari, muKristu aahwisani no matahwa akaenda kookeshari ku umambo, pikija zvinozoita kuti azotongwe kubanje kana kucikwadhra.

^ ndim. 3 Kuitira kuwana masoko mazinji, vonanyi Murindiri wo 15 ya Soka ra Baba, 1997, mapheji 17-22, no wo 15 ya Gumi Guru, 1991, mapheji 25-28 (mu ciShona).