Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 7

Munoreremeja Upenyu inga Zvinoita Mwari here?

Munoreremeja Upenyu inga Zvinoita Mwari here?

“Ngokuti ndimwi cinyuke co uhomi.”—NDUYO 36:9.

1, 2. Ngo capi cipo catinaco cakabva kuna Mwari cinosisira maningi nyamasi uno, zve ngenyi?

BABA vedu vo mugore vakatipa ciro cinosisira maningi—cipo co upenyu inga vandhu vano zivo vanokwanisa kukhombija mugariro jake. (Genesi 1:27) Kubvira ku cipo ici, itusu tinokwanisa kushandisa zviambi zvo Bhaibheri. Ngo kuzvishandisa, tinova vandhu vanoenderera mberi mukuibva kumujimu, vanoda Jehovha zve ‘vano simba ravo ro zwisiso rakarovejwa kuitira kuziva zvakanaka no zvakashata.’—Vaheberi 5:14, Shanduro yeNyika Itsva.

2 Kukwanisa kushandisa zviambi zvo Bhaibheri zvinosisira maningi nyamasi uno, ngo kuti nyika iri kuramba yecindonesa zvo kuti pikija mutemo jive jakawandisa zvakadini, ijona ajishandi ku mugariro jese jo mu upenyu. Muezaniso ngo wo siensia yo zvokurapa, maningi-ningi ku divi ro mutombo no marapihwe anobatanija ngazi. Iri i divi rinodikana zve rinosisira maningi kuna vese vanoda kuzwira Jehovha. Pikija tecizwisisa zviambi zvikuru zvo Bhaibheri, tinodikana kukwanisa kuita zvisungo zvo ungwaru zvinosia hana yedu yakanaka zve zvinoita kuti tirambe tiri mu rudo hwa Mwari. (Mazwi Akangwara 2:6-11) Ngativonenyi zvimweni zvo zviambi zvondhozvo.

UPENYU NO NGAZI ZVAKACENA

3, 4. Ndirini uceni hwo ngazi hwakatanga kunangwa mu Matahwa, zve ihwona hwakacijikira mu zviambi zvapi?

3 Kaini paakauraya Abheri, Jehovha ndipona paakatanga kukhombija kuti upenyu no ngazi zvakabatana kamare zve zvese zvakacena. Mwari wakati kuna Kaini. “Ndinozwa izwi ro ngazi yo munukuna wako riri kumimira kondiri kubva mu mabvu!”  (Genesi 4:10) Mu mavonero a Jehovha, ngazi ya Abheri yaimirira upenyu hwake, hwakabviswa ndi Kaini ngo maitiro akashata. Ngo kudaro, ngo manangiro amweni, ngazi ya Abheri yakamima pamberi pa Jehovha kuitira kuti ihwirijihwe.—Vaheberi 12:24.

4 Pasure po Ndambi ya Nowa, Mwari wakapekeja vandhu rusujunuko wo kuha nyama jo zvinyama, haiwa ngazi. Mwari wakananga kudari: “Kaveta mucadoha—nyama no mwiha—bzinoti no ngazi. Garanyi meciziva kuti ndinozobvunjisa ndava yo ngazi yenyu.” (Genesi 9:4, 5) Mupango uu unoshanda ku mubarihwana wese wa Nowa mbhera mu njiku jedu jino. Izvi zviri kuhwirijirazve magama a Mwari kuna Kaini—kuti mwiha, kana upenyu hwo zvisikwa zvese unoimirihwa ngo ngazi. Mupango uu unokhombijazve pambhene kuti vandhu vese vacikareremeji upenyu no ngazi vacazojidavirira pamberi pa Jehovha, uwo anopa upenyu.—Nduyo 36:9.

5, 6. Mutemo wa Mosi waikhombijisa kudini kuti ngazi yakacena zve inosisira? (Vonanyivo  bhokiso pa pheji 78.)

5 Mativi maviri aya anosisira o cokwadi, aiwanika mu Mutemo wa Mosi. Pa VaLevi 17:10, 11 panoti: “Mulsraeli wese, . . . anoha ngazi, mufumbo uriwese wo ngazi, ndinozonyangajihwa ndiyena, ndozomupeja pakati po vandhu vake. Ngokuti kurarama ko muviri kuri mu ngazi. Ngazi iyo ndakamupa kuti muite ndiyona [‘mupiro,’ Shanduro yeNyika Itsva] wo kuripira uxaixi, mweciidururira panyezuru po dandiro, ngokuti ngazi inopona inofujura uxaixi.” *—Vonanyi bhokiso rinoti: “ Ngazi Ingaviisa Ruregerero” riri pa pheji 76.

6 Kudari ngazi yo cinyama caurawa icizivi kushandiswa pa nyezuru po dandiro, iyona yaipopomejwa pasi. Ngo njira yokufananijira, upenyu waihwirira ku Muambi waho. (Deuteronòmio 12:16; Ezekieli 18:4) Vonanyi kuti vaIziraeri avacaidikana kupindirija mudida ngo kueja kubvisa ngazi yese kamare pa  nyama yavaiuraya. Zvecivoneka kuti cisikwa caiuraiwa no kubviswa ngazi ngo maitiro akarungama, muIziraeri waikwanisa kuha no hana yakacena, ngo kuti kubvisa ngazi uku kunonga kuri kukhombija nderemejo inofanera kuno Mupi-wo-Upenyu.

7. Dhavhidhi wakakhombijisa kudini kureremeja uceni hwo ngazi?

7 Dhavhidhi, uwo ‘waidakajisa’ mwoyo wa Mwari, wakakwanisa kuzwisisa ciambi ciri pasi po mutemo wa Mwari ngo pamusoro  po ngazi. (Maitiro o Vapostori 13:22) Bvaza imweni paainga ano nyota maningi, vanarume vake vatatu vakaita simba ro kunghwina mu akampamento yo vavengi, voenda koocera kumwa pa umwe mwimbo, voviisa kwaari. Dhavhidhi wakazvivona kudini? Iyena wakabvunjisa kudari: ‘Iyi asipi ngazi yo vandhu avo vakaenda koojipindisa mu ngozi yo kupona kwavo here?’ Mukuvona ka Dhavhidhi, kumwa iyani yainga ngazi yo upenyu hwo vanarume vake. Ngo kudaro, pikija wainga no nyota iyena ‘wakaidurura kuna Jehovha.’—2 Samueli 23:15-17, Baiberi Mazwi Akacena aMwari.

8, 9. Mavonero a Mwari ngo pamusoro po upenyu no ngazi akacinja here ngo kugajwa ko ungano yo ciKristu? Sananguranyi.

8 No papera makore anokhwedera kuita 2.400 Nowa naapuwa mutemo ngo pamusoro po ngazi, zve nopapera makore anokhwedera kuita 1.500 citenderano co Mutemo no capera kuitwa, Jehovha wakafemera mukhumbi unotonga wo ungano yo kutanga yo ciKristu kuti utare kudari: ‘Ngo kuti mujimu mucena, na itusu takheta kutama kuengejera muthwaro umweni komuri kuciripi ku zviro izvi zvinodikana kuti murambe muciregera zviro zvakapihwa zvithombi, ngazi, zvakakakwa zve uhure.’—Maitiro o Vapostori 15:28, 29, Shanduro yeNyika Itsva.

9 Zvakajeka kuti mukhumbi unotonga wakakwanisa kuziva kuti ngazi yakacena zve kushaisha kuishandisa i cishaishi cakakura kuezana no cokunamata zvithombi kana kuhura. MaKristu okadi-kadi anodavira mutemo wondhowo. Kusiapo izvo, ivona vanokwanisa kudakajisa Jehovha pakuita zvisungo ngo pamusoro po kushandisa ngazi, ngo kuti vanorangarijisisa zve voshandisa zviambi zvo Bhaibheri.

KUSHANDISA NGAZI PA KURAPA

Ndaizosanangurisa kudini cisungo cangu kuna dhokodheya ngo pamusoro po kushandisa zvimativi zvinobviswa mu ngazi?

10, 11. (a) Zvapupu zva Jehovha zvinovona kudini ngo pamusoro po ngazi yese kamare kana mativi marongomuna makuru? (b) Mu mativi api maKristu anova no mavonero akasiana ngo pamusoro po ngazi?

10 Zvapupu zva Jehovha zvinoziva kuti ‘kuregera . . . ngazi’ zvinoda kureva kutama kutendera kudihwa ngazi, kupekeja kana kuviga yavo kamare kuti vazohwirijihwezve. Kusiapo basi kuzwira mutemo wa Mwari, ivona avadavirivo mativi marongomuna aya o ngazi: Maserura o kupsuka, maserura o kucena, mapraketa no prasma.

11 Nyamasi uno, mukushandisa amwe maitiro, kazinji mativi marongomuna aya anopauhwa-pauhwa kuita zvimativi zvidoko zvinobviswa mu ngazi zvinoshandiswa mu maitiro akasiana-siana. MuKristu waizotendera zvimativi izvi zvinobviswa mu ngazi here? Iyena waizozvivona kuva “ngazi” here? Umwe nga umwe anodikana kuita cisungo cake pa shwiro iyi. Ndizvona zvondhozvo zvinoitikavo no marapiro akadari inga hemodiálise, hemodiluição, recuperação sanguínea, marapiro anoda kuti pashandiswe ngazi yake mundhu kamare, kudari icikazivi kutanga yavigwa.—Vonanyi Masoko o Kuengejera, pa mapheji 215218.

12. Tinodikana kuvonesa kudini shwiro jinobatanija hana zve tinodikana kuitenyi patinosotana najo?

12 Kureva kuti Jehovha aana basa no zvisungo zvo shwiro jo mundhu ega here? Haiwa, ngo kuti iyena anodisisa maningi kuziva murangariro jedu no zvinotindundira kuti tiite ciito.  (Verenganyi Mazwi Akangwara 17:3; 24:12.) Ngo kudaro, patinopera kupsakisira no mukumbiro ngo pamusoro po mutombo no marapihwe ari ese, tinodikana kuzwira hana yedu yakarovejwa ngo Bhaibheri. (VaRoma 14:2, 22, 23) Zvokadi, vamweni avadikani kutivangirija kuita zvavaizoita nee kutibvunjisa kudari: “Mwaizoitenyi kudari mainga muri imwimwi muri pa shwiro yakadari?” Mu shwiro jakadari, muKristu umwe nga umwe anodikana “kuthwara muthwaro wake.” *VaGalàsia 6:5; VaRoma 14:12; vonanyi bhokiso rinoti: “ Ndinovona Ngazi Inga Yakacena Here?” pa pheji 81.

MUTEMO JA JEHOVHA JINOKHOMBIJA RUDO HWAKE INGA BABA

13. Mutemo no zviambi zva Jehovha zvinokhombijenyi ngo pamusoro pake? Ipanyi muezaniso.

13 Mutemo no zviambi zvinowanika mu Bhaibheri, zvinokhombija kuti Jehovha i Mupi wo Mutemo zve ndi Baba vanoneseka kamare ngo kuda kugarisika ko vana vavo. (Nduyo 19:7-11) Pikija mupango wo “kuramba . . . ngazi” ucikazivi kupekejwa inga ndhungamiro yo uhomi, iwona unotingwarira ku zvineso zvinoviiswa ngo kudihwa ngazi. (Maitiro o Vapostori 15:20) I zvokadi kuti, vazinji, pa divi ro kurapa vanovona kuti kuceka peresau pacikashandiswi ngazi ndiwona maitiro akanaka maningi pa marapiro o mazuva ano. Kuno maKristu okadi-kadi kurapa pacikashandiswi ngazi zvinokhombija uzivi hucikapimiki hwa Jehovha no rudo hwake inga baba.—Verenganyi Isaia 55:9; Johani 14:21, 23.

14, 15. (a) Rudo hwa Mwari kuno vandhu vake unovonekesa kudini mu mutemo jake? (b) Mungashandisisa kudini zviambi zvinobesera kungwaririka?

14 Kudisisa ka Mwari kuti vandhu vake vagare zvaushoni mu Iziraeri yo kare kwaivoneka mu mutemo jake muzinji. Inga muezaniso, iyena waida kuti nyumba jo vaIziraeri jive no rusosa pa nyezuru kuitira kungwarira ngozi, zvecivoneka kuti iyo yainga ndau yaiitihwa mabasa amweni. (Deuteronòmio 22:8; 1 Samueli 9:25, 26; Neemia 8:16; Maitiro o Vapostori 10:9) Mwari  wakapavo mupango wo kuti n’gombe jainga no ushungu jaidikana kungwarihwa. (Exodo 21:28, 29) Kureja-reja mupango iji zvaikhombija kutama kureremeja rugarisiko hwo vamweni zve zvaipekeja ndava yo ngazi.

15 Mungashandisisa kudini zviambi zvakacijikira mu mutemo iji? Madini kunasa kurangarira ushoni ngo pamusoro po mwotokari wenyu, mafambisire amunoita, zvifuyo zvenyu, nyumba yenyu, ndau yamunoshandira no mutambo jamunokheta? Mu nyika jimweni, ngozi jiri kuuraisa vocidoko vazinji, kazinji ngo kuti ivona vanojipsaka vega. Asi, vocidoko vanoda kuramba vari mu rudo hwa Mwari, vanoreremeja upenyu zve avapsaki kudakajihwa ngo mutambo jino ngozi. Ivona avajicengeji ngo kurangarira kuti mujaha aakhuvaziki. Kusiapo izvi, ivona vanodakajihwa ngo ujaha hwavo ngo kumbzenga ngozi jicina revo.—Mucumaeri 11:9, 10.

16. Ciambi capi co Bhaibheri cinoshanda pa shwiro yo kubvisa mimba? (Vonanyivo masoko o pasi.)

16 Pikija upenyu hwo mwana acito abahwa huno mutengo mukuru pamberi pa Mwari. Mu Iziraeri yo kare, kudari ari wese akakhuvaza mwanakaji ano mimba zve mwanakajiwo kana mwana wakeo wofa, Mwari waivona wazviitaro inga muurai, zve mundhuwo waidikana kuripa “uhomi . . . ngo uhomi.” * (Verenganyi Exodo 21:22, 23.) Waro, rangariranyi basi mazwiro a Jehovha paanovona mutengo ucikaverengeki wo mimba jinobviswa ngo cabomo gore ngo gore, zinji jinobviswa basi ngo kuti vanozviitaro vanoda kujidakajisa basi no kuhura.

17. Mungatondhoja kudini mundhu wakambobvisa mimba acito ajija cokwadi ngo pamusoro po ndhungamiro ja Mwari?

17 Waro, tingativo kudini ngo pamusoro po mwanakaji wakambobvisa mimba acito aziva cokwadi co Bhaibheri? Kureva kuti ari ndhambo no kuwana unyasha hwa Mwari here? Haiwa!  Zvokadi, mundhu anokhauya kamare angawana kuregerehwa ndi Jehovha kwakacijikira pa ngazi ya Jesu. (Nduyo 103:8-14; VaEfeso 1:7) Hina, Jesu pacake wakananga kudari: “Inini andizivi kuviira vanasi, kaveta vaxaixi kuti vatenderuke.”—Luka 5:32.

 RAMBANYI MURANGARIRO JO KUZONDA!

18. Bhaibheri rinokhombijisa kudini shwiro huru inobara kupopomejwa ko ngazi yakawanda?

18 Kunja ko kutama kukhuvaza vamweni, Jehovha anoda kuti tibvite mu mwoyo mwedu murangariro ungatiita kuti tigume pakupopomeja ngazi—kuzonda. Mupostori Johani wakatara kudari: “Ndiani anonyenya hama yake muurai.” (1 Johani 3:15) Mundhu wakadari aagumiri pa kuzonda hama yake basi, asi anotoda kuti ife. Cizondo cake cingavoneka ngo maitiro o kunangira manyepo kana ngo maitiro o kupumbha zvokuti kudari cainga cokwadi waanonangiraro manyepo, waizofanera kuwana rutongeso hwa Mwari. (VaLevi 19:16; Deuteronòmio 19:18-21; Mateu 5:22) Ngo kudaro, zvinosisira maningi kuti tishande ngo simba kuitira kubvita mu mwoyo mwedu ushati uri wese ungavemo!—Jakobo 1:14, 15; 4:1-3.

19. Mavonero api anoita wiya anotungamirihwa ngo zviambi zvo Bhaibheri inga zviri pa Nduyo 11:5 zve VaFilipi 4:8, 9?

19 Vaya vanoreremejaya upenyu inga zvinoita Jehovha zve vanoda kuramba vari mu rudo hwake, vanodikanavo kutiza mushovo wese wo ugevenga. Pa Nduyo 11:5, BMAA panoti: ‘Asi mwiha wake Jehovha unonyenya vakashata, naavo vanoda ugevenga.’ Vhesi iyi ainangi basi undhu hwa Mwari, iyona inopa ndhungamiro ngo pa musoro po mararamire atinodikana kuita. Iyona inondundira vaya vanoda Mwari kuti vatize mukhaindi uri wese wo mabungaijo aizovaita kuti vasakurire cido cokuita zvo ugevenga. Mukufanana, masoko okuti Jehovha ndi “Mwari wo rugarisiko” anondundira vashandiri vake kuti vazaje murangariro no mwoyo mwavo ngo zviro zvinokojwa, zvauxoni bzese no zvese zvakanakira kukujwa, izvo zvinoviisa rugarisiko.—Verenganyi VaFilipi 4:89.

MUCABATANA NO ZVISUNGO ZVINO NDAVA YO NGAZI

20-22. Ngo rapi divi ro maKristu ngo pamusoro po nyika, zve ngenyi?

20 Pa meso pa Jehovha, nyika yese ya Sathana ino ndava yo ngazi. Mu Matahwa, mugariro wo zvomatongehwe o nyika, unoimirihwa ngo cikara co musora, ico ciri kuuraya mutengo ucikaverengeki wo vandhu, kubatanija vashandiri va Jehovha.  (Danieli 8:3, 4, 20-22; Apokalipsi (Cakapangijihwa) 13:1, 2, 7, 8) Mukubatana no utongi wo zvomatongehwe o nyika, uwo unofananijihwa no cikara, vo zvosiencia no zvisungo zvo kutengeserana, vari kuumba mbvuti jimweni jakashatisisa kamare, veciwana mare yakawanda maningi. Izvo zvinokhombija kamare kuti “nyika yese yo pasi iri mu nyara ya Sathana”!—1 Johani 5:19.

21 Ngo ndava yo kuti vateveri va Jesu ‘avaripi vo nyika yo pasi’ asi vanoramba vacina kovakapeamira ku zviro zvomatongehwe o nyika no zvo hondo, ivona avavi no ndava yo ngazi kana kutora rutivi pa mbhungano ino ndava yo ngazi. * (Johani 15:19; 17:16) Zve mukutevejera Kristu, ivona avahwirijiri ngo ugevenga kuno vaya vanovateverera. Kusiapo izvo, vanokhombija rudo kuno vavengi vavo, kunyazi kutovakumbirira kamare.—Mateu 5:44; VaRoma 12:17-21.

22 Pamusoro po zvese, maKristu okadi-kadi aabatani no “Babilónia guru,” iro riri mutongi wo pasi pese wo ciara co  manyepo zve rino ndava yo ngazi yakakura maningi kupinda vese. Soko ra Mwari rinoti: “Moriri makawanika ngazi yo vaporofeti no vacena mwoyo, no yo vese vakapihwa [kana kuurawa] mu nyika yo pasi.” Ngo kudaro, tiri kungwajwa kuti: “Vandhu vangu budanyi moriri.”—Apokalipsi 17:6; 18:2, 4, 24.

23. Zvinoda kurevenyi kubuda mu Bhabhironi Guru?

23 Kubuda mu Bhabhironi Guru zvinopinda kupfujurisa zina pa nda-nda-nda yo vanotora rutivi koriri. Zvinobatanija kuzonda zviito zvakashata zvinotendehwa kana kuitwa pambhene ngo ciara co manyepo—zvakadari inga uhure, kunghwinira mu zvomatongehwe o nyika zve kudisisa kuwana pfuma. (Verenganyi Nduyo 97:10; Apokalipsi 18:7, 9, 11-17) Kazinji zviito izvi zinopa ndava yo ngazi.

24, 25. (a) Mwari anoshandisenyi kuti akhombije unyasha kuno mundhu wakakhauya ngo kuva no ndava yo ngazi? (b) Izvi zvaiezanisihwa nenyi mu nguva jo Bhaibheri?

24 Ticito tanghwina mu kunamata ko cokwadi, umwe nga umwe wedu, ngo maitiro ari ese, waibesera mugariro wa Sathana, ngo kudaro, taingavo no ndava yo ngazi. Asi, ngo ndava yo kuti takacinja mufambiro wedu, tosakurira gonda redu ku muripo wo kujipira wa Kristu, zve topira upenyu hwedu kuna Mwari, takawana unyasha hwa Mwari no kubvikirika kumujimu. (Maitiro o Vapostori 3:19, Shanduro yeNyika Itsva) Kubvikirika kondhoko mu nguva jo Bhaibheri kwaiezanisihwa no madhorobha o kutizira.—Bziverengo 35:11-15; Deuteronòmio 21:1-9.

25 Nasiriro yondhoyo yaishandisa kudini? Kudari muIziraeri akauraya umweni acikadi, waidikana kutiza woenda ku rimwe ro madhorobha o kutizira. Perepo vatongi vanokwanirisa, vakapera kuitonga ndaveyo, wiana wakauraya acikadi waidikana kugara mu dhorobha ro kutizira mbhera mupiri mukuru wofa. Perapo waizobuda hake woenda koogara ku ndau iri yese. Uu i muezaniso wakanaka maningi unokhombija unyasha hwa Mwari no mareremejere aanoita upenyu hwo mundhu. Mukuezanisira, nyamasi uno madhorobha o kutizira i nasisiriro ya Mwari, ecishandisa muripo wo kujipira wa Kristu, kuti atibvikire ku rufu ngo kuphwanya mutemo jake ticikadi ngo pamusoro  po uceni hwo upenyu no ngazi. Imwimwi munoreremeja here nasiriro iyo waro? Mungakhombijisa kudini kuti munoireremeja? Maitiro amweni o kukhombija zvondhozvo, ngo o kukoka vamweni kuti vabatane nemwi mu dhorobha ro kutizira ro kuezanisira, zvecivoneka kuti “matambujiko makuru” ari kukhwedera ngo kukasika.—Mateu 24:21; 2 VaKorinto 6:1, 2.

KUREREMEJA UPENYU NGO KUCUMAERA MASOKO O UMAMBO

26-28. Kuitisa kudini mugariro wedu nyamasi uno wakafanana no wainga no muphorofita Ezekieri, zve tingaitisa kudini kuti tirambe tiri mu rudo hwa Mwari?

26 Mugariro wo vandhu va Mwari nyamasi uno unotirangarijisa mugariro wo muphorofita wo kare, Ezekieri, uwo wakapuwa basa ndi Jehovha ro kushanda inga murindiri wo kumujimu wo nyumba yo vaIziraeri. Mwari wakati: “Wecizwa izwi ro muromo wangu, unodikana kuvangwaja, ngo zina rangu.” Kudari Ezekieri naakava ecireja-reja basa raakapuwa, waizova no ndava yo ngazi yo vaizoparajwa paizoparajwa Jerusarema. (Ezekieli 33:7-9) Asi Ezekieri wakapurukira zve aazivi kuva no ndava yo ngazi.

27 Nyamasi uno, takasotana no mugumo wo nyika ino yese ya Sathana. Ngo kudaro, Zvapupu zva Jehovha zvino mutoro zve rudakajiso wo kutokotesa “njiku” yokuti Mwari “anozoviisijira [kana kuhwirijira]” pamwepo no masoko o Umambo. (Isaia 61:2; Mateu 24:14) Imwimwi muri kutora rutivi zvakakwana pa basa iri rinosisira maningi here? Mupostori Pauro wakabatisisa basa iri ngo mwoyo wese kamare. Inga muvio, iyena wakati: ‘Ndakacena kuno ngazi yenyu yese ngokuti andizivi kuregera kumubvunja mupango jese ja Mwari.’ (Maitiro o Vapostori 20:26, 27, BMAA) Muezaniso wakanaka zvakadini kuti titevejere!

28 Zvokadi kamare, kuti tirambe tiri mu rudo hwa Jehovha zve ticikorondhwa ndiyena inga baba, tinodikana kuita zvinopinda kuva no mavonero ake ngo pamusoro po upenyu no ngazi. Itusu tinodikanavo kuva vandhu vakacena pa meso pa Jehovha, inga zvaticazovona mu cipauko cinotevera.

^ ndim. 5 Ngo pamusoro po masoko a Mwari okuti: “Kurarama ko muviri kuri mu ngazi,” jhoronari rinozwi Scientific American rinonanga kudari: “Tikasia pa mutivi zvo kuezanisira, masoko aya ngo o kadi kamare: Mukhaindi umwe nga umwe wo divi ro ngazi unodika maningi, kuti upenyu uvepo.”

^ ndim. 12 Vonanyi Despertai! ya Katutu 2006, mapheji 3-12, yakabudiswa ngo Zvapupu zva Jehovha.

^ ndim. 16 Vadurujiri vo magama o Bhaibheri vanonanga kuti magama akashadiswa pa vhesi yo ciHebheru “anovonesa kuti zvinonesa kusanangura magama aya tecinanga kuti ainangira ku khuvazwa ko mwanakaji basi.” Vonanyivo kuti, Bhaibheri arinangi kuti mwana waidikana kuva no mweji mungana mu ndani kuti pave no macijikiro o kuti atongwe ndi Jehovha.

^ ndim. 70 Vonanyi Masoko o Kuengejera pa mapheji 215-216, kuitira kuzwa zvakawanda.