Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 12

Vereketanyi “Izwi Rinonakira Kuvaka”

Vereketanyi “Izwi Rinonakira Kuvaka”

“Pa muromo penyu ngapatame kubuda izwi ririrese rakaposeka. Kaveta, pa ngari yokudikana, izwi rinonakira kuvaka.”—VAEFESO 4:29.

1-3. (a) I cipo capi catakapuwa ndi Jehovha zve tingashaishisa kudini kucishandisa? (b) Kuti tirambe tiri mu rudo hwa Mwari, tinodikana kushandisa kudini cipo cokuvereketa?

KUDARI mukapa cipo mundhu wamunoda maningi, maizozwa kudini kudari akashaisha kucishandisa ngo cabomo? Ngatiti mwakamupa karu, asi mozwa kuti pakuifambisa wakairejareja, wokhuvaza vamweni. Amucaizonyangajwa here?

2 Kukwanisa kuvereketa i cipo cinobva kuna Jehovha, Mupi wo “bzipuwo bzauxoni bzese no bzakanaka.” (Jakobo 1:17) Cipo ici cinosianisa vandhu no zvinyama, cinotibesera kuti tibudise zvatinorangarira no mazwiro edu ku vamweni. Kudari inga karu, cipo cokuvereketa cingashaisha kushandiswa. Kunyangajwa kwakadini kunoita Jehovha patinoshaisha kushandisa cipo ici kuitira kukhuvaza no kuhwajisa vamweni!

3 Kuti tirambe tiri mu rudo hwa Mwari, tinodikana kushandisa cipo ici inga zvaida Mupi waco. Jehovha anosia zvakajeka kuti i mavereketero api anomudakajisa. Soko rake rinoti: “Pa muromo penyu ngapatame kubuda izwi ririrese rakaposeka. Kaveta, pa ngari yokudikana, izwi rinonakira kuvaka, ngaripe unyaxa vaya vanorizwa.” (VaEfeso 4:29) Ngatende tivone kuti ngenyi tinodikana kuramba tecingwarira mavereketero, mavereketero api atinodikana kunyenya zve tingavereketesa kudini ‘izwi rinonakira kuvaka.’

 NGENYI TINODIKANA KUNGWARIRA MAVEREKETERO EDU?

4, 5. Mazwi akangwara o mu Bhaibheri anosanangura kudini ngo pamusoro po simba ro magama?

4 Rimwe thangwe rinoitisa kuti tingwarire mavereketero edu ngo rokuti magama ano simba. Mazwi Akangwara 15:4 inoti: “Mazwi anonyaraja mwoyo ndiwona muti wo uhomi, mazwi akaxata anogura mwoyo.” * Inga kumwa inoponesa muti uri kufota, magama akapfava anotondhoja mujimu wo wiya ari kuazwa. Mukusiana, magama akashata anokwanisa kukhuvaza mujimu wo vamweni. Zvokadi, magama edu ano simba ro kukhuvaza no kurapa.—Mazwi Akangwara 18:21.

5 Mazwi akangwara amweni, anosanangura ngo pamusoro po simba ro magama eciti: “Variyo vano rurimi hunoceka inga banga.” (Mazwi Akangwara 12:18) Magama acikazivi kurangarihwa anokwanisa kubara kuhwajihwa ko mazwiro no kuparaja ushamwari. Makambozwa kuhwaja mwoyo ngo pamusoro po magama anokhuvaza inga kukhuvaza kunoita banga here? Mazwi akangwara ondhowo anonanga divi rakanaka eciti: “Rurimi hwo vazivi hunorapa.” Magama akanasa kurangarihwa anobva ku mundhu anotatija zivo ro  umwari anokwanisa kurapa mwoyo jo vaya vakakhuvazika zve kuviiranisa ushamwari. Munokwanisa kuceukija bvaza imwe yo mwakakwanisa kuvona kuti magama o kunaka mwoyo anorapa here? (Verenganyi Mazwi Akangwara 16:24.) Ngo kuziva kuti magama atinovereketa ano simba, zvokadi kamare tinoda kushandisa mavereketero edu kuitira kurapa vamweni haiwa kuvakhuvaza.

Magama akapfava i makomborero

6. Ngenyi kungwarira rurimi i hondo huru?

6 Azvinenyi kuti i simba rakadini ratingaita, itusu atikwanisi kungwarira rurimi hwedu kamare. Ngo iyo ndava, pano thangwe ro cipiri rinoitisa kuti tingwarire zvatinovereketa: Cishaishi no kutama kukwana zvinoitisa kuti tive no cirovejeso co kushaisha kushandisa rurimi. Magama anobva mu mwoyo mwedu, asi “murangariro yo mwoyo yo vandhu yakaxata.” (Genesi 8:21; Luka 6:45) Kuramba tecibata rurimi hwedu zvokadi kamare i hondo huru. (Verenganyi Jakobo 3:2-4.) Pikija ticikakwanisi kungwarira kamare rurimi hwedu, tinokwanisa kuramba tecishanda ngo simba kuitira kuushandisa mu njira inofanera. Inga musambiri ari kueja kusambira akasota kunobva kumwa, itusu tinoramba ticihwisana no cirovejeso co kuita zvakashata ngo kushaisha kushandisa rurimi.

7, 8. Mu njira yapi tinozozvidavirira kuna Jehovha ngo pamusoro po magama edu?

7 Thangwe ro citatu rinoitisa kuti tingwarire mavereketero edu ngo rokuti: Tinozozvidavirira kuna Jehovha ngo pamusoro po magama edu. Njira yatinoshandisa ndiyona rurimi hwedu inopsasa haiwa ushamwari no vatendi doni basi asi inopsasavo ushamwari wedu na Jehovha. Jakobo 1:26 inoti: “Ndiani anoti anotenda Mwari, kaveta aabati rurimi hwake, anojicengeja kamare. Rutendo hwake hwabiresi.” * Inga zvatakavona mu cipauko cakapera, zvatinovereketa zvakabatana kamare no kunamata kwedu. Kudari rurimi hwedu  hukatama kungwarihwa—tovereketa zvinokhuvaza no magama akapinda kushatisisa—mabasa edu ese o ciKristu anova acina mutengo pa meso pa Mwari. Amutendi here kuti iyi i shwiro yo kuti tinodikana kurangarira?—Jakobo 3:8-10.

8 Zvakajeka kuti tino mathangwe akavanga anotiitisa kuti tingwarire kuti titame kushaisha kushandisa cipo co kuvereketa. Ticito tavona kuti i njira japi jatingashandisa ndijona mavereketero edu kuitira kuvaka, ngatibhuye ngo pamusoro po mavereketero acikadikani kamare kuwana ndau mu upenyu hwo maKristu okadi-kadi.

MAGAMA ANOKHUVAZA

9, 10. (a) Ngo api ari kuva mavereketero o njiku ngo njiku mu nyika? (b) Ngenyi tinodikana kunyenya mavereketero anonyoweja? (Vonanyi masoko o pasi.)

9 Mavereketero anonyoweja. Magama okutuka, akasvipa zve njira jimweni jo mavereketero okunyoweja ari kuva divi ro mavereketero o njiku ngo njiku mu nyika. Vazinji vanomashandisa kuitira kugogomejera zvavavereketa kana kuti kufakeya magama avacikazivi manangihwe awo. Vandhu vanoita mutambo jo kusekesa vanoshandisa magama okuungwa, anovereketa ngo zvopabonde kuti vasekese vandhu. Ngo kudaro, mavereketero anonyoweja asipi zviro zvomushekenyera. Ko makore anodarika 2.000 akapera, mupostori Pauro wakafemehwa kuti ape mbhangiro ku ungano yo ku Korose yo kuti vatame no kumboshandisa “mavereketero okunyoeja.” (VaKolosi 3:8) Pauro wakabvunja ungano yo ku Efeso kuti ‘mavereketero okunyoweja [kana kuti majee anopseruja],’ ari pakati po zviro ‘zvicikadikani kunangwa pakati’ po maKristu.—VaEfeso 5:3, 4.

10 Mavereketero anonyoweja anonyangajisa Jehovha. Anonyangajisavo vaya vanoda Jehovha. Ngo kudaro, rudo hwedu kuna Jehovha hunotindunda kuti tirambe mavereketero anonyoweja. Pauro paaindandanisa “mabasa o nyama” wakananga “psina”, zvinobatanija mavereketero akasvipa.  (VaKolosi 3:5) Iyi i shwiro huru kamare. Mundhu angajingwa mu ungano akatama kuzwira mbhangiro zinji asi oenderera mberi no cirovejeso co kushandisa mavereketero anonangira kana anokhwindijira mufambiro wakashatisisa, ucikadakajisi zve wakavora. *

11, 12. (a) Cirevo i cinyi zve cingakhuvazisa kudini? (b) Ngenyi vanamati va Jehovha vanodikana kunyenya magumbu?

11 Cirevo, magumbu kana kuti magumba. Cirevo kuvereketa ngo pamusoro po vandhu vamweni no upenyu hwavo. Kunanga kuti cirevo cese cakashata here? Haiwa, kudari tecivereketa ngo pamusoro po mabhuyo akanaka atinonga tecibhuya no umweni, masoko anovangisa kana anobesera, inga o kuti ndiyani anobhabhatijwa kana ndiyani anoda kuvangiswa. MaKristu o muzana ro kutanga ro makore ainga no cidaka-daka co kugara ushoni ko umwe no umweni zve kukovana masoko akanaka ngo pamusoro po vatendi doni. (VaEfeso 6:21, 22; VaKolosi 4:8, 9) Asi, cirevo cingava cinokhuvaza kudari cecicinja zviro zvokadi kana kuphetura zviro zvo mundhu ega. Ciro cikuru maningi, cirevo cingatungamirira ku magumbu, awo nguva jese anokhuvaza. Magumbu i “mabhuyo okunyepa . . . anoshatisa kana kusvipisa zina ro umweni.” Inga muezaniso, vafarisi, vakatanga magumbu akashata mukueja kuti Jesu arambhwe. (Mateu 9:32-34; 12:22-24) Magumbu kazinji anomusa kuvereketesana.—Mazwi Akangwara 26:20.

12 Jehovha aadakariri vaya vanoshandisa cipo co kuvereketa kuitira kurevera zvakashata vamweni kana kubara kuparajana. Iyena anonyenya vaya ‘vanomusa haxa pakati po  hama.’ (Mazwi Akangwara 6:16-19) Gama ro ciGiriki rakasandujwa kuti “magumbu” i di·aʹbo·los, rinoshandiswazve kureva Sathana. Ndi “Dhiabhu,” nyamagumbu wakashata wa Mwari. (Apokalipsi [Cakapangijihwa] 12:9, 10) Zvokadi kamare, tinoda kunyenya mavereketero angazobara kuti tive inga ndi dhiabhu. Mu ungano amutendehwi vandhu vanovereketa magumbu anoita kuti vandhu vaite mabasa o nyama inga “kupipana” no “kukaxana (kuparajana).” (VaGalàsia 5:19-21) Hina, mucito mahwirijira masoko ngo pamusoro po mundhu umweni, jibvunjisenyi kudari: ‘Ngo zvokadi? Kwaizova kunaka mwoyo kunanga izvi here? Zvinodiwa kamare kana zvinobesera kuzvindhandhanisa here?’—Verenganyi 1 VaTesalònika 4:11.

13, 14. (a) Mavereketero okushora angava no muviyo wenyi ku vanomazwa? (b) Kushora i kudini zve ngenyi mushori angazvidira pa ndau inosejemuka?

13 Mavereketero okushora. Inga zvatavona pakutanga, magama ano simba ro kukhuvaza. Ngo zvokadi kuti, pa mukuvo no mukuvo ngo ndava yokutama kukwana kwedu, tese tinonanga zviro zvatinozodemba. Ngo kudaro, Bhaibheri rinongwaja ngo pamusoro po mavereketero o kuti ngo njira iri yese aana ndau pa muzi po ciKristu kana mu ungano. Pauro wakangwaja maKristu kuti: “Kupsipa mwoyo kwese, kunyangajwa no runya, izwi rese rakarema nokuti ro kuxora, pamwepo no uxaixi hwese: Ngabzibude mo muri.” (VaEfeso 4:31) Sandujo jimweni jinonanga kuti ‘izwi ro kushora’ inga ‘magama akashata,’ “okucamwisa” zve “kutuka”. Mavereketero okushora—anobatanija kudanija mazina acikadakajisi, kutuka no kuvereketera, kundoshora zvese—kungadereja vamweni kovaita kuti vazwe vacizivi kureremera. Maitiro aya angapsasa maningi mwoyo jo vana, zvecivoneka kuti avanesi kubata mavereketero okushora.—VaKolosi 3:21.

14 Bhaibheri rinorambisa kamare kushandisa magama okutuka, kucamwisa—cirovejeso co kuvereketa magama okushora vamweni ngo kutuka kana okudenga kusimba  kuveni kushora. Mundhu anoita cirovejeso co mavereketero aya ari kuzvidira pa ndau inosejemuka, angaguma pakujingwa mu ungano kudari akaenderera mberi acikazwiri mbhangiro zinji jo kuti acinje. Akambhera ngo kutama kucinja angaruzavo makomborero o Umambo. (1 VaKorinto 5:11-13; 6:9, 10) Zvakajeka, apana njira imweni kuti tirambe tiri mu rudo hwa Mwari kudari tino cirovejeso co kuvereketa magama akavora, okunyepa kana aciripi okunaka mwoyo. Mavereketero aya anokhuvaza.

MAGAMA ‘ANONAKIRA KUVAKA’

15. Mavereketero api ‘anonakira kuvaka’?

15 Tingashandisisa kudini cipo co kuvereketa inga zvaida Mupi waco? Ceujanyi kuti Soko ra Mwari rinotipangira kuti tiverekete basi “izwi rinonakira kuvaka.” (VaEfeso 4:29) Jehovha anodakara potinovereketa magama anovaka, anosimbisa zve anovangisa vamweni. Izvo zvinoda kubhuya magama akarangarihwa ushoni. Bhaibheri aritipi nda-nda-nda yo magama otinodikana kuvereketa, nokuti aritipi nda-nda-nda yo mufumbo wo ‘kuvereketa kunodikana.’ (Tito 2:8) Kuti tiverekete magama ‘anonakira kuvaka,’ tinodikana kuramba tecirangarira zviro zvitatu zvakareruka, asi zvinosisira kuti mavereketero edu avake zvakadari inga: Zvakanaka, ngo zvokadi zve kunaka mwoyo. Ticirangarira izvi, ngativone muezaniso munganani jo mavereketero aushoni anovaka.—Vonanyi bhokiso rinoti: “ Mavereketero Angu Anovaka Here?” pa pheji 140.

16, 17. (a) Ngenyi tinodikana kusimba vamweni? (b) Mukana wapi uripo wo kusimba vamweni mu ungano? Pa Mbhuri?

16 Kusimba ngo mwoyo wese. Jehovha na Jesu vanoziva kudikana ko kuvereketa magama o kusimba no kutendera. (Mateu 3:17; 25:19-23; Johani 1:47) Inga maKristu, tinodikanavo kusimba vamweni ngo mwoyo wese. Ngenyi? Mazwi Akangwara 15:23, Baiberi Mazwi Akacena aMwari, inoti:  ‘Kunaka kwakadini ko magama anovereketwa pa nguva kwayo!’ Zvibvunjisenyi kuti: Ndinozwa kudini ndikaashira kubongesera kunovha mu mwoyo? Azvivangisi mwoyo wangu no kundidakajisa here? Zvokadi kamare, magama o kusimba ngo mwoyo wese anomuita kuti muzive kuti pana mundhu ari wese ari kumuvona, anomutaja zve zvomaita mavangisira maningi. Kusimba kwakadaro kunothembesa zve kunomundundira kuti muzoitezve zvimweni ngo simba rese. Zvecivoneka kuti imwimwi munodakara mukabongwa, amudikani kubongavo vamweni ngo mwoyo wese here?—Verenganyi Mateu 7:12.

17 Zvirovejenyi kusota zvinonasa vamweni zve vabongenyi. Mu ungano, nguva jimweni munozwa hurukuro yaitwa ushoni, mavona mujaha ari kukwanirisa zvido zvo kumujimu, kana mavona musharuka ari kuvangisira kuviya ku musongano pikija ana zvineso zvo usharuka. Magama o kusimba ngo mwoyo wese anobaya mwoyo jo vandhu ava zve zvinovavangisa kumujimu. Pa mbhuri, mukaji no mwamuna vanoda kuzwa magama o kubonga no o kusimbana. (Mazwi Akangwara 31:10, 28) Maningi-ningi vana vanovangisira maningi vakazwa kuti vari kuvoniwa zve vari kubongwa. Kusimba no kutendera mwana zvakaezana no zuva no kumwa zvinopfaja mamiti. Vabari, psakanyi nguva yo kusimba vana venyu ngo mugariro javo jinodakajisa no kuvangisira kwavo. Kuvangisira uku kunopa cicunge no kuthemba ku vana venyu zve kunovandundira kuti vaitezve zviro zvimweni zvaushoni.

18, 19. Ngenyi tinodikana kuita zvatinokwanisa pa kuvangisa no kunyaraja vatendi doni, zve tingazviitisa kudini?

18 Kuvangisa no kunyaraja. Jehovha anotaja maningi ‘mundhu acina simba’ no vana “mwoyo yakaremba.” (Isaia 57:15) Soko rake rinotikohomeja kuti ‘vangisananyi’ zve ‘vangisanyi avo vana mwoyo inodemera.’ (1 VaTesalònika 5:11, 14, Baiberi Mazwi Akanaka aMwari) Tingava no cokwadi cokuti Mwari ari kuvona zve anodakara ngo kuvangisira kwedu  pa kuvangisa no kunyaraja vatendi doni vana mwoyo inoremehwa ngo kucamwa.

Jehovha anodakara tikavereketa magama anovaka vamweni

19 Waro, ngozvapi zvomungananga kuti muvake muKristu doni wakacamwa kana wakasuruvara? Amudikani kuzwa kuti munodikana kupeja cineso cake. Kazinji anobesera maningi i masoko mashoma basi. Muvhunjenyi kuti munomuda maningi zve muri kuneseka ngo pamusoro pake. Zvipirenyi kuti muite mukumbiro ngo izwi rakakhwirira naye; mungapota kuna Jehovha kuti mundhuwo azive kudiwa kwaanoitwa ngo vamweni zve na Mwari. (Jakobo 5:14, 15) Mujekeserenyi kuti anodiwa maningi zve anoreremejwa inga ndhengo yo ungano. (1 VaKorinto 12:12-26) Verenganyi vhesi imwe yo mu Bhaibheri kuti ave no cokwadi cokuti Jehovha anomutaja kamare inga mundhu. (Nduyo 34:18; Mateu 10:29-31) Kutora nguva yakareba kuti mukovane ‘gama rakanaka’ no wakacamwa zve kubhuya zvicivha pasi po mwoyo pacina kukana-kana, zvinozomubesera kuti azwe ecidiwa zve anoreremejwa.—Verenganyi Mazwi Akangwara 12:25.

20, 21. Ngozvapi zvinoitisa kuti mbhangiro iashirike?

20 Mbhangiro inobesera. Inga zvisikwa zvicikazivi kukwana, tinoda kuashira mbhangiro nguva no nguva. Bhaibheri rinotivangisa kuti: “Izwai mupangiro, tenderai kujijiswa, kuti, sure kwa ibzo, uite wakangwara.” (Mazwi Akangwara 19:20) Kupangira vamweni asipi basa ro vakuru vo ungano  basi. Vabari vanopangira vana. (VaEfeso 6:4) Hambzaji jakaivha kumujimu jinodikana kupangira matombozana. (Tito 2:3-5) Rudo hunotindunda kuti tide kupa mbhangiro vamweni jinoashirika ushoni, jicikavapseruji. I cinyi cingatibesera kuti tipe mbhangiro jakadari? Vonanyi zviro zvitatu zvinoitisa kuti mbhangiro ive inoashirika: Murangariro no cidisiso co mundhu ari kupangiraro, cine ro mbhangiro no mapihwe oinoitwa.

21 Kubesera ko mbhangiro kunotangira ku mupi wayo. Zvibvunjisenyi kuti: ‘Pa mugariro wapi wakandirerukira kuti ndiashire mbhangiro?’ Mbhangiro inoreruka kuiashira kudari mukaziva kuti anomupangiraro anomutaja, aaripi kufisha cidisiso cake zve aaripi kufisha macamwiro ake. Amudikani kuva no murangariro uu pomunopangira vamweni here? Mbhangiro inobudirira yakacijikira mu Soko ra Mwari. (2 Timoti 3:16) Azvifiri kuti tanokora Bhaibheri kana atizivi, mbhangiro yedu inodikana kucijikira mu Matahwa. Ngo kudaro, vakuru vo ungano vanongwarira kuti vacadoshandisa mavonero avo, kuphinduja zvinonanga Matahwa, kuita kuti zvizike kuti zvinonanga Bhaibheri zvinobesera mavonero o mundhu. Mbhangiro inobesera kudari ikapuwa ngo maitiro aushoni. Mbhangiro yakarungwa ngo munyu no unyasha yakareruka kuashira zve inosiya ari kupangihwaro ano kureremera kwake.—VaKolosi 4:6.

22. Ngocapi civaringo cenyu ngo pamusoro po mashandisiro enyu cipo co kuvereketa?

22 Zvokadi kamare, kuvereketa i cipo cina mutengo mukuru cinovha kuna Mwari. Rudo hwedu kuna Jehovha hunodikana kutindunda kuti tishandise ushoni cipo ici. Ngaticeuje kuti magama otinovereketa ana simba—ro kuvaka kana kukhuvaza vamweni. Ngativangisire kuti tishandise cipo ici inga Mupi waco zvaaida—kuitira “kuvaka.” Ngo kudaro, mavereketero edu acazova makomborero kamare kuna vaya vanotizwa zve zvinozotibesera kuti tirambe tiri mu rudo hwa Mwari.

^ ndim. 4 Gama ro ciHebheru rakasandujwa kuti “kuxata” pana Mazwi Akangwara 15:4 ringasandujwavo kuti “kubhendama; ricikatendehwi.”

^ ndim. 7 Gama ro ciGiriki rakasandujwa kuti “biresi” ringasandujwavo kuti “ricina shwiro.”—1 VaKorinto 15:17.

^ ndim. 10 Inga zvarinoshandiswa mu Matahwa, “kutama kucena” i gama ringananga zvizinji recibatanija zvishaishi zvakawanda. Pikija hazvo kuciripi kutama kucena kwese kunoda kutongwa ngo cikwata co kutonga, mundhu angajingwa mu ungano kudari akaenderera mberi ecihwirijira-hwirijira zvirovejeso zvo kutama kucena kukuru.—2 VaKorinto 12:21; VaEfeso 4:19; vonanyi “Mibvunzo Inobva Kuvaverengi” mu Murindiri wo 15 ya Khunguru, 2006 (mu Cishona).