Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 16

Hwisananyi na Dhiabhu no Mazano Ake

Hwisananyi na Dhiabhu no Mazano Ake

“Vanganyi kurhwa na Sathana, yena anozomutiza.”—JAKOBO 4:7.

1, 2. Mukuvo wo rubhabhatijo unodakajisa ani?

KUDARI muri kushandira Jehovha ko makore mazinji, mazwa hurukuro jakawanda maningi jo rubhabhatijo pa magungano edu. Hina, azvinenyi kuti kangana pa mava muri pa zviitiko izvi, munondobaiwa mwoyo basi pa mukuvo wese wamunovona vanonga vakagara ngo pambeji po civanje vanoima kuti vazvivonese pambhene kuti vabhabhatijwe. Pa mukuvo wokupera kubijwa, mudakaro unokura maningi, wecitevehwa ngo kubwabwaijira nyara kunoita mundandarima. Kangaije majiso enyu anozara ngo musoji pamunovona cikwata cimwenizve cecizvikhetera kushandira Jehovha. Mukuvo uu unotipa mudakaro wakakura!

2 Pikija hazvo tino mukana mushoma pa gore kuti tivone rubhabhatijo mu ndharaundha medu, ngirozi jino rudakajiso o kuvavona kazinji maningi. Mungakwanisa kurangarira kuti “kudakara” kwakadini kwajinova nako pajinovona mazana no mazana o vandhu mu nyika yese eciengejera sangano ra Jehovha ro divi ro pasi pano bviki ngo bviki here? (Luka 15:7, 10) Pacina kukakanija, ngirozi jinodakara ngo kuvona kuengejeka uku!—Hagayo 2:7.

DHIABHU ‘ANOFAMBA-FAMBA INGA MBHONDORO IRI KUBHONGA’

3. Ngenyi Sathana ari kufamba-famba ‘inga mbhondoro iri kubhonga,’ zve anoda kuitenyi?

3 Mukusiana no ngirozi jatanangaya pa ndima japera, kuno zvisikwa zvimweni zvo kumujimu zvinopsuka majiso pa zvinovona vanobhabhatijwa. Kuna Sathana no madhimoni,  vanozvimba ngo kunyangajwa pavanovona mazana no mazana ecifuratira nyika ino yakazara ngo uvori. Kunja kwa zvese, Sathana wakareva kuti apana mundhu anoshandira Jehovha ngo mwoyo wese kamare zve apana angaramba akagondeka akambhera ngo kunasa kuteverehwa. (Verenganyi Jobe 2:4, 5.) Pa mukuvo wese mundhu paanoita mudanyu ozvipira pacake kuna Jehovha, Sathana anonga ecibvunjwa kuti munyepi. Zvinoita inga kuti Sathana ari kudihwa mazana o mabofutada kumeso bviki ngo bviki ro gore ngo gore. Apana kukakanija, iyena ‘anofamba-famba inga mbhondoro iri kubhonga, yecipsaka mundhu kuti imuhe’! (1 Pedru 5:8) ‘Mbhondoro’ iyi inocidisiso cokutibvabvura-bvabvura kumujimu, kuti tiphwanye pikija kutoruza ushamwari hwedu na Mwari.—Nduyo 7:2, 3; 2 Timoti 3:12.

Pa nguva yese mundhu anozvipira pacake kuna Jehovha perapo obhabhatijwa, Sathana anovoneswa kuva munyepi

4, 5. (a) Mu njira japi mbiri Jehovha anopiningijira kucengeja kwa Sathana? (b) MaKristu o cokwadi angava no cokwadi cenyi?

 4 Pikija hazvo tinohwisana no muvengi wakashata maningi, apana dikano yo kukurihwa ngo kuthya. Ngenyi? Ngokuti Jehovha wakapiningijira simba ro ‘mbhondoro iyi’ mu njira mbiri jinodikana maningi. Ngo japi? Jehovha wainga akananga kuti “uzinji hukuru hucingaverengeki” hwo maKristu o cokwadi hunozoponeswa pa “dambujiko guru” riri kuzari. (Apokalipsi [Cakapangijihwa] 7:9, 14) Zviphorofita zva Mwari azviposi. Ngo kudaro, pikija Sathana anoziva vandhu va Mwari inga cikwata, aangakwanisi kuvakhuvaza.

5 Maitiro amweni ocipiri anojekeswa ngo cokwadi cikuru cakabhuiwa ngo umwe mubatiri wa Mwari wakagondeka wo mu nguva jo kare. Muphorofita Azaria wakananga kudari kuna Mambo Aza: “[Jehovha] anemwi kudari munaye.” (2 Kronike 15:2; verenganyi 1 VaKorinto 10:13.) Pano mutengo wakati wandire wo muezaniso jinovonesa kuti kareko, Sathana wakakonehwa kuparaja umwe hake wo vashandiri va Mwari vakaramba vari phedo na Mwari. (Vaheberi 11:4-40) Nyamasi uno, muKristu anoramba ari phedo na Mwari anozokwanisa kuhwisana kana kutonyisa Dhiabhu. Zvokadi kamare, Soko ra Mwari rinotigondesa kuti: “Vanganyi kurhwa na Sathana, yena anozomutiza.”—Jakobo 4:7.

TIRI KUHWISANA NA SATHANA NO MADHIMONI

6. Sathana anohwisisa kudini muKristu umwe nga umwe?

6 Ngo mavereketero amweni, Sathana aazowini pa hondo iyi asi angakwanisa kunyisa umwe wedu paega kudari tikavaraihwa. Sathana anoziva kuti angatibvabvura-bvabvura kudari tikarembesa ushamwari hwedu na Jehovha. Sathana anoeja kuzviitisa kudini izvi? Ngo kutihwisa ngo simba, kuhwisa ko mundhu ega zve ngo mazano akafindara. Ngatijije mazano aya makuru a Sathana.

7. Ngenyi Sathana ari kuvangisira kuhwisa vandhu va Jehovha?

7 Kuhwisa ngo simba. Mupostori Johani wakananga kuti: “Nyika yese yo pasi iri mu nyara ja Sathana.” (1 Johani 5:19)  Magama ao ano ngwajo kuitira maKristu ese okadi-kadi. Zvecivoneka kuti Sathana ari kukwanisa kubvabvura-bvabvura nyika icikadi Mwari yo vandhu, wari iyena angabatikana maningi no kuvangisira kwese kuhwisa vaya vaacito akwanisa mbhera wari—vandhu va Jehovha. (Mikeya 4:1; Johani 15:19; Apokalipsi 12:12, 17) Iyena wakacamwa maningi ngo kuti anoziva kuti nguva yake yasara ishoma. Ngo kudaro anoita zvese zvaanokwanisa. Nyamasi uno, tiri kusotana no kuhwisa zve kuparaja kwake kokupejisira.

8. Zvicinyi zvaida kunanga Pauro paakananga kuti ‘tinohwa’ no mujimu jakashata?

8 Kuhwisa mundhu ega. Mupostori Pauro wakangwaja maKristu doni kuti: ‘Atihwi [mu ciGiriki, kujipana] no ngazi no nyama, asi . . . no masimba o mujimu jakashata jiri mu ndau jo mu matenga.’ (VaEfeso 6:12, Shanduro yeNyika Itsva) Ngenyi Pauro wakashandisa gama ro kuti ‘kujipana’? Ngo kuti rinoviisa murangariro wo kuhwisana nyara ngo nyara. Ngo kudaro, ngo kushandisa gama iri, Pauro waigogomejera kuti umwe na umwe wedu ano hondo yake ega no mujimu jakashata. Kudari tinoraramira mu nyika inotendhwa maningi zvo mujimu jakashata kana kuti haiwa, atimbodikani kukanganwa kuti takazvipira pacedu kuna Jehovha, takaita inga tanghwina mu civanje co kutakana. Kubvira pakuzvipira kwedu, muKristu umwe na umwe ari mu hondo icina matiziro. Azvishamaisi kuti Pauro wakavona dikano yo kupangira maKristu o ku Efeso pa vhaza ndhatu ngo pamusoro po ‘kuvangirira’!—VaEfeso 6:11, 13, 14.

9. (a) Ngenyi Sathana no madhimoni ake anoshandisa ‘zviejo’ zvakasiana-siana? (b) Ngenyi Sathana anoeja kuvoja marangaririro edu, zve tinganyisisa kudini muejo iji? (Vonanyi bhokiso riri pa  mapheji 192-193.) (c) I zano rapi rakafindara ratinoda kujija wari?

9 Kuhwisa ngo mazano akafindara. Pauro wakangwaja maKristu kuti arambe akaima kuti jii pakuhwisana no ‘zviejo zvake.’ (VaEfeso 6:11) Vonanyi kuti Pauro wakanangira muejo muzinji. Mujimu jakashata ajishandisi zano rimwe basi—zve ngo thangwe rakanaka. No kufamba ko nguva,  vatendi vamweni vakambocijikira dambujiko rimwe vakazombhwera pavakazosongana no rimweni. Ngo kudaro, Dhiabhu no madhimoni anosotesesa zvido zvo umwe na umwe wedu kuti awane paakarembera. Perapo, anoshandisa kuremba kuri kwese ko kumujimu kwatingava nako. Zvinodakajisa ngo zvokuti, ngo kushandisa Bhaibheri, tinokwanisa kuziva mazano anoshandiswa ndi Dhiabhu. (2 VaKorinto 2:11) Kumatangiro ko bhuku rino, takabhuya mazano aya akadari inga kudisisa pfuma, shamwari jakashata no mufambiro wakashata wo vatano. Ngatende wari tibhuye ngo pamusoro po rimwe ro mazano akafindara—zvomujimu.

KUITA ZVOMUJIMU—NJIRA IMWE YO KUPANDUKIRA

10. (a) Zvomujimu cicinyi? (b) Jehovha anovona kudini ngo zvomujimu zve imwimwivo munovona kudini ngo pamusoro po zvomujimu?

10 Ngo kuita zvomujimu, kana zvomadhimoni, mundhu anonga ecibhuisana kamare no mujimu jakashata. Kuuka, uroi, mathumwa, kupsakisira hope, kusungira ndhimwi zve kupsaka kubhuya no vakafa ndi jimwe njira jo zvomujimu. Inga zvatinonasa kuziva, Jehovha anovona zvomujimu inga ‘zvinonyangajisa.’ (Deuteronòmio 18:10-12; Apokalipsi 21:8) Zvecivoneka kuti tinodikana ‘kunyenya zvakashata,’ azvitendehwi kuti tipsake kushamwarijana no masimba o mujimu jakashata. (VaRoma 12:9) Ciito cakashata zvakadini kupandukira Baba vedu vo mugore, Jehovha.

11. Ngenyi kwaizova kuwina kukuru kuna Sathana kudari waizocengeja umwe wedu kuti aite zvomujimu? Ezanisanyi.

11 Asi, zvecivoneka kuti kuita zvomujimu i kucengejera kukuru Jehovha, Sathana wakacunga kamare kuti vamweni vedu vanghwine mu ciito ici. Mukuvo wese waanondundira muKristu kuti atevere madhimoni, Sathana anonga anyisa maningi. Ngenyi? Rangariranyi ngo muezaniso uu: Kudari musoca wacengejeka opandukira vocikwata cake obatana no masoca o vavengi, mutungamiriri wo vavengi waizodakara maningi. Angatomuimisa pa mbeji po vandhu vese ecipururujira kuitira kupseruja wainga mutungamiriri  wo mupanduki wiya. Mukufananavo, kudari muKristu akaita zvomujimu, anonga acida zve ecitoziva kamare kuti ari kupandukira Jehovha ecizvidira pasi po utongi hwa Sathana. Rangariranyi kuti mudakaro wakadini waizova na Sathana ngo kupururujira wapandukaya inga kuwina mu hondo! Aripo umwe wedu waizodakarira kuti Sathana awine here? Zvokadi kamare apana! Itusu atiripi vacengejeri.

KUMUSA MUBVUNJO KUITIRA KUMUSA KUKANA-KANA

12. I zano rapi rinoshandisa Sathana kuitira kucengeja mavonero edu ngo zvomujimu?

12 Patinonyenya maningi zvomujimu, Sathana aazotinyisi ecishandisa izvi. Ngo kudaro, iyena anoziva kuti anodikana kucinja marangaririro edu. Kuitisa kudini? Anopsaka njira kuti akanganise maKristu zvokuti vamweni vagume pa kuti: ‘Zvakashata zvakanaka no zvakanaka kuti zvakashata.’ (Isaia 5:20) Kuti aite kudaro, Sathana kazinji anoshandisa njira imweni yokuti inoanja kubudirira—iyena anomusa mubvunjo kuitira kumusa kukana-kana.

13. Sathana wakashandisisa kudini zano ro mubvunjo kuitira kumusa kukana-kana?

13 Vonanyi mashandisire akaita Sathana zano iri mu nguva jo kare. Mu Edheni wakabvunjisa Evha kudari: “Bzokadi Mwari wakananga kuti: Amutendehwi kuha ku miti yese yo mu munda?” Pa mukuvo wa Jobe, mukati mo musongano wo ngirozi mugore, Sathana wakaita mubvunjo: “Jobe anothya Mwari biresi here?” Pakutanga ko mushando wa Jesu pasi pano, Sathana wakaeja Kristu ngo kunanga kuti: “Kudari iwewe uri mwana wa Mwari, nangai ku mapuwe aya aphinduke kuita mukate.” Rangariranyi—pa shwiro ya Jesu, Sathana waida kuseka magama a Jehovha aainga akabhuya kamare pa mazuva matandhatu ainga apera o kuti: “Nga uu mwana wangu anodikana, wiya anondidakajisa”!—Genesi 3:1; Jobe 1:9; Mateu 3:17; 4:3.

14. (a) Sathana anoshandisisa kudini zano rake ro kumusa kukana-kana ngo pamusoro po zvomujimu? (b) Ngozvapi zvaticajija wari?

14 Nyamasi uno, Dhiabhu anoshandisa zano rakafanana  ngo njira yakavanga kuitira kumusa kukana-kana ngo pamusoro po kuvepo ko mujimu jakashata. Zvinozwisa urombo, iyena ari kubudirira ngo kumusa kukana-kana mu murangariro jo vatendi vamweni. Ivona vakatanga kuita mubvunjo ngo pamusoro po njira jimweni jo zvomujimu kuti ijona jakashatadi kamare here. (2 VaKorinto 11:3) Tingabeseresa kudini vandhu ava kuti vacinje marangaririro avo? Tingaitisa kudini kuti tive no cokwadi co kuti mazano a Sathana anotikwevejera pa kuda kutipausa? Kuti tidavire, ngatende tijije mativi maviri o upenyu anoshatiswa maningi ndi Sathana ngo zviro zvomujimu. Mabungaijo no kuraphwa.

ANOVONA ZVINOTIDAKAJISA NO ZVATINODA

15. (a) Vazinji vo ku divi ro kuMavirira ko nyika vanovona kudini ngo zvomujimu? (b) MaKristu amweni akapsasiswa kudini ngo mavonero o nyika ngo pamusoro po zvomujimu?

15 Maningi-ningi ku divi ro kuMavirira ko nyika, vandhu vanovona inga zvicizivi kushata zviro zvakadari inga masaramuso, uroi no njira jimweni jo zvomujimu. Mafirime, mabhuku, zvirongwa zvo Terevhizau no mutambo jo pa komputadhori zviri kuramba zveciengejeka kuvonesa zviito zvomujimu inga zvinodakajisa, zvo ungwaru zve zvicingakhuvazi. Mafirime amweni no mabhuku ano shwiro jinonanga ngo zvo masaramuso zvaakuzivikanwa maningi zvo kuti vanozvidakarira vakatoronga cikwata cavo. Zvakajeka, madhimoni ari kubudirira mukuita kuti vandhu vatende kuti masaramuso asipi zviro zvo ngozi. Maitiro aya o kuvona zvomujimu inga zviro zvakanaka ari kupsasavo maKristu here? Murangariro wo vamweni wakapsaswa. Mu njira yapi? Kuitira kupa muezaniso kamare, umwe muKristu pakupera kuvona firime yaivonesa masaramuso, iyena wakati: “Ndavona firime basi, asi andizivi kuita zvomujimu.” Ngenyi murangariro uu ngo wo ngozi?

16. Ngenyi zvino ngozi kukheta bungaijo rinovonesa zvo masaramuso?

16 Pikija hazvo pano musiano kuita zvomujimu no kuzvivona, zvokadi kamare azvirevi kuti kuvona zvomujimu azvina ngozi. Ngenyi? Vonanyi izvi: Soko ra Mwari rinotatija  kuti nee Sathana nee madhimoni ake avakwanisi kuziva zviri mu murangariro jedu. * Ngokudaro, inga zvabhuiwa pakutanga, kuti mujimu jakashata jizive zvatinorangarira zve marembo edu okumujimu, jinosotesesa maningi zviito zvedu—kubatanija zvatinokheta pakubungaija. Apo zviito zvo muKristu zvinotatija kuti anodakarira maningi mafirime no mabhuku anobhuya ngo kubudihwa, masaramuso o mafuhwa, zvinoitwa ngo mundhu ari kubudihwa kana zviro zvakafanana, anonga eciendesa masoko ku madhimoni. Zvokadi kamare, ari kumabvunja paakarembera. Apa wari, madhimoni anoengejera zvibhakera ku muKristu uu kuitira kumubatira pamarembo ake aya mbhera owa pasi. Zvokadi kamare, vamweni vakadakarira zvomujimu vakakwevejehwa ngo mabungaijo anokhwindijira shwiro jo masaramuso jaivoneswa pa rimwe bungaijo no kufamba ko nguva vakazova vaiti vo zvomujimu.—Verenganyi VaGalàsia 6:7.

Benefit from Jehovah’s support in times of illness

17. Sathana angashandisa mazano api kuitira vaya vari kuhwaja?

17 Sathana anoeja kushandisa haiwa basi mabungaijo edu asi dikano yatinayo yo kuraphwa. Kuitisa kudini? MuKristu angacamwa kudari acikavangi pikija aeja marapihwe akasiana-siana. (Marco 5:25, 26) Izvi zvingapa Sathana no madhimoni ake mukana wakanaka wo kushandisa kucamwa uku. Madhimoni kangaije angaeja kutora mundhu ari kuhwaja kuti apsake marapihwe anobatanija kushandisa ‘simba ro masaramuso,’ kana zvomujimu. (Isaia 1:13, Shanduro yeNyika Itsva) Kudari mazano aya o madhimoni akabudirira, zvingarembesa ushamwari hwo mutenda na Mwari. Mu njira yapi?

18. Mushovo wapi wo marapihwe angaramba muKristu, zve ngenyi?

18 Jehovha wakangwaja vaIziraeri vainga vakashandisa  ‘simba ro masaramuso’ eciti: “Mukatambanuja nyara jenyu, ndinofundurusa komuri majiso angu. Nokunyati mukaengejera munamato, andizomuzwi.” (Isaia 1:15) Zvokadi kamare, itusu mu njira iri yese tinodikana kuramba ciri cese cingaitisa kuti mukumbiro yedu itame kuzika zve cinopungura besero ratinoashira kubva kuna Jehovha—maningi-ningi patinonga tiri kuhwaja. (Nduyo 41:4) Ngokudaro, kudari tikavona kuti imwe njira yo kurapa inokhombija marapire anobatanija zvomujimu, maKristu okadi-kadi anodikana kuramba. * (Mateu 6:13) Mu njira iyi, mutenda angava no cokwadi co kuti Jehovha acamubesera.—Vonanyi bhokiso rinoti: “ Izvi ngo Zvomujimu Kamare Here?” pa pheji 194.

KUDARI PANO NDHORONDHO ZINJI JINONAGWA NGO PAMUSORO PO MADHIMONI

19. (a) Ngozvapi zvinotenda vandhu vazinji ngo pamusoro po simba ra Sathana? (b) Ngo japi ndhorondho jinodikana kutizwa ngo maKristu okadi-kadi?

19 Pikija hazvo vandhu vazinji vo divi ro kuMavirira ko nyika vanorerusa ngozi yo simba ra Sathana, ku mativi amweni o nyika zvinoitika zvakasiana. Ku nyika jondhojo Dhiabhu anoitisa kuti vamweni vatende kuti iyena ano simba kupinda raanaro waro kamare. Vandhu  vamweni vanorarama, kuha, kushanda zve kuvata vecithya mujimu jakashata. Ndhorondho zinji jinonangwa ngo pamusoro po zviito zvo simba ro madhimoni. Ndhorondho jakadari kazinji jinotoverengwa mu njira yakarungama; vandhu vacitodakajihwa ndizvona. Tinodikanavo kundhandhanisa ndhorondho jakadari here? Haiwa, vashandiri vo kadi-kadi va Mwari vanoramba kuita izvi ngo mathangwe maviri anosisira.

20. Zvigaitisa kudini kuti mundhu ariwese andhandhanise fafanya ya Sathana kangaije acikazvivoni?

20 Thangwe rokutanga, ngo ro kundhandhanisa ndhorondho ngo pamusoro po zviito zvo madhimoni, mundhu anonga ari kumusijira zvido zva sathana. Kuitisa kudini? Soko ra Mwari rinotibvunja kuti Sathana anoita mabasa o simba, asi rinotingwajavo kuti iyena anoshandisa “bzitatijo . . . bzokunyepa” no “macengejero.” (2 VaTesalònika 2:9, 10) Zvecivoneka kuti Sathana i mucengeji mukuru, iyena anoziva  kuti angakwevejeresa kudini murangariro yo vaya vanopeamira mu kuda kuita zvomujimu no kuita kuti vatende zviro zvicikaripi zvokadi. Vandhu vondhovo ngo mwoyo wese vanotenda zviro zvavavonaro no kuzwa zve kangaije votozviverengeravo vamweni inga cokwadi. Mu kufamba ko nguva, ndhorondhojo ngo kundophindhwa japhindhwazve jinopejisira ngo kuengejehwa. Kudari muKristu akandhandhanisa ndhorondho jakadaro, waizova eciita kuda kwa Dhiabhu—“baba wo unyepi.” Anonga ari kundhandhanisa fafanya ya Sathana.—Johani 8:44; 2 Timoti 2:16.

21. Mabhuyo edu anodikana kubatikana maningi papi?

21 Thangwe rocipiri, pikija muKristu umwe kareko wainga akabatana no mujimu jakashata, iyena aacaizogara acindohwirijira-hwirijira ndhorondho iji inga zviro zvokubungaija nazvo no vatendi doni. Ngenyi? Tinongwajwa kudari: ‘Ngatiringisise ngo meso edu Jesu, anovhikira rutendo hwedu.’ (Vaheberi 12:2) Hina, tinosotesesa kuna Kristu, haiwa Sathana. Tinodikana kuziva kuti paainga pasi pano, Jesu aazivi kuvaraija vajiji vake ngo ndhorondho ngo pamusoro po mujimu jakashata, pikija hazvo waikwanisa kunanga zvizinji ngo pamusoro po zvinokwanisa no zvicikakwanisi kuita Sathana. Kusiapo izvo, Jesu wakabatikana pa masoko o Umambo. Hino, mukutevejera Jesu no vapostori vake, tinoda kuti mabhuyo edu abatikane maningi pa “muxamaiso ya Mwari.”—Maitiro o Vapostori 2:11; Luka 8:1; VaRoma 1:11, 12.

22. Tingaitisa kudini kuti tirambe tecibesera ‘kudakara’ ko ‘mugore’ kurambe kuripo?

22 Zvokadi, Sathana anoshandisa mazano akawanda, kubatanija zvomujimu, ecieja kuparaja ushamwari hwedu na Jehovha. Asi, ngo kunyenya zvakashata zve toda zvakanaka, itusu atidopi mukana Dhiabhu wo kurembesa civaringo cedu co kuramba maitiro ari ese o zvomujimu. (Verenganyi VaEfeso 4:27.) Rangariranyi kuti ‘kudakara’ kwakadini kunozova ‘mugore’ kudari tikaramba ‘tecivangirira bziejo bza Sathana’ mbhera kuparajwa kwake!—Luka 15:7; VaEfeso 6:11.

^ ndim. 16 Mazina akapuwa Sathana (Muphikizi, Murevi, Mucengeji, Mueji, Munyepi) aanangi kuti iyena anokwanisa kuzemena-zemena murangariro wedu no mwoyo. Mukusiana, Jehovha anonangwa inga ‘anosotesesa mwoyo,’ zve Jesu anonangwa inga ‘anosotesesa shingamo no mwoyo.’—Mazwi Akangwara 17:3; Apokalipsi 2:23, Shanduro yeNyika Itsva.

^ ndim. 18 Kuitira kuwana masoko mazinji, vonanyi musoro unoti: “Muedzo Woutano nokuda Kwako Here?” uri mu Murindiri wo 15 ya Mbuji, 1994, mapheji 19-22 (mu Cishona), zve musoro unoti: “Zvinotaura Bhaibheri: Kurapwa Kwaunosarudza—Kune Basa Here?” uri mu Despertai!, yo 8, Zvita, 2001.