Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 MASOKO O KUENGEJERA

Zvinonanga Bhaibheri ngo Pamusoro po Kurambana no Kuparajana

Zvinonanga Bhaibheri ngo Pamusoro po Kurambana no Kuparajana

Jehovha anovetera kuti vaya vanocadha varambe vakabatisisa mbhiko yo mucadho. Jehovha paakabatanija mwanarume no mwanakaji wo kutanga, iyena wakati: ‘Mwanarume anozobatana no mukaji wake, vovaviri vanozova mundhu umwe.’ Ngo kufamba ko nguva, Jesu Kristu wakacindikijavo shwiro iyi pakuengejera kuti: “Mundhu acadoparaja bzakabatanijwa ndi Mwari.” (Genesi 2:24; Mateu 19:3-6) Ngo kudaro, Jehovha na Jesu vanovona mucadho inga cisungo co kwenda no kwenda cinopera basi umwe wavo akafa. (1 VaKorinto 7:39) Zvecivoneka kuti mucadho i nasiriro yakacena, kurambana akudikani kuvoniwa inga cishwiro co mahara haco.  Zvokadi kamare, Jehovha anozonda kurambana kucizivi kucijikira mu Matahwa.—Malakia 2:15, 16.

Ngoapi macijikiro anotendehwa ngo Matahwa kuti vandhu varambane? Zvakanaka, Jehovha anozonda upombo no uhure. (Genesi 39:9; 2 Samueli 11:26, 27; Nduyo 51:6) Ngo kudaro, iyena anovona uhure inga thangwe rinotendera kurambana. (Kuti mujije ngo pamusoro po zvinobatanijwa pa uhure, vonanyi Cipauko 9, ndima 7.) Jehovha anopa mundhu anongaro ashaishihwa kuti ateme ega civaringo co kugara nae kana kurambana. (Mateu 19:9) Kudari anongaro ashaishihwa asunga kurambana, aaripi kushaishira Jehovha. Pa mukuvo wondhowo, ungano yo ciKristu aikukumijiri mundhu ari wese kuti arambane. Ngo zvokadi kuti, mugariro jimweni jingaitisa wakashaishihwaya kuti atame kurambana, maningi-ningi kudari wakashaisharo watatija kukhauya kamare. Vaya vano mathangwe anotendehwa ngo Matahwa kuti varambane, vanodikana kutema vega zvivaringo zve kutendera muviyo jinozovepo ngo kurambana.—VaGalàsia 6:5.

Mu mugariro jimweni jakashatisisa maningi, maKristu amweni akasunga kuparajana kana kutorambana pikija umwe wavo acizivi kuhura. Mu shwiro iji, Bhaibheri rinopangira kuti wia wasia waakarovorana nae “acadorovohwa, nokuti aviirane no” mukaji kana mwamuna wake. (1 VaKorinto 7:11) MuKristu uu aazivi kusujunuka kuti arovore kana kurovohwazve. (Mateu 5:32) Vonanyi muezaniso munganani jinotevera, jo kuti vamweni vangathuka vajivona kuva macijikiro o kuparajana.

Kuramba ngo cabomo kusapota mbhuri. Mbhuri ingazova pa urombo kamare, yokonehwa zvokurarama ndizvona zvicikabviri kucota njiku ngo njiku, ngokuti mwamuna ari kuregera kusapota mbhuri, pikija ecitokwanisa kuzviita. Bhaibheri rinoti: “Ndiani acikakorondhi vandhu vake, bzikuru-kuru vo muzi wake, wakarambavo rutendo, ari wakaxata mwoyo kupinda vacikatendi.” (1 Timoti 5:8) Kudari mwanarume uu anoramba kucinja maitiro ake aya, mukaji angatema civaringo cake dengani anoda kujivirira kugara ushoni ko upenyu hwake no hwo vana ngo kurambana zvopamutemo. Zvokadi kamare, vakuru vo ciKristu vanodikana kungwarira maningi  umwe paanonga acipumbha kuti waakarovorana nae ari kuramba kusapota mbhuri. Mundhu anoramba kusapota mbhuri angajingwa mu ungano.

Kugara kuri kundovodora umweni. Mundhu anotaka waakarovorana nae angaita zvocisimba zvokuti upenyu hwo anozviizihwaro hungava pa ngozi. Kudari anotakaro i muKristu, vakuru vo ungano vanodikana kupsakisira kuti zvinoitika mbhera papi. Kuzvimba ngo kunyangajwa kana zvomasimbamasimba zvingaitisa kuti mundhu ajingwe.—VaGalàsia 5:19-21.

Kurambijwa kunamata Jehovha. Mwamuna kana mukaji angadira ciphingaijo cinganesera umweni kuti anamate Jehovha kana kutoita ngo hasha kuti umweni wake aphwanye mutemo wa Mwari. Pa shwiro iyi, wia ari kuthyisijihwaro angasunga kuti njira imwe yo kuzwira “Mwari kupinda vandhu” ngo yo kuparajana zvopamutemo.—Maitiro o Vapostori 5:29.

Mu shwiro jese jinobatanija mugariro iji jinopindirija mudida inga japerari kubhuiwa, apana na imwe hayo inodikana kuita inga civangirijo ku mukaji kana mwamuna kuti aparajane kana kugara no ari kumushaishiraro. Pikija hazvo shamwari jakaibva kumujimu no vakuru vo ungano vangapa besero rakacijikira mu Bhaibheri, ivona avakwanisi kuziva zvese kamare zviri kuitika pakati po mukaji no mwamuna. Jehovha basi ngo angakwanisa kuzvivona. Mukaji wo ciKristu aacaizokuja Mwari kana nasiriro yo mucadho kudari akaengejera zviciripi izvona pa masoko ake ngo pamusoro po shwiro jo pamuzi basi kuitira kuti aparajane no mwamuna wake, kana mwamuna kuti aparajane no mukaji. Jehovha anonga acivona mazano ese o kupsaka kuparajana, azvinenyi kuti mukaji kana mwamuna anoeja kumafindarisa. Ngo kudaro, ‘zvese zviri mitu no pa mbhene, zvecivoniwa ndiyena, wo tinozoverengerana na yena.’ (Vaheberi 4:13) Asi kudari mugariro wo ngozi unopindirija mudida kamare uri kundoramba uripo, apana na umwe anodikana kushora muKristu anovona kuti njira imwe basi yasara ngo yo kuparajana. Pakupejisira, “tese tinozoenda pa nyasi po utongi hwa Mwari.”—VaRoma 14:10-12.