Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 DIVI 7

Mapangirire Amungaita Mwana Wenyu

Mapangirire Amungaita Mwana Wenyu

“Mazwi aya o ndinokutonga nyamasi, agare mu mwoyo mako! Unozomakonokeja kuno mwana wako, unozovereketa ndiwona wecigara pa muzi pako, no wecifamba mu gwanja rako, wecivata no weciima.”—Deuteronòmio 6:6, 7

Apo Jehovha wakaita nasiriro yo mbhuri, iyena wakadira vabari pa cigaro co kuti vajijise vana vavo. (VaKolosi 3:20) Uu mutoro wenyu inga vabari kuti muroveje vana venyu vade Jehovha zve vagume pa kukura vakareremera. (2 Timoti 1:5;3:15) Imwimwi munodikana kujija zviri mu mwoyo wo mwana wenyu wo rume kana wo kaji. Zvokadi kamare, muezaniso wenyu unoshanda maningi. Mungakwanisa kunasa kujijisa ushoni mwana wenyu Soko ra Jehovha kudari pakutanga rikava mu mwoyo wenyu.—Nduyo 40:8.

 1 ITANYI KUTI ZVIRERUKE KU MWANA WENYU KUVEREKETA NEMWI

BHAIBHERI RINOTI KUDINI: Ivanyi ‘anokasika kupurukira, anononoka kuvereketa.’ (Jakobo 1:19) Munodikana kuita kuti vana venyu vazwe vakasujunuka kuti vabhuye nemwi. Vanodikana kuziva kuti imwimwi makasujunuka kuvapurukira pavanonga vecida kuvereketa. Itanyi kuti pave no mugariro wo runyararo ngo kudaro vanozozvivona zvakareruka kuti vanange vega. (Jakobo 3:18) Kudari vakarangarira kuti munozovavereketera ngo hasha kana kuvatonga, avazovi vakasujunuka kwamuri. Ivanyi anosengerera no vana venyu, zve mukuvo no mukuvo vagondesenyi rudo hwenyu.—Mateu 3:17; 1 VaKorinto 8:1.

ZVAMUNGAITA:

  • Vavonesenyi kuti makasujunuka kudari vana venyu vanoda kuvereketa

  • Bhuisananyi no vana venyu nguva jese, kuciripi basi panonga pano zvineso

2 EJANYI KUZWISISA KUTI VARI KUDA KUNANGENYI KAMARE

BHAIBHERI RINOTI KUDINI: “Ndiani anorangarira uxoni bzaanonanga, anozodakara; Ndiani anogonda [Jehovha] Mwari, anogarisika.” (Mazwi Akangwara 16:20) Nguva jimweni munodikana kusota zviri sure ko magama o vana venyu kuitira kuzwisisa mazwiro avo. Ngo zvovazinji kuti vocidoko vanoengejera maningi kana kuda kunanga ciro cavaciripi kuda kunanga kamare. “Ndiani anopingura acito azwa, anozova no upenji no kupserujwa.” (Mazwi Akangwara 18:13) Mucakasika kunyangajwa.—MazwiAkangwara 19:11.

ZVAMUNGAITA:

  • Ivanyi makasunga kutama kukamisa mwana wenyu ecivereketa kana kumukharamusa, azvinenyi kuti mwana wenyu ari kunangenyi

  • Ejanyi kuceukija kuti maizwa kudini pamainga no mupira wavo zve zvicinyi zvaidenga zvakanaka maningi kwamuri

 3 VAVONESENYI KUTI MURI KUZWIRANA

BHAIBHERI RINOTI KUDINI: “Izwai, mwana wangu, bzikonokejo bza baba wako, ucaxora majijisiro a mai wako”. (Mazwi Akangwara 1:8) Jehovha wakagaja kuti baba na mai vatonge vana. Munodikana kujijisa vana venyu kuti vamureremeje zve kumuzwira. (VaEfeso 6:1-3) Vana vanozvivona kuti vabari vavo avana “mwoyo umwe.” (1 VaKorinto 1:10) Kudari mukatama kuzwirana, ejanyi kutama kuzvivonesa ku vana venyu ngo kuti izvi zvingapeja nderemejo yavo kwamuri inga vabari.

ZVAMUNGAITA:

  • Bhuisananyi zve tenderananyi njira jamucazopanica ndijona vana

  • Kudari imwimwi no mudoni wenyu mukava no mavonero akasiana ngo marovejere amucaita vana, ejanyi kuvona mavonero o mudoni wenyu Jijisai mwana gwanja rinosisira”

 4 IVANYI NO MAZANO

BHAIBHERI RINOTI KUDINI: “Jijisai mwana gwanja rinosisira.” (Mazwi Akangwara 22:6) Jijiso inobudirira yo vana venyu aiitiki yega. Munodikana kuva no mazano o kuroveja, anobatanija kupangira vana venyu. (Nduyo 127:4; Mazwi Akangwara 29:17) Kupangira akunangi kupanica basi, asi kunobatanijavo kubesera vana venyu kuzwisisa cinangwa ciri sure ko mupango. (Mazwi Akangwara 28:7) Zve vajijisenyi kuda Soko ra Jehovha pomwe no kufumbhura zviambi zvaro. (Nduyo 1:2) Izvi zvinozovabesera kuti hana yavo irambe yecishanda.—Vaheberi 5:14.

ZVAMUNGAITA:

  • Ivanyi no cokwadi co kuti vana venyu vanovona Mwari inga Mundhu kamare wavangathemba

  • Vabeserenyi kuti vavone zve kujivirira ngozi jo mufambiro, jakadari inga jiya jinowanika mu Interneti no mu redes sosiais. Vajijisenyi matizire avangaita vandhu vanopsaka zvo vatano.

“Jijisai mwana gwanja rinosisira”