Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 DIVI 8

Apo Ngozi Inoitika

Apo Ngozi Inoitika

“Dakaranyi nga izvi, pikija mecidikana kutambujika, pa ngari doko, matambujiko akasianasiana.”—1 Pedru 1:6

Pikija hazvo munoeja kuita zvamunokwanisa kuti muve no mucadho zve mbhuri inodakajisa, zviro zvicikavetehwi zvingaitisa kuti zvinese kwamuri kuti murambe muno mudakaro. (Mucumaeri 9:11) Ngo rudo hwese Mwari anotipa besero patinosongana no zvineso. Kudari mukashandisa zviambi zvinotevera zvo Matahwa, imwimwi no mbhuri yenyu munozokwanisa kuhwisana nazvo, pikija mugariro wakashata.

 1 GONDANYI NA JEHOVHA

BHAIBHERI RINOTI KUDINI: “Turanyi muthwaro wenyu kwaari, Yena anozomukorondha.” (1 Pedru 5:7) Nguva jese ceujanyi kuti Mwari aazivi kumunyangajirihwa. (Jakobo 1:13) Pamunonga mecimukhwederera, iyena anozomubesera mu njira yakanaka maningi. (Isaia 41:10) “Mubvunjenyi bzokuthimwathimwa bzese.”—Nduyo 62:8.

Munozowana vangiso pamunoverenga zve kujija Bhaibheri mazuva ese. Inga muviyo, munozovona kuti Jehovha anotinyaraja mu matambujiko edu ese (2 VaKorinto 1:3, 4; VaRoma 15:4) Iyena wakagondesa kumupanyi “rugarisiko . . . hunopinda uzivi hwese.”—VaFilipi 4:6, 7, 13.

ZVAMUNGAIDTA:

  • Itanyi mukumbiro wo kukumbira besero ra Jehovha kuti murambe makathiva zve kurangarira kwakacena

  • Hwirijiranyi mavonero enyu zve sananyi njira yaushoni yamunayo

2 JINGWARIRENYI MWEGA POMWE NO MBHURI YENYU

BHAIBHERI RINOTI KUDINI: “Mwoyo wo muzivi unoda kuziva; njeve yo vazivi inodavo kuziva.” (Mazwi Akangwara 18:15) Munodikana kuziva zvese kamare. Fumbhuranyi kuti vo pa mbhuri yenyu vanodenyi. Bhuyanyi navo. Vapurukirenyi.—Mazwi Akangwara 20:5.

Kudari mudiwa akafa keni? Mucatya kuvonesa mazwiro enyu. Ceujanyi kuti pikija Jesu ‘wakacema.’ (Johani 11:35; Mucumaeri 3:4) Kuzorora ushoni zve kuvata zvinodikanavo maningi. (Mucumaeri 4:6) Zvinozoitisa kuti zvireruke kuhwisana no mugariro unosuruvarisa.

ZVAMUNGAITA:

  • Ngozi icito yaitika, ngacive cirovejeso cenyu kubhuisana no mbhuri yenyu. Panomuka zvineso, vanozozwa vakasujunuka kubhuya nemwi

  • Bhuisananyi no vamweni vakambosonganavo no zvineso zvakafanana

 3 WANANYI BESERO YAMUNODA

BHAIBHERI RINOTI KUDINI: “Xamwari inokuda mu mukuvo wese; yakabahwa kuti iite hama pa bonezi.” (Mazwi Akangwara 17:17) Shamwari jenyu jinoda kumubeseranyi, asi ivona kangaije avazivi kuti vangamubeseresa kudini. Mucapseruka kuvabvunja zvamunoda kamare. (Mazwi Akangwara 12:25) Cimwenizve, psakanyi besero ro kumujimu kubva ku vaya vanozwisisa Bhaibheri. Ndhungamiro yavangapa inobva mu Bhaibheri ingamubesera.—Jakobo 5:14.

Munozowana besero ramunoda apo nguva jese munosonganirana no vandhu vano rutendo hwo kadi kamare na Mwari anothemba zvigondiso zvake. Munozowanavo nyarajo huru pamunozobesera vamweni vanoda vangiso. Kovananyi no vamweni rutendo hwenyu kuna Jehovha pomwe no zvigondiso zvake. Rambanyi makabatikana ngo kubesera vandhu vamweni vari kuneseka, zve mucajipaura no vaya vanomuda zve vanomutaja.—Mazwi Akangwara 18:1; 1 VaKorinto 15:58.

ZVAMUNGAITA:

  • Bhuyanyi no shamwari yo phedo zve musienyi amubesere

  • Nanganyi zvamunodaro kamare mucingapoti-poti zve bhuyanyi zvokadi