Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 8

Ngenyi Mwari Anoregerera Ushati no Kutambujika?

Ngenyi Mwari Anoregerera Ushati no Kutambujika?

1. Hwakatangisa kudini ushati?

Mwari wakatendera kuti vandhu vatonge ko mukuvo wakareba kuitira kuti zvibude pambhene kuti ivona avakwanisi kupeja zvineso zvo vandhu

Ushati hwakatanga pasi pano apo Sathana wakareva manyepo okutanga. Pakutanga Sathana wainga ngirozi yakaperera, asi “aazivi kuvangirira mu bzokadi”. (Johani 8:44) Iyena wakakhwijirija cido co kunamathwa cakafanera Mwari basi. Sathana wakanyepera mwanakaji wo kutanga, Evha, zve wakamukhohwesa kuti amuzwire kusia Mwari. Adhamu wakabatana na Evha mu kuphwanya mutemo wa Mwari. Cisungo ca Adhamu cakamutungamirira ku matambujiko zve no rufu.​—Verenganyi Genesi 3:1-6, 19.

Sathana paakapa mazano kuti Evha acapurukira Mwari, iyena waitanga kupandukira utongi hwa Mwari, kana cigaro cake inga Mukuru-kuru. Vandhu vazinji vakabatana na Sathana mu kuramba Mwari inga Mutongi wavo ngo kudaro, Sathana wakava “mambo wo nyika”.​—Verenganyi Johani 14:30; 1 Johani 5:19.

2. Zvakarura Mwari zvainga zvakaposeka here?

Mabasa ese a Mwari akarungama. Vandhu no ngirozi zvaakarura Mwari zvaikwanisa kumupurutana ngo njira yakaperera. (Deuteronòmio 32:4, 5) Mwari wakatirura no rusujunuko hwo kujikhetera kuita zvakanaka kana zvakashata. Rusujunuko uhu hunotipa mukana wo kutatija rudo kuna Mwari.​—Verenganyi Jakobo 1:13-15; 1 Johani 5:3.

3. Ngenyi Mwari anoregerera matambujiko kugumira zvino?

Pa mukuvo wakatemehwa, Jehovha ari kuregerera kupandukira utongi hwake. Ngenyi? Kuitira kutatija kuti apana simba ro utongi rinobesera vandhu pacina besero yake. (Mucumaeri 7:29; 8:9) Pa kupera  ko 6.000 zvo makore o zviitiko zvo vandhu, zvitatijo zviri pa mbhene. Kutonga ko vandhu kuri kukonehwa kupeja hondo, uphanga, kutama kururama kana ndhenda.​—Verenganyi Jeremia 10:23; VaRoma 9:17.

Mu kusiana no kutonga ko vandhu, kutonga ka Mwari kunobesera vayani vanohutenda. (Isaia 48:17, 18) Sambi-sambi, Jehovha anozopeja utongi hwese hwo vandhu. Vandhu vayani basi vakakheta kutongwa ndi Mwari vanozorarama panyika.—Isaia 11:9.​—Verenganyi Danieli 2:44.

Vonanyi vhidhio inoti Ngenyi Mwari Anoregerera Kutambujika?

4. Kumboregerera ka Mwari kunotiita kuti tidini?

Sathana wakananga kuti vandhu vanoshandira Jehovha ngo cido co umbau. Maidakarira kuti zvakabhuya sathana ave manyepo here? Imwimwi mungazviita! Kuregerera ka Mwari kunoitisa kuti tese titatije kuti tiri ku divi ro kutonga ka Mwari kana ko Vandhu. Itusu tinotatija kukheta kwedu ngo mararamire atinoita.​—Verenganyi Jobe 1:8-12; Mazwi Akangwara 27:11.

5. Tingakhetesa kudini Mwari kuti ave Mutongi wedu?

Kukheta kwedu kunotatija kuti tinoda Mwari inga Mutongi wedu

Tingakheta Mwari kuti ave Mutongi wedu ngo kujija pomwe no kuva mukunamata ko kadi-kadi. (Johani 4:23) Tingaramba Sathana kuti acava mutongi wedu ngo kuenderera mberi ticinganghwiniri mu zvo matongehwe o nyika no hondo, inga zvakaita Jesu.​—Verenganyi Johani 17:14.

Sathana anoshandisa simba rake kuti akhwindijire uhure, zviito zvinokhuvaza. Patinoramba zviito izvi, shamwari jimweni zve vo paukama vangatiseka kana kutizonda. (1 Pedru 4:3, 4) Ngo kudaro tinodikana kukheta. Ticaita ushamwari no vandhu vanoda Mwari here? Ticazwira mutemo jake jo ungwaru no jo rudo here? Tikaita kudaro, tinotatija kuti Sathana wakanyepa paakananga kuti pa matambujiko apana na umwe anoita kuda ka Mwari.​—Verenganyi 1 VaKorinto 6:9, 10; 15:33.

Rudo hwa Mwari ku vandhu vese hunogondisa kuti ushati no kutambujika zvicazopera. Vaya vanotatija kuti vanotenda izvi vanozobusa upenyu hucikaperi pasi pano.​—Verenganyi Johani 3:16.