Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 9

Mungaitenyi Kuti Mbhuri Yenyu Ive Inodakara?

Mungaitenyi Kuti Mbhuri Yenyu Ive Inodakara?

1. Ngenyi kutaririsa mucadho kunoviisa mudakaro pa mbhuri?

Masoko akanaka anobva kuna Jehovha, Mwari wakadakara, anoda kuti mbhuri jidakare. (1 Timoti 1:11) Ndiena mutangi wo mucadho. Kutaririsa mucadho kunodikana maningi ku mudakaro wo mbhuri ngo kuti kunopa cijikiro mukurera vana. MaKristu anodikana kureremeja mutemo jo mu mutundhumo ngo kutaririsa mucadho.​—Verenganyi Luka 2:1, 4, 5.

Mwari anovonesa kudini mucadho? Anoda kuti uve cisungo co kwenda no kwenda co mwanarume no mwanakaji. Jehovha anoda kuti mwamuna no mukaji vave vakatendeseka umwe kuno umweni. (VaHeberi 13:4) Anozonda kurambana. (Malakia 2:16) Asi anotendera kuti maKristu arambane zve arovorezve kudari mukaji kana mwamuna apombora.​—Verenganyi Mateu 19:3-6, 9.

2. Mwamuna no Mukaji vangatajisana kudini?

Jehovha wakarura mwanarume no mwanakaji kuti vabesane mu mucadho. (Genesi 2:18) Inga musoro wo mbhuri, mwamuna anodikana kutungamirira mu kupa zvinodikana ku mbhuri yake zve no kuijijisa ngo zva Mwari. Anodikana kuita ndhamburiko mu rudo hwake ku mukaji. Vamuna no vakaji vanodikana kudisana no kureremejana. Zvecivoneka kuti vamuna no vakaji vese avazivi kuperera, kujija kuregererana ndiyona khiya ku mudakaro mu mucadho.​—Verenganyi VaEfeso 4:31, 32; 5:22-25, 33; 1 Pedru 3:7.

 3. Kudari mucizivi kudakara mu mucadho, munodikana kuutiza here?

Mukasongana no zvineso mu mucadho wenyu, mese mo vaviri munodikana kushanda kuti mutajane ngo rudo. (1 VaKorinto 13:4, 5) Izwi ra Mwari aripangiri kuparajana inga njira yo kutonga ndiyona zvineso zvinoitika kazinji mu mucadho.​—Verenganyi 1 VaKorinto 7:10-13.

4. Imwimwi vana, anodenyi Mwari kwa muri?

Jehovha anoda kuti imwimwi muve vakadakara. Wakamupa ngwajo yakanaka yo kuti mubuse ujaha no usikane hwenyu. Anoda kuti mubesereke kubva mu ungwaru zve no zviitiko zvo vabari venyu. (VaKolosi 3:20) Jehovha anodazve kuti muwane mudakaro wo kushandira Marure wenyu no Mwana wake.​—Verenganyi Mucumaeri 11:9–12:1; Mateu 19:13-15; 21:1516.

5. Imwimwi vabari, vana venyu vangawanisa kudini mudakaro?

Munodikana kushanda ngo simba kuti mupe vana venyu zvo kuha, nyumba zve zvo kusimira. (1 Timoti 5:8) Asi kuti vana venyu vawane mudakaro, munodikanazve kuvajijisa kuti vade Mwari zve kuti vajije ngo zvake. (VaEfeso 6:4) Muezaniso wenyu wo rudo kuna Mwari, unga kwevera zvikuru kwazvo mwoyo wo mwana wenyu. Kujijisa kwenyu kukacijikira mu Izwi ra Mwari, kungacinja murangariro wo mwana wenyu mu njira yakanaka.​—Verenganyi Deuteronòmio 6:4-7; Mazwi Akangwara 22:6.

Mwana anobesereka pamunomuvangisa zve kumusimba. Vanodazve kupangihwa no kupanicwa. Rovejo iyi inovajivirira mu mufambiro ungavatorera mudakaro. (Mazwi Akangwara 22:15) Hina, kujijisa akumbodikani kuva ko hasha kana ko ciki.​—Verenganyi VaKolosi 3:21.

Zvapupu zva Jehovha zvinobudisa mabhuku akawanda maningi akatahwa kuitira kubesera vabari no vana. Mabhuku aya akacijikira mu Bhaibheri.​—Verenganyi Nduyo 19:7, 11.