Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 10

Mungamavonesa Kudini Manamatiro Okadi-kadi?

Mungamavonesa Kudini Manamatiro Okadi-kadi?

1. Kuno ciara cimwe basi cokadi-kadi here?

“Basopanyi vaporofeti vokunyepa.”—MATEU 7:15.

Jesu wakajijisa vateveri vake ciara cimwe basi, ciara co kadikadi. Cakadenga citaka cinotungamirira ku upenyu. Jesu wakati: “Vaxoma” vanowana citaka ici. (Mateu 7:14) Mwari anotendera kunamata kumwe basi kwakacijikira mu Izwi rake ro zvokadi. Vanamati vese vo kadi-kadi vakabatana mu rutendo humwe.​—Verenganyi Johani 4:23, 24; 14:6; VaEfeso 4:4, 5.

Vonanyi vhidhio inoti Mwari Anotendera Manamatire Ese Anoitwa ngo Vandhu Here?

2. Jesu wakanangeyi ngo maKristu o kunyepa?

“Vanonanga kuti vanoziva Mwari, kaveta vanomuramba ngo maitiro avo.”—TITO 1:16.

Jesu wakangwaja kuti vaphorofeti vo kunyepa vaizovoja uKristu. Ngo magama amweni, ivona vanovoneka enga vanamati vo kadi-kadi. Zviara zvavo zvinokhuwa kuva zvo ciKristu. Asi imwimwi mungaziva vandhu avo zvo vari kamare. Mungazviitisa kudini? Manamatire okadi-kadi basi anobara maKristu okadi kamare ano mugariro no njira jinozivikanwa.​—Verenganyi Mateu 7:13-23.

3. Mungamazivisa kudini manamatire okadi-kadi?

Vonanyi zvitatijo zvishanu zvinovonesa:

  • Vanamati vo kadi-kadi vanoreremeja Bhaibheri inga Izwi ra Mwari. Vanovangisira kurarama mukuzwirana no ndhungamiro jaro. Ngo kudaro, manamatiro okadi-kadi anosiana no manamatiro anojijisa hwiru hwo vandhu. (Mateu 15:7-9) Vanamati vo kadi-kadi avaiti zvinosiyana no zvavanocumaera.​—Verenganyi Johani 17:17; 2 Timoti 3:16, 17.

  •   Vateveri vo kadi-kadi va Jesu vanokuja zina ra Mwari, Jehovha. Jesu wakakuja zina ra Mwari ngo kuriita kuti rizivikanwe. Iyena wakabesera vandhu kuti vazive Mwari zve wakavajijisa kuti vakumbire kuti zinero riceneswe. (Mateu 6:9) Mumutundhu menyumo, i ciara capi cinoita kuti zina ra Mwari rizivikanwe?​—Verenganyi Johani 17:26; VaRoma 10:13, 14.

  • MaKristu o kadi-kadi anocumaera Umambo hwa mwari. Mwari wakatuma Jesu kuti azocumaere masoko akanaka o Umambo. Umambo hwa Mwari ngo vetero imwe basi ku vandhu. Jesu wakaenderera mberi ecivereketa ngo pamusoro pahwo kugumira pa njiku yo kufa kwake. (Luka 4:43; 8:1; 23:42, 43) Iyena wakareva kuti vateveri vake vaizocumaera ngo pamusoro pahwo. Kudari ari wese akamukhwederera kuti averekete ngo ndava yo Umambo hwa Mwari, munoti angava wo manamatiro api?​—Verenganyi Mateu 24:14.

  • Vateveri va Jesu avaiti divi ro nyika iyi yakashata. Imwimwi mungavaziva ngo kuti avaiti divi ro zvo matongehwe o nyika kana kuhwisana ngo kusiana ko ndimi. (Johani 17:16; 18:36) Cimwenizve, avatevejeri zviito no murangariro zvo nyika zvinokhuvaza.​—Verenganyi Jakobo 4:4.

  • MaKristu o kadi-kadi anodisana ngo cawo. Kuvha mu Izwi ra Mwari, vakajija kureremeja vandhu vo majinja ese akasiana-siana. Mukusiana, manamatiro o kunyepa kazinji anobesera ngo simba rese hondo jo majinja, vanamati vokadi-kadi vanoramba kuita izvi. (Mikeya 4:1-3) MaKristu okadi-kadi aana umbau mu kushandisa nguva yawo no zvaanazvo kuitira kubesera zve kuvangisa vamweni.​—Verenganyi Johani 13:34, 35; 1 Johani 4:20.

4. Mungakwanisa kumavona manamatiro okadi-kadi here?

Manamatiro api okuti jijiso jawo jese jinovha mu Izwi ra Mwari, anokuja zina ra Mwari zve anotokotesa Umambo hwa Mwari inga vetero imwe basi yo vandhu vese? Cikwata capi cinotatija rudo zve cinoramba hondo? Munorangarira kudini?​—Verenganyi 1 Johani 3:10-12.