Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 12

Mungaitisa Kudini Kuti Mukhwedere Phedo na Mwari?

Mungaitisa Kudini Kuti Mukhwedere Phedo na Mwari?

1. Mwari anopurukira mukumbiro jese here?

Mwari anokoka vandhu vo mushovo wese kuti vakhwedere kwaari mu mukumbiro. (Nduyo 65:2) Hina, iyena aapurukiri kana kuti aadaviri mukumbiro jese. Inga muezaniso, mukumbiro jo mwanarume anoshupha mukaji wake ajigumi. (1 Pedru 3:7) VaIziraeri pavakaramba veciita zvakashata, Mwari wakaramba kupurutana mukumbiro javo. Zvakajeka kamare, mukumbiro i unyasha. Pikija mukumbiro yo vakaita zvishaishi zvikuruwani Mwari anozovadavira, kudari vakatendeuka.​—Verenganyi Isaia 1:15; 55:7.

Vonanyi vhidhio inoti Mwari Anopurukira Mukumbiro Jese Here?

2. Tingakumbirisa kudini?

Mukumbiro i divi ro kunamata kwedu, ngo kudaro tinodikana kukumbira ka Marure wedu basi, Jehovha. (Mateu 4:10; 6:9) Zvecivoneka kuti tiri vashaishi, tinodikana kukumbira mu zina ra Jesu ngo kuti wakafa ngo ndava yo zvishaishi zvedu. (Johani 14:6) Jehovha aadi kuti tiphinde-phinde mukumbiro jo kutevejera kana jakatahwa. Iyena anoda kuti tikumbire zvinobva mu mwoyo medu.​—Verenganyi Mateu 6:7; VaFilipi 4:6, 7.

Marure wedu angazwa pikija munamato jinoizwa ngo cinyararire. (1 Samueli 1:12, 13) Anotikoka kuti tikumbire pa nguva iri yese, inga pakutanga no pa kupera ko njiku, pakuda kuha zve patinosongana no zvineso.​—Verenganyi Nduyo 55:23; Mateu 15:36.

3. Ngenyi maKristu anoungana pamwepo?

Kukhwedera phedo na Mwari azvizivi kureruka ngo kuti tiri  kurarama pakati po vandhu vacina rutendo muna Mwari zve vanoseka cigondiso cake co mutendere panyika. (2 Timoti 3:1, 4; 2 Pedru 3:3, 13) Ndiyo ndava tinoda kusonganirana kunovangisa ko vatendi doni zve ivonavo vanoda kwedu.​—Verenganyi VaHeberi 10:24, 25.

Kusonganirana no vandhu vanoda Mwari kunotibesera kuti tikhwedere phedo na Mwari. Musongano jo Zvapupu zva Jehovha jinopa mukana wakanaka wo kubesereka kuvha mu rutendo hwo vamweni.​—Verenganyi VaRoma 1:11, 12.

4. Mungakhwederesa kudini phedo na Mwari?

Mungakhwedera phedo na Jehovha ngo kurangarijisisa ngo zvamajija kuvha mu Izwi rake. Poporanyi mabasa, ngwajo zve zvigondiso zvake. Mukumbiro no kurangarijisisa zvinotibesera kuti tizwisise kudikana ko rudo no ungwaru zva Mwari.​—Verenganyi Joxwa 1:8; Nduyo 1:1-3.

Mungakwanisa kukhwedera kuna Mwari kudari mukagonda zve kuva no rutendo kwaari. Asi rutendo hwakaita inga ciro cinorarama cinoda kupuwa zvo kuha. Imwimwi munodikana kuhisa gonda renyu nguva jese ngo kurangarijisisa pakacijikira zvamunotenda.​—Verenganyi Mateu 4:4; VaHeberi 11:1, 6.

5. Kukhwedera phedo na Mwari kungazomubeseresa kudini?

Jehovha anokorondha vayani vanomuda. Angavajivirira ku zviri zvese zvingauraya gonda zve no vetero yavo yo upenyu hucingaperi. (Nduyo 91:1, 2, 7-10) Iyena anotingwaja ngo ndava yo njira jo upenyu jingakhuvaza uhomi hwedu zve mudakaro. Jehovha anotijijisa njira yakanaka yo upenyu.​—Verenganyi Nduyo 73:27, 28; Jakobo 4:4, 8.