Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 3

Ngo Capi Cidisiso ca Mwari Kuno Vandhu?

Ngo Capi Cidisiso ca Mwari Kuno Vandhu?

1. Ngo capi cidisiso ca Mwari kuno vandhu?

MWARI wainga no cidisiso cakanaka maningi kuno vandhu. Iyena wakaita mwanarume no mwanakaji wo kutanga, Adhamu na Evha, kuti vararame mu munda wo maruva waiseja. Cidisiso cake cainga co kuti vave no vana, vaite paradhiso pasi pese, no kungwarira zvinyama.—Genesi 1:28; 2:8, 9, 15; vonanyi Masoko o Kupejisira civerengo 6.

2. Tinozvizivisa kudini kuti Mwari anozoita cidisiso cake? (b) Bhaibheri rinonangenyi ngo kurarama mbhera na rini?

2 Munorangarira kuti tingazoraramavo mu paradhiso here? Jehovha anotibvunja kuti: “Ndakabziimisa, ndinozobziita.” (Isaia 46:9-11; 55:11) Hina, anozoita zvaakaimisira kana kuti cidisiso cake zve apana cingamukamisa. Jehovha anonanga kuti anothangwe ro kuita pasi pano. Iyena “aazivi kuirura inga bzipare.” (Isaia 45:18) Iyena waida kuti vandhu vararame pasi pano pese. Mwari waida vandhu vo mushovonyi kuti vararame pasi pano, zve mbhera rini? Bhaibheri rinoti: “Varurami [kana, vanozwira] vanazoita veno vo nyika, vanozogaremo mbhera narini.Nduyo 37:29; Apokalipsi 21:3, 4.

3. Zvecivoneka kuti vandhu vari kuhwaja vecifa, cicinyi camungabvunjisa?

3 Nyamasi vandhu vari kuhwaja vecifa. Mu ndau zinji, ivona vanotakana veciurayana. Zvokadi izvi andizvopi zvaida Mwari. Waro, kwakashatenyi, zve ngenyi? I Bhaibheri basi rinokwanisa kuzvidurujira.

 MUVENGI WA MWARI

4, 5. (a) Ndiyani wakabhuya na Evha zvecibva ngo mukanwa mo nyoka mu munda wo Maruva? (b) Zvingaitisa kudini kuti mundhu wakagondeka agume pakuva mbabva?

4 Bhaibheri rinotibvunja kuti Mwari ano muvengi anodaninjwa kuti “Dhiabho nokuti Sathana.” Sathana wakashandisa nyoka kuti iverekete na Evha mu munda wo Edheni. (Apokalipsi 12:9; Genesi 3:1) Iyena wakaita kuti iite inga nyoka iri kuvereketa.—Vonanyi Masoko o Kupejisira civerengo 7.

5 Waro, ndi Mwari wakaita Sathana Dhiabho here? Haiwa! Ngirozi yainga kudenga Mwari paainasirira pasi pano kuitira Adhamu na Evha yakacinja, yova Dhiabho. (Jobe 38:4, 7) Zvakaitisa kudini? Vonanyi! Zvingaitisa kudini kuti mundhu wakagondeka kamare acinje kuva mbabva? Iyena aazivi kubahwa ari mbabva. Asi iyena woemura, kana kuda ciro ciciripi cake. Iyena oramba ecindocirangarira, zve cidisiso cake cakashata coguma pa kuva cakakura. Perapo, paanowana mukana, iyena wotociba. Iyena wacinja ega kuva mbabva.—Verenganyi Jakobo 1:13-15; vonanyi Masoko o Kupejisira civerengo 8.

6. Zvakaitisa kudini kuti ngirozi ive muvengi wa Mwari?

6 Ndizvona zvakaitika no ngirozi iyi. Pasure po kusika Adhamu na Evha, Jehovha wakananga kuti vave no vana zve ‘vazaje nyika.’ (Genesi 1:27, 28) Ngirozi iyi yakarangarira kuti: ‘Vandhu vese ava vangandinamata kunja ko kunamata Jehovha!’ Paainga ecizvirangarira maningi, kuemura kwake zviro zva Jehovha kwaikuravo maningi. Ngirozi iyi yaida kuti vandhu vamunamate. Ngo kudaro wakaenda kocengeja Evha. (Verenganyi Genesi 3:1-5.) Ngo kuita izvi, iyona yakava Sathana Dhiabho, muvengi wa Mwari.

7. (a) Ngenyi Adhamu na Evha vakafa? (b) Ngenyi tinoita harahwa perapo tofa?

 7 Adhamu na Evha vakaphwanya mutemo wa Mwari voha mucero. (Genesi 2:17; 3:6) Ivona vakashaishira Jehovha, perapo vofa, inga zvainga zvakanangwa ndi Jehovha kuti ngo zvavaizoita. (Genesi 3:17-19) Vana va Adhamu na Evha vaingavo vashaishi, ngo kudaro vakafavo. (Verenganyi VaRoma 5:12.) Kuti tibesehwe ngo kuzwisisa kuti ngenyi vana va Adhamu na Evha vakavavo vashaishi, vonanyi muezaniso uwu. Rangariranyi ciumbiro co pau cakabofoka. Pau jakona jinozobudavo jakabofoka inga ciumbiro cajo. Adhamu paakatama kuzwira Mwari iyena wakava mushaishi. Zvecivoneka kuti itusu tiri vana va Adhamu, tese tiri vashaishi, kana kuti “takabofokavo” inga Adhamu. Zvecivoneka kuti tiri vashaishi, itusu tinoita harahwa perapo tofa.—VaRoma 3:23; vonanyi Masoko o Kupejisira civerengo 9.

8, 9. (a) Sathana waida kuti Adhamu na Evha vadavirenyi? (b) Asi ngenyi Jehovha aazivi kuuraya ciriporipoco vapandukiri?

8 Sathana wakatanga kupandukira Jehovha paakaitisa kuti Adhamu na Evha vatame kuzwira Mwari. Iyena waida kuti Adhamu na Evha vadavire kuti Jehovha munyepi, mutongi wakashata acikadi zvakanaka kwavari. Sathana wainga ecinanga kuti vandhu avacaidikanepi kubvunjwa zvokuita ndi Mwari zve kuti Adhamu na Evha vaidikana kukheta vega zvakanaka no zvakashata. Waro Jehovha waizoitenyi? Iyena waikwanisa kuuraya vapandukiri. Asi izvi zvaizovonesa kuti Sathana ndiyena munyepi here? Haiwa.

9 Ngo kudaro, Jehovha aazivi kuuraya ciriporipoco vapandukiri ava. Asi wakapekeja cinguva kuti vandhu vajitonge vega. Izvi zvaizovonesa pambhene kuti Sathana ndiyena munyepi zve kuti Jehovha anoziva zvakanaka kuno vandhu. Tinozojija zvizinji ngo pamusoro  pazvo mu Cipauko 11. Asi munovona kudini ngo pamusoro po civaringo ca Adhamu na Evha? Zvainga zvakanaka kwavari kuzwira Sathana votama kuzwira Mwari here? Jehovha wakavapekeja zvese zvavainga nazvo. Wakavapekeja upenyu hwakakwana, ndau yakaseja kuti vagaremo, no basa raivadakajisa. Asi Sathana apana na cimwe cakanaka caakavaitira. Kudari no mainga muriyo, maizoitenyi?

10. Zvicinyi zvinosisira manigi zvatinodikana kukheta kwatiri tese?

 10 Nyamasi uno, tese tino zvatinodikanavo kukheta, zve upenyu hwedu huri munyara mo zvatinokhetaro. Tingakheta kuzwira Jehovha inga Mutungamiriri wedu zve tobesera kutatija kuti Sathana munyepi. Kana tingakheta Sathana inga mutungamiriri wedu. (Nduyo 73:28; verenganyi Mazwi Akangwara 27:11.) Vandhu vashoma basi munyika ino, ndivona vanozwira Mwari. Zvokadi iyena andiyepi mutongi wo nyika ino. Asi kudari aciripi Mwari, azori ani?

NDIYANI ARI KUTONGA NYIKA?

Kudari umambo hwese hwo nyika ahucaingepi hwa Sathana, iyena waizoupekeja Jesu here?

11, 12. (a) Tinojijenyi ngo kupa kwakaita Sathana kuna Jesu? (b) Matahwa api anovonesa kuti Sathana ndiyena Mutongi wo nyika?

11 Jesu waiziva waitonga nyika kamare. Vhaza imweni, Sathana wakamutatija “umambo hwese hwo nyika no goja rahwo.” Perapo, Sathana wakagondesa Jesu kuti: “Ndinozokupa bzese ibzi kudari ukagwadama wondiromberera.” (Mateu 4:8, 9; Luka 4:5, 6) Jibvunjisenyi kudari: ‘Kudari umambo uhu ahucaingepi hwa Sathana, waizoupekeja Jesu here?’ Haiwa. Utongi hwese ngo hwa Sathana.

12 Kangaije mungananga kuti: ‘Zvingaitisa kudini kuti Sathana ave mutongi wo nyika? Asipi Jehovha Mwari Mukuru-kuru wakasika zvese here?’ (Apokalipsi 4:11) Hina, ndiyena, asi Jesu wakadanija Sathana pambhene kuti ndi “mambo wo nyika.” (Johani 12:31; 14:30; 16:11) Mupostori Pauro wakadaninjavo Sathana Dhiabho kuti ndi ‘mwari wo mugariro uno wo zviro.’ (2 VaKorinto 4:3, 4, Shanduro yeNyika Itsva) Zve mupostori Johani wakatara kuti “nyika yese yo pasi iri mu nyara ya Sathana.”—1 Johani 5:19.

 NYIKA YA SATHANA INOZOPHWANYISWA KUDINI?

13. Ngenyi tinoda nyika imbza?

13 Nyika ino iri kunyanyisa kushata. Tiri kuvona hondo, uvori, ucengejeri no ugevenga zvese zvakatitendeneja. Vandhu avakwanisi kuzvijivirira azvinenyi no kuvangisira kwavo. Asi Mwari mbaimbai anoparaja nyika ino yakashata pa hondo yake yo Armagedhoni, zve iyena anozoicinja ngo nyika imbza yakarurama.—Apokalipsi 16:14-16; vonanyi Masoko o Kupejisira civerengo 10.

14. Mwari wakakheta aani kuti ave Mambo wo Umambo Hwake? Bhaibheri rainga rakanangenyi ngo pamusoro pa Jesu?

14 Jehovha wakakheta Jesu kuti ave Mambo wo utongi Hwake, kana Umambo hwo mugore. Zviuru zvo makore a pera, Bhaibheri rainga rakananga kuti Jesu anozotonga inga “muzware wo kunyarara,” BMAA,  zve kuti kutonga kwake akuzoperi. (Isaia 9:6, 7) Jesu wakajijisa vateveri vake kuti vaite mukumbiro ngo utongi uhu paakananga kuti: “Umambo hwenyu ngahuze kwedu, kuda kwenyu ngakuitwe pasi pano inga nyezuru.” (Mateu 6:10) Mu Cipauko 8, tinozojija kuti Umambo hwa Mwari hunozocinjisa kudini utongi hwo nyika. (Verenganyi Danieli 2:44.) Perapo, Umambo hwa Mwari hunozoita pasi pano paradhiso yakaseja maningi.—Vonanyi Masoko o Kupejisira civerengo 11.

NYIKA IMBZA IRI PHEDO!

15. I cinyi “pasi papsa”?

15 Bhaibheri rinogondesa kuti: ‘Tinovetera gore ibza no pasi papsa’ zve ‘urungami unozogaremo.’ (2 Pedru 3:13, Shanduro yeNyika Itsva; Isaia 65:17) Nguva jimweni Bhaibheri recinanga kuti “pasi,” riri kunangira vandhu vanorarama pasi pano. (Genesi 11:1) Ngokudaro “pasi papsa” pakarungama, zvinoreva vandhu vanozwira Mwari vanozokomborehwa ndiyena.

16. Ngocapi cipo cinodakajisa cinopa Mwari kuna vaya vanorarama mu nyika imbza yake? Zve ngozvapi zvatinodikana kuita kuti tiashire cipo ici?

 16 Jesu wakagondesa kuti vaya vanorarama mu nyika imbza ya Mwari ‘vanozorarama no kucingaperi.’ (Marco 10:30) Ngocapi catinodikana kuita kuti tiashire cipo ici? Tapota verenganyi Johani 3:16 no 17:3 kuti muwane mupinguro. Wari ngativone kuti Bhaibheri rinonangenyi ngo pamusoro po magariro o upenyu hwo mu Paradhiso.

17, 18. Tinozvizivisa kudini kuti pasi pano panozova no rugarisiko kuri kwese zve kuti tinozova takangwaririka?

17 Ushati, hondo, kuphuka mutemo, zve no ugevenga zvicazopera. Kunozonga kucinazve mundhu wakashata anosara pasi pano. (Nduyo 37:10, 11) Mwari anozopeja “hondo mbhera ku magumo o nyika.” (Nduyo 46:10; Isaia 2:4) Pasi pano panozonga pakazara ngo vandhu vano rudo na Mwari zve vanomuzwira. Panozova no runyararo hwo kwenda no kwenda.—Nduyo 72:7.

18 Vandhu va Jehovha vanozozwa vakangwaririka. Munguva jo Bhaibheri, vaIziraeri pavaizwira Mwari, ivona vaingwaririka ngo kuti iyena waivajivirira. (VaLevi 25:18, 19) Mu Paradhiso aticazothyizve ciri cese kana ari wese. Tinozogara takangwaririka basi!—Verenganyi Isaia 32:18; Mikeya 4:4.

19. Ngenyi tingava no cokwadi co kuti munyika imbza ya Mwari munozova no zvokuha zvakawanda?

19 Kunozova no zvokuha zvakawanda. ‘Munda inozobara mbeu jakawanda. Musonjoti inozozungunyika panyezuru po matundhu.(Nduyo 72:16) Jehovha, ‘Mwari wedu, anozotikomborera.’—Nduyo 72:7.

20. Tinozvizivisa kudini kuti pasi pano panozova paradhiso?

20 Pasi pese panozova paradhiso. Vandhu vanozova no nyumba jakaseja no maruva akadakaja. (Verenganyi Isaia 65:21-24; Apokalipsi 11:18) Pasi pese panozova  pakaita inga munda wo maruva wo Edheni. Jehovha anozoramba ecitipa zvese zvatinoda. Bhaibheri rinoti ngo pamusoro pake: “Munofunungura nyara jenyu, munogutisisa bzese bzinorarama.”—Nduyo 145:16.

21. Tinozivisa kudini kuti kunozova no runyararo pakati po vandhu no zvinyama?

21 Kucazova no runyararo pakati po vandhu no zvinyama. Zvinyama azvicazorumizve vandhu. Cimwana mudoko cinozova cakajiviririka, pikija ciri pakati po zvinyama zvinothyisa nyamasi uno.—Verenganyi Isaia 11:6-9; 65:25.

22. Jesu anozoitenyi kuno vanohwaja?

22 Akuna anozohwaja. Jesu paainga pasi pano, iyena wakarapa vandhu vakawanda. (Mateu 9:35; Marco 1:40-42; Johani 5:5-9) Asi inga Mambo wo Umambo hwa Mwari, Jesu anozorapa vese. Akuna anozonanga kuti: “Ndiri kuhwaja.”—Isaia 33:24; 35:5, 6.

23. Mwari anozoitenyi kuno vakafa?

23 Vakafa vanozoraramazve. Mwari anogondesa kuti anozomusa zviuru no zviuru zvo vandhu vakafa. “Kunozowanika kumuka ko vakafa: vanasi no vacikanasi.”—Verenganyi Johani 5:28, 29; Maitiro o Vapostori 24:15.

24. Munozwa kudini ngo pamusoro po kurarama mu Paradhiso?

24 Tese tino zvatinodikana kukheta. Tingakheta kujija ngo pamusoro pa Jehovha zve tomushandira, kana tingaita zvatinoda kuita. Kudari tikakheta kushandira Jehovha, tingava no kumbeji kunodakajisa. Mwanarume wiya paakakumbira kuzorangarihwa pakupera kufa kwake, Jesu wakamugondesa kuti: “Ucazova na inini mu Paradhiso.” (Luka 23:43, Shanduro yeNyika Itsva) Imanyi tijije zvizinji ngo pamusoro pa Jesu Kristu zve kuti iyena anozoitisa kudini kuti zvigondiso zvinodakajisa zva Mwari zvikwanirisike.