Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 12

Mungaitisa Kudini Kuti Mugume pa Kuva Shamwari ya Mwari?

Mungaitisa Kudini Kuti Mugume pa Kuva Shamwari ya Mwari?

1, 2. Ndiyani vakava shamwari ja Jehovha?

NDIYANI wamunoda kuti ave shamwari yenyu? I mundhu wamunodakarira. Mundhu wamunozwirana naye zve iyena anozwiranavo na imwimwi. Mundhu wakanaka zve ano mugariro jamunodakarira.

2 Jehovha Mwari wakasana vandhu vamweni kuti vave shamwari jake. Inga muezaniso, Abhirahama ndi umwe wakava shamwari ya Jehovha. (Isaia 41:8; Jakobo 2:23) Jehovha waidavo Dhavhidhi. Iyena wakananga kuti Dhavhidhi wainga mundhu ‘waaidakajihwa ndiyena.’ (Maitiro o Vapostori 13:22) Zve muporofeti Danieri wainga ari mundhu “anodikisisa” ndi Jehovha.—Danieli 9:23.

3. Ngenyi Abhirahama, Dhavhidhi, zve Danieri vakava shamwari ja Jehovha?

3 Abhirahama, Dhavhidhi, Danieri vakaitisa kudini kuti vagume pakuva shamwari ja Jehovha? Jehovha wakabvunja Abhirahama kuti: “Iwewe wakandipurukira.” (Genesi 22:18) Jehovha anova shamwari kuna vaya vanomuzwira. Pikija majinja ese o vandhu angaguma pa kuva shamwari jake. Jehovha wakabvunja jinja ro vana va Iziraeri kuti: “Izwanyi izwi rangu, neni ndinozoita Mwari wenyu, nemwi munozoita vandhu vangu.” (Jeremia 7:23) Waro imwimwivo munodikana kuzwira Jehovha kudari mecida kuva shamwari yake kamare.

JEHOVHA ANOJIVIRIRA SHAMWARI JAKE

4, 5. Jehovha anojivirisa kudini shamwari jake?

4 Bhaibheri rinonanga kuti Jehovha anopsaka njira  yo “kuti avangise vaya vanomugonda ngo mwoyo yavo yese.” (2 Kronike 16:9) Pana Nduyo 32:8, Jehovha wakagondesa shamawari jake kuti: “Ndinozokujijisa, ndecitatija gwanja ro kutevera ndinozokuringisa no kukupangira.”

5 Muvengi anosimba anoda kuti titame kuva shamawari ya Mwari. Asi Jehovha anoda kutijivirira. (Verenganyi Nduyo 55:22.) Inga shamwari ja Jehovha itusu tinomushandira ngo mwoyo wedu wese. Itusu takatendeseka kwaari pikija tecitambujika. Zve tinothembavo inga zvaiita muimbi wo nduyo. Iyena wakatara ngo pamusoro pa Jehovha kuti: “Anobata mukono wangu wo muho, wondivangisa.” (Nduyo 16:8; 63:8) Sathana anotiejesa kudini kuti titame kuva shamwari ja Jehovha?

KUPUMBHA KWAKAITA SATHANA

6. Sathana wakanangenyi ngo pamusoro po vandhu?

6 Mu Cipauko 11 takajija kuti Sathana wakashora Jehovha kuva munyepi zve mushati ngo kutama kutendera Adhamu na Evha kuti vazvikhetere vega cakanaka no cakashata. Jobe, bhuku ro Bhaibheri, rinotijijisa kuti Sathana wakapumbha vandhu vanoda kuva shamwari ja Mwari. Sathana wakananga kuti ivona vanoshandira Mwari ngo zvavanopuwa Ndiyena, kuciripi ngo rudo na Iyena. Sathana wakatonanga kuti angapausa ari wese kubva ka Mwari. Imanyi tivone zvatingajija ngo pamusoro pa Jobe zve kuti Jehovha wakamujiviririsa kudini.

7, 8. (a) Jehovha wakazwa kudini ngo pamusoro pa Jobe? (b) Sathana wakananga kudini ngo pamusoro pa Jobe?

7 Jobe wainga ani? Iyena wainga mundhu wakanaka wakararama makore 3.600 akapera. Pa nguva iyi Jehovha wakananga kuti apana mundhu umwenizve wakafanana naye pasi pano. Jobe waireremeja Mwari, zve  iyena wainyenya zvakashata. (Jobe 1:8) Zvokadi, Jobe wainga shamwari ya Jehovha.

8 Sathana wakananga kuti Jobe anoshandira Mwari ngo umbau. Sathana wakabvunja Jehovha kuti: “Amuzivi kumutendeneja ngo mufimbiji kuti imungwarire, yena, nyumba yake no bziro bzake bzese? Makakomborera basa ro nyara jake, muxambi yake inofukija nyika yese! Tambanujanyi nyara yenyu, bvisanyi bziro bzake bzese. Munozovona kuti anozomutuka!”—Jobe 1:10, 11.

9. Jehovha wakatendera Sathana kuti aitenyi?

9 Sathana wakanyepera Jobe kuti anoshandira Jehovha ngo zviro zvaakapuwa Ndiyena. Sathana wakananga kuti iyena angakamisa Jobe kushandira Jehovha. Jehovha aazivi kudavira zvakananga Sathana, asi Mwari wakapa mukana Sathana aeje Jobe ngokuti wainga shamwari ya Jehovha ngokuti Waimuda.

SATHANA ANOHWISA JOBE

10. Sathana wakahwisisa kudini Jobe, zve Jobe wakaitenyi?

10 Cokutanga, Sathana wakauraya zvifuyo zvese zvainga na Jobe. Perepo Sathana wakauraya vashandiri vakawanda va Jobe. Jobe wakaruza zvese. Kuhwisa ko kupejisira, Sathana wakauraya gumi ro vana va Jobe ngo zibepo. Asi Jobe wakaramba akagondeka kuna Jehovha. “Nobzakanyadaro, Jobe aazivi kuxaixa, nokuti kumukira Mwari.”—Jobe 1:12-19, 22.

Jehovha wakakomborera Jobe ngo ushamwari hwake hwakagondeka

11. (a) Ngo zvapizve zvimweni zvakaita Sathana kuna Jobe? (b) Jobe wakaitenyi?

11 Sathana aazivi kuviya sure. Iyena wakabvunja Mwari kuti: “Tambanujanyi nyara panyezuru pake, mumutambuje mu nyama no mu magodo. Munozovona kuti anozomutuka.” Sathana wakakhuvaza Jobe ngo ndhendha yaihwaja maningi. (Jobe 2:5, 7) Jobe wakandoramba akagondeka kuna Jehovha. Iyena wakati:  “Ndinotokotesa uceni hwangu mbhera kufa!”—Jobe 27:5.

12. Jobe wakatatijisa kudini kuti Sathana wainyepa?

12 Jobe aacaizivepi kushora kwaiithwa ndi Sathana zve kuti ngenyi wainga ecitambujika maningi. Iyena wairangarira kuti ndi Jehovha ari kumutambuja. (Jobe 6:4; 16:11-14) Asi pikija zvakadaro, iyena wakaramba akagondeka kuna Jehovha. Wari aticakanakani. Jobe wainga acina umbau. Iyena wainga shamwari ya Mwari ngokuti iyena waimuda. Zve zvainanga Sathana ainga manyepo!

13. Ngowapi wakava muviyo wa Jobe ngo kugondeka kwake?

13 Pikija Jobe wainga acikazivi zvaiitika kudenga, iyena wakaramba akatendeseka kuna Mwari zve wovonesa kuti Sathana wainga mushati. Jehovha wakakomborera Jobe ngo ushamwari hwake hwakagondeka.—Jobe 42:12-17.

SATHANA ANOMUSHORESA KUDINI?

14, 15. Sathana wakashora cinyi kuno vanarume no vanakaji vese?

14 Mungajija zvizinji ngo zvakaitika na Jobe. Nyamasi uno, Sathana anotishora eciti tinoshandira Jehovha ngo pamusoro po zvatinowana Kwaari. Pana Jobe 2:4, Sathana wakati: “Mundhu anopa bzese bzaanabzo kuti ajiponese.” Waro Sathana wakashora vese, vanarume no vanakaji kuti vano umbau, kuciripi Jobe basi. Mazana o makore pasure po kufa kwa Jobe, Sathana wainga acandotuka Jehovha zve ecishora vashandiri vake. Inga muezaniso, Mazwi Akangwara 27:11, tinoverenga kudari: “Itai wakangwara, mwana wangu, dakajisai mwoyo wangu; ndinozokwanisa kupingura vaya vanondituka.”

15 Imwimwi mungakheta kuzwira Jehovha zve mova shamwari Yake yakagondeka, mecivonesa kuti Sathana munyepi. Pikija zvecida kuita cinjo huru mu upenyu  hwenyu kuti mugume pakuva shamwari ya Mwari, cinonga ciri cisungo cakanakisisa camunonga maita! Cisungo ici ishwiro huru. Sathana wakananga kuti imwimwi amuzorambi makagondeka kuna Mwari pamunonga muno zvineso. Iyena anoeja kuticengeja kuti titame kuva takagondeka kuna Mwari. Kuitisa kudini?

16. (a) Mazano api anoshandiswa ndi Sathana kuti aeje kukamisa vandhu kushandira Jehovha? (b) Dhiabhu angaejesa kudini kumukamisa kushandira Jehovha pacenyu?

16 Sathana anoshandisa mazano akasiana-siana kuti atikamise kuva shamwari ya Mwari. Iyena anohwa “inga mbhondoro inofamba-famba yecibhoonga, yecipsanga mundhu kuti imuhe.” (1 Pedru 5:8) Mucakahamara pamunovona shamwari yenyu, vopaukama, kana kuti vamweni vecieja kumukamisa kujija Bhaibheri no kuita zvakanaka. Mungazwa inga kuti muri kuhwiswa. * (Johani 15:19, 20) Sathana anozviita pacake inga “ndhumwa yo ubenengeri.” Waro iyena anoeja kuticengeja kuti titame kuzwira Jehovha. (2 VaKorinto 11:14) Zano rimwenizve rinoshandiswa ndi Sathana kuti aeje kutikamisa, kushandira Jehovha ngo yo kutiita kuti tirangarire kuti atisisiri kuti tishandire Mwari.—Mazwi Akangwara 24:10.

ZWIRANYI MUPANGO JA JEHOVHA

17. Ngenyi tinozwira Jehovha?

17 Patinozwira Jehovha, tinovonesa kuti Sathana munyepi. Zvicinyi zvinozotibesera kuva vanozwira? Bhaibheri rinoti: “Ndibzo unozoda [Jehovha]  Mwari wako ngo mwoyo wako wese, ngo mwiha wako wese, ngo simba rako rese.” (Deuteronòmio 6:5) Itusu tinozwira Jehovha ngokuti tinomuda. Ngokuti rudo hwedu hunoramba hwecikura kuna Jehovha, itusu tinoda kuita zvese zvaanoda. Mupostori Johani wakatara kuti: “Ngokuti, kudisa Mwari ndikona kuteveja mupango yake. Mupango yake airemi.”—1 Johani 5:3.

18, 19. (a) Ngo zvapi zviro zvinonangwa ndi Jehovha kuti zvakashata? (b) Tinozvizivisa kudini kuti Jehovha aatikumbiri kuita zviro zvaticikakwanisi kuita?

18 Asi ngozvapi zviro zvatinobvunjwa ndi Jehovha kuti zvakashata? Pano muezaniso jimweni jiri mu bhokiso rinozwi “ Nyenyanyi Zvinonyenywa ndi Jehovha.” Pakutanga, mungarangarira kuti zviro zvimweni zvakona azvizivi kushata maningi. Asi pamunoverenga Bhaibheri mecirangarijisisa ngo pamusoro pazvo, mungazwisisa kuti ngenyi zvakanaka kuzwira mutemo  ja Jehovha. Mungavona kuti munodikana kuita cinjo mu upenyu hwenyu. Pikija zvikathuka zvanesa pakutanga, asi kudari mukaita cinjo iji, munozova no runyararo pomwe no mudakaro hunobva pakuva shamwari yakagondeka ya Mwari. (Isaia 48:17, 18) Tinozvizivisa kudini kuti tinokwanisa kuita cinjo iji?

19 Jehovha aazombotikumbiri kuti tiite zvaticikakwanisi kuita. (Deuteronòmio 30:11-14) Inga Shamwari yokadi, iyena anonasa kutiziva kupinda mazivire atinojiita pacedu. Iyena anoziva zvatinokwanisa no zvaticikakwanisi. (Nduyo 103:14) Mupostori Pauro wakativangisa eciti: “Mwari ndi mugondeki. Yena aatendi kuti muejwe kupinda simba renyu. Pakuejavo, yena anozomupsangira gwanja ro kubuda mu kuejwa uku, no simba ro kunyisa maejo.” (1 VaKorinto 10:13) Ngatithembe kuti Jehovha anozotipekeja simba kuti tiite zvakanaka. Iyena anozomupa “simba rakakura” kuti rimubesere  kucungirira zvineso. (2 VaKorinto 4:7) Pauro naapera kubesehwa ndi Jehovha mu zvineso, wakananga kuti: “Ndinokwanisa bzese ndiyena anondivangisa weya.”—VaFilipi 4:13.

JIJIRANYI KUDA ZVINODIWA NDI MWARI

20. Mugariro japi jamungatevejera, zve ngenyi?

20 Kudari tecida kuva shamwari ya Jehovha, tinodikana kukama kuregera kuita zvinonangwa ndi Jehovha kuti zvakashata, zve tinodikana kuita zvizinji. (VaRoma 12:9) Shamwari ja Mwari jinoda zvaanoda. Ivona vanonangwa pana Nduyo 15:1-5. (Verenganyi.) Shamwari ja Jehovha jinotevejera mugariro jake zve jinovonesa “rudo, rudakaro, rugarisiko, kukova, kuthiva mwoyo, kupfava mwoyo, kudavirana, kutendana no kuziva kujibata.”—VaGalàsia 5:22.

21. Mungajijisa kudini kuvonesa mugariro jinodiwa ndi Mwari?

21 Mungajijisa kudini kuvonesa mugariro jakasejesa kudari? Munodikana kujijira zvinoda Jehovha ngo kuverenga no kujija Bhaibheri nguva jese. (Isaia 30:20, 21) Pamunoita izvi, rudo hwenyu kuna Jehovha unozokura, zve panozokuravo rudo hwenyu, munozoda kumuzwira.

22. Ngowapi unozova muviyo ngo kuzwira Jehovha?

22 Cinjo yamungada kuita mu upenyu hwenyu, ingatojaniswa no kubvisa nguvo jokare zve mosimira imbza. Bhaibheri rinonanga kuti munodikana ku “bvisa undhu hwo kare” zve mosimira undhu “undhu hupsa.” (VaKolosi 3:9, 10) Pikija zvecinesa, patinoita cinjo iji zve tozwira Jehovha, iyena anogondesa kutipekeja ‘besero guru.’ (Nduyo 19:11) Khetanyi kuzwira Jehovha zve vonesanyi kuti Sathana i munyepi. Shandiranyi Jehovha, kuciripi ngo pamusoro po zvaanozomupa, asi ngo pamusoro po kumuda kamare. Imwimwi munozova shamwari yokadi ya Mwari!

^ ndim. 16 Izvi azvirevi kuti Sathana ari kuvonerera vandhu vanoeja kumukamisa kujija Bhaibheri. Asi Sathana ndi “varungu [kana mwari wo] pasi pano,” zve “nyika yese yo pasi iri mu nyara ya Sathana.” Ngo kudaro atikahamari patinovona vandhu vecieja kutikamisa kushandira Jehovha.—2 VaKorinto 4:4; 1 Johani 5:19.