Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 13

Reremejanyi Upenyu Hwamakapuwa

Reremejanyi Upenyu Hwamakapuwa

1. Ndiyani wakatipa upenyu?

JEHOVHA “diyena Mwari anopona.” (Jeremia 10:10) Ndiyena Marure wedu, zve ndiyena wakatipa upenyu. Bhaibheri rinoti: “Makarura bzese. Bzakaruhwa, ngo kuda kwenyu bziriyo, bzvorarama.” (Apokalipsi 4:11) Zvokadi, Jehovha anoda kuti tive no upenyu. Upenyu i cipo cinosisira cinobva kwaari.—Verenganyi Nduyo 36:10.

2. Tingaitisa kudini kuti tibudirire mu upenyu hwedu?

2 Jehovha anotipa zvatinoda kuti tirarame zvakadari inga zvokuha no kumwa. (Maitiro o Vapostori 17:28) Asi kupinda izvi, iyena anoda kuti tidakajihwe ngo upenyu. (Maitiro o Vapostori 14:15-17) Kuti tibudirire mu upenyu, tinodikana kuzwira mutemo ja Mwari.—Isaia 48:17, 18.

MWARI ANOVONA KUDINI UPENYU?

3. Khaini paakauraya Abheri Jehovha wakaitenyi?

3 Bhaibheri rinotijijisa kuti upenyu hwedu no hwo vamweni hunosisira kuna Jehovha. Inga muezaniso, Khaini—mwana wa Adhamu na Evha—paainga ano ushungu maningi na Abheri, munukuna wake, Jehovha wakangwaja Khaini kuti aungwarire ushungu hwake. Asi Khaini aazivi kuzvipurutana, zve iyena wakazoguma pa kunyangajwa zvo kuti “Kaini wakamukira hama yake Abheri womuuraya.” (Genesi 4:3-8) Jehovha wakapanica Khaini ngo ndava yo kuuraya Abheri. (Genesi 4:9-11) Ngokudaro ushungu no kuzonda i zviro zvakashata maningi ngo kuti zvinoitisa kuti tigume pakuva maphanga kana vashati. Mundhu wakadaro aazovi no upenyu  ucikaperi. (Verenganyi 1 Johani 3:15.) Kuti tidakajise Jehovha, tinodikana kujijira kuda vandhu vese.—1 Johani 3:11, 12.

4. Umwe wo mutemo ja Mwari jakapuwa vaIziraeri unotijijisenyi ngo pamusoro po cipo co upenyu?

4 Zviuru zvo makore zvakazotevera Jehovha wakavonesa kuti anoreremeja upenyu paakapekeja Mosi Gumi ro Mutemo. Umwe wao nga uwu: “Ucadouraya.” (Deuteronòmio 5:17) Mundhu anouraya umweni ecizviziva, iyena waidikana kufavo.

5. Mwari anovona kudini kubvisa mimba?

5 Mwari anovona kudini ngo kubvisa mimba? Pikija cimwana cicito cabahwa cinosisira kuna Jehovha. Mu Mutemo wa Jehovha waakapa vaIziraeri, Jehovha wakananga kuti kudari mundhu akakhuvaza mwanakaji zve mimba yake yovha ngo pamusoro pake, iyena anodikana kufavo. (Verenganyi Exodo 21:22, 23; Nduyo 127:3.) Izvi zvinotijijisa kuti kubvisa mimba kwakashata.—Vonanyi Masoko o Kupejisira civerengo 28.

6, 7. Tingakhombijisa kudini Jehovha kuti tinoreremeja upenyu?

6 Tingakhombijisa kudini Jehovha kuti tinoreremeja upenyu hwedu no hwo vamweni? Ngo kutama kuita ciri cese cingadira pa ngozi upenyu hwedu no hwo vamweni. Ngo kudaro atizoshandisi foha, mbhanje kana mutombo jinodhakwisa ngo kuti jinotikhuvaza zve jingatiuraya.

7 Upenyu hwedu no muviri hwedu takazvipuwa ndi Mwari, zve tinodikana kuzvishandisa inga zvaanoda. Waro tinodikana kungwarira ushoni muviri wedu. Tikatama kungwarira, tinozova vakapsipa pamberi pa Mwari. (VaRoma 6:19; 12:1; 2 VaKorinto 7:1) Atizokwanisi kunamata Jehovha, uwo wakatipa upenyu, kudari ticikareremeji upenyu. Pikija zvecinesa kuregera  zvakashata zvatainga taroveja kuita, Jehovha anozotibesera kudari tikavangisira kuvona upenyu inga unosisira.

8. Tinozoitenyi kuti tive no cokwadi co kuti atidiri pangozi upenyu hwedu no hwo vamweni?

8 Tajija kuti upenyu i cipo cinosisira. Jehovha anothemba kuti tinozoita no patinokwanisa kuti titame kudira pa ngozi upenyu hwedu no hwo vamweni. Tinozviita patinotekenya karu, muthu-thu-thu, kana ciri cese haco. Atiiti mutambo jakashata kana jinokhuvaza. (Nduyo 11:5) Tinoita no patinokwanisa kuti pamuzi pedu patame kubara ngozi. Jehovha wakati ku vaIziraeri: “Ukavaka nyumba ipsa, unodikana kudira rusosa panyezuru payo, kuti patame anowira pasi, ngokudaro auzovi no ndava yo ngazi.”—Deuteronòmio 22:8.

9. Tinodikana kutajisa kudini zvinyama?

9 Pikija matajire atinoita zvinyama, anosisira kuna Jehovha. Iyena anotitendera kuuraya zvinyama kuti tihe, titengese, zve kudari cecikhuvaza upenyu hwedu. (Genesi 3:21; 9:3; Exodo 21:28) Asi atidikani kuva no cishatihwa no zvinyama kana kudakajihwa ngo kuzviuraya basi.—Mazwi Akangwara 12:10.

REREMEJANYI UCENI HWO UPENYU

10. Tinozvizivisa kudini kuti ngazi inoimirira upenyu?

10 Ngazi yakaceneswa kuna Jehovha ngo kuti ngazi inoimirira upenyu. Khaini paakapera kuuraya Abheri, Jehovha wakabvunja Khaini kuti: “Izwi ro ngazi yo munukuna wako riri kumimira kondiri kubva mu mabvu!” (Genesi 4:10) Ngazi ya Abheri yaiimirira upenyu hwake, zve Jehovha wakapanica Khaini ngo ndava yo kuuraya Abheri. Pasure po Ndambi ya Nowa, Jehovha wakakhombijazve kuti ngazi inoimirira upenyu. Jehovha wakatendera Nowa no mbhuri yake kuti vahe zvinyama. Iyena wakati: “Bzese bzinofamba, bzino  uhomi bzinozoita bzokuha bzenyu; ndinokupa bzese ibzi, no mitivo mivixi.” Asi, pano ciro cimwe cavakarambiswa ndi Jehovha: “Kaveta mucadoha nyama no mwiha [kana upenyu], bzinoti no ngazi.”—Genesi 1:29; 9:3, 4.

11. Mwari wakapa vaIziraeri mupango wapi ngo pamusoro po ngazi?

11 Pasure po 800 o makore Jehovha naarambija Nowa kuha ngazi, iyena wakabvunja vandhu vake kuti: “Ariwese mulsraeli nokuti munyikanja anogara pakati penyu, akanyanga nyama nokuti xiri inotendehwa kuhiwa, anodikana kupopomeja ngazi yayo no kuifukija ngo mabvu.” Perapo wakati: “Mucazoha ngazi.” (VaLevi 17:13, 14) Jehovha wainga ecindoda kuti vandhu vake vavone ngazi inga yakaceneswa. Ivona vaidikana kuha nyama asi kuciripi ngazi. Pavaiuraya nyama yo kuha, ivona vaidikana kuipopomejera pasi ngazi yayo.

12. MaKristu anovona kudini ngazi?

12 Makore manganani Jesu naafa, vapostori no vakuru mu ungano yo ciKristu ku Jerusarema vakaita musongano kuti vateme civaringo co divi ro Mutemo wo vaIzirare raizosara recishanda ku maKristu. (Verenganyi Maitiro o Vapostori 15:28, 29; 21:25.) Jehovha wakavabesera kuti vazwisise kuti ngazi yainga icandosisira kwaari zve kuti vainga vecindodikana kuvona inga yakaceneswa. MaKristu okutanga, aacaidikanepi kuha kana kumwa ngazi, nee kuha nyama icizivi kucekwa ushoni. Kudari vakaita izvi, zvainga zvakatojana no mashatire akaita kunamata zvithombe no mufambiro wakashata wo vatano. Kubvira pondhopo maKristu okadi-kadi anoramba kuha no kumwa ngazi. Tinoti kudini nyamasi? Jehovha aciri kuda kuti tivone ngazi inga yakaceneswa.

13. Ngenyi maKristu anoramba kudihwa ngazi?

 13 Izvi zvinoreva kuti maKristu anodikana kuramba kudihwa ngazi here? Hina, ndizvona. Jehovha anotibvunja kuti titame kuha kana kumwa ngazi. Kudari dhokodheya akananga kuti amudikani kumwa doro, maizoridira ngo njesau mu muviri menyu here? Haiwa! Mukufananavo, mupango wo kuti amudikani kuha no kumwa ngazi, unoreva kuti atibviri kutendera kudihwa ngazi.—Masoko o Kupejisira civerengo 29.

14, 15. Ngenyi zvinosisira kuti muKristu areremeje upenyu zve wozwira Jehovha?

14 Tingati kudini, kudari dhokodheya akananga kuti tikatama kudihwa ngazi tinofa? MuKristu umwe nga umwe anojikhetera ega kuzwira mutemo wa Mwari ngo pamusoro po ngazi. MaKristu anoreremeja cipo ca Mwari co upenyu, zve tinozopsaka marapihwe amweni kuti tipone; asi atizotenderi kudihwa ngazi.

15 Tinovangisira kuti tive no uhomi hwakanaka, asi ngo pamusoro po kusisira ko upenyu pamberi pa Mwari, atizotenderi kudihwa ngazi. Zvinosisira maningi kuzwira Jehovha kunja ko kueja kujiponesa tecimushaishira. Jesu wakati: “Ngokuti ndiani anoda kupones a uhomi hwake, anozohutama. Ndiani anotama uhomi hwake ngo ndava yo kundida, anozohuwana.” (Mateu 16:25) Tinoda kuzwira Jehovha ngo kuti tinomuda. Iyena anoziva zvakanaka kwatiri, zve tinovona upenyu inga hunosisira zve hwakaceneswa, inga zvinoita Jehovha.—Vaheberi 11:6.

16. Ngenyi vashandiri va Mwari vanomuzwira?

16 Vashandiri vakagondeka va Mwari vakacunga kuzwira mutemo wake ngo pamusoro po ngazi. Ivona avazombohi no kumwa ngazi, zve avazotenderi ngazi  ngo pamusoro po kurapiwa. * Asi, ivona vanotendera marapihwe amweni kuti vaponese upenyu hwavo. Ivona vanothemba kuti Marure wo upenyu no wo ngazi anoziva zvakatinakira. Munozvidavira here kuti iyena anoziva zvakatinakira?

MASHANDISIHWE AMWE BASI O NGAZI ANOTENDEHWA NDI JEHOHVA

17. Ngoapi mashandisihwe o ngazi akatendehwa ndi Jehovha ku vaIziraeri?

17 Mu Mutemo wa Mwari waakapa Mosi, Jehovha wakabvunja vaIziraeri kuti: “Kurarama ko muviri kuri mu ngazi. Ngazi iyo ndakamupa kuti muite ndiyona [cibairo co] kuripira uxaixi [kana kukumbira kuregerehwa], mweciidururira panyezuru po dandiro, ngokuti ngazi inopona inofujura uxaixi.” (VaLevi 17:11) VaIziraeri pavaishaisha, vaidikana kukumbira ruregerero hwa Jehovha ngo kupira cinyama zve vokumbira vapiri kuti vadururire ngazi panyezuru po dandiro mutemberi. Aya ndiwona oga basi mashandisihwe o ngazi akatendera Jehovha ku vaIziraeri.

18. Kujipira kwa Jesu kwakativiisirenyi?

18 Jesu paakaviya pasi pano, iyena wakafakeya pa ndau yo kupira zvinyama ngo kupira upenyu hwake, kana ngazi kuitira kuti zvishaishi zvedu zviregerehwe. (Mateu 20:28; Vaheberi 10:1) Upenyu hwa Jesu hwainga no mutengo maningi zvokuti Jehovha paakapera kumumusa kuti aende kudenga, Jehovha waikwanisa kupekeja mukana wo kurarama no kucikaperi ku vandhu vese.—Johani 3:16; Vaheberi 9:11, 12; 1 Pedru 1:18, 19.

Mungatatijisa kudini kuti munoreremeja upenyu no ngazi?

19. Cicinyi catinodikana kuita kuti titame kuva no “ndava no ariwese”?

 19 Tinobonga maningi Jehovha ngo cipo cake cinoshamaisa! Zve tinodikana kubvunja vandhu kuti kudari vakava no rutendo kuna Jesu, vangararama mbhera na rini. Tinoda vandhu, zve tinozoita zviri zvese zvatinokwanisa kuti tivajijise mawanire atingaita upenyu. (Ezekieli 3:17-21) Zve inga mupostori Pauro, tinozonangavo kuti: “Andina ndava no ariwese wenyu angazopsejeka, ngokuti andizivi kuhwirira sure ndecitokotesa komuri kuda kwese ka Mwari.” (Maitiro o Vapostori 20:26, 27) Hina, Tinovonesa kuti tinoreremeja upenyu no ngazi patinobvunja vamweni ngo pamusoro pa Jehovha no kusisira kwaho kwaari.

^ ndim. 16 Kuitira masoko ngo pamusoro po kudihwa ngazi, vonanyi mapheji 77-79 o bhuku rinozwi Rambanyi Muri mu “Rudo hwa Mwari,” rakabudiswa ngo Zvapupu zva Jehovha.