Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 11

Ngenyi Tinotambujika Maningi?

Ngenyi Tinotambujika Maningi?

1, 2. Vandhu vazinji vanobvunjisenyi?

TSUNAMI yakapwanya mutundhu wese. Mwanarume wainga no bhomba, wakariputisa mu ceci imweni, zve wakauraya vandhu vazinji. Khansere yakauraya mai vamweni, vosiya vana vashanu.

2 Panoitika ngozi jakadari inga jakaitikari, vandhu vazinji vanobvunjisa kuti, “Ngenyi?” Vamweni vanobvunjisa kuti ngenyi nyika yakazara ngo uzondi zve no matambujiko. Imwimwi makambopsaka kuda kuziva ngo pamusoro pazvo here?

3, 4. (a) Mubvunjo wapi wakaita Habhakuki? (b) Jehovha wakamudavira kudini?

3 Mu Bhaibheri, tinojija kuti mwanarume wainga ano rutendo kuna Mwari wakaitavo mubvunjo jakadari. Inga muezaniso, muporofeti Habhakuki wakabvunjisa Jehovha kuti: “Ngenyi munondivonesa bzakaxata, munosotesesa vandhu vakaxupwa? Kuba no kujipa kuri pambeji pangu; vandhu vanopopana no kuhwisana!”—Habakuki 1:3.

4 Pana Habakuki 2:2, 3, tinoverenga mupinguro wa Mwari ku mubvunjo wa Habhakuki pomwe no cigondiso Cake co kunasirira cineso ici. Jehovha ano rudo maningi no vandhu. Bhaibheri rinoti: “Yena anozomukorondha.” (1 Pedru 5:7) Zvokadi, Jehovha anonyangajwa maningi paanovona matambujiko edu akakura kupindirija mudida. (Isaia 55:8, 9) Waro tiri kuda kupopora mubvunjo wokuti, Ngenyi munyika makazara ngo matambujiko?

 NGENYI KUNO MATAMBUJIKO MAZINJI?

5. Vajijisi vo zviara zvizinji vanonangenyi ngo pamusoro po matambujiko? Bhaibheri rinojijisenyi?

5 Vatungamiriri vo zviara, vapiri, zve vajijisi vo zviara kazinji vanonanga kuti i kuda ka Mwari kuti vandhu vatambujike. Vamweni vanonanga kuti zvese zviri kuitika kuno vandhu, kubatanija ngozi, zvakanasirihwa ndi Mwari kuti zviitike zve atingakwanisi kuzvizwisisa kuti ngenyi. Vamweni vanonanga kuti vasharuka vana vadoko vanofa kuti vaende kudenga koogara na Mwari. Asi asipi zvokadi. Jehovha narini aazivi kumboitisa zvakashata kuti zviitike. Bhaibheri rinoti: “Mwari aaiti bzakaxata kamare! Nyakukwanisa bzese aaxaixi.”—Jobe 34:10.

6. Ngenyi vandhu vanopumbha Mwari ngo matambujiko ese ari mu nyika?

6 Vandhu vazinji vanopumbha Mwari ngo matambujiko ese ari mu nyika ngokuti vanorangarira kuti Mwari ndiyena ari kutonga nyika. Asi inga zvatakajija mu Cipauko co 3, mutongi wo nyika ino kamare ndi Sathana Dhiabhu.

7, 8. Ngenyi mu nyika muno matambujiko mazinji?

7 Bhaibheri rinotibvunja kuti “nyika yese yo pasi iri mu nyara ya Sathana.” (1 Johani 5:19) Sathana, mutongi wo nyika ino, wakashata zve muzondi. Iyena “mucengeji wo nyika yese yo pasi pano.” (Apokalipsi 12:9) Uzinji hwo vandhu huri kumutevejera. Iri ndirimwe ro thangwe rinoitisa kuti nyika izare ngo manyepo, kuzondana, zve no ushati.

8 Kuno thangwe rimweni rinoitisa kuti mu nyika muve no matambujiko maningi. Adhamu na Evha pavakapera kupandukira, ivona vakapekejavo cishaishi ku vana vavo. Ngo ndava yo ushaishi, vandhu vanoitisa kuti vamweni vatambujike. Ivona vanoda kuva  vanosisira maningi kupinda vadoni vavo. Vanohwa, vanoenda ku hondo, no kuthyisijira vamweni. (Mucumaeri 4:1; 8:9) Nguva jimweni vandhu vanotambujika ngo “mukuvo no zvicikavetehwi.” (Mucumaeri 9:11) Pavanonga vari pa ndau yakashata no mukuvo wakashata, ngozi no zvimweni zvakashata zvingavaitikira.

9. Ngenyi tingava no cokwadi cokuti Jehovha ano thangwe ro kutendera matambujiko?

9 Jehovha andiyepi anoitisa matambujiko. Iyena andiyepi anoitisa hondo, ngozi no kutama kutajwa ushoni. Mwari andiyepi anoitisa ngozi jakadari inga mudhuma ngo pasi, dutu guru zve no usore. Asi imwimwi mungarangarira kuti, ‘Zvecivoneka kuti Jehovha anosimba maningi ku zviro zvese, waro ngenyi aapeji ushati hwese huri kuitika?’ Itusu tinoziva kuti Mwari ano kaya-kaya ngo kutambujika kwedu, zve iyena ano thangwe ro kutendera matambujiko.—1 Johani 4:8.

NGENYI MWARI ANOTENDERA MATAMBUJIKO?

10. Sathana wakaitisa kudini kuti aphikize Mwari?

10 Mu munda wo Edheni, Dhiabhu wakacengeja Adhamu na Evha. Sathana wakanyepera Mwari kuti Mutungamiriri wakashata. Iyena wakananga kuti Mwari wainga eciviga ciro cakanaka kuna Adhamu na Evha. Sathana waida kuti vadavire kuti iyena mutungamiriri wakanaka kupinda Jehovha zve avacaidikanepi kuva na Mwari.—Genesi 3:2-5; vonanyi Masoko o Kupejisira civerengo 27.

11. Mubvunjo wapi watinawo unoda mupinguro?

11 Adhamu na Evha vakashaishira Jehovha zve vakamupandukira. Ivona vakarangarira kuti vainga vano dikano yo kuzvikhetera zviro zvakanaka no zvakashata. Jehovha waizovonesa kudini kuti vapandukiri vainga vakashata zve kuti iyena anoziva zvakanaka kwatiri?

12, 13. (a) Ngenyi Jehovha aazivi kuparaja vapandukiri ciriporipoco? (b) Ngenyi Jehovha anotendera Sathana kuti ave mutungamiriri wo nyika zve kuti vandhu vatungamirire?

 12 Jehovha aazivi kuparaja Adhamu na Evha ciriporipoco. Asi, iyena wakavaregera kuti vave no vana. Zve Jehovha wakaita kuti vana va Adhamu na Evha vakwanise kusana wavanoda kuti ave mutungamiriri wavo. Cinangwa ca Jehovha cainga co kuzaja nyika ngo vandhu vakakwana, izvi zvaizoitika pacinenyi no zvakaejwa kuitwa ndi Sathana.—Genesi 1:28; Isaia 55:10, 11.

13 Sathana wakaphikiza Jehovha pambeji po zviuru no zviuru zvo ngirozi. (Jobe 38:7; Danieli 7:10) Jehovha wakapa nguva Sathana kuti avonese kuti kunyepa kwake akucaingepi cokwadi. Zve wakapa vandhu nguva yo kugaja utongi hwavo vecitungamirihwa ndi Sathana kuitira kukhombijira kuti avangakwanisi kubudirira pacina besero ra Mwari.

14. Zvicinyi zviri kuvoneka ko zviuru no zviuru zvo makore?

14 Papera zviuru no zviuru zvo makore, vandhu vecieja kujitonga vega, asi ivona vari kukonehwa. Sathana ari kuvonesa kuti munyepi. Vandhu vanoda besero ra Mwari. Muporofita Jeremia wainga no cokwadi paakatara kuti: ‘Ndinoziva, Jehovha, kuti mundhu asipi mune wo gwanja rake; kuti ecifamba aakwanisi kusana gwanja raanoda.’—Jeremia 10:23.

NGENYI JEHOVHA ARI KUVETERA KUBVIRA KARE?

15, 16. (a) Ngenyi Jehovha anoregerera matambujiko kuti arambe aripo? (b) Ngenyi Jehovha aazivi kunasirira zvineso zvainga zvakaithwa ndi Sathana?

15 Ngenyi Jehovha anoregerera matambujiko kuti arambe aripo? Ngenyi aapeji zviro zvakashata zvinoitika? Wakatora nguva kuitira kuti avonese utongi hwa Sathana aukwanisi. Vandhu vakaeja matongere ese, asi  avazivi kukwanisa. Pikija hwecienderera mberi mu uzivi hwo siencia, asi ushati, urombo, kuphuka mutemo, zve hondo zvakawanda maningi kupinda kare. Itusu atingabudiriri tecijitonga tega ticikabesehwi ndi Mwari.

16 Jehovha aazivi kunasirira zvineso zvainga zvakaithwa ndi Sathana. Kudari naakazviita, zvaizoreva kuti Mwari anobesera utongi hwa Sathana, zve Mwari aazombozviiti. Zve vandhu vaizodavira kuti vanokwanisa kujitonga vega vecibudirira. Asi aya manyepo, zve Jehovha aambovabeseri. Iyena aazombonyepi.—Vaheberi 6:18.

17, 18. Ngozvapi zvinozoita Jehovha kuno zvese zvakapera kuphwanyiwa ndi Sathana?

17 Jehovha angakwanisa kunasirira zvakaphwanyiwa ngo kupandukira ka Sathana no vandhu here? Hina. Kuna Mwari zvese zvinokwanisika. Jehovha anoziva kuti kushora kwa Sathana kwese kunozopinguhwa rini. Perapo nyika inozova paradhiso, zvainga zwakarongwa. Vese “vaya vari mu makuva” anorangarihwa vanozomuswa. (Johani 5:28, 29) Vandhu avazohwaji kana kufa. Jesu anozonasirira zvese zvakaphwanyiwa ndi Sathana. Jehovha anozoshandisa Jesu kuti: “afujure mabasa a Sathana.” (1 Johani 3:8) Tinobonga maningi ngokuti Jehovha anosengerera kuitira kuti tigume pa kumuziva no kutema civaringo co kuti tinoda kuti iyena ave Mutungamiriri wedu. (Verenganyi 2 Pedru 3:9, 10.) Pikija patinonga tecitambujika, iyena anotibesera kucungirira.—Johani 4:23; verenganyi 1 VaKorinto 10:13.

18 Jehovha aativangiriji kuti timusane kuti ave Mutungamiriri wedu. Iyena wakapa vandhu rusununguko hwo kuzvikhetera. Ngatimbopopora zvinoreva cipo ici kwatiri.

 MUNGASHANDISA KUDINI CIPO CO RUSUNUNGUKO HWO KUZVIKHETERA?

19. Muripo wapi unoshamaisa wakatipa Jehovha? Tingakhombijisa kudini kuti tinobongesea cipo ici?

19 Jehovha wakatipa rusununguko hwo kuzvikhetera wakasiyana maningi no wo zvinyama. Kazinji izvona zvinoita mu kuwirirana no mazwiro azvo, asi itusu tingakwanisa kukheta mararamire atinoda mu upenyu hwedu zve no kusana kudakajisa Jehovha. (Mazwi Akangwara 30:24) Mukuengejera, itusu atiripi mucini wakanasirihwa kuti uite zvowakaitihwaro basi. Itusu tino rusujunuko hwo kuzvikhetera zvatinoda, kana watinoda kuti ave shamwari yedu, zve no zvatinoda kuita mu upenyu hwedu. Jehovha anoda kuti tidakajihwe ngo upenyu.

20, 21. Ngokwapi kusana kwakanaka kwatingaita wari?

20 Jehovha anoda kuti timude. (Mateu 22:37, 38) Iyena wakaita inga baba vanodakara ngo kuzwa vana vavo vecinanga kuti “ndinomuda,” mwana paanonga ecinanga zvecibva pa mwoyo pake kuciripi kuita ngo kuvangirijwa. Jehovha wakatipa cipo co rusujunuko hwo kukheta kumushandira kana kuti haiwa. Sathana, Adhamu na Evha vakasana kuramba Mwari. Mungashandisa kudini cipo cenyu co rusununguko hwo kuzvikhetera?

21 Shandisanyi rusununguko hwenyu hwo kuzvikhetera pa kushandira Jehovha. Kuno zviuru no zviuru zvo vandhu vakazvipira kuti vadakajise Mwari vo ramba Sathana. (Mazwi Akangwara 27:11) Ngozvapi zvamungaita kuti mukwanise kuva mu nyika imbza ya Mwari paanozobvisa matambujiko ese? Cipauko cinotevera cinozodavira mubvunjo uwu.