Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 1

Ndiyani Mwari?

Ndiyani Mwari?

1, 2. Mubvunjo japi kazinji jinobvunjiswa ngo vandhu?

VANA vanobvunjisa mubvunjo jakawanda. Kangaije mungatovasanangurira, asi ivona vangandobvunjisa kuti: ‘Ngenyi?’ Pamunonga mecieja kuvapingura, vanoramba vecibvunjisa, ‘Asi ngenyi?’

2 Azvinenyi kuti tiri vana vadoko kana kuti vasharuka, tese tinoita mubvunjo. Tingava no mubvunjo jakadari inga iji: Tinozohenyi, tinozosimirenyi kana kuti tinozotengenyi? Tingatova no mubvunjo jinosisira maningi ngo pamusoro po upenyu zve nokumbeji. Asi kudari tikatama kuwana mupinguro jinodakajisa jo mubvujo iji, kangaije tingatoregera kupsaka mupinguro.

3. Ngenyi vandhu vazinji vanorangarira kuti avangawani mupinguro jo mubvunjo javo jinosisira?

3 Bhaibheri rino mupinguro jo mubvunjo jinosisira jatinoita here? Vandhu vamweni vanorangarira kuti arina, asi ivona vanovona kuti Bhaibheri rinonesa maningi kurizwisisa. Ivona vanorangarira kuti vajijisi basi kana kuti vapiri ndivona vangawana mupinguro. Zve vamweni vanonyoejeka kudavira kuti avajizivi mupinguro. Munorangarira kudini?

4, 5. Ngojapi mubvunjo jinosisira maningi jamunajo? Ngenyi munodikana kuramba mecipsaka mupinguro jajo?

4 Imwimwi mungatoda kuwana mupinguro jo mubvunjo, jakadari inga iji: Ngenyi ndiri pano? Icinyi cinozoitika kwandiri ndikafa? Mwari wakadini? Jesu, Mujijisi anonasa kuzivika, wakati: ‘Rambanyi mecikumbira, munozopuwa. Rambanyi mecipsaka, munozowana. Rambanyi mecigugujira munozobeurihwa.’ (Mateu 7:7, Shanduro yeNyika Itsva) Mucadoramwa mbhera muwane mupinguro jakagondeka.

 5 Zvokadi, kudari mukaramba ‘mecipsaka’ munozowana mupinguro mu Bhaibheri. (Mazwi Akangwara 2:1-5) Mupinguro jakona ajinesi kuzwisisa. Zvamunozojija zvinozomupa mudakaro mu upenyu hwenyu nyamasi zve no vetero icikanangiki yo kumbeji. Ngatende tibhuye ngo mubvunjo uri kunesa vandhu vazinji.

MWARI ANOTITAJA KANA KUTI WAKASHATA?

6. Ngenyi vandhu vamweni vanorangarira kuti Mwari aavataji pavanotambujika?

6 Uzinji hwo vandhu unorangarira kuti Mwari aatitaji. Vanorangarira kuti kudari Mwari ecititaja kamare, nyika yaizova yakasiyana. Tinovona hondo, uzondi pomwe no utami. Vandhu vanohwaja, vanotambujika, zve vanofa. Vamweni vanojibvunjisa kuti, ‘Kudari Mwari ecititaja, ngenyi aapeji zvineso zvinotitambuja?’

7. (a) Kuitisa kudini vatungamiriri vo zviara vanojijisa vandhu kuti Mwari wakashata? (b) Ngenyi tingava no cokwadi co kuti Mwari andiyepi muitisi wo zviro zvakashata zvinoitika?

7 Vatungamiriri vo zviara, nguva jimweni vanoitisa kuti vandhu vadavire kuti Mwari wakashata. Panonga paitika ngozi, ivona vanoti i kuda ka Mwari. Vanonanga kuti iyena waida kuti zviitike. Pavanonga vecinanga kudaro, vanonga vecitopumbha Mwari. Asi Bhaibheri rinojijisa kuti narini Mwari asipi cinyuke co ushati. Jakobo 1:13 inotibvunja kuti iyena aaeji ari wese ngo zviro zvakashata. Iyona inoti: “Ndiani anoejwa acadonanga kuti: ‘Mwari wakandieja.’ Ngokuti Mwari aaejwi ngo uxaixi no kuti kueja mundhu ari wese.” Izvi zvinoreva kuti pikija Mwari acikarambisi kuti zviro zvakashata zviitike, iyena andiyepi anozviitisa. (Verenganyi Jobe 34:10-12.) Ngatimboshandisa muezaniso jimweni.

8, 9. Ngenyi azvicaizova no shwiro kupekeja ndava Mwari ngo pamusoro po zvineso zvedu? Ipanyi muezaniso.

 8 Amborangariranyi ngo pamusoro po cimujaha cinogara pa muzi no vabari vaco. Baba vaco vanocida maningi zve vakacijijisa njira yo kutema zvivaringo zvakanaka. Hino, cimufana ici copandukira vabari vaco zve copomoka pamuzi. Mwana uwo woita zvakashata zve owira mu cineso. Maizopumbha baba ava ngo zvaitikari ngo kutama kumurambija kubuda pamuzi here? Haiwa, andizvopi! (Luka 15:11-13) Kufanana na baba, Mwari aarambisi vandhu povanosana kupanduka no kuita zvakashata. Ngo kudaro panoitika zvakashata, atidikani kukanganwa kuti asipi Mwari anozviitisa. Azvicaizova no shwiro kupa ndava Mwari.

9 Kuno mathangwe akanaka maningi anoitisa kuti Mwari aregerere zviro zvakashata zveciitika. Mu Cipauko 11, mucazojija zvinonanga Bhaibheri ngo pamusoro pazvo. Asi imwimwi mucazova no cokwadi co kuti Mwari anorudo nesu zve andiepi muitisi wo zvineso zvedu. Zvokadi, iyena ndiyena Ega basi anokwanisa kupeja zvineso.—Isaia 33:2.

10. Ngenyi tinodikana kuva no cokwadi cokuti Mwari anozopeja ngozi jese jinoithwa ngo vandhu vakashata?

10 Mwari wakacena. (Isaia 6:3) Izvi zvinoreva kuti iyena wakacena, zve wakanaka. Ngokudaro tinodikana kumuthemba. Asi vandhu avathembeki. Ivona nguva jimweni vanoita zvakashata. Pikija mutongi wo vandhu anothembeka maningi, aana simba rokupeja ngozi jinoitwa ngo vandhu vakashata. Apana na umwe hake anosimba rakaezana no ra Mwari. Iyena anokwanisa zve anozopeja ngozi jese jinoviiswa ngo vandhu vakashata. Mwari acazobvisa ushati hwese mbhera narini.—Verenganyi Nduyo 37:9-11.

 MWARI ANOZWA KUDINI PAANOVONA VANDHU VECITAMBUJIKA?

11. Mwari anozwa kudini ngo pamusoro po zvineso zvedu?

11 Mwari anozwa kudini paanovona zviri kuitika mu nyika zve no zvineso zvamuri kusongana nazvo? Bhaibheri rinojijisa kuti Mwari “anodisisa bzakarurama.” (Nduyo 37:28) Iyena anopsaswa maningi ngo zvakanaka no zvakashata. Iyena aadi kuti vandhu vatambujike. Bhaibheri rinonanga kuti Mwari ‘wakaita bundu mu mwoyo make’ ushati pawakazara mu nyika mu nguva yo kare. (Genesi 6:5, 6) Mwari aazivi kucinja. (Malakia 3:6) Bhaibheri rinonanga kuti iyena anomukorondha.—Verenganyi 1 Pedru 5:7.

Bhaibheri rinojijisa kuti Jehovha ndi Marure wozvese ano rudo

12, 13. (a) Ngenyi tinorudo no kutaja vamweni, zve tinozwa kudini ngo pamusoro po matambujiko ari mu nyika ino? (b) Ngenyi tingava no cokwadi co kuti Mwari anozopeja matambujiko ese no kutamika ko ururami?

12 Bhaibheri rinoreva kuti Mwari wakatiita ngo muezaniso wake. (Genesi 1:26) Izvi zvinoreva kuti Mwari wakatiita no mugariro jakatojana no jake. Kudari mecinyangajwa ngo kutambujwa ko vandhu vacina ndava, Mwari anonyanya kunyangajwa maningi paanovona zvakashata! Tinozvizivisa kudini?

13 Bhaibheri rinotijijisa kuti “Mwari rudo.” (1 Johani 4:8) Ciri cese cinoita Mwari, cinotungamirihwa ngo rudo. Itusu tino rudo ngo kuti Mwari ano rudo. Amborangariranyi basi: Kudari no mainga no simba, maizobvisa matambujiko ese no kutamika ko ururami kuri mu nyika ino here? Zvokadi kamare maizobvisa, ngokuti munoda vandhu. Kuzotivo Mwari keni? Iyena anosimba, zve iyena ano rudo nesu, iyena anoda kupeja matambujiko ese no kutamika ko ururami. Imwimwi mungava no cokwadi cokuti zvigondiso zvese zva Mwari zvakatahwa pa matangiro o bhuku rino  zvinozokwanirisikadi! Kuti mugonde zvigondiso izvi, imwimwi munodikana kuziva zvizinji ngo pamusoro pa Mwari.

MWARI ANODA KUTI MUMUZIVE

Kudari mecida kuva shamwari yo ari wese, munomubvunja zina renyu. Mwari wakatibvunja zina rake mu Bhaibheri

14. Zina ra Mwari ndiyani, zve tingazvizivisa kudini kuti tinodikana kurishandisa?

14 Kudari mecida kuva shamwari yo ari wese, icinyi camunotanga kumubvunja? I zina renyu. Waro Mwari ano zina here? Zviara zvizinji zvinonanga kuti zina rake ndi Mwari kana kuti Tenji, asi aya asipi mazina kamare. Aya mazina o kureremeja akadari inga “mambo” kana kuti “mutungamiriri.” Mwari wakatibvunja kuti zina rake ndi Jehovha. Nduyo 83:18, BMAA inoti: ‘Kwokuti vazive kuti iwewe wega zina rako ndi Jehovha, uri padera [kana Mukuru-kuru panyezuru] po zvese mu nyika yese.’ Vatari vo Bhaibheri vakashandisa zina ra Mwari mu ndau jinokwana zviuru no zviuru. Jehovha anoda kuti imwimwi muzive zina rake zve murishandise. Imwimwi mungakwanisa kuziva zina rake kudari mukava shamwari yake.

15. Zina ro kuti Jehovha rinorevenyi?

15 Zina ra Mwari, ro kuti Jehovha rino revo huru maningi. Rinoreva kuti Mwari angakwanirisa cigondiso ciri cese caanoita zve anoita cidisiso cake. Apana cingakwanisa kumukamisa. Jehovha ega basi, ndiyena anodikana kuva no zina iri. *

16, 17. Zvinorevenyi, kunanga kuti (a) “wo Masimba ese”? (b) “Mambo wo kucingaperi”? (c) “Marure”?

16 Inga zvataverenga pana Nduyo 83:18 yainanga ngo pamusoro pa Jehovha kuti: ‘Iwewe wega . . . uri Mukuru-kuru.’ Zve Apokalipsi 15:3, inoti: “Mabasa enyu makuru no okuxamisa, [Jehovha], Mwari wo  [‘Masimba ese,’ Shanduro yeNyika Itsva]. Makwanja enyu akarungama no okadi, Mambo wo [‘kucingaperi,’ Shanduro yeNyika Itsva]”. Zina ro kureremeja ro kuti wo ‘masimba ese’ rinorevenyi? Rinoreva kuti Jehovha ndiyena ano simba rakakura maningi kupinda zvisikwa zvese. Zina ro kureremeja ro kuti “Mambo wo kucingaperi” rinoreva kuti iyena andoriyo. Nduyo 90:2 inonanga kuti iyena andoriyo kubvira kare, mbhera narini. Azvitikahamaji here?

17 Jehovha ega basi ndiyena Marure. Apokalipsi 4:11 inoti: “[Jehovha], Mwari wedu, ndimwi munonakira kuaxira goja, nderemejo no simba; ngokuti makarura bzese. Bzakaruhwa, ngo kuda kwenyu bziriyo, bzorarama.” Hina, kubvira ku ngirozi jo mugore, mbhera ku ndhondho jo mugore, ku mucero jo miti, hove jo mu jombe—no zvese zvamungarangarira, zvakaruhwa ndi Jehovha!

 MUNGAVA SHAMWARI YA JEHOVHA HERE?

18. Ngenyi vandhu vamweni vanorangarira kuti avangakwanisi kuva shamwari ya Mwari? Bhaibheri rinoti kudini ngo pamusoro pazvo?

18 Vandhu vamweni pavanoverenga ngo pamusoro po mugariro unoshamisa wa Jehovha, ivona vanothya vorangarira kuti, ‘Mwari anosimba, anosisira, atori ndhambo maningi, waro ngenyi anganditaja?’ Asi Mwari anoda kuti tizwe kudaro here? Haiwa andizvopi. Jehovha anoda kukhwedera phedo na itusu. Bhaibheri rinonanga kuti Mwari “aaripi ndhambo na ariwese wedu.” (Maitiro o Vapostori 17:27) Mwari anoda kuti mukhwedere phedo nae, zve iyena anogondesa kuti “anozomukhwedereravo.”—Jakobo 4:8.

19. (a) Mungaitisa kudini kuti muve shamwari ya Mwari? (b) Mugariro japi ja Jehovha jamunodakarira maningi?

19 Mungaitisa kudini kuti muve shamwari ya Mwari? Jesu wakati: “Uhomi hucingaperi nga uhu: kuti vamuzive imwimwi, Mwari umwe ega wokadi-kadi, na wiya wakatumwa ndimwi: Jesu Kristu.” (Johani 17:3) Rambanyi mecijija, zve munozoguma pa kuziva Jehovha na Jesu. Perapo mova no upenyu hucingaperi. Inga muezaniso, tajija kuti “Mwari rudo.” (1 Johani 4:16) Asi iyena ano mugariro jakawanda jakanaka. Bhaibheri rinotibvunja kuti Jehovha “anounyaxa no usizi, anononoka kuceneka, wakazara ngo rudo no ugondeki.” (Exodo 34:6) Jehovha “wakanaka, anokungurira.” (Nduyo 86:5) Mwari anosengerera. (2 Pedru 3:9; Ndu 145:17) Munozojija maningi ngo pamusoro po mugariro jake jinodakajisa pamunonga meciverenga Bhaibheri.

20-22. (a) Tingaitisa kudini kuti tizwe tiri phedo na Jehovha kasike atiripi kumuvona? (b) Ngozvapi zvamungaita kudari vamweni vecida kuti muime kujija Bhaibheri?

20 Mungaitisa kudini kuti muzwe muri phedo na Jehovha kasike amuripi kumuvona? (Johani 1:18; 4:24; 1 Timoti 1:17) Pamunoverenga ngo pamusoro  pa Jehovha mu Bhaibheri, munoguma pa kumuziva inga Mundhu kamare. (Nduyo 27:4; VaRoma 1:20) Pamunojija zvizinji ngo pamusoro pa Jehovha, rudo hwenyu kwaari unotanga kukura maningi zve munozozwa muri phedo nae.

Baba vanoda vana vavo, asi Baba vedu vo kudenga vanotidisisa maningi

21 Mungaguma pa kuzwisisa kuti Jehovha ndi Baba wedu. (Mateu 6:9) Iyena wakatipa upenyu, zve anoda kuti tirarame upenyu hwakanaka kamare. Izvi ndizvona zvaizodiwavo ndi baba vano rudo kuno vana vavo. (Nduyo 36:10) Zvokadi, Bhaibheri rinojijisa kuti imwimwi mungava shamwari ya Jehovha. (Jakobo 2:23) Amborangariranyi basi. Jehovha, Marure wo zviro zvese, anoda kuti muve shamwari yake!

22 Vandhu vamweni vangada kuti imwimwi muregere kujija Bhaibheri. Kangaije vanothyira kuti mungazocinja ciara cenyu. Asi mucambotendera kuti ari wese amuimise kuva shamwari ya Jehovha. Iyena i Shamwari yakanaka yamungava nayo.

23, 24. (a) Ngenyi munodikana kuramba meciita mubvunjo? (b) Tinozojijenyi mu cipauko cinotevera?

23 Pamunonga mecijija Bhaibheri, pano zvimweni zvamucikazonasi kuzwisisa. Mucadopseruka ngo kuita mubvunjo kana kupsaka besero. Jesu wakananga kuti tinodikana kujidodokesa inga mwana mudoko. (Mateu 18:2-4) Mwana mudoko anoita mubvunjo jakawanda. Mwari anoda kuti muwane mupinguro. Waro nasanyi kujija Bhaibheri kuti muve no cokwadi cokuti zvamuri kujija ngo zvokadi.—Verenganyi Maitiro o Vapostori 17:11.

24 Njira yakanakisisa yokujijira ndiona ngo pamusoro pa Jehovha ngo yo kujija Bhaibheri. Mu cipauko cinotevera, tinozoziva kuti ngenyi Bhaibheri rakasiyana maningi no bhuku rimweni riri rese.

^ ndim. 15 Kudari Bhaibheri renyu ricina zina rokuti Jehovha, kana kuti, kudari mecida kuwana masoko mazinji ngo pamusoro po zvarinoreva zve no madaninjihwe aro, tapota vonanyi Masoko o Kupejisira civerengo 1.