Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 13

Timoti Waidakarira Kubesa Vandhu

Timoti Waidakarira Kubesa Vandhu

Timoti wainga mujaha waidakajihwa ngo kubesa vandhu. Iyena wakaita hwendo kwenda ku ndau zinji kuitira koobesa vamweni. Ngo ndava ya izvi iyena wainga no upenyu unoshamaisa maningi. Unoda kuziva ngo zvake here?—

Mbia wa Timoti na mai wake vakamujijisa ngo pamusoro pa Jehovha

Timoti wakarebera ku dhorobha rimwe raidanijwa Ristra. Paainga aciri mwana mudoko, mbiya wake Roidhii pomwe na mai wake, Eunise, vakatanga kumujijisa ngo pamusoro pa Jehovha. Paakazokura, Timoti wakada kubesera vamweni kujijira ngo pamusoro pa Jehovha.

Timoti paainga aciri mujaha, Pauro wakamukumbira kuti aite hwendo naiyena kuitira koocumaera mu ndau jimweni. Timoti wakati: ‘Hina!’ Iyena wainga wakanasirika kuti aende koobesera vamweni.

 Timoti wakaita hwendo na Pauro kwenda ku dhorobha rimwe ro ku Masedhonia raidanijwa Tesaronika. Kuti vagumeyo, ivona vakafamba maningi perapo vokhwira piketi. Pavakaguma, ivona vakabesera vandhu vazinji kujijira ngo pamusoro pa Jehovha. Asi vandhu vamweni vakanyangajwa voeja kuvakhuvaza. Asi Pauro na Timoti vakatiza voenda koocumaera ku ndau imweni.

Timoti wainga no upenyu unodakajisa no kushamaisa

Nopakhirira mweji munganani, Pauro wakakumbira Timoti kuti ahwirire ku Tesaronika koovona kuti hama jainga jakadini. Zvaida kucunga kuhwirira ku dhorobha irowaro ro ngozi! Asi Timoti wakaenda ngo kuti waithyira hama kondhoyo. Iyena wakahwirira kuna Pauro no masoko akanaka. Hama ku Tesaronika jainga jecibudirira zvakanakisisa!

Timoti wakashanda na Pauro makore akawanda. Vhaza imwe Pauro wakatara kuti Timoti wainga mundhu wakanaka waaifanira kutuma koobesera ungano. Timoti waida Jehovha pomwe no vandhu.

Iwewe uno rudo no vandhu zve unoda kuvabesera kujijira ngo pamusoro pa Jehovha here?— Ukaita kudaro, iwewe ungava no upenyu unodakajisa no unoshamaisa maningi, inga ndi Timoti!