Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 3

Rahabhe Wakatenda Jehovha

Rahabhe Wakatenda Jehovha

Ngatiti tiri mu dhorobha ro Jeriko. Dhorobha iri riri mu nyika yo Kanani, maingaya muno vandhu vacikanamati Jehovha. Mwanakaji waidanijwa kuti Rahabhe wairarama mondhomu.

Rahabhe paainga musikane, iyena wakazwa ndhorondho ngo pamusoro po kujivirihwa ka Mosi mu Jombe ro Kupsuka zve kutungamirira vaIziraeri kubuda mu Ejipita. Wakazwazve mabesere avakaithwa ndi Jehovha kuti vawine hondo jo vavengi vavo. Wari wazwa kuti vaIziraeri vaungana phedo no Jeriko!

Rahabhe wakajivirira vafei ngo kuti iyena wakatenda Jehovha

Mu usiku humweni, Vaiziraeri vaviri vakaenda koofeya dhorobha ro Jeriko. Ivona vakaviya pa muzi pa Rahabhe. Rahabhe wakavakoka kuti vanghwine zve vagare. Muusikuhwo mambo wo Jeriko wakafumbhura kuti vafei vari mudhorobhemo zve kuti vari ku nyumba ka Rahabhe. Ngo kudaro mambo wakatumira vanarume vaviri kuti vavabate. Rahabhe wakaviga vafei panyezuru po nyumba yake zve obvunja vanarume vamambo kuti: ‘Vafei vainga pano, asi ivona vabuda mudhorobha muno panguva yaperari. Kudari mukavatevera, mungavabata!’ Unozviziva kuti ngenyi Rahabhe wakajivirira vafei ava?— Ngo kuti iyena waithemba Jehovha zve waizwa kuti Jehovha waizopekeja vaIziraeri nyika yo Kanani.

Vafei vacito vabva pamuzi pa Rahabhe, ivona vakagondesa kuti Rahabhe no mbhuri yake vaizoponeswa paizoparajwa Jeriko. Unozviziva kuti zvicinyi zvavakabvunja Rahabhe kuti aite?— Ivona vakananga kuti: ‘Torai bote rokupsuka, uripakaike ngo kunja ko jhanera yako. Kudari ukazviita, ari wese anonga ari mukati mo nyumba yako anozoponeswa.’ Rahabhe wakaita kamare zvainga zvakanangwa ngo vafei kuti aite. Unozviziva zvakazoitika?—

Jehovha wakaponesa Rahabhe no mbhuri yake

Sure ko njiku nganani, vaIziraeri vakafamba vecitenderera dhorobha mu cinyararire. Pa mazuva matandhatu Ivona vakafamba vecitenderera dhorobha, kamwe pa njiku. Asi pa njiku yo cinomwe, ivona vakafamba vecitenderera dhorobha kanomwe. Perapo vese vakakhuwa ngo izwi guru. Jehovha wakaita kuti mufimbiji jaitenderera dhorobha jihidhike.  Asi nyumba yainga yakapakaikwa bote ro kupsuka ngo kunja ko jhanera yakaramba yakaima! Ungaivona pa mupikica?— Rahabhe no mbhuri yake vakaponeswa!

Ungajijenyi ngo zva Rahabhe?— Rahabhe wakatenda Jehovha ngo pamusoro po zvese zvinoshamaisa zvaakajija. Iwewevo uri kujija zvizinji zvinoshamaisa maningi ngo pamusoro pa Jehovha. Unotendavo Jehovha inga zvakaita Rahabhe here?— Tinozviziva kuti uri kuzviita!