Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 12

Muzukuru wa Pauro Wakava Akacunga

Muzukuru wa Pauro Wakava Akacunga

Ngatende tijije ngo pamusoro po mujaha wakaponesa cekuru wake. Cekuru wo mujaha wondhou ndi Pauro. Itusu atirizivi zina ro mujaheo, asi zvatinoziva ngo zvokuti wakaita ciro cokucunga maningi. Iwewe unoda kuzwa zvaakaita?—

Pauro wainga ari mugunia ku Jerusarema. Iyena wakasungwa ngo ndava yo kucumaera ngo pamusoro pa Jesu. Vanarume vamweni vakashata vaizonda Pauro. Ngo kudaro ivona vakarangarira zano rakashata. Ivona vakati: ‘Ngatikumbire mutungamiriri wo masoca kuti aviise Pauro kubanje. Itusu tinozovafindarira mumbhiripiri mo citaka zve Pauro paanozokhirira ngo citakeco tinozomuuraya!’

Muzukuru wa Pauro wakabvunja Pauro no mutungamiriri wo masoca ngo pamusoro po zano ro kushata

Njiku imwe Pauro acito apindiswa ku Sezareya, muzukuru wake wakazwa ngo pamusoro po zano iri. Zvicinyi zvaaizoita? Iyena wakaenda ku gunia koozvibvunja Pauro. Ngo kukasika, Pauro wakamubvunja kuti abvunje mutungamiriri wo masoca no kuda ko zano rakashata. Unorangarira kuti zvainga zvakareruka kuno muzukuru wa Pauro kuvereketa no mutungamiriri wo masoca here?— Haiwa, ngo kuti mutungamiriri wainga mundhu waireremejwa maningi. Asi muzukuru wa Pauro wakava akacunga zve wakavereketa no mutungamiriri wo masoca.

Mutungamiriri wo masoca waiziva kamare zvokuita. Iyena wakatora masoca anokhwedera 500 kuti abvikire Pauro! Iyena wakamabvuja atore Pauro kubva mu Sezareya usiku hwondhohwo. Pauro wakaponeswa here?— Hina, vanarume avacaizokwanisepi kumukhuvaza! Zano ravo rakashata arizivi kushanda.

Ungajijenyi kubvira ku ndhorovondho iyi?— Iwewevo ungava akacunga inga muzukuru wa Pauro. Itusu tinodikana kuva vakacunga patinobhuya no vamweni ngo pamusoro pa Jehovha. Unozova wakacunga zve woramba wecivereketa ngo pamusoro pa Jehovha here?— Ukaita kudaro, iwewe ungazoponesa upenyu wo ariwese.