Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 7

Wakambojizwa uri wega zve wecithya here?

Wakambojizwa uri wega zve wecithya here?

Vonai cimufana ciri pa pikica apa. Icona ciri cega zve ciri kuthya, andizvopi? Iwewe wakambojizwa kudaro?— Nguva jimweni mundhu ari wese angajizwa kudaro. Bhaibheri rinonanga ngo pamusoro po shamwari ja Jehovha jakajizwavo kuva vari vega zve vecithya. Umwe wavo wainga Erija. Ngatende tijije ngo pamusoro pake.

Jhezabheri waida kuuraya Erija

Erija wakararama mu Iziraeri kare kamare, Jesu acito abahwa. Akabhi, mambo wo Iziraeri, aacainamatepi Mwari wokadi-kadi, Jehovha. Akabhi no mukaji wake, Jhezabheri, vainamata mwari wo manyepo Bhaari. Ngo kudaro vandhu vazinji mu Iziraeri vakatangavo kunamata Bhaari. Hosi Jhezabheri wainga mushati maningi zve waida kuuraya vandhu vese vainamata Jehovha, kubatanijavo Erija! Unozviziva zvakaita Erija?—

Erija wakatiza! Iyena wakaenda ndhambo kubani zve wakafindara mu bambha. Unorangarira kuti ngenyi wakaita kudaro?— Hina, ngo kuti wainga  ecithya. Asi Erija aacaidikana kuthya. Ngenyi? Ngo kuti iyena waizviziva kuti Jehovha waizomubesera. Jehovha wainga akakhombija simba rake kuna Erija kareko. Vhaza imweni, Jehovha wainga akapingura mukumbiro wa Erija kubvira ku denga. Ngo kudaro Jehovha waizobesera Erija vhaza iyi!

Jehovha wakabesera kudini Erija?

Erija naari mu bambha, Jehovha wakavereketa naye ecimubvunjisa kuti: ‘Uri kuitenyi muno?’ Erija wakadavira: ‘Ndini basi ndasara ndecindomunamata. Ndasara ndega, zve ndiri kuthya kuzouraiwa.’ Erija wairangarira kuti vanamati vamweni vese va Jehovha vainga vapera kuurawa. Asi Jehovha wakabvunja Erija kuti: ‘Haiwa, andizvopi. Kunazve zviuri zvinomwe zvo vandhu vacandoramba vecindinamata. Iva wakacunga. Ndino basa zinji ro kuti uite!’ Unorangarira kuti Erija wakadakara ngo kuzwa izvi here?—

Ungajijenyi kubvira ku zvakaitika na Erija?— Auzombodikanizve kujizwa uri wega zve no kuthya. Iwewe uno shamwari jinoda Jehovha zve nokudavo iwewe. Cimwenizve, Jehovha ano simba rakawanda maningi, zve nguva jese anozondokubesera! Wadakara ngo kuziva kuti narini auripi wega kamare?—