Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIJIJO 1

Cakafisika Catinodakarira Kuciziva

Cakafisika Catinodakarira Kuciziva

Aripo wakambokubvunja cakafisika here?— * Bhaibheri rinonanga ngo pamusoro po “cakafisika” cinosisira maningi cinobva kuna Mwari. Cinodanijwa kuti cakafisika ngo kuti vandhu avacizivi. Pikija ngirozi jaidikana kuziva zvizinji ngo pamusoro paco. Waidakarira kuzwa kuti i cakafisika capi here?—

Unorangarira kuti ngirozi jaieja kufumbhurenyi?

Ko, nguva yakareba yapera, Mwari wakasika mwanarume wo kutanga no mwanakaji. Mazina avo ainga Adhamu na Evha. Mwari wakavapa muzi wakaseja maningi waidaninjwa kuti munda wo maruva. Kudari Adhamu na Evha no vakapurutana Mwari, ivona no vana vavo vaizoita kuti nyika yese ive paradhiso inga munda uu. Zve ivona vaizorarama mu Paradhiso mbhera na rini. Asi uciri kurangarira zvakaita Adhamu na Evha here?—

Adhamu na Evha avazivi kuzwira Mwari, ngo zvakatiitisa kuti titame kurarama mu paradhiso nyamasi uno. Asi Mwari wakananga kuti waizosejesa pasi pese, zve ari wese waizorarama kucingaperi no kudakara. Waizozviitisa kudini izvi? Ko makore mazinji, vandhu avacaizvizivepi. Izvi zvainga zvakafisika.

Jesu paakaviya pasi pano, wakajijisa vandhu zvizinji ngo pamusoro po cakafisika ici. Iyena wakananga kuti zvaizoitika ngo Umambo hwa Mwari. Jesu wakabvunja vandhu kuti vaite mukumbiro kuitira kuti Umambo uhwu huviye. Ndihwona hunozosejesa pasi kuva paradhiso.

Unodakajihwa ngo kuziva cakafisika ici here?— Ucakanganwa kuti vaya basi vanopurutana Jehovha ndivona vanozorarama mu Paradhiso. Bhaibheri rinotibvunja ndhorondo zinji jo vanarume no vanakaji vakapurutana Jehovha. Waidakarira kujija ngo zvavo here?— Imai tivone kuti vainga ani vamweni vavo zve tingavatevejeresa kudini.

^ ndim. 3 Mu mativi ese o ndhorondo iji, mucazovona kuti muno cakamakwa cakaita inga ici (—) pakupera ko mubvunjo. Iyi i nguva yakanaka yo kumbokama kuti musiye mwana wenyu kuti adavire.