Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 7

Vazivi vo Ndhondho Vobvakacira Jesu

Vazivi vo Ndhondho Vobvakacira Jesu

MATEU 2:1-12

  • VAZIVI VO NDHONDHO VOTEVERA ‘NDHONDHO’ KWENDA KU JERUSAREMA MBHERA KUNA JESU

Kuno vanarume vamweni vakabva ngo kumabvazuva. Ivona vazivi vo ndhondho, vanojija magarire anoita ndhondho, perepo vonanga kuti vanokwanisa kudurujira revo yo zviitiko zvo upenyu hwo mundhu. (Isaia 47:13) Pavainga vari kumuzi kwavo vakavona ‘ndhondho’ yakavatungamirira pa mumango wo mazana o makirometro kwenda ku Jerusarema, kuciripi ku Bheterehema.

Pavanoguma ku Jerusarema, vazivi vo ndhondho vobvunjisa kuti: “Ari kwapi Mambo wo Majuda wabahwari? Ngokuti takavona ndhondo yake kumabvazuva, taza komugwadamira.”—Mateu 2:1, 2.

Mambo Herodhi, ku Jerusarema, paakazwa izvi, wotanga kuima-ima ngo kunyangajwa. Ngo kudaro wakadaninja nduna jo vapiri no vatungamiriri vo zviara zvo ciJudha wovabvunjisa kuti Kristu waizobarihwa kwapi. Vecinanga zvakatahwa, vakadavira kuti: “Mu Beterehema.” (Mateu 2:5; MIKEYA 5:1) Ngo masoko aya Herodhi wakadaninjisa vazivi vo ndhondho mu cifise-fise wovabvunja kuti: “Endanyi mopsanga uxoni mwana uwo. Kudari mukamuwana, vianyi mondizivisa, kuti nenivo ndiende komugwadamira.” (Mateu 2:8) Asi izvona ngo zvokuti Herodhi waida kuuraya Jesu!

Vazivi vo ndhondho pavakapinda, kwakaitika zviro zvinoshamaisa. Ndhondho yavaingaya vakavona vari kumuzi kwavo, yovatungamirira. Zviri pambhene kuti asipi ndhondhovo hayo, iyona yakatumwa kuti ivatungamirire kamare. Vazivi vo ndhondho voitevera mbhera payakaenda koima. Iyona yakaima kamare ngo panyezuru po nyumba yaingaro na Jasefa na Maria pomwe no cimwana cavo.

Vazivi vo ndhondho pavakanghwina mu nyumba vakakhanda Maria no cimwana cake, Jesu. Ivona vakagwadama pamberi pa Jesu vomupekeja zvipo zvo ndarama no mira (mafuta anonuhira). Sure kwazvo Mwari wakavabvunja muhope kuti vatame kuhwirira ka Herodhi. Ngo kudaro vakahwirira kanyi kwavo ngo gwanja rimweni.

Munorangarira kuti ndiyani wakadira ndhondho iyi kuti itungamirire vazivi vo ndhondho? Mucakanganwa kuti ndhondho iyi aizivi kutanga ngo kuvaendesa ku Bheterehema kamare. Asi yakavaendesa ku Jerusarema kuti vawanane na Mambo Herodhi, waidaya kuuraya Jesu. No kwainga kuti Mwari aazivi kunghwinira, wobvunja vazivi vo ndhondho kuti vatame kuhwirira ka Herodhi, Herodhi waizouraya Jesu. Zviri pambhene kuti ndi Sathana muvengi wa Mwari waida kuti Jesu afe, ndiyena wakadira ndhondho iyi, kuti zvaaida zviitike.