Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 1

Masoko Maviri Anobva kuna Mwari

Masoko Maviri Anobva kuna Mwari

LUKA 1:5-33

  • NGIROZI GABHIRIERI INOZIVISA NGO KUBAHWA KA JOHANI MUBHABHATIJI

  • NGIROZI INOBVUNJA MARIA NGO KUBAHWA KA JESU

Zvokadi, tingavona Bhaibheri rese kuva soko ra Mwari. Baba wedu vo mugore vakatipa bhuku iro kuti ritijijise. Asi rangariranyi basi, masoko anosisira akaziviswa ko makore anodarika kuita 2.000 akapera. Iwona akanangwa ngo ngirozi Gabhirieri, inogara “pambeji pa Mwari.” (Luka 1:19) Mugariro wapi waiwanikeyo ngirozi iyi payakagumisa masoko ondhowo aisisira?

Rainga recikhwedera gore ro 3 Nguva ya Vese Icito Yaguma (N.V.I.Y.). Masoko a Gabhirieri akatanga kuguma kuna aani? Ku matundhu o Judheya, kangaije yainga ndau icainga ndhambo no Jerusarema. Ndikona kwaigara mupiri wa Jehovha waidanijwa Zakaria. Iyena no mukaji wake Erizabheti kana Zabheri, vainga vaaharahwa, asi avacainga no mwana. Ici cikara ca Zakaria co kushanda inga mupiri mu themberi ya Mwari ku Jerusarema. Paainga ecishanda mu themberi, Gabhirieri wakamugumira ngo cibvumbu phedo no pa dandiro ro mupiro.

Zvokadi Zakaria wakathya. Asi ngirozi yakamutondhoja, yeciti: “Zakaria, ucathya. Kukumbira kwako kwazika. Mukaji wako Zabheri anozokubarira mwana, unozomudura zina ra Johani.” Gabhirieri wakaengejera ecinanga kuti Johani waizova “mundhu mukuru panyasi” pa Jehovha zve ‘anozonasiririra Mwari vandhu vanopurukira.’—Luka 1:13-17.

Kuna Zakaria zvainga zviro zvicikadaviriki. Ngenyi? Ngo ndava yo ndanga yake no mukaji wake. Ngo kudaro Gabhirieri wakamubvunja kuti: “Kubvira wari unozoita mbeveve, auzovereketi mbhera ibzi bziitike; ngokuti auzivi kutenda mazwi angu.”—Luka 1:20.

Ngo kunjeyo, vaindokana-kana kuti ngenyi Zakaria wainonoka kubuda. Pejisire wakazobuda, asi wainga acikavereketi. Zakaria waikwanisa basi kuvereketa ngo nyara. Zvainga zvakajeka kuti zviripo zvaainga avona mu themberi.

Naapeja kuita basa rake mu themberi, wakahwirira kumuzi. Nguva shomani nozvapera kuitika, Erizabheti wakava no mimba. Ko mweji mushanu, paivetehwa kubahwa ko mwana, Erizabheti waigara pamuzi basi ndhambo no vandhu vamweni.

Pasure pa izvi Gabhirieri wakaviyazve hwo cipiri. Wakagumira ani? Kuno musikane acizivi kurovohwa waidanijwa Maria, waigara kanjikazi ko Jerusarema ku mutundhu waidanijwa Garireya, ku dhorobha ro Nazareta. Ngirozi iyi yakamubvunjenyi? Iyona yakati: “Wawana unyaxa panyasi pa Mwari.” Yakaenderera mberi yeciti: “Unozomita, wozobara mwana worume, wozomudura zina ra Jesu.” Gabhirieri wakaengejera eciti: “Anozoita mukuru, wozodanwa Mwana wa Mwari Mukuru-kuru. . . . Anozotonga mabvumbo a Jakobe mazuva acingaperi, Umambo hwake ahuzoperi.”—Luka 1:30-33.

Mungakwanisa kuvona mazwire akava na Gabhirieri ngo kuva no cidakajiso co kutumwa no masoko aya pa hwendo huviri uhu. Patinonga teciverenga zvizinji ngo pamusoro pa Johani na Jesu, zvicazotijekera kuti ngenyi masoko ao akabvari mugore anosisira maningi.