Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 8

Ivona Vanotiza Mutongi Wakashata

Ivona Vanotiza Mutongi Wakashata

MATEU 2:13-23

  • MBHURI YA JESU INOTIZIRA EJIPITA

  • JASEFA ANOTHUTHISA MBHURI YAKE KUENDA NAZARETA

Jasefa anomusa Maria mu hope kuti amubvunje masoko o kukasika maningi. Ngirozi ya Jehovha inonga yabva kubudira Jasefa mu hope, yomubvunja kudari: “Mukai, utore mwana na mai wake utizire Ejipiti ugareyo mbhera ndikubvunje. Ngokuti Herodi anopsanga mwana, kuda kumuuraya.”—Mateu 2:13.

Jasefa, Maria no mwana wavo votiza ngo kukasika, no usiku. Vakazviita pa nguva kwayo, ngokuti Herodhi wakaziva kuti vazivi vo ndhondho avazivi kuita zvaakavabvunjaya. Vakabuda munyikemo vacizivi kusumurira Herodhi kuti Jesu anowanika kwapi. Iyena wakanyangajwa maningi ndizvona. No cido co kuuraya Jesu, Herodhi wakadira mutemo wokuti vana vese vorume vano makore maviri kana pasi, vari mu Bheterehema no mundharaundhemo, vanodikana kuurawa. Wakapima ndanga iyi naakacijikira pa zvaakazwaya ngo vazivi vo ndhondho vakabva weya ku Mabvazuva.

Kuuraiwa ko vana vese vorume ndi ciro cakashata maningi! Azviziviki kuti kwakaurawa vana vangana, asi ciriro cikuru ici no kucumba ko majimai akauraihwa vana vao kunokwanirisa uphorofita hwo Bhaibheri hwakanangwa ndi Jeremia, muphorofita wa Mwari.—Jeremia 31:15.

Pozvaiitika izvi, Jasefa no mbhuri yake vainga vatizira Ejipita, votogareyo. Ngirozi ya Jehovha yakazobudirazve Jasefa muhope pa usiku humweni. Iyona yakati: “Mukai, utore mwana na mai wake, uhwirire ku nyika yo vaIsraeli, ngokuti vaya vaida kuuraya mwana vapera kufa.” (Mateu 2:20) Ngo masoko aya, Jasefa wakazwisisa kuti waizokwanisa kuhwirira ku nyika yaakabarihwa no mbhuri yake. Ngo njira iyi, hwakakwanirisikazve uphorofita humweni hwo Bhaibheri hunonanga kuti Mwana wa Mwari anodanijwa kubva ku Ejipita.—Hoseya 11:1.

 Zvingaita kuti Jasefa waida kuti mbhuri yake igare Judheya, kangaije phedo no Bheterehema, kovaigaraya vacito vatizira Ejipita. Asi waizviziva kuti mwana wokushata wa Herodhi, anozwi Arkerau, ndiyena ari kutonga mu Judheya. Mu hope jimweni, Mwari anongwaja Jasefa ngo pamusoro po ngozi. Ngokudaro, Jasefa no mbhuri yake vanoita hwendo kuenda kanjikazi zve vogara mu dhorobha ro Nazareta, mu ndharaundha yo Garireya, ndhambo kamare no cine ro maponero o manamatiro o ciJudha. Jesu anokurira mu ndharaundha iyi, zvokwanirisa uphorofita humweni, hunonanga kuti: “Yena anozodanwa Munazareta.”—Mateu 2:23.