Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 118

Kupipana ngo Ukuru

Kupipana ngo Ukuru

MATEU 26:31-35 MARCO 14:27-31 LUKA 22:24-38 JOHANI 13:31-38

  • JESU ANOPANGIRA NGO PAMUSORO PO KUDA UKURU

  • PEDHRU ANOBVUNJWA KUTI ANOZORAMBA JESU

  • VATEVERI VA JESU VANOVONEKA NGO RUDO

Pa usiku hwo kupejisira no vajiji vake, Jesu wakavapekeja cijijo cakanaka maningi ngo pamusoro po kujidodokesa, paakasuka soka javo. Ngenyi zvakava zvinosisira maningi? Ngo pamusoro po cineso cavainga naco. Ivona vainga vanamati va Mwari, asi vainga vecikaya-kaya kuti mukuru ndiani pakati pavo. (Marco 9:33, 34; 10:35-37) Mu usiku uhu, cineso ici cakabvumbukazve pakati pavo.

Vapostori vanotanga “kupopana ngo ndava yokuti ndiani wavo angazoita mukuru.” (Luka 22:24) Zvinoita inga zvakahwaja maningi Jesu kuvonazve vecimusazve shwiro iyi. Waro Jesu anoitenyi?

Jesu aazivi kupangira vapostori vake ecivakharamusa ngo pamusoro po murangariro no maitiro avo. Asi, ngo kuthiva kwese, iyena wakarangarijisisa navo eciti: “Majimambo o nyika vanojixupha, vaya vanoda kutonga nyika vanoda kudanijwa ‘vaiti vo bzauxoni.’ Kucaitika kudaro pakati penyu! . . . Ngokuti, ndiani mukuru: uwo anogara pa tafura, nokuti uwo anoperekera? Asi uwo anogara pa tafura? Kaveta inini ndiri pakati penyu inga muperekeri.”—Luka 22:25-27.

Pikija vacizivi kukwana, vapostori vanoramba vana Jesu mu mugariro unonesa maningi. Ngo kudaro, iyena anoti: “Ndinomunasirira [kana kuita citenderano co] umambo, kudari inga Baba wakandinasiriravo inini.” (Luka 22:29) Vanarume ava i vateveri va Jesu vakatendeseka. Ngo citenderano ici, Jesu anovagondesa kuti ivona vanozova mu Umambo zve vanozotonga pamwepo na iyena.

Pikija vapostori vanovetero inoshamaisa iyi, ivona vaciri vandhu vacizivi kukwana. Jesu anovabvunja kuti: “Sathana wakamupsanga kuti amupepete inga mbeu” inoparajika painonga yecipepethwa. (Luka 22:31) Jesu anovangwajazve eciti: “Usiku huno, mwese munozokhugunyiswa ngo ndava yangu. Ngokuti bzakatahwa kuti: ‘Ndinozobaya muhavisi; mabvuta o muxambi anozoparajika.’”—Mateu 26:31; Zakaria 13:7.

Pedhru aazvitenderi eciti: “Pikija vese vakakhugunyika ngo ndava yenyu, inini mbhikwa, andizokhugunyiki.” (Mateu 26:33) Jesu anobvunja Pedhru kuti waizomuramba jongwe ricito rarira kaviri pa usiku uhu. Asi Jesu wakaengejera eciti: “Inini ndakakukumbirira, kuti kutenda kwako kucazoremba. Iwewe, kudari ukatenderuka, vangisai hama jako.” (Luka 22:32) Pikija zvakadaro Pedhru anopika eciti: “Pikija bzikadika kuti ndife na imwimwi, andizomurambi.” (Mateu 26:35) Vapostori vamweni vanonangavo zvondhozvo.

Jesu anobvunja vajiji vake kuti: “Ndicinemwi nguva shomani. Munozondipsanga. Kaveta, kudaro ngo bzo ndakabvunja vaJuda, ndinomubvunjavo wari: kondinoenda, imwimwi amukwanisi kwendeyo.” Perepo anoengejera eciti: “Ndinomupa mupango mupsa: kuti mudisane ngocenyu, kuti kudari ngo bzo ndakamuda, imwimwivo mudisane ngo cenyu. Mukaita kudaro vese vanozoziva kuti muri vajiji vangu: mukadisana ngo cenyu.”—Johani 13:33-35.

Paanozwa Jesu ecinanga kuti iyena wasara no nguva shomani kuti apinde, Pedhru anobvunjisa kuti: “Tenji, munoenda kwapi?” Jesu anopingura kuti: “Ko ndinoenda iwewe aukwanisi kunditevera. Unozonditevera mukuvo umweni.” Ecikahamara Pedhru anoti: “Andikwanisi ngenyi kumutevera [wari]? Inini ndinozopira uhomi ngo ndava yenyu!”—Johani 13:36, 37.

Wari Jesu anonangira panguva yaakatumira vapostori ku Garireya kuti vaende kocumaera. Ivona avacaidikanepi kutora nee cikhwama co mare haco kana co mbuva. (Mateu 10:5, 9, 10) Jesu anobvunjisa kuti: “Makakairirihwa ngo ciricese?” Ivona vanodavira kuti: “Apana.” Asi zvicinyi zvavaidikana kuita pa njiku jinotevera? Jesu anopekeja ndhungamiro jinoti: “Ndiani ano mbudu, aitore pondhopo no cinyede; ndiani acina banga, ngaatengese hanju yake, aritenge. Ndinomubvunja  kuti anotevejwa kondiri Matahwa okuti: ‘Wakaverengwa pakati po bzigevenga.’ Bzinoda kutevejwa bziya bzakanangwa ngo ndava yangu.”—Luka 22:35-37.

Jesu ari kunangira paanozokohomehwa ari pakati po vashaishi. Pasure pa izvi vateveri vake vanozoteverehwa zvo kuti izanyi muzovona. Ivona vanovona inga vakanasirika zve vanoti: “[Tenji, tinawo] mapanga maviri!” Iyena anopingura kuti: ‘Zvinokwana!’ (Luka 22:38) Ngo pamusoro po kuva no mapanga aya zvinozoita kuti Jesu mbaimbaipano awane mukana wo kupekeja cijijo cinosisira maningi.