Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 129

Pirato Anonanga kuti: “Nga Uu Mundhu”

Pirato Anonanga kuti: “Nga Uu Mundhu”

MATEU 27:15-17, 20-30 MARCO 15:6-19 LUKA 23:18-25 JOHANI 18:39–19:5

  • PIRATO ANOEJA KUSUJUNURA JESU

  • VAJUDHA VANOKUMBIRA KUTI BHARABHASI ASUJUNUHWE

  • VANOSINGIRIRA JESU NO KUMUTAMBUJA

Mbungano yaida kuti Jesu afe basi. Pirato wakavabvunja kuti: “Inini, . . . [andizivi] kuwana no ndava imwe yo munomurevera. Na Herodivo aazivi kuwana ndava.” (Luka 23:14, 15) Ecieja kujivirira Jesu, Pirato anoshandisa zano rimweni ecibvunja vandhu kuti: “Imwimwi maroveja kuti ndimusunungure mundhu pa ngari yo Paskwa. Wari munoda kuti ndimusunungure mambo wo vaJuda?”—Johani 18:39.

Pirato anoziva mushaishi umweni anodaninjwa kuti Bharabhasi, anozivika inga mbabva, mucengeji zve muurai. Ngo kudaro Pirato anobvunjisa kuti: “Munoda kuti ndimusunungurire ani: Barabasi, dangani Jesu anodanwa Kristu?” Vecikukumijihwa ngo vapiri vakuru, vandhu vanokumbira kuti Bharabhasi abudiswe, kuciripi Jesu. Pirato anobvunjisa kuti: “Ndiani wo vaviri womunoda kuti ndimusunungurire?” Mbungano inopingura yeciti: “Barabasi”!—Mateu 27:17, 21.

Pirato anonyangajwa, wonanga kuti: “Waro, ndinozoitenyi na Jesu anodanwa Kristu?” Mbungano inopingura yeciti: “Ngaakohomehwe!” (Mateu 27:22) Nee avapseruki ngo kukumbira kuurawa ko mundhu acina ndava. Pirato anocumba eciti: “Wakaita uxaixi hwenyi? Andiwani ndava iriyese [kwaari] yokuti aurawe. Ndinotuma kumutambuja, kuperapo ndino musunungura.”—Luka 23:22.

Pikija no kuvangisira kwakawanda ka Pirato, mbungano yakazara ngo ushungu inokhuwa pamwepo yeciti: “Ngaakohomehwe!” (Mateu 27:23) Vatungamiriri vo zviara vakukumijira vandhu mbhera kugumira pakuda kuva no ndava yo ngazi. Zve asipi ngazi yo mushaishi kana muurai, asi vari kuda ngazi yo mundhu acina ndava! Mu dhiya shanu japera, vandhu vainga vakaashira Jesu mu Jerusarema inga mambo. Zvinoita inga kuti vajiji va Jesu avapo. Kudari varipo, vanomukira kunyararisa zve apana cavanoita.

Pirato anovona kuti kudeketera kwake akuripi kushanda ciro zve jowe-yowe riri kuengejeka. Ngo kudaro anocera zvikumwa padoko wosamba nyara pamberi po mbungano. Iyena anoti: “Andina ndava no ngazi yo mundhu wokunasa uu; ibzo mbzenyu.” Pikija zvakadaro, mbungano aihwiriri sure. Asi iyona inoti: “Ngazi yake ngaiwire kotiri no kuno vana vedu.”—Mateu 27:24, 25.

Asi kuti adakajise mbungano kuciripi kuita zvaanoziva kuti zvakanaka, Pirato anoita zvaanovangirijwa ndiyona, wobudisa Bharabhasi. Anokumbira  vandhu kuti vabvise nguvo jakasimihwa ndi Jesu wovatuma kuti vamusvapute.

Pasure po kutambujwa uku, masoca anotora Jesu voenda naye ku nyumba ya govhernadhori. Jesu anotambujwazve maningi ngo cikwata co masoca. Ivona vanoita hata yo muzwa voisimija mu musoro make. Vanomubatija njanga mu mukono muho wa Jesu, no kumusimija nguvo yo kupsuka inga majimambo. Perepo vanomusingirira veciti: “Tamuvona, Mambo wo vaJuda.” (Mateu 27:28, 29) Andizvopi zvega, ivona vanomupfirira mata vecimusvaputa kumeso kwake. Vanomutorera njanga yaingaya munyara jake vosvaputa ndiyona “hata” yo muzwa yo kurerusa yavakamusimijaya mu musoro make. Muzwejo jainghwina mu mushuna make.

Pirato anokahamara ngo kuthiva no kucunga kwa Jesu. Ngo kudaro anoeja kutiza muthwaro wo kutonga shwiro iyi. Iyena anoti: “Ndinobuda na iyena komuri kunja kuno, muzive kuti andiwani ndava iriyese kwaari.” Kunanga kuti Pirato anorangarira kuti vandhu vaizocinja murangariro wavo ngo kuvona Jesu apera kukhuvazika no kuzara ngazi here? Jesu paanoima pamberi po vavengi vacina pena, Pirato anonanga kuti: “Nga uu mundhu!”—Johani 19:4, 5.

Masoko a Pirato anoita inga anovonesa kuti waireremeja Jesu no kumuzwira pena ngo kuti iyena ari kuramba akathiva no kunyararisa pikija no kusvaputhwa.