Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 110

Jesu Anoenda mu Themberi ko Kupejisira

Jesu Anoenda mu Themberi ko Kupejisira

MATEU 23:25–24:2 MARCO 12:41–13:2 LUKA 21:1-6

  • JESU ANOENDERERA MBERI ECISHORA VATUNGAMIRIRI VO ZVIARA

  • THEMBERI RINOZOPARAJWA

  • NONI INOITA MUPIRO WO ZVIMACERENI ZVIVIRI KASIKE MUROMBO

Uhwu i hwendo hwa Jesu hwo kupejisira kwenda mu themberi, zve iyena anoenderera mberi eciphetura ujiitisi hwo vatari no vaFarisi, ecivadaninja pakazara vandhu kuti vajiitisi. Ecishandisa magama okufananijira, iyena anoti: “[Imwimwi] munosuka kunja mukheyo no ndiro, kaveta mukati majo makazara ngo kuba no kuemura bzakaxata. Mufarisi uri bofu! Ambai kusuka mukati mo mukheyo no ndiro, kuti kunja kucenevo.” (Mateu 23:25, 26) VaFarisi vanoita zvese zvavanokwanisa kuti vave vakacena kunja, kuitira kuti vavoniwe inga vakacena mukuzwirana no mutemo asi avana basa no magariro avo o mukati zve avatokwanisi kucenesa mwoyo yavo.

Ujiitisi hwavo hunovoneka ngo cido cavo co kuvaka no kusejesa-sejesa makuva o vaporofita. Asi inga zvinonanga Jesu kuti ivona i “vana va vaya vakauraya vaporofeti.” (Mateu 23:31) Izvi zvinonasa kuvoneka ngo madire avo kuuraya Jesu.—Johani 5:18; 7:1, 25.

Ngo kudaro Jesu anovabvunja vetero ro vatungamiriri vo zviara kudari vakatama kukhauya eciti: “Nyoka! Bvumbo ro bvumbi! Munozotizisa kudini kutongehwa nyatwa yo Gehena?” (Mateu 23:33) Gama ro kuti Gehena rinoreva “muterero wo Hinomi.” Muterero uwu waipisihwa zviro. Iwona wainasa kufananijira ushoni kuparajwa kucikaperi kwaivetehwa ngo vatari no vaFarisi vainga vakashata.

Vajiji va Jesu vanozomuimirira inga “vaporofeti, vazivi” no vajijisi vo vandhu vese. Ivona vanozotajiswa kudini? Ecibvunja vatungamiriri vo zviara, Jesu anoti: “Munozouraya mecikohomera pa” mutanda “vamweni vavo [ecinangira vajiji vake], vamweni munozovapsaputa ngo muxakwe mu Masinagoga enyu, mecivateverera nyika no nyika, kuti ngazi yese icina ndava iwire pa musoro penyu, kubvira ngazi ya Abeli wakarungama, mbhera ngazi ya Zakaria . . . wo makauraya.” Iyena anovazivisa kuti: “Ndinomubvunja bzokadi: Bzese ibzi bzinozowira bvumbo iri.” (Mateu 23:34-36) Ndizvona zvakaitika kamare mu gore ro 70 N.V.Y., masoca o kuRoma paakaphwanya Jerusarema, zviuru no zviuru zvo vaJudha zvofa.

Ecirangarira ngo pamusoro po ciitiko ici cinothyisa, Jesu anohwajihwa ndizvona. Akasuruvara, iyena anoti: “Jerusalema, Jerusalema! Unouraya vaporofeti, unofura ngo mapuwe vaya vounotumihwa; mukuvo mungana ndakada kuunganija vana vako inga huku inounganija bzitio bzayo pasi po mapapiro, kaveta wakaramba. Ngokudaro nyumba yenyu inozoxama.” (Mateu 23:37, 38) Vari kupurutana Jesu, zvingaita kuti vainga vecirangarira ngo pamusoro po “nyumba” yainangihwa ndi Jesu. Kureva kuti wainga ecinangira themberi yakaseja yainga ku Jerusarema, yaiita inga yakajivirihwa ndi Mwari?

Ngo kudaro Jesu anoengejera eciti: “Amuzondivonibze mbhera monanga: ‘Ngaasimbwe wiya anoza ngo zina ra Tenji!’” (Mateu 23:39) Jesu ari kunokora masoko o ciporofita ari pana Nduyo 118:26 anoti: “Ngaakomborehwe anoza ngo zina ra Tenji Mwari! Tinomukuja tiri mu nyumba ya Tenji Mwari.” Zviri pambhene kuti themberi kamare ikaparajwa, apana anozoenda kwairi mu zina ra Mwari.

Wari Jesu woenda ku divi rimweni ro themberi kunovigwa mabhokiso o mare. Bhokiso rimwe nga rimwe rino cibovo ngo panyezuru paro kuti vandhu vawisire mare. Jesu anovona vaJudha vazinji veciita zvondhozvovo kamare, vakhupuki vecidira “mare yakawanda” inga zvipo. Ngo kudaro anovona mwanakaji, noni wainga ari murombo maningi, “wodira mare mbiri, inoita mupeni umwe.” (Marco 12:41, 42) Pacina kukana-kana, Jesu anoziva kuti Mwari anodakara ngo cipo co mwanakaji uwu.

Jesu anodaninja vajiji vake woti: “Mwanakaji uu wakafihwa, wadira mu civigiro, mare zinji kupinda  vese.” Kuitisa kudini? Iyena anodurujira eciti: “Vese [vadira] bzaivawandira, kaveta yena, mu utami hwake, wadira bzese bzaainga nabzo, bzaairarama ndibzona.” (Marco 12:43, 44) Marangaririre no maitiro o noni iyi akasiana maningi no marangaririre o vatungamiriri vo zviara.

Yaaphedo no kupera dhiya yo 11 yo mweji wa Nisani, Jesu anobuda mu themberi ko kupejisira. Umwe wo vajiji vake anoti: “Mujijisi! Ringisanyi mapuwe no mavakiro!” (Marco 13:1) Zvokadi mapuwe amweni aivaka mupfimbiji wo themberi, akakura zve aipekeja murangariro wo kuti anozorarama makore akawanda. Ngo kudaro masoko anovereketa Jesu aangambotami kuvakahamaja paanoti: “Unovona nyumba huru iji? Apazosari buwe panyezuru po rimweni, ricikazivi kuphwanyika.”—Marco 13:2.

Pakupera kuvereketa masoko aya, Jesu no vajiji vake vanoambuka Muterero wo Kedhroni vokhwira ku Dundhu ro Maorivhe. Pano nguva yaanombosara no vajiji varongomuna basi: Pedhru, Andereya, Jakobo, na Johani. Vari padundhupo, vanokwanisa kuvona themberi riri ngo pasi kamare ndhambo.