Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 132

“Mbzakadi Mundhu uu Wainga Mwana wa Mwari”

“Mbzakadi Mundhu uu Wainga Mwana wa Mwari”

MATEU 27:45-56 MARCO 15:33-41 LUKA 23:44-49 JOHANI 19:25-30

  • JESU ANOFIRA PA ZIMITI

  • KUNOITIKA ZVIRO ZVINOSHAMAISA PA KUFA KWA JESU

Wari i nguva “yocitandhatu,” kana nguva 12 yo masikati. Cidima cakakura ‘cinofukija nyika yese mbhera ngari yocipfumbamwe,’ nguva 15. (Marco 15:33) Cidima cinothyisa ici aciitiswi ngo ekiripsi yo zuva. Ekiripsi jinoitika mweji ucabva kugara, asi wari i mukuvo wo Phasika, mweji waamukuru. Ciitiko ici cinotora mukuvo wakareba kupinda museswa munganani jinoitika ekiripsi. Ngokudaro, cidima ici cinoitiswa ndi Mwari.

Rangariranyi kuti vaishoraya Jesu vanopsaswa kudini ndizvona. Pa mukuvo wo cidima ici, panoguma vanakaji varongomuna pa danda ro kutambujikira iri. Vanakaji ava ndi mai wa Jesu, Saromee, Maria Madharena na Maria mai wo mupostori mudoko, Jakobo.

Mupostori Johani ana make Jesu, phedo no danda ro kutambujikira. Maria ari kucumba ngokuti ari kuvona mwana waakabara no kumurera akapaikwa pa zimiti acihwajihwa. Kuna Maria, zvinoita inga kuti wabaiwa ngo “banga” rakareba. (Johani 19:25; Luka 2:35) Asi, pikija kuti Jesu ari kuhwajihwa maningi, anorangarira ngo kugara ushoni ka make. Iyena anovangisira kuti asikisire musoro kuna Johani, wobvunja make kuti: “Mwanakaji, nga uu mwana wako.” Perepo, anosikisira musoro kuna Maria, wobvunja Johani kuti: “Nga ava mai wako.”—Johani 19:26, 27.

Jesu ari kupa mupostori waanoda basa ro kukorondha make, zve zvinovoneka kuti vaanoni. Jesu anozviziva kuti hama jake, vana vamweni va Maria, avato vaano gonda kwaari. Ngokudaro, Jesu anoita nasiriro kuti make vakorondhwe ku divi ro kunyama, kubatanijavo no zvinodiwa zvavo zvo kumujimu. Uu i muezaniso wakanaka maningi.

Cidima pocinopera, Jesu anoti: “Ndino nyota!” Iyena anokwanirisa matahwa ngo kunanga kudaro. (Johani 19:28; Nduyo 22:16) Jesu anojizwa kuti Babake avaciripi kumujivirira kuitira kuti kugondeka kwake kuejwe zvakaperera. Kristu kangaije anomima ngo Ciaramaiko cinovereketwa Garireya, aciti: ‘Eli, Eli, lamma sabactani?’ zvinoreva kuti “Mwari wangu, Mwari wangu, mandisia ngenyi?” Vamweni vakaima ngo phedopo vanoshaisha kumuzwisisa, vomimira kuti: “Izwanyi! Ari kudanija Elia.” Umwe wavo anogogoma, wobija gosarinya kana ciponji mu vhinyu inoshasha wocidira pambhiri po sengere, wopa Jesu kuti amwe. Asi vamweni vanoti: “Ngativone dangani Elia anoza komuderusa.”—Marco 15:34-36.

Perepo Jesu anomima eciti: “Bzese bzapera.” (Johani 19:30) Hina, wapeja zvese zvaakatumihwa koita pasi pano ndi Babake. Pakupejisira, Jesu anoti: “Baba, mu nyara menyu ndinopa mwiha wangu.” (Luka 23:46) Ngo kunanga kudaro, Jesu anokhombija kuthemba kuti Jehovha anozomumusa. Ngo kuthemba kwakaperera kuna Mwari, Kristu anokotamisa musoro wake, wofa.

Pa mukuvo uu, nyika inotetemera zve mapuwe anophwanyika. Kutetemera uku kuno simba maningi, koita kuti makuva ari mu Jerusarama afununguke zve mutembo inokhandirika kunja kwao. Vandhu vanopinda vacivona mutembo jiri kunja vanonghwina mu dhorobha, vosumurira vamweni zvovabva kuvona.—Mateu 12:11; 27:51-53.

 Jesu paanofa, nguvo yakareba zve inorema, inokasha Ndau Yakacena no Ndau Yakacenesesa mu themberi ra Mwari, inomweka kubva nyezuru mbhera pasi, kuita matimbu maviri. Ciitiko cinothyisa ici cinovonesa ushungu hwa Mwari kuna vaya vauraya Mwanake zve cinoreva kuti zvokwanisika kunghwina mu Ndau Yakacenesesa, kana kuenda kumatenga.—Vaheberi 9:2, 3; 10:19, 20.

Zvinozwisisika kuti vandhu vari kuthya maningi. Mukuru wo masoca anotungamirira pa kuuraya uku, anoti: “Mbzakadi mundhu uu wainga Mwana wa Mwari.” (Marco 15:39) Kangaije iyena wainga aripo Jesu paaitongwa pambeji pa Pirato, ecibvunjiswa kuti iyena ndi mwana wa Mwari kamare kana kuti haiwa. Wari iyena wazokhohwa kuti Jesu wakarurama zve i mwanadi wa Mwari kamare.

Ngo kuvona ciitiko cikuru ici, vamweni vanohwirira kanyi “vecijirova pa diti” kuitira kuvonesa kukura ko kucumba kwavo no kunyoejeka. (Luka 23:48) Pakati po vari kuzvivona ngo ndhambo, pano vajiji va Jesu vakawanda, vokaji, vakaperekeja Jesu mu mukuvo jimweni. Ivona vari kuhwajihwavo maningi ngo zviitiko izvi zvicikakanganiki.