Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 113

Cijijo ngo Pamusoro po Mufananijo wo Matarenta

Cijijo ngo Pamusoro po Mufananijo wo Matarenta

MATEU 25:14-30

  • JESU ANOITA MUFANANIJO WO MATARENTA

Jesu paanonga aciri pa Dundhu ro Maorivhe no vajiji vake varongomuna, anonangazve mufananijo umweni. Dhiya nganani japerari, paainga ari Jeriko, Jesu wakaita mufananijo wo mamina kuitira kukhombija kuti Umambo huciri ndhambo. Mufananijo waanonangari wakaezana no wo mamina wiya. Iwona unotora rutivi pa mupinguro wake wo mubvunjo ngo pamusoro po kuvepo kwake no kupera ko nyika. Mufananijo uu unokohomejera kuti vajiji vake vanodikana kushanda ngo simba pa basa raakavasiira.

Jesu anoutanga eciti: “Bzinozoitavo inga mundhu wakatikuti, ecida kuronga hwendo, wakadanija varanda vake wovasiira upfumi hwake.” (Mateu 25:14) Zvecivoneka kuti Jesu wakajiezanisa no mundhu wakaita hwendo kuenda ku nyika yo ndhambo “koaxira umambo,” vapostori vanokasika kuzwisisa kuti “mundhu” waanonangari wari ndiena Jesu.—Luka 19:12.

Mundhu wo pamufananijo uu, anosiira varanda vake upfumi hwaanaho acito apinda. Pa makore matatu no padoko o mushando wa Jesu, waibatikana maningi pa kucumaira masoko akanaka o Umambo hwa Mwari no kuroveja vajiji vake kuti vaitevo basa iri. Wari Jesu ari kupinda, ecinyindira kuti vanozoenderera mberi vaciita basa raakavarovejaya.—Mateu 10:7; Luka 10:1, 8, 9; ezanisanyi na Johani 4:38; 14:12.

Pa mufananijo, mundhu uu anokovanisa kudini upfumi hwake? Jesu anoti: “Wokutanga wakapuwa matarenta maxanu, umweni maviri, wocitatu rimwe, kudari ngo kukwanisa ko umwe nga umwe. Kuperapo wakapinda.” (Mateu 25:15) Varanda ava vanozoitenyi no upfumi hwovapuwari? Vanozovangisira kuti vaite zvinodakajisa tenji wavo here? Jesu anoenderera mberi ecidurujira vapostori vake.

Iyena anoti: “Wiya wakaaxira matarenta maxanu wakamabatisa woviihwabze ngo maxanu. Ngo maitiro ondhoo, wainga akaaxira maviri wakaviihwavo ngo maviri. Kaveta wainga wakaaxira rimwe rega, wakaca rindi wofuxira mare ya tenji wake.” (Mateu 25:16-18) Waro zvicinyi zvinozoitika paanozoviya tenji?

Jesu anoenderera mberi aciti: “Sure ko ngari zinji, wakavia tenji wo varanda vaya, wokumbira kuverengerana.” (Mateu 25:19) Vaviri vokutanga vakaita zvese zvovaikwanisa, “kudari ngo kukwanisa ko umwe nga umwe.” Muranda umwe na umwe wakavangisira, kuitira kuti matarenta aakapuwa awande. Wakaashira mashanu wakawanazve mashanu, wo maviri vakawanazve maviri. (Pa mukuvo wondhowo, mundhu waidikana kushanda makore 19 kuti awane tarenta rimwe.) Tenji wakavasimba ngo nyira yakafanana, eciti: “Wabziita, muranda wauxoni, anopurukira; wakapurukira ngo bzixomani, ndinokudira  pambeji po bzizinji. Nghwinai mu rudakaro hwa tenji wako.”—Mateu 25:21.

Asi, andizvopi zvinoitikavo ku muranda wakaashiraya tarenta rimwe. Muranda uu anoti: “Tenji, ndinoziva kuti muri mundhu wokucunga mwoyo: munokotora pomucingazivi kukusa, munounganija pomucingazivi kumwaraja. Ngo kuthya, ndakaenda koviga pasi tarenta renyu. Ngauu mutengo wenyu.” (Mateu 25:24, 25) Muranda uu, nee aazivi kovigisa mare iyi ku bhanko kuitira kuti ibare imweni, azoipe tenji wake. Iyena wakaita zvinohwisana no zvinoda tenji wake.

Pakupejisira, tenji vanomunanga kuti i “muranda wakaxata, ano nungo.” Iyena anotorehwa tarenta raainga naro ropuwa muranda ano cido co kushanda ngo simba. Tenji uu anodira mutemo eciti: “Ndiani ano bzizinji anozopuwa bzakawanda eciva no bzizinji. Kaveta wiya acina, anozotohwavo no bzixomani bzake.”—Mateu 25:26, 29.

Vajiji va Jesu vaano zvakawanda zvokurangarira, maningi-ningi ngo mufananijo uu. Ivona vanokwanisa kuvona kuti Jesu ari kuvapa—rudakajiso hwo kuita vajiji—huno mutengo mukuru maningi. Iyena anonyindira kuti vanozovangisira maningi pa kuita basa iri. Jesu aaveteri kuti vese vanodikana kuita basa ro kucumaira raakavapari ngo njira yakaezana. Inga zvafananijihwa, vanodikana kuriita “kudari ngo kukwanisa ko umwe nga umwe.” Izvo azvirevi kuti Jesu anodakajihwa ngo mundhu ano “nungo” zve anoregera kuita mbhera panoperera simba rake kuti aite zvinodakajisa tenji wake.

Vajiji vanodakara maningi povanothembeswa kuti, “ndiani ano bzizinji anozopuwa bzakawanda.”