Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 104

VaJudha Pavanozwa Izwi ra Mwari, Vanozova no Rutendo Here?

VaJudha Pavanozwa Izwi ra Mwari, Vanozova no Rutendo Here?

JOHANI 12:28-50

  • VAZINJI VANOZWA IZWI RA MWARI

  • ZVINOZOSHANDISWA PA KUTONGA VANDHU

Maa Muciposa dhiya yo 10 ya Nisani, zve Jesu ari mu themberi ecibhuya ngo rufu hwake huri kukhwedera. Ecirangarira ngo pamusoro po mapsasire azvinozoita zina ra Mwari, iyena anoti: “Baba reremejanyi [kana kujanyi] zina renyu.” Izwi rinosimba rakazika recibva ngo kudenga reciti: “Ndakarireremeja, ndozorireremejabze.”—Johani 12:27, 28.

Vandhu vari ngo phedopo vanobararika hwiru ngo ciitiko ici. Vamweni vanonanga kuti vazwa mbheni. Vamweni vanoti: “Ndhumwa [kana ngirozi] yakavereketa naye.” (Johani 12:29) Asi ndi Jehovha wavazwaro ecivereketa. Zve asipi ko kutanga vandhu kuzwa izwi ra Mwari ecibhuya ngo pamusoro pa Jesu.

Makore matatu no meya, pakubhabhatijwa kwa Jesu Johani Mubhabhatiji wakazwa Mwari ecinanga kuti: “Nga uu mwana wangu anodikana, wiya anondidakajisa.” Nguva yakazotevera pasure po Phasika yo gore ro 33 N.V.Y., Jakobo, Johani na Pedhru, vakavona kupinduka kwa Jesu. Vanarume vatatu ava vakazwa Mwari ecinanga kuti: “Nga uu mwana wangu wokudikana, wondakadira rudakaro hwangu hwese. Mupurukirenyi.” (Mateu 3:17; 17:5) Asi wari, Jehovha paanovereketa hwo citatu uhwu, vazinji vanozvizwa.

Jesu anoti: “Izwi iri arizivi kuzika ngo njio yangu, kaveta ngo njio yenyu.” (Johani 12:30) Ici i citatijo cokuti iyena ndi Mwana wa Mwari, Mesia wakagondeswa.

Kunja kwa izvi, mararamire a Jesu anopekeja muezaniso wo mararamire anodikana kutevejehwa ngo vandhu, zve anovonesa kuti Sathana Dhiabhu, mutongi wo nyika ino, anofanira kuparajwa. Jesu anoti: “Ndi bzino kutongwa ko nyika. Bzino mambo wo nyika anokhandihwa kunja.” Kufa kwa Jesu kuri kukhwedera asipi kunyiswa asi kwainga kuwina. Kuitisa kudini? Iyena anoti: “Inini ndikazomuswa pasi pano, ndinozokwevera vandhu vese kondiri.” (Johani 12:31, 32) Ngo njio yo rufu hwake, Jesu anozokwevera vamweni kuti vaviye kwaari, ecifunungura gwanja ro upenyu hucikaperi.

Mbungano yecipingura zvainga zvananga Jesu ngo pamusoro po ‘kuzomuswa,’ inoti: “Itusu takajija Mupango, kuti Kristu anozogara acingaperi. Munonangisa kudini kuti Mwana wo mundhu anozopakaikwa? Ndiani Mwana wo mundhu?” (Johani 12:34) Pikija no ucapupu hwese uhu, kubatanija no kuzwa izwi ra Mwari, vazinji vavo avazivi kudavira kuti Jesu wainga Mwana wokadi-kadi wo mundhu, Mesia wakagondeswa.

Jesu anojiezanisa pacake no “ruveneko,” inga zvaakamboitaya. (Johani 8:12; 9:5) Jesu anobvunja mbungano kuti: “Pangari shomani ruveneko huri pakati penyu. Fambanyi mucinaho ruveneko, kuti mucawanika ngo cidima: . . . Apo mucinaho ruveneko, tendanyi ruveneko, kuti muzove vana vo ruveneko.” (Johani 12:35, 36) Perepo Jesu wofindara, zvecivoneka kuti ngo kuti mu dhiya 10 ya Nisani asipi dhiya yaanodikana kufa ndiyona. Iyena “anozopakaikwa” mu dhiya 14 ya Nisani, wokohomehwa pa muti.—VaGalàsia 3:13.

Kudari tikasotesesa zvainga zveciitika mu mushando wa Jesu, tinoenda kovona kuti kutama kutenda kwaiithwa ngo vaJudha, zvainga zvecizajisa ciporofita. Isaia wakaporofita kuti meso o vandhu aizoita mapofu zve kuti vaizovoma mwoyo kuti vatame kutendeuka kuti varapike. (Isaia 6:10; Johani 12:40) VaJudha vazinji vanoramba kamare ucapupu hwo kuti Jesu ndiyena Muponesi wakagondeswa, gwanja ro ku upenyu.

Nikodhemo, Jasefa wo ku Arimateya no vatungamiriri vo ciJudha ‘vakatenda kamare’ Jesu. Kureva kuti ivona vanozokhombijira kuti vano rutendo here? Kana kuti avazozviiti ngo kuthya kugogomehwa mu sinagoga, no ‘kudisisa maningi goja ro vandhu’?—Johani 12:42, 43.

 Jesu pacake anodurujira zvinoreva kuva no rutendo eciti: “Ndiani anonditenda, aatendi inini, anotenda wiya wakandituma.” Cokwadi cakabvunjwa Jesu ndi Mwari kuti acijijise pomwe no caari kucumaerari, cinosisira maningi zvokuti iyena wakati: “Uwo anondiramba acingapurukiri mazwi angu, aripo anozomutonga: Izwi ro ndakatokotesaro rinozomutonga mu njiku yo kupejisira.”—Johani 12:44, 45, 48.

Perepo Jesu anopejesa eciti: “Andizivi kuvereketa ngo cangu. Ndivona kamare baba vakandituma vakandibvunja zvondinoda kuvereketa no kujijisa. Inini ndinoziva kuti mupango wavo ndihwona uhomi hucingaperi.” (Johani 12:49, 50) Jesu anoziva kuti anozodurura ngazi yake inoponesa ecijipira kuna vayani vanova no gonda.—VaRoma 5:8, 9.