Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 136

Mumbhiripiri mo Jombe ro Garireya

Mumbhiripiri mo Jombe ro Garireya

JOHANI 21:1-25

  • JESU ANOBUDIRA KU JOMBE RO GARIREYA

  • PEDHRU NO VAMWENI VANOZOHAVISA MABVUTA

Pa usiku hwo kupejisira hwa Jesu no vapostori vake, iyena wakati kovari: “Kaveta sure ko kumuka po vakafa, ndinozomutungamirira kuenda Galileya.” (Mateu 26:32; 28:7, 10) Wari vateveri vake vazinji vanoita hwendo kuenda Garireya. Vanoenda koitenyi?

Pa mukuvo umweni vari kondhoyo, Pedhru anobvunja vapostori vatandhatu kuti: “Ndinoenda kotanda.” Ivona vanoti: “Na itisuvo tinoendavo newe.” (Johani 21:3) Ivona avabati ciricese pa usiku hwese. Pakunoeja, Jesu anobuda mumbhiripiri mo jombe, asi ivona avamuzivi kuti ndiani. Jesu anomimira eciti: “Majaha, muno ciricese co kuha?” Ivona vanoti: “Atina.” Jesu anoti: “Wisiranyi juya ngo divi ro mukono muho ro ngarava, munozobata.” (Johani 21:5, 6) Ivona vanobata hove jakawanda maningi, vokonehwa kukweva juya ravo.

Johani anobvunja Pedhru kuti: “Ndi Tenji!” (Johani 21:7) Pedhru anosimira nguvo yake yokunja, yaacaisimira paaitanda. Iyena anophukira mukumwa, wosambira pa 90 o metro mbhera kumutundhu. Vamweni vanomutevera padoko-padoko ngo ngarava, vacikweva juya rakazara ngo hove.

Povanoceva, vanovona “masimbe ecibwaka, no hove panyezuru pao, no mukate.” Jesu anoti: “Vianyi no hove jo mabataro.” Pedhru anokweva juya rino hove huru jinokwana kuita 153! Jesu anoti: “Vianyi moha.” Apana na umwe wavo ano cicunge co kumubvunjisa kuti “ndimwi ani?” ngokuti vamuziva kuti ndi Jesu. (Johani 21:10-12) Uhu i hwendo hwocitatu hwaanobudira vajiji vake vakaungana kuita cikwata.

Jesu anopa umwe na umwe wavo pau no hove kuti vahe. Waro, kangaije anosota hove jovabataro, wobvunjisa kudari: “Simoni, mwana wa Johani, unondida kupinda” iji? Kunanga kuti Pedhru anoda maningi basa ro kutanda kupinda basa rinodari Jesu kuti aite here? Pedhru anoti: “Hina, Tenji, munobziziva kuti ndinomuda.” Jesu anomuvangisa kuti: “Havisai bzimabvuta bzangu!”—Johani 21:15.

Jesu anomubvunjisazve ngopapsa kuti: “Simoni, mwana wa Johani, unondida?” Kangaije ecikahamara, Pedhru anodavira ngo mwoyo wese kuti: “Hina, Tenji, . . . munoziva kuti ndinomuda.” Jesu anomubvunjazve zvondhozvo kuti: “Havisai bzimabvuta bzangu.”—Johani 21:16.

Jesu anobvunjisazve hwocitatu kuti: “Simoni mwana wa Johani, unondida?” Kangaije Pedhru angajibvunjisa kuti dangani Jesu ari kukana-kana kugondeka kwake. Pedhru anovangirira eciti: “Tenji! Munoziva bzese. Munoziva kuti ndinomuda.” Jesu anokohomejerazve zvinodikana kuitwa ndi Pedhru, eciti: “Havisai mabvuta angu.” (Johani 21:17, 18a) Zvokadi kamare, vanotungamirira vanodikana kushandira vanonga vaviiswa ndi Mwari mu phandu rake.

Jesu wakasungwa no kuurawa ngokuti waiita basa raakagajwa ndi Mwari. Wari Jesu anokhombija Pedhru kuti anozoitikihwavo ngo zvakafanana, eciti: “Uciri mujaha, waisimira wega, woenda kowaida. Ukazoita harahwa, unozotambaraja nyara, umweni anozokusimija, wokuendesa ko ucikadi.” Pikija zvakadaro, Jesu ari kumuvangisa kuti agare ‘ecimutevera.’—Johani 21:18, 19.

Pedhru anovona Johani, wobvunjisa kudari: “Tenji, uu anozodini?” Iyena ari kuda kuziva kuti kumbeji ko mupostori uu anodiwaya maningi ndi Jesu kunozova kwakadini. Jesu anoti: “Inini ndikada kuti asare mbhera ngo kuvia kwangu, iwewe unenyi nabzo?” (Johani 21:21-23) Pedhru anodikana kutevera Jesu acikakayakayi ngo zvinoita vamweni. Pikija zvakadaro, Jesu anokhombija kuti Johani anozorarama maningi kupinda vapostori vamweni zve anozova no civoniso co kuviya ka Jesu mu simba ro Umambo.

Zvokadi kamare, zviro zvakaitwa ndi Jesu zvakawanda maningi, zvokuti azvikwanisiki kutara zvese mu muphukutu.