Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 119

Jesu—I Gwanja, I Cokwadi no Upenyu

Jesu—I Gwanja, I Cokwadi no Upenyu

JOHANI 14:1-31

  • JESU ANOENDA KONASIRIRA NDAU

  • IYENA ANOGONDESA KUPEKEJA VAJIJI VAKE MUBESERI

  • BABA MUKURU KUPINDA JESU

Jesu no vapostori vake vaciri mumba mavahiraya cirangarijo. Zve wari anovavangisa eciti: “Mucarangarija mu mwoyo menyu. Tendanyi Mwari tendanyivo inini.”—Johani 13:36; 14:1.

Jesu anopekeja thangwe rinoitisa kuti vapostori vake vakagondeka vatame kuthimwa-thimwa ngo kupinda kwake, eciti: “Pa muzi pa Baba wangu pano nyumba zinji. . . . Sure ko kuenda no kutojanisira ndau, ndinozoviabze komutora; kuti kwapi kondinogara, na imwimwivo muzogarevo. Kondinoenda, gwanja rinogumeyo, munoriziva uxoni.” Tomasi anobvunjisa kuti: “Tenji, atikuzivi ko munoenda, tinorizivisa kudini gwanja?”—Johani 14:2-5.

Jesu anopingura eciti: “Ndini gwanja, bzokadi no uhomi.” Kuti mundhu anghwine mu nyumba yo kudenga ya Baba wake, anodikana kuashira Jesu no jijiso jake pomwe no kutevejera mararamire ake. Iyena anoti: “Apana anokwanisa kuenda kuna Baba acikapindi ndini.”—Johani 14:6.

Firipi ari kunasa kupurutana zviri kunanga Jesu, anokumbira kuti: “Tenji, titatijenyi Baba, zvinokwana kotiri.” Zvinoita inga kuti Firipi ari kuda kuvona citatijo cimweni cinovonesa kuti Mwari ario, inga zvaimboitikaya na Mosi, Eria, na Isaia. Asi vapostori vano ciro cinopinda zvivoniso basi. Jesu anogogomejera ciro ici eciti: “Filipi! Ndakagara na imwimwi ngari zinji. Iwewe auto wandiziva? Ndiyani anondivona, anovonavo Baba.” Jesu anonasa kukhombijira ushoni magarire akaita Babake, ngo kudaro kurarama na Jesu kuri kumusota zvakatojana no kuvona Baba. Ndizvona kuti Baba vakasiana no Mwana, ngo kuti Jesu anoti: “Mazwi o ndinomubvunja, andimarevi ndega.” (Johani 14:8-10) Vapostori vanozwisisa kuti Jesu ari kutatija kuti zvese zvaanojijisa zvinobva kuna Babake.

Vapostori va Jesu vakavona mabasa ake anoshamisa zve vakamuzwa ecizivisa masoko akanaka o Umambo hwa Mwari. Wari iyena anovabvunja kuti: “Ndiani anonditenda anozoitavo mabasa o ndinoitari. Anozoitavo amweni makuru kupinda  aya.” (Johani 14:12) Jesu aaripi kureva kuti ivona vaizoita mushamaiso jinopinda jaakaita iyena. Asi ari kureva kuti ivona vaizocumaera ko mukuvo wakareba vecigumira mbhera ndau jo ndhambo no vandhu vakawanda maningi.

Jesu akapinda, ivona avazosari vega, ngo kuti iyena anogondesa kuti: “Bzese bzo munondikumbira ngo zina rangu, ndinozobziita.” Kusiapo izvo iyena anoti: “Inini ndinozokumbira Baba. Ivona vanozomupa muembejeri umweni, kuti agare nemwi mukuvo ucikaperi: Mujimu wo bzokadi.” (Johani 14:14, 16, 17) Iyena anovagondesa kuti vanozoashira mubeseri, kureva mujimu mucena. Izvi zvinozoitika pa dhiya yo pentekoste.

Jesu anoti: “Mukuvo padoko, nyika yo pasi aizondivoni. Imwimwi munozondivona, ngokuti inini ndinopona, imwimwivo munoponavo.” (Johani 14:19) Pasure po kumuswa Jesu anozoenda kuvapostori vake ano muviri wo kunyama, zve pa kufamba ko nguva, anozovamusa kuti vanghwine vese mugore inga zvisikwa zvo kumujimu.

Wari Jesu anonanga cokwadi cimweni cakajeka maningi eciti: “Ndiani anopurukira mupango yangu no kuiteveja, ngaanondida bzokadi. Wiya anondida, anozodihwa ndi Baba wangu. Inini ndinozomuda no kujivonesa kwaari.” Ngo kudaro, mupostori Jakobo anombodaninjwaya kuti, Tadheu, anobvunjisa kuti: “Tenji, munojivonesa kudini kotiri, motama kujivonesa ku vandhu vese?” Jesu anopingura kuti: “Kudari mundhu akandida anozongwarira mazwi angu; Baba wangu vanozomuda; . . . Kaveta ndiani anotama kundida, aapurukiri mazwi angu.” (Johani 14:21-24) Mukusiana no vateveri vake, nyika aivoni kuti Jesu i gwanja, i cokwadi no upenyu.

Jesu paanopinda, vajiji vake vanozoceukijisa kudini zvese zvavakajijiswa ndiyena? Jesu anodurujira kuti: “Mujimu mucena, wiya unozotumwa ndi Baba ngo zina rangu, ndiwona unozomujijisa bzese, no kumuceukija bzese bzondakamujijisa.” Vapostori vakavona simba rino mujimu mucena. Izvi zvinoitisa kuti cigondiso ca Jesu cive cinonyaraja kamare. Jesu anoengejera eciti: “Ndinomusiira runyararo, ndinomupa runyararo hwangu. . . . Mwoyo yenyu icathimwathimwa no kuremba.” (Johani 14:26, 27) Vajiji vanomathangwe akanaka kuti vatame kuthimwa-thimwa ngo kuti vaizoashira mutungamiriri no mujiviriri wa Baba va Jesu.

Jiviriro ya Mwari yaizovoneka ngo kukasika. Jesu anoti: “Mambo wo nyika ari kuza. Ngo bzokadi akuna caanokwanisa kondiri.” (Johani 14:30) Sathana wakakwanisa kubata Judha kakumushandisa. Asi zvecivoneka kuti Jesu i mundhu wakakwana, zve aana paakarembera, pangashandiswa ndi Sathana kuti amupause pa kushandira Mwari. Ngenyi? Jesu anoti: “Inini [ndinoita] bzo ndakatumwa ndi Baba.” Iyena anoziva kuti Baba vake vanozomumusa.—Johani 14:31.