Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 125

Jesu Anoendeswa ka Anasi Ozoendeswazve ka Kaifasi

Jesu Anoendeswa ka Anasi Ozoendeswazve ka Kaifasi

MATEU 26:57-68 MARCO 14:53-65 LUKA 22:54, 63-65 JOHANI 18:13, 14, 19-24

  • JESU ANOENDESWA KA ANASI WAIMBONGA MUPIRI MUKURU

  • SINEDHRIO INOGAJA BANJE RICIRIPI RO PAMUTEMO

Pasure po kusungwa inga mushaishi, Jesu anoendeswa ka Anasi. Jesu paainga aciri mwana mudoko, paakasiaya muromo yo madhodha o vandhu yakati, khangara, mu themberi, Anasi wainga ecishanda inga mupiri mukuru. (Luka 2:42, 47) Vana vamweni va Anasi vakazoshandavo inga vapiri vakuru, asi wari, Kaifasi, mukwambo wake ndiyena ari kushanda inga mupiri mukuru.

Jesu paanonga ari pamuzi pa Anasi, Kaifasi wainga no nguva yo kuronga banje ro Sinedhrio. Banje iri raiumbhwa ngo vandhu vanokwana 71, kubatanija mupiri mukuru no vaimbonga vapiri vakuru.

Anasi anobvunjisa Jesu ngo pamusoro po “vajiji vake no majijisiro ake.” Jesu anomukira kupingura kuti: “Ndakavereketa pambhene, panyasi po vese. Ndakajijisa nguva yese mu masinagoga no mu Nyumba ya Mwari, mo vanoungana va Juda vese. Andizivi kuvereketa ciro ngo cifise-fise. Unondibvunjisa ngenyi inini? Bvunjisai vaya vakazwa bzo ndakananga.”—Johani 18:19-21.

Murindiri umweni wainga phedo na Jesu anomubofutiari ecinanga kuti: “Unodavira kudaro ku mupiri mukuru?” Jesu anozviziva kuti aazivi kushaisha ciro. Ngo kudaro anonanga kuti: “Dangani [ndaposa] kuvereketa, nditatijenyi kuposa kwangu. Kaveta, kudari ndananga bzakanaka unonditakirenyi?” (Johani 18:22, 23) Perepo Anasi anomuendesa ku mukwambo wake, Kaifasi.

 Pa mukuvo uwu, vese vanoshanda mu Sinedhrio; kubvira mundhu ari kushanda inga mupiri mukuru wari, vakuru-kuru vamweni pomwe no vatari, vapera kuungana pamuzi pa Kaifasi. Kwainga kuposa mutemo kutonga shwiro yakadari mu usiku hwo Phasika, asi ivona avazivi no kuzvirangarira, vakaenderera mberi no ushati hwavo.

Munorangarira kuti banje iri rinoda kutongesa kudini Jesu? Rangariranyi basi, Jesu paakamusa Razaro, banje ro Sinedhrio rakasunga kumuuraya. (Johani 11:47-53) Azvina dhiya mbiri ndhatu, vatungamiriri vo zviara voozwiranaya kusunga Jesu kuti vamuurae. (Mateu 26:3, 4) Zviri pambhene kuti waapagwanja ro kufa dare ricito ratonga.

Kunja ko kuronga banje riciripi ro pamutemo iri, vapiri vakuru no vamweni vo mu Sinedhrio vanopsaka zvapupu zvo kunyepa kuti vawane mathangwe o kupumbhwa kwa Jesu. Ivona vanowana vandhu vakawanda maningi, asi ivona vanopupurira zviro zvakasiana. Pakupejisira vaviri vanobudirira vonanga kuti: “Takamuzwa ecinanga kuti: ‘Inini ndinozophwanya Nyumba ii ya Mwari yakavakwa ngo nyara jo vandhu, pakupera ko njiku ndhatu ndinozovaka imweni icingavakiki ngo nyara jo vandhu.’” (Marco 14:58) Asi vandhu ava avatenderani mu zvese.

Kaifasi anobvunjisa Jesu kuti: “Audaviri ciro? Cinyi [kana unoti kudini, ngo ciro] ico co vanokurevera ava?” (Marco 14:60) Jesu anonyararisa pamberi po ucapupu hwo kunyepa hwo vandhu vaciripi kuwirirana ngo cavo. Ngo kudaro, Kaifasi, mupiri mukuru, anorangarira zano rimweni.

Kaifasi anozviziva kuti vaJudha avadi kuzwa gama ro kuti ndiri Mwana wa Mwari. Jesu paakambodaninja Mwari kuti Baba, vaJudha vainga voda kumuuraya, vecinanga kuti ‘ari kujiezanisa na Mwari.’ (Johani 5:17, 18; 10:31-39) Eciziva mavonero o vaJudha pa shwiro iyi Kaifasi anoeja kubwatija muriro ngo kumukumbira kuti: “Ndinokupikisa mu zina ra Mwari anopona, kuti tibvunjei dangani iwewe ndiwe Kristu Mwana wa Mwari!” (Mateu 26:63) Jesu wainga ananga kare kuti iyena ndi Mwana wa Mwari. (Johani 3:18; 5:25; 11:4) Akambhera ngo kunyarara zvinoita inga ari kuramba kuva Mwana wa Mwari zve Kristu. Ngo kudaro Jesu anoti: “Ndini kamare. Munozovonavo Mwana wo mundhu akagara pa mukono muho wo Simba ra Mwari no kuvia pa makwiti o mugore.”—Marco 14:62.

Paanozwa izvi, Kaifasi anomwesa nguvo yake kuitira kuti vandhu vavone inga kuti iyi ndiyona shwiro huru yakona, perepo wodaninjira eciti: “Watuka Mwari. [Tinoda kuvaitenyizve] . . . vasadombo vamweni? Mapera kuzwa kutuka Mwari. Munorangarira cinyi?” Banje ro Sinedhrio rotema civaringo cicizivi kurungama, veciti: “Anofanera kufa!”—Mateu 26:65, 66.

Ngo kudaro vanotanga kutamba ndiyena vecimudira zvibhakera. Vamweni vanomubofutiari no kumupfirira kumeso. Pavaimufukija kumeso vecimutaka, vaimuseka veciti: “[Femberai] ndiani wakutaka?” (Luka 22:64) Ngo kudaro Mwana wa Mwari anotambujwa pa banje riciripi ro pamutemo raithwa co usiku!