Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 103

Themberi Rinoceneswazve

Themberi Rinoceneswazve

MATEU 21:12, 13, 18, 19 MARCO 11:12-18 LUKA 19:45-48 JOHANI 12:20-27

  • JESU ANOTUKA MUKUYU ZVE ANOCENESA THEMBERI

  • JESU ANODIKANA KUTI AFE KUTI APONESE VAZINJI

Jesu no vajiji vake vanoita usiku hutatu vecivata mu Bhetania kubvira pavakaguma ku Jeriko. Ngo Muciposa co dhiya yo 10 ya Nisani, ivona vanofumirisa vecienda ku Jerusarema. Jesu ari kuzwa njara. Ngo kudaro paanovona mukuyu, anoendeyo kopsaka makuyu. Wakamawanemo here?

Wari tiri kumbhiri ko mweji wa Soka ra Baba, makuyu anotanga kuibva mu mweji wa Nyaonga. Pikija zvakadaro, mukuyu uwu wakasika kupfikitira. Jesu paanovona kupfara ko muti uwu wakarangarira kuti maano makuyu. Anokhanda nee rimwe haro. Kupfara uku kwainga ko ciphameso. Ngo kudaro Jesu anoti: “Akunabze anozoha micero yako!” (Marco 11:14) Mukuyu wakamukira kuomerepo. Zvaireva ciitiko ici, zvinozodurujihwa mangwana comangwanani.

Avazivi kutora nguva maningi, Jesu no vajiji vake vanoguma ku Jerusarema. Iyena anoenda ku themberi, kwaaingaya zuro eciringa-ringa, ecisota zviro zvainga mu themberi. Nyamasi aasoti basi zviro zviri mu themberi. Anoita zviro zvakatojana no zvaakamboita ku makore matatu akapera, pa phasika yo gore ro 30 N.V.Y. (Johani 2:14-16) Wari Jesu anogogomera “vese vaitengesa no kutenga mukati mayo.” Zve anovinduja “matafura o vatenganisi vo mare no matarimba o vatengesi vo njiva.” (Marco 11:15) Anorambija no kugurisira ngo paruvanje po themberi, vakathwara zvirozvo kwenda nazvo divi rimweni ro dhorobha.

Ngenyi Jesu anokasika kugogomera vaicinjisa mare no kutengesa zvinyama mu themberi? Iyena anoti: “Akuzivi kutahwa kuti ‘Nyumba yangu inozoita nyumba yo munamato yo mabvumbo ese?’ Kaveta imwimwi makaiphinduja kuita bambha ro mbava.” (Marco 11:17) Iyena anodaninja vandhu ava kuti imbabva ngo kuti ivona vaicaja mare yakawanda maningi kuna vayani vaidaya kutenga zvinyama zvokuita mupiro. Pamberi pa Jesu, izvi zvaireva kuba.

Zviri pambhene kuti kubvira ku vapiri vakuru, vatari no vatungamiriri pavaivona Jesu eciita izvi vaiengejera mathangwe avo o kumuuraya. Asi ivona vanocineso. Ivona avaripi kuwana manera o kumuuraya ndiwona, ngo kuti vandhu vanoungana kuti vazwe zvaari kuvereketa.

Kubvira ku vaJudha vo kunyama no vaciripi vaJudha, asi vakatendeuka vova mu ciara co ciJudha, vanoviyavo ku Phasika. Vamweni vavo i vaGiriki vaviya kuzonamata pa mabiko aya. VaGiriki ava vanopsaka Firipi, kangaije ngo ndava yo kuti ano zina ro ciGiriki, vomukumbira kuti vavonevo Jesu. Zvingaita kuti Firipi wainga acina cokwadi kuti zvavaidari zvinotendehwa kana kuti haiwa. Ngo kudaro anobhuya na Andereya. Vovaviri vanoenda no shwiro iyi kuna Jesu, kangaije anonga ari muthemberi.

Jesu anoziva kuti anofa mukati mo dhiya nganani zve kuti aicaingepizve nguva yo kudakajisa vandhu vari kuda kuziva ngo zvake nee aicaingepi nguva yo kupsaka kuti azivike ngo vandhu. Iyena anodavira vapostori vaviri vaya ngo muezaniso unoti: “Yaguma nguva yokuti Mwana wo mundhu akojwe. Ndinomubvunja bzokadi: mbeu inokhandihwa pasi ikatama kufa, inosara yoga kamare; kaveta ikafa inobara mbeu zinji.”—Johani 12:23, 24.

Mucece umwe basi wo trigu unoita inga ucikasisiri. Manji mukambhera ngo kuufushira ‘wofa’ ukamera, iwona ungapfikitira no kufamba ko nguva, unoita zidavi rakazara ngo mucece. Inga mucece umwe basi, Jesu ndi umwe basi, mundhu umwe basi wakakwana. Ngo kuramba akagondeka mbhera pa kufa, iyena anova njira yo kupekeja upenyu ucikaperi ku vandhu vakawanda vanojipira inga ndiyena. Ngo kudaro Jesu anoti: “Ndiani anodisa uhomi hwake, anohuruza. Ndiani anohunyenya mukuvo uu wari, anozohuviga mbhera ku kurarama kucingaperi.”—Johani 12:25.

 Jesu aaripi kurangarira ngo zvake basi paanoti: “Ndiani anoda kundishandira, ngaanditevere. Pondiri ndipona panozovavo mubatiri wangu. Wiya anondibatira, anozoreremejwa ndi baba wangu.” (Johani 12:26) Mupfupo wakadini! Vanoreremejwa ndi Baba vanozotonga pamwepo na Kristu mu Umambo.

Ecirangarira dambujiko raari kuda kusongana naro no rufu hunohwaja maningi, Jesu anoti: “Wari mwoyo wangu wakacamwa ngo kuthya. Ndinonangenyi? Baba, ndiponesenyi mu mukuvo uu. Kaveta ndaguma mbhera wari ngo ndava yondhoyo.” (Johani 12:27) Jesu anotenderana no zvese zviri mu cidisiso ca Mwari kubatanija rufu hwake hwo muripo.