Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 114

Kristu Anotonga Mabvuta no Mbuji

Kristu Anotonga Mabvuta no Mbuji

MATEU 25:31-46

  • JESU ANOITA MUFANANIJO WO MABVUTA NO MBUJI

Jesu ari pa Dundu ro Maorivhe zve wabva kuita mufananijo wo gumi ro mbhandwe no wo matarenta. Waro anopejisisa kudini mupinguro wake ku mubvunjo wo vapostori ngo pamusoro po citatijo co kuvepo kwake no cokupera ko nyika? Anoupejisa ngo kuita mufananijo wo mabvuta no mbuji.

Jesu anotanga ngo kunanga zvinozotungamira kuitika, aciti: “Akazovia Mwana wo mundhu ngo goja rake, pamwepo no ngirozi jake jese, anozogara pa cigaro co goja rake.” (Mateu 25:31) Jesu aasiyi kukana-kana kuti ari kujibhuya ega pa mufananijo uu. Iyena kazinji anojidanija kuti “Mwana wo mundhu.”—Mateu 8:20; 9:6; 20:18, 28.

Zvinonangwari pa mufananijo uu zvinozoitika rini? Zvinozoitika akazoviya mu “goja rake” no ngirozi, akagara pa “cigaro co goja rake.” Iyena wakanangazve ngo pamusoro po “Mwana wo mundhu ecivia panyezuru po makwiti o mugore no simba guru no goja” no ngirozi jake. Izvo zvinozoitika rini. ‘Pasure po dambujiko.’ (Mateu 24:29-31; Marco 13:26, 27; Luka 21:27) Ngokudaro, mufananijo uu unozokwanirisika kumbejiyo, Jesu paanozoviya mu goja. Waro anozoitenyi?

Jesu anodurujira kudari: “Akazovia Mwana wo mundhu . . . , mabvumbo ese anozoungana pa nyasi pake. Yena anozokheta vamweni no vamweni, inga muhavisi anokheta mabvuta no mbuji. Wozodira mabvuta pa mukono muho, mbuji pa mukono boxe.”—Mateu 25:31-33.

Mabvuta anomadira ku mukono muho, kukhombija kuti anomada. Jesu anoti: “Pondhopo Mambo anozobvunja vari mu mukono muho kuti: Izanyi, vokudikana ndi Baba wangu. Axiranyi Umambo hwakanasirihwa ngo njio yenyu kubvira kuruhwa ko nyika.” (Mateu 25:34) Ngenyi mabvuta anodiwa ndi Mambo?

Mambo anoti: “Ndainga no njara makandipa  bzokuha; ndainga no nyota makandipa kumwa; ndainga mufambi makandiaxira; Ndainga mitu makandisimija, ndaihwara makandivona; ndainga mu gunia makandifambira.” Mabvuta aya, “vakarungama,” povanozobvunjisa kuti takakuitira zviro zvakanaka ngo njira yapi, mambo anovadavira kuti: “Ngari yese, yo makabziita ku umwe wo hama jangu doko iji, makabziitira inini.” (Mateu 25:35, 36, 40, 46) Zviito zvakanaka izvi avazviitiri kumatenga, ngokuti kondhoyo akuna vandhu vanohwaja kana vano njara. Zviito zvakanaka izvi zvinoitihwa hama ja Kristu jiri panyika pano.

Waro tingativo kudini ngo mbuji jinodihwaya ku mukono boshwe? Jesu anoti: “Sure kwabzo [Mambo] anozobvunja vo mukono boxwe kuti: ‘Ibvanyi kondiri, vakaxata; muende ku muriro ucikaperi, wakanasirihwa Sathana no ngirozi jake. Ngokuti ndainga no njara amuzivi kundipa bzokuha, ndainga no nyota amuzivi kundipa kumwa. Ndainga mufambi amuzivi kundiaxira, ndainga mitu amuzivi kundisimija, ndaihwara no kusungwa mu gunia amuzivi kuza kondivona.’” (Mateu 25:41-43) Mbuji jinofaneradi kutongwa kudaro ngokuti ajizivi kutaja hama ja Kristu ngo kunaka mwoyo panyika pano, inga zvojaidikana kuita.

Vapostori vanojija kuti kutongwa kunozoitwa kumbejiyo kunozova no muviyo jakashata—jizovepo mbhera narini—kwenda no kwenda. Jesu anovabvunja kudari: “Yena [Mambo] anozovadavira kuti: ‘Ndinomubvunja bzokadi: pakuregera kwenyu kuitira umwe wo vadoko ava, makaregera kuitira inini.’ Vakaxata ava vanozoenda mu nyatwa icingaperi; vakarungama mu kupona kucingaperi.”—Mateu 25:45, 46.

Mupinguro wa Jesu ku mubvunjo wo vapostori unoita kuti vateveri vake varangarire zvakawanda, zvovabesera kuti vapopore mugariro javo no zviito zvavo.