Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 78

Muvonereri Wakagondeka Anodikana Kugara Wakanasiririka

Muvonereri Wakagondeka Anodikana Kugara Wakanasiririka

LUKA 12:35-59

  • MUVONERERI WAKAGONEKA ANODIKANA KUGARA WAKANASIRIRIKA

  • JESU WAKAVIYA KOPARAJANISA

Jesu wabva kudurujira kuti “muxambi mudoko” basi ngo unozova no ndau mu Umambo hwo mugore. (Luka 12:32) Asi kuashira mupfupo wokudakajisa uu akudikani kuvoniwa inga ciro cicikasisiri. Jesu anoenderera mberi acinanga kuti kudari mundhu anoda kuzova divi ro Umambo, zvinosisira maningi kuti ave no mavonero aushoni.

Ngokudaro, Jesu anoruma njeve vajiji vake kuti vagare vakanasiririka kuitira kuviya kwake. Iyena anoti: “Garanyi makanasirika, makasunga bzihunu ngo mabande, no bzibani bzakabwaka; inga vandhu vanogarira tenji wavo, ecibva ku mucado wake; kuti, akaguma woguguja musuvo, mukasike kumuzaurira. Vano mucena varanda avo vokuti, tenji akaguma, vanowanika vecirinda.”—Luka 12:35-37.

Vajiji vanozwisisa ushoni mugariro uri kufananijihwari ndi Jesu. Vashandi vari kunangwari kuti vakanasiririka, vari kuvetera kuviya ka tenji wavo. Jesu anodurujira kudari: “Kudari [tenji] akazoguma majiisa [kutangira nguva 21 mbhera mahungu], dangani sure ko mahungu makuru [kutangira mahungu mbhera nguva 3 jo mangwanani], wovawana kudaro, vano mucena ivona!”—Luka 12:38.

Mbhangiro iyi inosisira maningi kupinda yokuti vangava kudini vashandi vo pamuzi vanovangisira. Zvinojeka ngokuti Jesu, Mwana wo mundhu, anojibatanijavo pa mufananijo uu. Iyena anobvunja vajiji vake kudari: “Garanyi makanasirika, ngokuti ngo ngari yo mucingaveteri ngo yaanozoguma Mwana wo mundhu.” (Luka 12:40) Jesu anozoviya pa nguva iriyese kumbejiyo. Iyena anoda kuti vateveri vake vave vakanasiririka—maningi-ningi vo “muxambi mudoko.”

Pedhru anoda kunasa kuzwisisa zviri kuda kunangwa ndi Jesu, ngokudaro, anobvunjisa kudari: “Tenji, muezaniso uu munonangira itisu, nokuti vandhu vese?” Kusiapo kudavira mubvunjo wa Pedhru, Jesu anonanga mufananijo wakaezana na uu, eciti: “Ndiani mukovanisi [kana muvonereri] nyahwiru no wakagondeka, wakadihwa ndi Tenji pambeji po varanda vake, kuti avape bzokuha nguva yokudikana? Ano mucena muranda anowaniwa ndi tenji wake eciita basa rauxoni. Ndinobvunja bzokadi kuti anozomudira pambeji po upfumi hwake.”—Luka 12:41-44.

Zvakajeka kuti “tenji” anonangihwa pa mufananijo wo kutanga ndi Jesu, Mwana wo mundhu. Ngokudaro, “mukovanisi” kana muvonereri, zvinoreva vaya vanoita rutivi hwo “muxambi mudoko,” zve ndivona vanozopuwa Umambo. (Luka 12:32) Apa wari, Jesu ari kunanga kuti vamweni vo cikwata ici vanozopuwa ‘varanda . . . , kuti vavape bzokuha nguva yokudikana.’ Ngokudaro, Pedhru no vajiji vamweni vari kujijiswari no kupuwa zvokuha zvo kumujimu ndi Jesu, vanokwanisa kuvona kuti kuna mukuvo unozoviya Mwana wo mundhu, kumbejiyo. Zve pa mukuvo uu, kucazoshanda nasiriro yo kupekeja zvokuha zvo kumujimu vateveri va Jesu, vanozwi “varanda” va Tenji.

Jesu anokohomejera ngo njira imweni kuti ngenyi vajiji vake vanodikana kutama kuvaraihwa no kuva vakangwarira murangariro javo. Vanodikana kungwarira ngokuti azvinesi kuva mundhu anovaraihwa no kutoguma pa kushora hama jimweni. Jesu anoti: “Kaveta muranda anorangarira mu hana make kuti: ‘Tenji wangu anononoka,’ woamba kutaka varandarume no varandakaji, woha, womwa ecirejera, tenji wo murandewo anozoguma njiku yaacingamuveteri no mukuvo waacingazivi, anozomubvisa basa, wozomupa nyatwa yo vacingagondeki.”—Luka 12:45, 46.

Jesu anonanga kuti wakazisa “muriro mu nyika.” Zve anomusa shwiro inoitisa bope rakakura, zvoita kuti jijiso no zvirovejeso zvo kunyepa zvipere. Zvondhozvo zvinotoparajanisa vandhu vacikadikani kuparajana, “baba no mwana wake, mwana  na baba wake, mai no mwana wokaji, mwana wokaji na mai, nyebzara no nyamwana, nyamwana no nyebzara.”—Luka 12:49, 53.

Masoko aya anoshanda maningi-ningi ku vajiji vake. Perepo Jesu anotanga kubhuya no mbungano. Vazinji vanoramba ngo kuvanga musoro citatijo cokuti iyena ndi Mesia, ngokudaro anovabvunja kudari: “Mukavona gwiti recibva kumavirira, munonanga kuti nvura inoda kuna. Ndibzona bzinozoitika. Ikabvunguza mbhepo yo ka njikazi, munonanga kuti ziya riri kuguma. Roguma bzokadi. Vajiitisi! Munoziva magariro o nyika no o mugore, amuzivi ngenyi kutonga ngari ii?” (Luka 12:54-56) Ngokudaro, zvakajeka kuti avazivi kunasiririka.