Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 80

Muhavisi Wakanaka no Maphandu

Muhavisi Wakanaka no Maphandu

JOHANI 10:1-21

  • JESU ANOBHUYA NGO PAMUSORO PO MUHAVISI WAKANAKA NO MAPHANDU

Paanoenderera mberi acijijisa mu Judheya, Jesu anobhuya ngo pamusoro po ciro cinokasika maningi kuzivika ngo vapurukiri vake—mabvuta no maphandu. Asi anozvinanga ngo njira yo kufananijira. Kangaije vaJudha vanoceuja magama a Dhavhidhi okuti: “Tenji Mwari muhavisi wangu, anditami ciro. Mu mahavo mavixi anondizoroja.” (Nduyo 23:1, 2) Pa nduyo imweni, Dhavhidhi wakakoka jinja iri eciti: “Pfukamanyi pambeji pa Tenji Mwari wakatirura! Hina, ndiye Mwari wedu; itisu tiri vandhu vanohaviswa ndiyena.” (Nduyo 95:6, 7) Izvo zvinovonesa kuti vaIziraeri vaizwira Mutemo, vaiezaniswa no mushambi wo mabvuta.

“Mabvuta” aya ainga ari “mu phandu” ngokuti vakabarihwa mu Mutemo wo citenderano ca Mosi. Mutemo waishanda inga fenzi, yaiita kuti vaparajane no zviito zvakashata zvo vandhu vacaingepi mu citenderano ici. Asi, vaIziraeri vamweni avacaitaja ushoni mushambi wa Mwari. Jesu anoti: “Ndinomubvunja bzokadi kuti: ‘Ndiani acikanghwini mu phandu ro mabvuta ngo pa musuvo wophukira ngo pa divi rimweni, i mbava no phanga. Kaveta ndiani anonghwina ngo pa musuvo, ngo muhavisi wo mabvuta.’”—Johani 10:1, 2.

Kangaije vandhu vanorangarira ngo pamusoro po vaijiita Mesia kana Kristu. Asi ivona vakaezana no mbabva no maphanga. Vandhu avadikani kutevera vacengejeri ava. Mukusiana, vanodikana kutevera “muhavisi wo mabvuta,” ari kunangwari ndi Jesu.

Iyena anoti: “Ndiyena anobeurihwa ngo murindi, mabvuta opurukiravo izwi rake; yena anomadanija ngo mazina ao no kumabudisa kunja. Akapera kumabudisa kunja, anomatungamirira, iwona omutevera, ngokuti anoziva izwi rake. Iwona aazoteveri mundhu wabiresi: anomuthya, ngokuti aazivi izwi ro vokunja.”—Johani 10:3-5.

Mukufanana no mufununguri wo musuvo, Johani mubhabhatiji wakakhombija pa mukuvo waperari kuti, Jesu ngaanodikana kutevehwa ngo vandhu vakaezana no mabvuta, vanowanika pasi po Mutemo. Zve vamweni vavo mu Garireya no mu Judheya muno, vakakwanisa kuziva izwi ra Jesu. ‘Anovatungamirira’ kuenda navo kwapi? Zve vanozowanenyi ngo kumutevera? Vamweni vo vanozwa mufananijo uu, vanotopsaka kuzviziva, ngokuti avaripi ‘kubzizwa bzaanoda kunanga.’—Johani 10:6.

Jesu anodurujira kudari: “Ndinomubvunja bzokadi kuti: Inini ndiri musuvo wo mabvuta. Vese vakanditungamirira i mbava no maphanga. Mabvuta aazivi kuvapurukira. Inini ndiri musuvo. Ndiani anonghwina ndini, anozopona; anozonghwina, wozobuda, wozowana mahavo.”—Johani 10:7-9.

Zvakajeka kuti Jesu ari kubhuya ngo pamusoro po ciro cipsa. Vapurukiri vanozviziva kuti Jesu andiepi musuvo wo citenderano co Mutemo, ciripo weya ko mazana o makore. Ngokudaro, zvingaita kuti ari kunanga kuti mabvuta ‘aanotungamirira’ anozonghwina mu phandu rimweni. Ngowapi ucazova muviyo wakona?

Jesu anoenderera mberi acidurujira basa rake, eciti: “Inini ndaza kuti vave no uhomi, uhomi hwakaperera. Inini ndini muhavisi wauxoni. Muhavisi wauxoni anopira uhomi mabvuta.” (Johani 10:10, 11) Pa mukuvo wakapera, Jesu wakavangisa vajiji vake aciti: “Mucathya, muxambi mudoko! Ngokuti Baba wenyu vakada kumupa Umambo.” (Luka 12:32) Izvokadi kuti vaya vanoita divi ro “muxambi mudoko” ngo vanozotungamirihwa ndi Jesu kuenda mu phandu ibza, kuitira kuti “vave no uhomi, uhomi hwakaperera.” Kuita divi ro mushambi mudoko i makomborero makuru maningi.

Asi, Jesu aapejeri apa shwiro iyi. Iyena anoti: “Ndino mabvuta amwenibze, aciripi o phandu iri: naonavo ndinoda kumakwengweneja; iwona anozozwa izwi rangu. Pondhopo apo panozova no muxambi umwe no muhavisi umwe.” (Johani 10:16)  “Mabvuta amwenibze” aya asipi o “phandu iri.” Iwona anodikana kuva o phandu rimweni, rakasiyana no ro “muxambi mudoko” unozogaraya utaka hwo Umambo. Maphandu maviri aya ano vetero yakasiyana. Pikija zvakadaro, mabvuta o maphandu ese o maviri anondobesereka ngo basa ra Jesu. Iyena anoti: “Ndiyona ndava yokuti Baba wangu vanondida; ngokuti ndinopira mwiha wangu.”—Johani 10:17.

Vazinji vari mu mbungano vanoti: “Wakabatwa ndi Sathana! Ari kurota” kana ari kupenga. Asi vamweni vanokhombija kumupurukira ngo kudakarira, vokwevejehwa kuti vatevere Muhavisi Wakanaka. Ivona vanoti: “Mundhu wakabatwa ndi Sathana aavereketi bzakadaro. Sathana angakwanisa, kani, kufunungura majiso o mapofu?” (Johani 10:20, 21) Zviri pambhena kuti vari kunangira mwanarume wakabahwa ari bofu wakarapwaya ndi Jesu.