Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 66

Iyena Anoenda Jerusarema ku Dhiri ro Mucaca

Iyena Anoenda Jerusarema ku Dhiri ro Mucaca

JOHANI 7:11-32

  • JESU ANOJIJISA MU THEMBERI

Jesu anonasa kuzivika kubvira pa rubhabhatijo hwake hwakaitika ko makore manganani apera. Zviuru no zviuru zvovandhu zvaivona mushamaiso ja Jesu. Zve munyikemo mese vapera kuzwa ngo mabasa ake. Wari ku Dhiri ro Mucaca (kana, Tabherinake) ku Jerusarema, vazinji vari kumupsaka.

Vandhu vaibhuya zvakasiana-siana ngo pamusoro pake. Ava vanoti: “Ngwauxoni.” Avoo vanoti: “Andizvopi. . . . Kaveta anocengeja vandhu.” (Johani 7:12) Makanijano aya aiitika maningi-ningi pa njiku jo kutanga jo dhiri. Asi apana waikwanisa kubhuya nae pakazara vandhu, ngo kuti vazinji vaithya kuti vatungamiriri vo ciJudha vaizozvivona kudini.

Pamukuvo wo mabiko, Jesu anoenda ku themberi. Vandhu vazinji vanoshamaiswa ngo majijisire ake. Zvecivoneka kuti iyena aazivi kumbonghwina mu cikora co varabhi, vaJudha vanobvunjisa kuti: “Mundhu uu anozivisa kudini Matahwa, acikazivi kujija?”—Johani 7:15.

Jesu anodurujira kuti: “Majijisiro angu asipi angu ndega, asi ngha wiya wakandituma. Ndiani anoda kuita kuda kwa Mwari, anozoziva kuti majijisiro angu anobva ka Mwari, nokuti nghangu ndega.” (Johani 7:16, 17) Majijisiro a Jesu anozwirana no Mutemo wa Mwari. Ngo kudaro zvakajeka kuti iyena ari kupsaka kukuja Mwari kuciripi kukujwa kwake.

Ngo kudaro Jesu anoti: “Mosi aazivi kumupa Mupango kani? Kaveta pakati penyu apana anoutevera. Munoda kundiuraya ngenyi?” Pakati po mbungano iyi, vamweni vavo kangaije vakabva ku madhorobha amweni, zvingaita kuti avacaizvizivepi kuti kuno vari kupsaka kumuuraya. Avaripi kutozvidavira kuti pangawanikadi mundhu angada kuuraya mujijisi wakadaro inga ndi Jesu. Ngo kudaro ivona vanoguma pa kurangarira kuti ciripo ciciripi ushoni kuna Jesu ngo kunanga kwake magama aya. Ivona vanoti: ‘Uno Dhimoni! Ndiani anoda kukuuraya?’—Johani 7:19, 20.

Papera gore no mweji mutandhatu, vatungamiriri vo ciJudha vooejaya kuuraya Jesu ngo kurapa mundhu ngo Musabudu. Wari Jesu anovaita kuti varangarire Mutemo wavanoziva, zve anobudisa pambhene kuti ivona avarangariri ushoni. Iyena anovaceuja kuti Mutemo unonanga kuti mwana wo rume anodikana kusokwa pa njiku yo cisere, pikija ngo Musabudu. Ngo kudaro anovabvunjisa kuti: “Vandhu vakasokwa mu sabudu, kuti Mupango wa Mosi utame kukanganika, munonyangajwa ngenyi ndini ngo ndava yokuti ndakarapa mundhu wese mu Sabudu? Mucatonga ngokuteveja bzokunja basi! Tonganyi ngokuteveja ururami!”—Johani 7:23, 24.

Vagari vo ku Jerusarema vainga vacikazivi shwiro iyi, vanoti: “Asipi uu anopsangiwa [ngo vatungamiriri] kuti aurawe? Ari kuvereketa acingathyi, ivona avamubvunji ciro! Dangani vatungamiriri vanotenda kuti ndiyena Kristu?” Zvinovanesa vecirangarira kuti vatungamiriri vakona vari kutodavira kuti ndiyena Kristu. Waro ngenyi vandhu ava avadaviri kuti Jesu ndiyena Kristu? Ivona vanoti: “Tinomuziva kwaakabva, kaveta Kristu akazoza, apana anoziva ngo kwapi kwaanobva.”—Johani 7:25-27.

Pondhopo kamare Jesu anopingura kuti: “Imwimwi munondiziva no kuzivavo kondakabva; andizivi kuza ngo cangu. Wiya wakanditumaya nghwakadikadi. Imwimwi amumuzivi. Inini ndinomuziva, ngokuti ndakabva ka Yena: ndiyena wondhowo wakandituma.” (Johani 7:28, 29) Pavanozwa masoko awo akanasa kujeka, vandhu vanoeja kumubata kangaije kuti vamusunge kana kutomuuraya. Asi avakwanisi kuzviita ngo kuti aito yakakwana nguva yake yo kuti afe.

Asi vazinji vanova no rutendo kuna Jesu, zve ngo zvavaidikana kuita. Ngo kuti iyena wakafamba ngo panyezuru po kumwa, wakanyaraja dutu, ngo njira inoshamaisa, wakahisa zviuru zvo vandhu ngo hove nganani no pau, wakarapa vaihwaja, wakaita kuti  zvigono zvifambe, wakafunungura meso o mapofu, wakarapa mapere zve wakatomusa vandhu vakafa. Atikanakani kuti ivona vano thangwe kwaro ro kubvunjisa kuti: “Kristu akazoza, anozoita muxamaiso, kani, kupinda yaanoita mundhu uu?”—Johani 7:31.

VaFarisi pavanozwa mbungano yecinanga izvi, vanotumira vangwariri kuti vaviye kuzosunga Jesu.