Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 75

Jesu Anokhombija Cinyuke co Mudakaro

Jesu Anokhombija Cinyuke co Mudakaro

LUKA 11:14-36

  • ANOGOGOMERA MADHIMONI NGO “CIKUNWE CA MWARI”

  • ZVINODAKAJISA MUNDHU

Jesu wabva kupa ndhungamiriro ngo pamusoro po kuita mukumbiro, asi andiyopi yega shwiro yaanobhuya maningi mu mushando wake. Paaiita mushamaiso mu Garireya, Jesu wakapumbhwa zvokunyepa kuti waizviita ngo simba ro mutungamiriri wo madhimoni. Wari mu Judheya ari kupumbhwazve zvandhozvo.

Jesu paanogogomera dhimoni raiitisa kuti mwanarume umweni atame kuvereketa, mbungano inokahamara. Asi vanomushoraya avadakari ndizvona. Vanomupumbhazve zvondozvo, veciti: “Yena anombhirimbija mabjoka ngo simba ra Sathana, mukuru wo mabjoka.” (Luka 11:15) Vamweni vari kuda kuziva kuti Jesu ndiyani no kumukumbira kuti avavonese civoniso co mugore.

Jesu aciziva kuti vari kuda kumueja, anovadavira inga zvaakaita vandhu vaimushorayazve mu Garireya. Iyena anonanga kuti umambo hwese hwakaparajana ngocaho hunozowa, zve anoti: “Sathana akaparajanavo ngocake, hungazotama kuphwanyikavo kudini umambo hwake?” Jesu acikasiki-siki, anoti: “Kaveta, inini ndikambhirimbija mabjoka ngo simba ra Mwari, ibzo bzinonanga kuti Umambo hwa Mwari hwaguma komuri.”—Luka 11:18-20.

Kunanga ka Jesu kuti “simba ra Mwari,” kungaceuja vapurukiri vake zvakaitika kare mu ndhorondho yo vaIziraeri. Vayani vainga mu nyumba yo umambo hwa Faro povakavona Mosi aciita mushamaiso, vakamimira vaciti: “lci cikunwe ca Mwari.” “Cikunwe ca Mwari” ndiconazve cakatara Gumi ro Mupango pa mapuwe maviri akaita cipande. (Exodo 8:15; 31:18) Mukufananavo, “cikunwe ca Mwari”—mujimu mucena wake kana kuti simba rake rinobata basa—ngo uri kuita kuti Jesu akwanise kugogomera madhimoni no kurapa vanohwaja. Ngokudaro, vavengi ava vagumihwa ngo Umambo hwa Mwari, ngokuti Jesu Mambo wakagajwa wo Umambo uhu, ari pakati pavo aciita mabasa aya.

Kukwanisa ka Jesu kugogomera madhimoni i citatijo cokuti ano simba kupinda Sathana, inga mundhu ano simba anonyisa mundhu wakabata zvijito acingwarira nyumba ya mambo. Jesu anophinda mufananijo wo mujimu wakashata unobuda pa mundhu. Kudari mundhuwo akatama kuita zvakanaka, mujimu uu unozoviya no jimweni jinokwana kuita munomwe, zvoita kuti mugariro wake ushate maningi kupinda wokutanga. (Mateu 12:22, 25-29, 43-45) Izvo ngo zviri kuitikira vaIziraeri.

Mwanakaji ari kuzwa zviri kunanga Jesu, anoti: “Ino mucena [kana kuti inodakara] ndani yakakubara, no mazamu akakumwisa!” Vanakaji vo ciJudha vaida maningi kuva mai wo muphorofita, maningi-ningi kuva mai wa Mesiya. Ngokudaro, Mwanakaji uu angarangarija kuti Maria anofanera kudakara maningi ngo kuva mai wo mujijisi wakadari inga ndi Jesu. Iyena anomurungamisa ecimutatija kuti icinyi kamare cinoviisa mudakaro wokadi-kadi, paanoti: “Vano mucena kamare avo vanopurukira izwi ra Mwari, no kuriteveja.” (Luka 11:27, 28) Jesu aazivi kunanga kana kuita zvinovonesa kuti Maria anodikana kukujwa ngo njira yakasiyana. Kunja kwa izvi, mudakaro wo mwanarume kana mwanakaji ariwese, unowanika ngo kuva mushandiri wakagondeka wa Mwari, kuciripi ngo ukama huri hwese kana ngo kubudirira kotinako.

Jesu anoshora vandhu vanomukumbira civoniso co mugore, inga zvaakaita mu Garireya. Iyena anonanga kuti akuna civoniso covanozopuwa kuciripi “civoniso ca Jona.” Jona wakava civoniso ngo njira mbiri, ngo kupeja kwake dhia ndhatu ari mundani mo hove no kucumaira kwake ngo kucunga, zvoita kuti vaNinivhe vakhauye. Jesu anoti: “Asi pano, pano ciro cikuru kupinda Jona.” (Luka 11:29-32) Jesu i mukuruzve kupinda Soromona, waingaya no ungwaru hwakakahamaja mambokaji wo Sabhaa.

Jesu anoenderera mberi eciti: “Akuna anobwakija  cibani kuti acidire pa ndau yakafisika dangani mu mugoro. Kaveta anocidira panyezuru po cigajikiro.” (Luka 11:33) Kangaije ari kunanga kuti kujijisa no kuita mushamaiso pamberi po vandhu ava, zvakaezana no kubwakija cibani kakuciviga. Zvecivoneka kuti majiso avo aaripi kuvona, ivona avazwisisi cidisiso co mabasa ake.

Jesu wabva kugogomera dhimoni no kuita kuti mbeveve iverekete. Izvi zvinodikana kukwevejera vandhu kuti vakuje Mwari no kubvunja vamweni zviri kuitwa ndi Jehovha. Jesu ano masoko o kungwaja vavengi vake, ngokudaro anoti: “Basopai kuti uveneki hwako hucadophinduka kuita cidima. Kudari muviri wako wakavenekwa, pacina divi riri mu cidima, wese unozovenekwa, inga cibani cinoveneka ngo kumonikira kwaco.”—Luka 11:35, 36.