Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 69

Baba Wavo ndi Abhirahama kana ndi Sathana?

Baba Wavo ndi Abhirahama kana ndi Sathana?

JOHANI 8:37-59

  • VAJUDHA VANONANGA KUTI ABHIRAHAMA NDI BABA WAVO

  • JESU WAKAVEPO ABHIRAHAMA ACITO AVEPO

Jesu aciri ku Jerusarema ku Mabiko o Taberinake (kana, o Mucaca) zve ari kuenderera mberi ecijijisa cokwadi cinosisira maningi. VaJudha vamweni vari pa mabiko aya, vanoti: “Itisu tiri bvumbo ra Abrahama, atizivi kumboita varanda vo mundhu ariwese.” Jesu anopingura kuti: “Ndinoziva kuti muri bvumbo ra Abrahama; kaveta munoda kundiuraya, ngokuti izwi rangu aringhwini mu mwoyo yenyu. Inini ndinojijisa bzo ndakavona kuna Baba. Imwimwi munoita bzo makajija kuna baba wenyu.”—Johani 8:33, 37, 38.

Jesu waida kunanga kuti baba wake andiepi umwewo na baba wavo. VaJudha avacaizvibatepi, ngo kudaro vanophindazve kuti: “Baba wedu ndi Abrahama!” (Johani 8:39; Isaia 41:8) Zvokandi kamare ivona vanobva mu mubarihwana wa Abhirahama. Ngokudaro, vanorangarira kuti vano gonda rakaezana no ra Abhirahama, waingaya shamwari ya Mwari.

Asi, Jesu anovapekeja mupinguro unoshamaisa: “Nomuri vana va Abrahama, itanyi mabasa a Abrahama.” Ndizvona kuti mwana kamare anotevejera babake. Ngo kudaro Jesu anoenderera mberi eciti: “Kaveta waro munopsanga kundiuraya, inini ndapera kumubvunja bzokadi bzo ndakazwa ndi Mwari: Abrahama aazivi kuita ibzo.” Perepo Jesu anovabvunja zvinovaphandisa musoro eciti: “Imwimwi munoita mabasa a baba wenyu.”—Johani 8:39-41.

VaJudha avato vazvibata zviri kunangwa ndi Jesu. Ivona vanonanga kuti i vana kamare, veciti: “Itisu atizivi kubahwa mu upombo: tina Baba wedu umwe basi: Mwari.” Kureva kuti baba wavo ndi Mwari kamare here? Jesu anoti: “Nokwainga kuti Mwari ndi Baba wenyu, maizondidavo inini; ngokuti inini ndakabva ka Mwari ndoza muno. Andizivi kuza ngocangu; kaveta ndiyena wakandituma.” Jesu woita mubvunjo perapo woudavirazve ega eciti: “Munotama ngenyi kuzwisa mavereketero angu? Ngokuti amukwanisi kuzwisa mazwi angu.”—Johani 8:41-43.

Jesu wakaeja kutatija muviyo unovepo ngo kumuramba. Asi wari acikapoti-poti anovabvunja pambhene kuti: “Baba wenyu ndi Sathana. Imwimwi munoda kuita kuda ka baba wenyu.” Baba wavo ndi mundhu wo mushovonyi? Jesu anotatija pambene kuti iyena ndi mundhu wo mushovonyi eciti: “Yena wainga muurayi kubva pakutanga; aazivi kuvangirira mu bzokadi.” Perepo anoti: “Mundhu wa Mwari anozwa mazwi a Mwari. Ndiyo ndava yo kutama kwenyu [kuzwa], ngokuti amuripi vandhu va Mwari.”—Johani 8:44, 47.

VaJudha vanonyangajwa maningi ngo kupumbhwa uku, zve vanoti: “Atizivi kunanga kuti ndiwe muSamaria, nokuti wakabatwa [ngo dhimoni]?” Povanodaninja Jesu kuti “muSamaria,” ivona vaimushora. Asi acikarangariri kushohwa uku iyena anoti: “Inini andizivi kubatwa [ngo dhimoni] kaveta ndinoreremeja Baba wangu; imwimwi mondixora.” Tinokwanisa kuvona kukura ko shwiro iyi paanoita cigondiso cinokahamaja eciti: “Ndiani anotevera mazwi angu, aazofi.” Jesu acaidepi kunanga kuti vapostori no vamweni vanomutevera avazofi. Asi avazombovoni kuparajwa kucingaperi, kana kuti “rufu hwocipiri,” ucinazve vetero yo rumuko.—Johani 8:48-51; Apokalipsi 21:8.

Asi vaJudha vanozwa magama aya inga manangihwe aakaithwaro kamare, zve vanonanga kuti: “Waro tinobziziva kuti wabatwa [ngo dhimoni]. Abrahama no vaporofeti vakafa, iwewe unoti: ‘Ndiani anotenda woteveja majijisiro angu aazofi.’ Ungaita here mukuru na baba wedu, Abrahama, vakafa? . . . Unojiita ani iwewe?”—Johani 8:52, 53.

Zviri pacena kuti Jesu anobhuya ngo pamusoro pokuva Mesia. Kunja ko kudavira mubvunjo wavo ngo pamusoro po kuti iyena ndiyani, Jesu anoti: ‘lnini ndikajikoja ndega, goja rangu ariremi; kaveta varipo Baba wangu vanondireremeja: wiya wamunodana kuti ndi Mwari wenyu. Imwimwi amumuzivi, kaveta inini ndinomuziva. Nondainanga kuti andimuzivi,  ndaizoita munyepi inga ndimwi.’—Johani 8:54, 55.

Perepo Jesu anobhuyazve ngo pamusoro po muezaniso wo mugondeki Abhirahama eciti: “Abrahama, baba wenyu, wakadakara ecivetera kuvona njiku yangu. Wakaivona, wodakarisisa.” Abhirahama waidavira cigondiso ca Mwari zve waivetera no cidaka-daka cese co kuvia ka Mesia. VaJudha avadaviri zve vanoti: “Auto wakwana makumaxanu o makore, wakavona Abrahama?” Jesu anopingura kuti: “Ndinomubvunja bzokadi: Abrahama acito abahwa, inini ndaingepo.” Iyena wainga ecibhuya ngo pamusoro po kuvepo kwake inga ngirozi inosimba kudenga acito aviya pasi pano.—Johani 8:56-58.

VaJudha vanonyangajwa maningi Jesu paanonanga kuti iyena wakatanga kurarama Abhirahama acito abahwa zve votoda kumuuraya. Asi iyena anokwanisa kuvambzenga acizivi kukhuvazika.