Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 26

Zvishaishi Zvako Zvaregerehwa

Zvishaishi Zvako Zvaregerehwa

MATEU 9:1-8 MARCO 2:1-12 LUKA 5:17-26

  • JESU ANOREGERERA ZVISHAISHI ZVO MUNDHU WAKAREMARA ZVE ANOMURAPA

Vandhu vo mundau jakawanda vapera kuzwa nduma ya Jesu. Vamweni vanotoenda ku ndau jinonesa kuguma kuti vamuzwe acijijisa no kuvona mabasa ake anoshamaisa. Asi, pasure po mazuva manganani anohwirira Kafarnaume, kwaanonyanya kushanda. Masoko okuti Jesu waviyazve anozika mu dhorobha iri, rinowanika mumbhiripiri mo Jombe ro Garireya. Inga muviyo, vazinji vanoviya pa nyumba yaanowanika Jesu. Vamweni vavo ndi vaFarisi no vajiji vo Muemo vanobva Garireya no Judheya, kubatanijavo no Jerusarema.

‘Vakaungana vazinji, zvokuti pambeji po musuvopo kamare apacaiva no ndau yokuti vese vangakwana. Jesu anovajijisa izwi.’ (Marco 2:2) Wari yaa nguva yo kuitika ciro cinoshamaisa. Ciitiko ici cinotibesera kuvona kuti Jesu ano simba ro kupeja zvinoviisira vandhu matambujiko no kuita kuti mundhu wese waanoda ave no uhomi hwaushoni.

Jesu paanojijisa mu nyumba yakazara ngo vandhu, vanarume varongomuna vanozisa mundhu wakaremara ari pa makha. Ivona vanoda kuti varapihwe shamwari yavo iyi ndi Jesu. Asi, ngondava yokuti vandhu vakawanda maningi, avakwanisi “kumuendesa pambeji” pa Jesu. (Marco 2:4) Rangariranyi basi kuti izvo zvinovahwaja zvakadini. Ivona vanokhwira padenga ro nyumba, voripfanangura. Perepo votereja makha ano mundhu wo kuremara mukati mo nyumba.

Jesu anonyangajwa ngokuti vari kumuphinga zvaari kuita here? Aanyangajwi, nee padoko! Anokahamara maningi ngo gonda rovanaro, wobvunja nyakuremara kuti, “bzixaixi bzako bzakungurihwa.” (Mateu 9:2) Waro Jesu anokwanisadi kamare kuregerera zvishaishi here? Vatari no vaFarisi vanozvitora kuti zviite shwiro, veciti: “Anovereketa kudini bzakadaro? Ari kutuka Mwari. Ndiani angakwanisa kukungurira bzixaixi kuciripi Mwari basi?”—Marco 2:7.

Jesu aciziva murangariro javo, anovabvunja kudari: “Ngenyi munorangarira kudari mu mwoyo menyu? Ngocapi cakareruka: kubvunja nyakuremara kuti: ‘Bzixaixi bzako bzakungurihwa’ nokuti ‘mukai, utore musengere [kana makha] upinde’?” (Marco 2:8, 9) Naakacijikira pa mupiro wo kujipira waanozoita Jesu ngo upenyu hwake, anokwanisa kuregerera zvishaishi zvo vandhu.

Perepo Jesu anokhombija mbungano, kubatanijavo na nyakuremara, kuti ano simba ro kuregerera zvishaishi panyika. Jesu anosota nyakuremara womubvunja kuti: “Mukai, utore musengere wako uende kanyi.” Zve mwanarume uu womuka ngokukasika, wofamba naakabata makha ake pambeji po vese varipo. Vandhu vanokahamara maningi kamare. Zve vanokuja Mwari veciti: “Atito tikambovona ciro cakadari”!—Marco 2:11, 12.

Jesu anoezanisa cishaishi no kuhwaja zve kuregerehwa zvishaishi no uhomi hwaushoni. Bhaibheri rinojijisa kuti baba wedo wokutanga, Adhamu, wakashaisha zve tese takagara utaka hwo muviyo jo cishaishi, kuda kureva, kuhwaja no kufa. Asi Umambo hwa Mwari hukazotonga, Jesu anozoregerera zvishaishi zvo vese vanoda Mwari no kumushandira. Perepo, kuhwaja kucazopera mbhera narini.—VaRoma 5:12, 18, 19.