Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 22

Vajiji Varongomuna Vanoita Vatandi vo Vandhu

Vajiji Varongomuna Vanoita Vatandi vo Vandhu

MATEU 4:13-22 MARCO 1:16-20 LUKA 5:1-11

  • JESU ANODANIJA VAJIJI VAKE KUTI VAMUTEVERE MUKUVO WESE

  • VATANDI VANOVA VATANDI VO VANDHU

Vandhu vo Nazareta no vaeja kuuraya Jesu, iyena anoenda Kafarnaume, phedo no Jombe ro Garireya, kunodanijwazve kuti “bahari ro Genezare.” (Luka 5:1) Izvi zvinokwanirisa uphorofita hwo bhuku ra Isaia hwokuti vandhu vo Garireya vanogara mu mbhiripiri mo jombe vanozovona rujeko hukuru.—Isaia 8:23, Isaia 9:1.

Ari mu Garireya, Jesu anoenderera mberi acizivisa kuti “Umambo hwo mugore hwaa phedo.” (Mateu 4:17) Iyena anowana vajiji vake varongomuna. Ivona vakafamba na Jesu pa kutanga, asi povakaviya na Jesu kubva Judheya, vakahwirira ku basa ravo ro kutanda. (Johani 1:35-42) Asi wari yaa nguva yokuti vave na Jesu mukuvo wese, kuitira kuti akwanise kuvaroveja kuti vazoite basa iri Jesu naapinda.

Jesu paanofamba mu mbhiripiri mo jombe, anovona Simoni Pedhru, hama yake Andereya no vadoni vavo vamweni vacinasirira majuya avo. Jesu anoguma povari, wopakira mu ngarava ya Pedhru, zve anovabvunja kuti vandundire mukumwa ngaraveyo. Povanoenda mukumwa padoko, Jesu anogara pasi wotanga kujijisa cokwadi mbungano yo vandhu vari mubhiripiri mo jombe ngo pamusoro po Umambo.

Tevere, Jesu anobvunja Pedhru kudari: “Vuthai, tiende pakati po bahari; imwimwi wisiranyi majuya, mutande.” Pedhru anodavira kudari: “Mujijisi, takatanda usiku hwese atizivi kubata ciro, kaveta ngo izwi renyu ndinowisira juya.”—Luka 5:4, 5.

Ivona vanobija juya, vobata hove jakawanda maningi zve juyero rinotanga kumweka. Ngokukasika, vanarume ava vanomusa nyara vacidanija ngarava yo vadoni vavo iri ngo phedo kuti vaze kovabesa. Ngo kukasika, ngarava jese jombiri jozara ngo hove jakawandisisa zvokuti jinotanga kundondomera. Acivona izvi, Pedhru anogwadama pamberi pa Jesu, wonanga kudari: “Tenji, ibvai kondiri, ngokuti ndiri muxaixi.” Jesu anodavira kudari: “Ucathya. Kubvira nyamasi unozoita mutandi wo vandhu.”—Luka 5:8, 10.

Jesu anobvunja Pedhru na Andereya kuti “nditeverenyi, ndinozomuita vatandi vo vandhu.” (Mateu 4:19) Iyena anodanijazve vatandi vaviri, Jakobo na Johani, vana va Zebhedheu. Ivonavo vanotendera vacikakanakani. Ngokudaro, vese vovarongomuna vanosiya basa ravo ro kutanda zve vanova vateveri vokutanga va Jesu vo mukuvo wese.