Kwenda ku nda-nda-nda yo zviri mukati

Kwenda ku bhokiso ro zviri mukati

Zvapupu zva Jehovha

Kheta ndumi Cindau

 CIPAUKO 28

Ngenyi Vajiji va Jesu Avaiti Ciziro?

Ngenyi Vajiji va Jesu Avaiti Ciziro?

MATEU 9:14-17 MARCO 2:18-22 LUKA 5:33-39

  • VAJIJI VA JOHANI VANOBVUNJISA JESU NGO PAMUSORO PO CIZIRO

Johani Mubhabhatiji acindori mujeri kubvira paakanghwinemo, pa mukuvo mushomani Jesu naapera kuenda ku Phasika yo mu gore ro 30 N.V.Y. Johani waida kuti vajiji vake vese vave vateveri va Jesu, asi asipi vese vanozviita mumweji jaanonga ari mu jeri.

Painonga yecikhwedera Phasika yo mu gore ro 31 N.V.Y., vajiji vamweni va Johani vanoviya kuna Jesu vomubvunjisa kudari: “Ngenyi itisu no vaFarisi tinozira ruzinji, vajiji vako avaziri?” (Mateu 9:14) VaFarisi vanoti ciziro i divi ro kunamata. Pa kufamba ko nguva, Jesu anoshandisa mufananijo wo muFarisi anojikuja, anoita mukumbiro eciti: “Mwari, ndinomubonga, ngokuti inini andiripi inga vandhu vamweni  . . . Ndinozira ruviri pa sumana.” (Luka 18:11, 12) Kangaije vajiji va Johani vaingavo no cirovejeso co kuzira. Kana vanoita ciziro kuitira kucumba ngo kufungihwa ka Johani. Vandhu vanojibvunjisa kuti ngenyi vajiji va Jesu avaiti ciziro, kangaije kutobatana na ivona pa kucumba ngo zvakaitikira Johani.

Jesu anodavira ecishandisa muezaniso, eciti: “Xamwari jo mukwambo jingakwanisa kupsipa mwoyo, apo mukwambo naaripo? Anozoguma mazuva okuti jinozotorehwa mukwambo: mu mukuvowo jinozozira.”—Mateu 9:15.

Johani ambhwine wakatonangira Jesu kuva Mukwambo. (Johani 3:28, 29) Ngokudaro, Jesu paanonga aripo, vajiji vake avaiti ciziro. Jesu paanozofa, vajiji vake vanozocumba zve vanozofindhwa mwoyo kuti vahe. Asi zvinozocinja maningi paanozomuswa. Ivona avazovizve no thangwe ro kuita ciziro co kucumba.

Tevere Jesu anovaitira mufananijo muviri, eciti: “Apana mundhu anosonera nguvo yokuvanga pa nguvo yo kare. Ngokuti nguvo ipsa inokweva nguvo yo kare, yoparuka kukuru. Aridihwi doro ricavira mu mbende yo kare. Ngokuti mbende inogaga, doro rinorasika, mbende yozophwanyika. Doro ricavira rinodihwa mu mbende [kana cinyede co dovo] ipsa.” (Mateu 9:16, 17) Jesu anoda kunangenyi ndizvona?

Jesu ari kubesera vajiji va Johani Mubhabhatiji kuzwisisa kuti apana anodikana kuvetera kuti vateveri va Jesu vabatisise zviito vokare zvo ciJudha, zvakadari inga kuita ciziro. Iyena aazivi kuza kodira cigamba pa manamatiro akasakara no kuita kuti aengejere mukuvo wo kuvepo kwao. Jesu aaripi kunanga kuti mukhaindi wo manamatire unodikana kuzwirana no wo ciJudha co munguveyo no zvirovejeso zvo ciJudha zvakaithwa ngo vandhu. Iyena aaripi kuda kudira cigamba cipsa pa nguvo yokare kana kudira doro ricavira mu cinyede cokare.